Ukubetha Umlozi—Indlela Echuliweyo “Yokuthetha”
NGUMBHALI KAVUKANI! EMEXICO
◼ Kwiintaba zaseOaxaca, eMexico, amaMazatec awanazo iifowuni okanye iicellphone. Sekunjalo, ayakwazi ukunxibelelana kumgama ongaphezu kweekhilomitha ezimbini okanye ngaphezulu—ngokomzekelo, xa elima ikofu kwindawo elithambeka. Enza njani? Kude kudala, amaMazatec aqalisa indlela yokuthetha ngokubetha umlozi. UPedro, umMazatec oselula, uthi: “IsiMazateco lulwimi lwezandi. Ngoko xa sibetha umlozi, sixelisa isandi solwimi oluthethwayo. Yaye sisebenzisa imilebe xa sibetha umlozi, kungekhona iminwe.”a
Umhlobo kaPedro uFidencio uchaza iingenelo zokubetha umlozi esithi: “Sisebenzisa le ndlela yokunxibelelana xa sikumgama oqeleleneyo naxa sibetha koomofu. Ngokomzekelo, utata usenokuthuma unyana wakhe evenkile ukuba ayokumthengela iitortilla kodwa alibale ukumthuma itumato. Ukuba lo mfana ukude ukuva oko kuthethwayo, uyise usenokubetha umlozi edlulisela loo myalezo.”
Maxa wambi amaNgqina kaYehova abetha umlozi xa enxibelelana. UPedro uthi: “Xa ndisiya kumhlaba ongabelwanga-bani yaye ndifuna ukucela omnye umzalwana ukuba andipheleke, akuyomfuneko ukuba ndide ndiye ekhayeni lakhe. Ndibetha nje umlozi.”
UPedro uthi: “Ukuze sazi ukuba ngubani ‘othethayo,’ mntu ngamnye unendlela awubetha ngayo umlozi. Ngokuqhelekileyo, ngamadoda angamaMazatec kuphela anxibelelana ngokubetha umlozi. Ibhinqa lisenokuliqonda olu lwimi lize lilisebenzise kwintsapho yalo, kodwa lingalisebenzisi xa linxibelelana nayo nayiphi na indoda. Oku kugqalwa njengento engafanelekanga.”
AsingomaMazatec kuphela anxibelelalana ngokubetha umlozi; kodwa nabantu baseCanary Islands, ePapua New Guinea naseTshayina. Idla ngokuba ngabantu abahlala ezintabeni nakumahlathi abanxibelelana ngale ndlela. Enyanisweni, zingaphezu kwama-70 iilwimi ezikhoyo zokunxibelelana ngomlozi, yaye ezili-12 zisafundwa.
Oku kusenza simangaliswe yindlela umntu anobuchule ngayo. Eneneni, xa udibanisa obo buchule nomnqweno wokufuna ukuncokola nabanye ayikho into enokuthintela abantu banganxibelelani!
[Umbhalo osemazantsi]
a Enye incwadi ithi: “AmaMazatec ayakwazi ukunxibelelana xa ebetha umlozi ngenxa yokwahluka kwesantya, ubume besandi nendlela okhaliswa ngayo umlozi.”