Imigudu Yam Yokwenza Ukhetho Lobulumko

NGOKUBALISWA NGUGUSTAVO SISSON

Xa ndandineminyaka eli-12 ubudala, nangona ndandikuthanda gqitha ukuqubha, ndagqiba kwelokuba ndibe ngugqirha. Kodwa malunga nexesha elifanayo, ndaqalisa ukufundisisa iBhayibhile yaye loo nto yaphumela ekubeni ndifune ukuba ngumlungiseleli. Kwenzeka ntoni kwizinto ezahlukeneyo endandizifuna nendandinomdla kuzo? Ngaba zazidibana?

NGOWE-1961 uOlive Springate, owayengumvangeli wasemazweni wamaNgqina kaYehova waqalisa ukufundisisa iBhayibhile kunye nam noMama. Ngenxa yokuchaswa nguTata, owayengugqirha ohlonelwayo ePôrto Alegre, sayeka ukufundisisa. Kodwa uOlive waqhubeka eqhagamshelana nathi, yaye ekuhambeni kwexesha ndeva laa nyaniso ndandiyifundile inkenteza. Kodwa ngelo xesha ukuzinikela kwam nofele ekuqubheni kwandiphazamisa kwizinto zokomoya.

Xa ndandineminyaka eli-19 ubudala, ndaphandlwa lelinye ibhinqa ekuthiwa nguVera Lúcia apho ndandiqubha khona yaye saqalisa ukwenza amadinga. UMama wamxelela ngoko sikukholelwayo, yaye waba nomdla. Ngoko ndaqhagamshelana no-Olive, waza waqalisa ukufundisisa iBhayibhile kunye nathi, phezu kwayo nje inkcaso katata kaVera Lúcia.

UVera Lúcia waqhubeka nokufunda, waza wakhula kulwazi lweBhayibhile. Wada waqalisa ukuqhuba izifundo zeBhayibhile nabo basebenza kwindawo endandiqubha kuyo. Kwangelo xesha, ndandiququzelela ukuziqeqeshela ukhuphiswano lokuqubha lwelizwe olwalusondela.

Emva kokufundisisa kwethu nokuya kwiintlanganiso zamaKristu kangangonyaka, utata kaVera Lúcia waqalisa ukukrokrela ukuba kwakukho into eqhubekayo. Ngenye imini xa sasibuya kwiintlanganiso, wayesele esilindele yaye efuna ngenkani ukwazi apho besiye khona. Ndamxelela ukuba besiye kwintlanganiso yamaKristu ndaza ndathi nangona unqulo lusenokuba alubalulekanga kuye, kuthi lwalungumbandela wokufa nokuphila. Enesingqala wathi: “Hay’ ke, ukuba lungumbandela wokufa nokuphila, kuya kufuneka ndiginye nokuba kukrakra.” Ukususela ngaloo mini, isimo sakhe sengqondo satshintsha, yaye nangona engazange abe ngomnye wamaNgqina kaYehova, waba ngumhlobo osenyongweni neqabane ngamaxesha kaxakeka.

Ukwenza Ukhetho

Ndandigqibe kwelokuba ndilushiye ukhuphiswano lokuqubha emva kokhuphiswano lwelizwe, kodwa ukuphumelela kwam kabini nokuphuma phambili kukhuphiswano lokuqubha lwaseBrazil lweemitha ezingama-400 nezili-1 500 lwandithatha lwaya kundibeka kwiMidlalo yePan American eCali, eColombia, ngowe-1970. Nangona uVera Lúcia wayengayiginyi into yokuya kwam apho, ndaqalisa ukuziqeqeshela loo midlalo.

Emva kokuba ndiqubhe kakuhle eCali, abaqeqeshi bam bafuna ukwazi enoba ndandikulungele ukuziqeqeshela iiOlimpiki. Ndacinga ngezifundo zamayeza endandingekazigqibi nangenyaniso emangalisayo endandiyifundile ngokuphathelele iinjongo zikaYehova ndaza ndalibala ngokuqhubeka nokuqubha. Ukususela ngoko ukuya phambili, ndenza inkqubela ekhawulezileyo ngokomoya. Ngowe-1972, unyaka ekwakukho ngawo iiOlimpiki eMunich, eJamani, mna noVera Lúcia safuzisela uzahlulelo lwethu kuYehova ngokubhaptizwa emanzini. Oku kwakhuthaza uMama ukuba aphinde aqalise isifundo sakhe seBhayibhile, yaye ekuhambeni kwexesha naye wabhaptizwa.

Emva kokuba uMama ebhaptiziwe, inkcaso kaTata yaba ngathi ithi chatha. Ekugqibeleni intsapho yakowethu yahlulelana, yaye njengoko ndandiseseyunivesithi, kwafuneka siphile ngemalana kamama yenkamnkam nangemali esayifumana ngokuthengisa indlu yakowethu. Loo nto yabangela ukuba mna noVera siwurhoxise umtshato wethu. Enyanisweni izinto ezintle endazifunda kuTata zandinceda ukuba ndithabathe isigqibo endasithabathayo. Wayedla ngokuthi: “Musa ukoyika ukwahluka” aphinde athi, “Isininzi asisoloko sisiya kwicala elililo.” Wayethanda nokuthi, “Ukuxabiseka kwendoda kuxhomekeke koko ikunika abanye.”

Njengomnye wamaNgqina kaYehova, ndiye ndakwazi ukusebenzisa icebiso elihle likaTata. Ndandisecaleni komandlalo wakhe ekufeni kwakhe ngowe-1986. Sasisele siphinde sangabahlobo yaye sihlonelana. Ndicinga ukuba wayenelunda ngam kuba kanye njengaye ndandingugqirha.

Okwelo xesha, ndaphumelela kwisikolo sezamayeza ngowe-1974. Ndagqiba kwelokuba ndibe ngugqirha oqhelekileyo, kodwa kamva, emva kokuba ndiwuhlafunisisile lo mbandela, ndagqiba kwelokuba ndibe ngugqirha wotyando ukuze ndibe luncedo ngakumbi kubazalwana bam abangamaKristu. (IZenzo 15:28, 29) Ngoko ndalwamkela olo celomngeni, ndaza ndachitha eminye iminyaka emithathu ndifundela ukuba ngugqirha wotyando.

Idabi Elilucelomngeni Lezomthetho

Eyona meko imbi endandibandakanyeke kuyo yeyentombazana eneminyaka eli-15 ubudala eliNgqina eyayophele ngaphakathi. Yayimpatshekile yaye uxinezeleko lwegazi lwayo luphantsi kodwa yayisezingqondweni yaye iqinisekile ngesigqibo sayo sokungalamkeli igazi. Emva kokuba ndiye ndandisa umthamo wayo wegazi, ndayihlola ngaphakathi ndaza ndahlamba indawo echaphazelekileyo ngomxube obandayo obizwa ngokuba yisaline ngelokunqanda ukopha. Ekugqibeleni yaba bhetele, kodwa kwiiyure ezingama-36 kamva, xa yayikwicandelo labagula kakhulu, ngequbuliso yaphinda yopha kwakhona. Phezu kwako nje ukuwa evuka, ugqirha owayephangele ngelo xesha akazange akwazi ukukulawula ukopha kwayo aze agcine igazi layo likumlinganiselo ofanelekileyo, yaye le ntombazana yafa.

Kwathi emva kweli shwangusha, ikomiti yemigaqo yandiyekisa okwexeshana njengogqirha osaqeqeshwayo yaza yathumela ityala lam kwibhunga lengingqi lezamayeza. Ndatyholwa ngokwaphula imithetho emithathu yezamayeza, nto leyo eyayibeka engozini imvume nomsebenzi wam njengogqirha.

Le komiti yabeka iintsuku ezingama-30 endiya kuthi ngazo ndibhale ileta endithethelelayo. Amagqwetha am ayeza kundithethelela esebenzisa umthetho nomgaqo-siseko yaye mna ndandiza kuzikhusela ndisebenzisa ulwazi lwam lwezamayeza ndincediswa nayiKomiti Yokunxibelelana Nezibhedlele (HLC [Hospital Liaison Committee]) yasekuhlaleni, iqela lamaNgqina kaYehova lazama ukwakha intsebenziswano phakathi kwesibhedlele nabaguli. Xa kwakuchotshelwe elo tyala ikomiti enikela imiyalelo yabuza imibuzo ubukhulu becala emalunga nesikhundla sam njengogqirha nanjengomnye wamaNgqina kaYehova. Noko ke, ngokuyintloko ukuzikhusela kwam kwakusekelwe kulwazi lwezamayeza nenzululwazi nakwiingxelo ezivela koogqirha abahlonelwayo.

Ubungqina obathiwa thaca apho baqinisekisa ukuba umguli uye walwala utofelo-gazi yaye andikhange ndimthofiyele ukuba enze eso sigqibo. Kwakhona ubungqina babonisa ukuba koogqirha abane abaye banenxaxheba ekumnyangeni, ndim kuphela owasebenzisa unyango olwalufunwa ngumguli nolwalufanele imeko yakhe yempilo.

Emva koko ityala lam lasiwa kwikomiti eyayiza kulichophela njengeqela. Ndazithethelela phambi kwayo kangangemizuzu elishumi apho ndagxininisa kwimibandela yezempilo, njengakuxwebhu endalubhalayo. Emva kokundiva, amalungu amabini ale komiti athi nangona ndingazange ndilitofele igazi, unyango endaluncomelayo lwaluvumelekile ngokwenzululwazi. Omnye ugqirha wagxininisa kwelokuba unyango ngaphandle kwegazi luyanceda yaye alunakufane lubulale mntu. Ilungu lokugqibela leli bhunga lathi eyona nqontsonqa yayingekokuba utofelo-gazi lulunyango olufanelekileyo okanye akunjalo kusini na. Eyona nto ibalulekileyo kukuba ugqirha unokusebenzisa unyango olungafunwayo ngumguli kusini na, yaye eli lungu lebhunga lalingayiqondi into yokuba ugqirha unelungelo lokwenjenjalo. Ngenxa yoko, isininzi samalungu ebhunga ali-12 kwama-2, avotela ukuba ndihlanjwe kuzo zonke izityholo, ngaloo ndlela ndakhululeka kwelo tyala.

Ukukhusela Amalungelo Omguli

Amanye amagunya ezamayeza aye afuna umyalelo wenkundla onyanzela abaguli abangamaNgqina ukuba bamkele utofelo-gazi, yaye maxa wambi ndiye ndanikela ubungqina enkundleni obuye beyisa loo miyalelo. Enye imeko yayibandakanya iNgqina elalidumbe imithambo yegazi yommizo walo, ingxaki engunobangela wokophela ngaphakathi esiswini. Ukulaliswa kwalo esibhedlele lalineeseli ezibomvu ezimbalwa kakhulu egazini lalo—ezi seli kulo zaziziigram ezisisi-4,7 kwidesilitha nganye.a Ekuqaleni alizange linyanzelwe ukuba lamkele igazi yaye lanikwa nje unyango lokuligcina liphilile.

Kwandula ke, emva kweveki esesibhedlele, lo mguli wothuswa kukutyelelwa ligosa lenkundla liphethe umyalelo wokuba atofelwe igazi. Ngelo xesha umlinganiselo wakhe weeseli ezibomvu wawunyukile waya kutsho kwiigram ezisisi-6,4 kwidesilitha nganye, yaye imeko yakhe yempilo yayikhetheka. Kuyabonakala ukuba xa yayiwisa esi sindululo ijaji yayicinga ngomlinganiselo weeseli ezibomvu wokuqala kungekhona ophakamileyo wesibini.

IKomiti Yokunxibelelana Nezibhedlele yathi iza kunikela uncedo. Lo mguli wacela ukuba ndimxilonge. Ndenjenjalo yaye emva koko ndakwazi ukumsa kwisibhedlele apho wayenokunyangwa ngaphandle kwegazi. Kwangaxeshanye amagqwetha akhe alwa nomyalelo wenkundla wokutofela igazi kulo mguli.

Ndabizwa ukuba ndiye kuvela phambi kwejaji, eyandibuza ngemeko yalo mguli. Ngoxa kuphulaphulwe eli tyala, yandigunyazisa ukuba ndiqhubeke ndimnyanga umguli ngoxa kwakusahlalutywa umyalelo wenkundla. Ngexesha inkundla iphinda idibana, umguli wayesele ephucule kakhulu yaye wayesele ephumile esibhedlele. Xa kwathiwa mandiphinde ndize kunikela ubungqina, igqwetha lesibhedlele lathi mandinikele ubungqina bokuba unyango endiluncomeleyo luvumelekile ngokwenzululwazi. Into eyamphoxayo yeyokuba, ndakhupha inqaku lolindixesha wezamayeza, owayepapashwe kwasesi sibhedlele wayesimele, yaye lalincomela olu nyango!

Emva kokuwiswa kwesindululo, savuyiswa kukuva ukuba ukuthembela kwethu kunyango lwezamayeza kunokuthembela kutofelo-gazi kwasinceda. Isibhedlele sayalelwa ukuba sihlawule zonke iindleko, kuquka iindleko zasemthethweni. Nangona isibhedlele sabhena, satsho phantsi.

Ukunyamekela Intsapho Yethu

Ukususela oko ndaba liNgqina, ndiye ndafumana inkxaso kaVera Lúcia njengeqabane elizinikeleyo nomama ongumzekelo wabantwana bethu. Ukwazi njani ukujamelana nalo lonke ucelomngeni, lokulondoloza ikhaya lethu nokuncedisa ekunyamekeleni abantwana, ngoku abalulutsha oluzizitsha-mlilo? Oku uye wakwenza ngenxa yothando lwakhe olunzulu ngoYehova nobulungiseleli bamaKristu.

Njengabazali, siye safundisa abantwana bethu ngeemfundiso nemigaqo yeBhayibhile besebancinane kakhulu. Phezu kwako nje ukuxakeka, sizabalazela ukuba kwinkonzo yexesha elizeleyo kangangeenyanga ezimbalwa nyaka ngamnye. Yaye sizama kangangoko ukunamathela kucwangciso, oluquka ukufunda iBhayibhile rhoqo, ukuba nengxubusho yeBhayibhile suku ngalunye, nokwabelana nabanye ngeenkolelo zethu kubulungiseleli bamaKristu. Kutshanje, intsapho yethu iye ngokuthe rhoqo yaqhuba izifundo zeBhayibhile ezili-12 veki nganye nabantu abangengomaNgqina.

SinoVera Lúcia siye sazama ukubandakanya oonyana bethu kwizinto esizenzayo ngoxa kwangaxeshanye sizihlonela izinto abazithandayo. Sikholelwa ukuba kukho izinto ezintathu ezisisiseko ezifunekayo kubazali ukuze bazinyamekele kakuhle iintsapho zabo. Eyokuqala, yimfundiso efanelekileyo esekelwe kwiLizwi likaThixo, iBhayibhile. Eyesibini, ngumzekelo omhle, onikela ubungqina obucacileyo ebantwaneni wokuba abazali babo bamoyika ngokwenene uThixo. Kanti eyesithathu, lunxulumano oluhle namaKristu akubudala obahlukeneyo anokudlulisela intaphane yezipho nobuchule kumalungu entsapho. Njengesibini, siye sakwenza usukelo lwethu ukunika intsapho yethu ezi zinto.

Xa sikhangela emva kwiminyaka emalunga nama-30 sikhonza uYehova, mna nomfazi wam sinokuthi, ngaphandle kwamathandabuzo, uye wasinika okona kulungileyo ebomini waza wasinika uyolo neentsikelelo ezininzi. Nangona ndingazange ndikwazi ukuya kwiiOlimpiki, ndisakunandipha ukuqubha iikhilomitha eziliqela ngeveki. Liyinyaniso elokuba, ukuba ngugqirha nomnye wamaNgqina kaYehova kuye kwaphumela ekubeni ndiphile ubomi obuxakeke ngakumbi, kodwa ndikufumanise kunomvuzo gqitha ukunceda abazalwana noodade wethu abangamaKristu ukuba banyamezele kwinkonzo yabo kuThixo ngoxa bejamelene nezilingo.

Ndidla ngokubuzwa ukuba ayindikhathazi kusini na into yokuba ndiza kuphulukana nomsebenzi wam xa inkqubo entsha kaThixo ifika kuze kupheliswe ukugula. Ndiye ndithi ndiya kuba ngowokuqala ukuxhumaxhuma luvuyo xa, ‘isiqhwala siya kutsiba njengexhama, nolwimi lwesimumu luya kumemelela ngochulumanco,’ naxa ‘kungayi kubakho mmi wakhona oya kuthi: “Ndiyagula.”’—Isaya 33:24; 35:6.

[Umbhalo osemazantsi]

[Umfanekiso okwiphepha 15]

Ndityanda umguli

[Imifanekiso ekwiphepha 15]

Ndikunye noVera Lúcia, nakwisifundo sethu sentsapho