Ukunxibelelana Nabakummandla Womoya
KUMBINDI wedolophu eqhelekileyo eseNtshona Afrika kwakumi isakhiwo esihle esinomgangatho omnye, esinombala omhlophe noluhlaza. Kwigumbi lokwamkela iindwendwe, oonobhala ababini babesebenza koomatshini bokuchwetheza. Kwakukho iqela labantu elalihleli kwizihlalo ezazikwigumbi leendwendwe, belindele ukubona ibabaláwo, umvumisi.
Kwidesika ekwiofisi ekufuphi, ngakumatshini oyi-fax, kwakuhleli ibabaláwo. Yayiyindoda eyondlekileyo, ingwevu eyayivathe iingubo ezimhlophe ezinde—ezinexabiso elikhulu nezihonjiswe kakuhle. Yathi: “Utata wayengumvumisi. Ndazalelwa kweli siko. Ndakhulela kulo. Xa ndandineminyaka emihlanu ubudala, ndandihamba notata ukuya kuvumisa. Ndandimbukela indlela enza ngayo, yaye ndafunda kuye ndada nam ndakwazi.”
Ibabaláwo yayisalatha ngezandla kwibhodi ende yeplanga eyayibhalwe izinto ezintsonkothileyo zenkqubo yokuvumisa ebisetyenziswa zizizukulwana ngezizukulwana zabantu bayo. Le nkqubo isekelwe ekuphosweni kweenqoba ezili-16 isetyenziswa kulo lonke elaseNtshona Afrika nangaphaya kwalo. Yathi: “Abantu beza kum nazo zonke iingxaki zabo. Iingxaki eziphathelelene nabafazi, ubudlolo, ukungafumani msebenzi, izigulo zengqondo, ukugula njalo njalo. Kuxhomekeka koko iziphumo zokuvumisa zikutshoyo, kusenokucelwa kwiminyanya okanye kwizinto ezisesibhakabhakeni [abavumisi]. Enoba imeko injani, kumele kwenziwe idini elithile.”
Ukwenziwa kwezithethe zonqulo, kuquka ukuvumisa, kuyinto ezinzileyo kuloo mmandla, kodwa kunjalo nangeecawa ezininzi zeNgqobhoko. Kufuphi neeofisi zebabaláwo kukho izakhiwo ezimhlophe okwekhephu ezinemiqondiso ngaphambili ebhalwe oku: King Solomon II Church, Cherubim and Seraphim, Celestial Church of Christ, Christ Apostolic Church, Christ Trumpeters Church. Ezi cawa zabakho ngaxeshanye yaye maxa wambi zamkela uqheliselo lonqulo lwesithethe. Ibabaláwo yathi: “Kutshanje bendikhe ndadlan’ indlebe nobhishophu. Wayeze apha. Emva kokuba sixubushe imibandela ethile malunga nemizuzu engama-30, wathi wayefuna ukuba sibe nengxoxo apho amaKristu nabantu bezithethe banokukhe bathetha-thethane baze balungise ukungaqondani.”
Iingcango Ezikhokelela Kummandla Womoya
Ukungaqondani okulolo hlobo ngokufuthi kubandakanya ukuqonda abo bahlala kummandla womoya. Kulo lonke elaseAfrika esemazantsi eSahara, yandile inkolelo yokuba kukho amaqela amabini abantu abahlala kummandla womoya. Iqela lokuqala ngabavumisi okanye oothixo, abangazange bakhe babe ngabantu. Iqela lesibini yiminyanya okanye imimoya yabafileyo, lona imbopheleleko yalo kukuqiniseka ngenkuseleko nempumelelo yeentsapho zalo emhlabeni. Kukholelwa ukuba abavumisi neminyanya banamandla okunceda nokwenzakalisa abo basemhlabeni. Ngenxa yoko, omabini la maqela amele anikwe imbeko nentlonelo efanelekileyo.
Iinkolelo ezifanayo ziyafumaneka kwiindawo ezininzi zehlabathi. Abantu kuzo zonk’ iindawo basebenzisa iindlela ezahlukeneyo zokuthetha nemikhosi enamandla angaphezu kwawemvelo, befuna ulwazi ngekamva noncedo kunye nokhokelo kwiingxaki zobomi zemihla ngemihla. Ngaba kunokwenzeka ngokwenene ukufumana uncedo kummandla womoya? UYesu Kristu, owayephila apho, wabonisa ukuba kunokwenzeka. Wathi: “Qhubekani nicela, yaye niya kunikwa; qhubekani nifuna, ibe niya kufumana; qhubekani ninkqonkqoza, kwaye niya kuvulelwa.” (Mateyu 7:7) Kodwa ukuze sifumane olo ncedo, simele silucele kumntu ofanelekileyo, silufune ngendlela elungileyo, yaye sinkqonkqoze kumnyango olungileyo. Ukuba sinkqonkqoza kumnyango ongalunganga, usenokuvulwa ngumntu onokusenzakalisa, kunokuba asincede.
Ngoko ke, kubalulekile ukumazi lowo uhlala kummandla womoya nongahlali kuwo. Sikwafuna nokwazi umahluko phakathi kwabo banokusinceda nabo banokusenzakalisa. Okokugqibela, sifanele sazi oko simele sikwenze ukuze sifumane uncedo kwabo bakulungeleyo ukusinceda. Amanqaku alandelayo aya kuhlolisisa le mibandela.
[Inkcazelo Ngomfanekiso okwiphepha 3]
Photo on pages 3-4: The Star, Johannesburg, S.A.