Izimvo Zabafundi BakaVukani!
Umkhombe KaNowa Nokwakhiwa Kweenqanawa(Januwari 2007) Bendisoloko ndisazi ukuba umkhombe wawenziwe kakuhle kodwa bendingaqondi ukuba wawenziwe njani. Eli nqaku liye lakuchaza ngendlela eyenze kwalula ukuqonda ubude, ububanzi nomphakamo wawo. Ndiye ndagqib’ ekubeni ndenze umkhombe kunye nabantwana basebandleni ndisebenzisa umfanekiso okweli nqaku. Sasebenzisa amaphepha ukwenza izilwanyana saza sazifaka ngaphakathi emkhombeni saza sazoba umfanekiso kaNowa nentsapho yakhe. Siye sasazi ngakumbi esi siganeko siseBhayibhileni ngenxa yokuba siye sazakhela owethu umkhombe. Ndithi maz’ enethole.
UT. A., waseJapan
Unyana wam oneminyaka emithandathu ubudala uyakuthanda ukwakha. Savuya gqitha sakufumanisa ukuba ekupheleni kweli nqaku likaVukani! kukho imiyalelo ngendlela yokwakha umkhombe kaNowa. Sayivuyela kakhulu loo mvakwemini sasisakha ngayo umkhombe. Sith’ enkosi ngeli nqaku! Ihlabathi esiphila kulo limaxhaphetshu yaye ulutsha oluhamba isikolo lujamelene nengcinezelo veki nganye. Kuyintsikelelo ukuba nesixhobo esinjengoVukani! esinceda abazali bakhulisele abantwana babo kwiindlela zikaYehova.
UM. F., waseUnited States
Abantu Abaselula Bayabuza . . . Ndinokuwoyisa Njani Lo Mkhwa? (Novemba 2006) Intliziyo yam yachukumiseka xa ndafunda ngendlela uYehova asinyamekela ngayo nendlela asinceda ngayo ukucombulula iingxaki zethu. Nakuba sikhe sivukwe likakade, uYehova “ukulungele ukuxolela.” (INdumiso 86:5) Ukwazi oku kuyasinceda thina lutsha ukuba ‘sisabe kwiinkanuko zobutsha.’—2 Timoti 2:22.
UV.F.F., waseBrazil
Abantu Abaselula Bayabuza . . . Kutheni Kukho Imithetho Emininzi Kangaka? (Disemba 2006) Ndifunde iBhayibhile kangangeminyaka emithandathu. Ekubeni abazali bethu bengqongqo, ndiyazi ukuba bandixhalabele ngokwenene. Xa bendifunda eli nqaku liye landinceda ndaqonda izinto ezixhalabisa abazali bam yaye liye landinceda ndayixabisa indlela andinyamekela ngayo uYehova.
UK. T., waseThailand
Ndandingunyana Wolahleko (Disemba 2006) UYehova ndimaze ukususela ngowe-1992. Kodwa kukho ixesha aph’ ekukhuleni kwam endikhe ndafuna ukuphila unothanda. NjengoMeros Sunday, ixesha elininzi ubomi bam bukhe baba ngamahla ndenyuka yaye emva kweminyaka emithathu ndingasamkhonzi uYehova ndacela uncedo lwakhe. Ndaphinde ndabuyela “ekhaya!” Ndibamba ngazibini ngomsebenzi wenu.
UD. K., waseUkraine
Abantu Abaselula Bayabuza . . . Ndinokuqalisa Nini Ukuthandana? (Januwari 2007) Ndineminyaka eli-15 ubudala. Ngoxa ndandityelele udadobawo nomyeni wakhe ndadibana nomfana oliNgqina oneminyaka eli-17 ubudala. Sasimane sincokola ngeInternet, ekuqaleni sasingancokoli rhoqo. Noko ke, kungekudala sasincokola suku ngalunye yaye sathandana. Emva kokuba ndifunde eli nqaku ndaqonda ukuba sasithandana. Ngoncedo lwabazali nolweli nqaku likaVukani! ndenza isigqibo—ndaqhawula unxibelelwano olwaluphakathi kwam nalo mfana. Saba ngabahlobo nje kodwa eyona nto iza kuqala lulwalamano lwam noYehova. Ndiyabulela ngokuba eli nqaku liye landinceda ndabuyela ezingqondweni.
UD. D., waseKhanada