Unxibelelwano Kubulungiseleli BamaKristu

“Hambani ngoko niye kuzenza abafundi zonke iintlanga.”—MATEYU 28:19.

1. Luluphi uthumo olwanikelwa nguKristu olubonisa imfuneko yonxibelelwano?

UTHUMO lukaYesu, olucatshulwe ngasentla, lusizisela ucelomngeni lokunxibelelana nabantu kubulungiseleli bethu njengokuba singena kwizindlu ngezindlu, sisenza amatyelelo okubuyela, yaye sisiba nesabelo kuzo zonke ezinye iinkalo zokushumayela ngoBukumkani. Olo thumo luquka imbopheleleko yokwazisa inyaniso engoYehova uThixo, uYesu Kristu, noBukumkani obungoMesiya uYesu alawula kubo ngoku.—Mateyu 25:31-33.

2. Ukuze sinxibelelane ngokunempumelelo, yintoni esifanele siyenze?

² Sinokunxibelelana njani ngokunempumelelo nabanye? Okokuqala, simele sikholelwe kwinkcazelo esinxibelelana ngayo nabanye. Ngamanye amazwi, simele sibe nokholo olomeleleyo lokuba uYehova ungokuphela koThixo oyinyaniso, ukuba iBhayibhile iliLizwi likaThixo ngokwenene, nokuba uBukumkani bukaThixo bukuphela kwethemba loluntu. Ngaloo ndlela, oko sikufundisayo kuya kuphuma entliziyweni, yaye siya kuba sithobela isiluleko sikaPawulos awasibhekisa kuTimoti esithi: “Kukhuthalele ukuzimisa phambi koThixo ucikidekile, ungumsebenzi ongenazintloni, ulungisa ukulahlula ilizwi lenyaniso.”—2 Timoti 2:15.

Ukunxibelelana Ngaphandle Kwamazwi

3-5. (a) Sinokunxibelelana njani nabanye ngaphandle kokuthetha ngelizwi? (b) Ngawaphi amava abonisa oku?

³ Unxibelelwano ngokufuthi lubandakanya amazwi. Kodwa, enyanisweni, sinxibelelana nabantu kwanangaphambi kokuba sithethe nabo. Njani? Ngokuziphatha kwethu nangendlela esinxiba nesizilungisa ngayo. Kwiminyaka ethile eyadlulayo umvangeli wasemazweni ophumelele kwiSikolo seBhayibhile seWatchtower saseGiliyadi wayehamba ngenqanawa esiya kwisabelo sakhe kwilizwe lasemzini. Emva kweentsuku ezimbalwa eselwandle, umntu angamaziyo wambuza isizathu sokuba ahluke kangako kubo bonke abanye ababekhwele apho. Lo mvangeli wasemazweni kunxibelelwano lwakhe wayedlulisela okuthile okuphawulekayo—ukuba wayenemilinganiselo eyahlukileyo yaye kwakunokuthethwa naye—kuphela ngenkangeleko yakhe nangendlela awayeziphethe ngayo. Oku kwavelisa ithuba elihle lokuba lo mvangeli wasemazweni anikele ubungqina.

⁴ Kwakhona, udade owayemi esitratweni enikela uncwadi lweBhayibhile kubantu abadlulayo walijonga ngoncumo ibhinqa elalihamba kufutshane naye. Eli bhinqa laqalisa ukuhla izinyuko ezingena kwisikhululo sikaloliwe esingaphantsi komhlaba. Lathi selilapho latshintsha ingqondo, labuyela kulo dade, laza lacela isifundo seBhayibile sekhaya. Lalichukunyiswe yintoni? Nangona lalingazange linikwe uncwadi lweBhayibhile, iNgqina elalisenza umsebenzi wasesitratweni lalibonakalise uncumo lobuhlobo.

⁵ Umzekelo wesithathu: Iqela lamaNgqina aselula lalisidla kwindawo yokutyela yaye lakhwankqiswa xa umntu elingamaziyo weza kwitafile yalo waza walihlawulela izidlo zalo. Kwakutheni ukuze enze oko? Wayechukunyiswe yindlela elaliziphethe ngayo. Engakhange athethe nto kuloo mntu angamaziyo, la maNgqina aselula, ngonxibelelwano ayebonise ukuba ayengabantu aboyik’ uThixo. Ngokucacileyo, ngokuziphatha, ngenkangeleko nangokubonakalisa kwethu ubuhlobo, siyanxibelelana nabanye kwanangaphambi kokuba sithethe.—Thelekisa eyoku-1 kaPetros 3:1, 2.

Ukuqiqa Kubalulekile Kunxibelelwano

6. Bonisa indlela ukuqiqa okubaluleke kakhulu ngayo kunxibelelwano?

⁶ Ukuze sinxibelelane nabantu ngokuthetha nabo ngeendaba ezilungileyo, simele silungiselele, kungekhona ukuze sithethe ngokuqiniseka okugqith’ emgceni, kodwa ukuze siqiqe nabo. Izihlandlo ezininzi siye safunda ukuba uPawulos waqiqa nabo wayezama ukudlulisela iindaba ezilungileyo kubo. (IZenzo 17:2, 17, NW; IZe 18:19, NW) Sinokuwuxelisa njani umzekelo wakhe? Kaloku, iimeko zehlabathi eziya zisiba mandundu zisenokuba zikhokelele abanye ukuba babuthandabuze ubukho boThixo ongusomandla nonothando obanyamekelayo abantu. Noko ke, sinokuqiqa nabo ngelokuba uThixo umise ixesha lento yonke. (INtshumayeli 3:1-8) Ebonisa oku, amaGalati 4:4 athi xa ixesha likaThixo lafikayo, wathumela uNyana wakhe emhlabeni. Oku kwenzeka kumawaka eminyaka emva kokuba wathembisa ukwenjenjalo okokuqala. Ngokufanayo, xa ixesha lakhe lifika, uya kukuphelisa ukubandezeleka nobungendawo. Ngaphezu koko, iLizwi likaThixo libonisa ukuba uThixo unezizathu ezinamandla zokuvumela ubungendawo buqhubeke ixesha elide kangaka. (Thelekisa iEksodus 9:16.) Ukuqiqa ngolu hlobo, nokuxhasa ezo zibakala ngemizekeliso nobungqina beZibhalo, kuya kunceda abanyanisekileyo baqonde ukuba ubukho bobungendawo abunakusetyenziswa njengobungqina bokuba uYehova akakho okanye akakhathali.—Roma 9:14-18.

7, 8. Ukuqiqa kusenokusinceda njani sinxibelelane nomYuda ongumOthodoki?

⁷ Makhe sithi ngoxa ukwindlu ngendlu, umninimzi uthi kuwe: “NdingumYuda. Andinamdla.” Unokuthini? Omnye umzalwana unikela ingxelo yokuba waphumelela xa wasebenzisa le ndlela yokuqalis’ incoko: Ndiqinisekile ukuba uya kuvumelana nam xa ndisithi uMoses wayengomnye wabona baprofeti babalaseleyo uThixo awakha wabasebenzisa. Yaye ngaba ubusazi ukuba wathetha oku kubhalwe kwiDutenoromi 31:29: ‘Kuba ndiyazi ukuba, emva kokufa kwam, niya kutyeka endleleni endiniwisele umthetho ngayo, nihlelwe bububi’? UMoses wayengumprofeti wokwenyaniso, ngoko amazwi akhe ayemele azaliseke. Ngaba awanakuba azaliseka xa uThixo wathumela uMesiya kumaYuda nokuba kungenxa yoko le nto amaYuda engazange amamkele? Kusenokwenzeka ukuba kunjalo. Ngoko ukuba kunjalo yaye enza impazamo, ngaba eso sisizathu sokuba mna nawe senze impazamo efanayo?’

⁸ Kwakhona, khumbula ukuba amaYuda aye abandezeleka gqitha phantsi kweNgqobhoko, ingakumbi kule nkulungwane. Ngoko usengathanda ukumxelela umninimzi ukuba thina sasingenanxaxheba koko. Ngokomzekelo, usengathanda ukuthi: “Ngaba ubusazi ukuba xa kwakulawula uHitler, amaNgqina kaYehova awazange avume ukukwaya amaYuda? Kwakhona awazange avume ukuthi “Heil Hitler” nokungenelela kumkhosi wakhe.a

9, 10. Ukuqiqa kunokusetyenziswa njani ekuncedeni umntu okholelwa kwisihogo somlilo?

⁹ Xa uzama ukunxibelelana nothile okholelwa kwisihogo somlilo, usenokuqiqa ngelokuba ukuba umntu umele athuthunjelwe ngonaphakade esihogweni, umele ukuba unomphefumlo ongafiyo. Umntu okholelwa kwisihogo somlilo uya kuvuma ngoko nangoko. Unokwandula ke ukhankanye ingxelo yokudalwa kuka-Adam noEva uze ngobubele umbuze enoba wakha waphawula nto ithile ethetha ngomphefumlo ongafiyo kuloo ngxelo. Uhlabela mgama nale ndlela yokuqiqa, usenokwandula ke utsalele ingqalelo yakhe kwiGenesis 2:7, apho iBhayibhile isixelela ukuba uAdam waba ngumphefumlo ophilayo. Xa uAdam wonayo wagwetyelwa ukufa. Yaye phawula oko uThixo wakuthethayo njengokungumphumo wesono sikaAdam: “Uya kudla ukudla kokubila kobuso bakho, ude ubuyele emhlabeni, kuba uthatyathwe kuwo; ngokuba uluthuli, uya kubuyela kwaseluthulini.” (Genesis 3:19) Ngenxa yoko, umphefumlo onguAdam wabuyela eluthulini.

¹⁰ Kwakhona usenokutsalela ingqalelo kwisibakala sokuba akukho nanye kwiGenesis indawo uThixo akhankanya kuyo ukuthuthunjiswa kwisihogo somlilo! Xa uThixo walumkisa uAdam ukuba angadli kwisiqhamo esalelweyo, wathi: “Mhlana uthe wawudla uya kufa.” (Genesis 2:17) Isihogo somlilo asikhankanywa. Ukuba umphumo wokwenene wesono sika-Adam wawuza kuba kukuthuthunjelwa ngonaphakade, kungekhona ukufa, ‘ukubuyela eluthulini,’ ngaba ukuba sesikweni kukaThixo kwakungenakumbangela ukuba akucacise kakuhle oko? Ngenxa yoko, ukuqiqa ngenyameko nangobubele kusenokumnceda umntu onyanisekileyo ukuba abone ukungavumelani kweenkolelo zakhe. Singaze sikujongele phantsi ukubaluleka kokuqiqa njengoko sisabelana nabanye ngenyaniso yeLizwi likaThixo.—Thelekisa eyesi-2 kuTimoti 2:24-26; 1 Yohane 4:8, 16.

Iimpawu Ezifunekayo Ukuze Unxibelelwano Luphumelele

11-13. Ziziphi iimpawu zamaKristu ezinokusinceda sinxibelelane ngokunempumelelo nabanye?

¹¹ Ngoku, ziziphi iimpawu esimele sizihlakulele ukuze sinxibelelane ngokunempumelelo nabanye ngeenyaniso zoBukumkani? Kaloku, usixelela ntoni umzekelo kaYesu? KuMateyu 11:28-30, sifunda amazwi akhe: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu. Kuba idyokhwe yam imnandi, nomthwalo wam ulula.” Apho sibona enye yezinto ezabangela uYesu aphumelele kunxibelelwano. Wayenobulali ethobekile ngentliziyo. Abantu abantliziyo zilungileyo babefumana ukuphumla kuye. Umpostile uPawulos naye wamisela umzekelo omhle, kuba, njengoko waxelela abadala base-Efese, ukususela kwimini yokuqala awafika ngayo kubo, wayekhonza iNkosi ‘enako konke ukuthobeka kwentliziyo.’—IZenzo 20:19.

¹² Ngokuhlala singabathozamileyo nabathobekileyo engqondweni, abanye baya kufumanisa ukuba nakuthi banokufumana ukuphumla, yaye kuya kuba lula ngathi ukunxibelelana nabo. Nasiphi na esinye isimo sengqondo sinokubangela umqobo phakathi kwethu nabo sizama ukunxibelelana nabo. Ngokwenyaniso, “bunabathozamileyo ubulumko.”—IMizekeliso 11:2.

¹³ Ukuze sidlulisele inkcazelo ngokunempumelelo, sikwamele sibe nomonde nobuchule. Ngokuqinisekileyo umpostile uPawulos wayenobuchule xa wayenikela ubungqina kwizithandi zobulumko ezazihlanganisene phambi kwakhe kwiNduli kaMars. Iindaba ezilungileyo wazinikela ngendlela ezazinokuyiqonda. (IZenzo 17:18, 22-31) Ukuba sifuna ukunxibelelana ngokunempumelelo nabaphulaphuli bethu, simele sithobele isiluleko umpostile uPawulos awasinikela kwabaseKolose xa wathi: “Incoko yenu mayihlale imnandi, ingaze ibe yengenancasa; fundani ukuthetha kakuhle nomntu ngamnye enidibana naye.” (Kolose 4:6, The New English Bible) Intetho yethu imele ihlale inandipheka. Intetho enjalo iya kuzivula iingqondo zabo basiphulaphuleyo, ngoxa amazwi angengowabulumko eya kubabangela bazivale iingqondo zabo.

14. Ukuthetha nabanye ngokuzolileyo nangendlela yokuncokola kunokusinceda njani sinxibelelane nabanye?

¹⁴ Sifuna ukubonakala singabazolileyo ngamaxesha onke. Oku kunceda ukuba abo basiphulaphuleyo bakhululeke. Ukuba ngozolileyo kuthetha ukungaxhalabeli ukuba ibe nguwe wedwa othethayo. Kunoko, ngesimo sengqondo sokuzola nemibuzo yobuhlobo, sinika abo basiphulaphuleyo ithuba lokuvakalisa izimvo zabo. Ingakumbi xa sinikela ubungqina obungacwangciswanga kubalulekile ukukhuthaza omnye umntu athethe. Ngokomzekelo, iNgqina lakha lahlala ecaleni komfundisi womRoma Katolika kwinqwelo-moya. Ngaphezu kweyure eli Ngqina lambuza imibuzo lo mfundisi, yaye lo mfundisi, ngokuphendula kwakhe, wayengoyena uthetha kakhulu. Kodwa ngexesha besahlukana, lo mfundisi wayethabathe iimpapasho zeBhayibhile eziliqela. Ukubonakalisa umonde onjalo xa sithetha nabantu kuya kusinceda sibe nolunye uphawu, uvelwano.

15, 16. Ukuba novelwano kunokusinceda njani sinxibelelane nabanye?

¹⁵ Ukuba novelwano kuthetha ukuzibeka kwimeko yabanye. Umpostile uPawulos wayeyiqonda ngokupheleleyo imfuneko yokuba novelwano, njengoko sinokubona koko wakubhalela amaKorinte: “Ndikhululekile nje kubo bonke, ndizikhonzisile kubo bonke, ukuze ndibazuze abona baninzi. KumaYuda ndaba njengomYuda, ukuze ndiwazuze amaYuda; kwabo baphantsi komthetho ndaba njengophantsi komthetho, ukuze ndibazuze abaphantsi komthetho; kwabo bangenamthetho, ndaba njengongenamthetho (ndingenguye phofu ongenamthetho kuThixo, ndingosemthethweni kuKristu), ukuze ndibazuze abangenamthetho; kwabo bangenamandla, ndaba njengongenamandla, ukuze ndibazuze abangenamandla; kubo bonke ndesuka ndaba ziinto zonke, ukuze ngeendlela zonke ndisindise inxenye.”—1 Korinte 9:19-22.

¹⁶ Ukuze sixelise umpostile uPawulos kwezi nkalo, sifanele sibe nobuchule, ingqiqo neliso elibukhali. Ukuba novelwano kuya kusinceda sinxibelelane nabo basiphulaphuleyo ngenyaniso ngokwendlela abacinga nabavakalelwa ngayo. Impapasho ethi Ukuqiqa NgeZibhalo inikela uncedo olungathethekiyo koku. Yiba nayo ngamaxesha onke ukubulungiseleli.

Uthando—Uncedo Kunxibelelwano

17. Kuzo zonke iimpawu zamaKristu, luluphi olona lubalulekileyo ekudluliseleni inyaniso ngonxibelelwano oluphumelelayo, yaye lubonakaliswa njani?

¹⁷ Ukuthozama, ukuthobeka kwengqondo, umonde ukuba novelwano zizinto ezibalulekileyo ukuze unxibelelwano lube nempumelelo ekudluliseleni inkcazelo. Noko ke, ngaphezu kwako konke, uthando lokungazingci luya kusinceda siphumelele ekufikeleleni iintliziyo zabanye. UYesu wasikwa yimfesane ngabantu kuba babefana ‘nezimvu ezityhafileyo, ezichithakeleyo nezingenamalusi.’ Luthando olwashukumisela uYesu ukuba athi: “Yizani kum nonke nina nibulalekayo, nisindwayo ngumthwalo, ndoninika ukuphumla.” (Mateyu 9:36; 11:28) Nathi kungenxa yokuba sibathanda abantu le nto sifuna ukuba bafumane ukuphumla size sibancede bangene kwindlela esa ebomini. Isigidimi sethu sesothando, ngoko masiqhubeke sisixelela abanye ngothando. Olu thando luzibonakalisa ngoncumo lobuhlobo, ngobubele nokuthantamisa, ngokuchwayita nangokufudumeleyo.

18. Sinokumxelisa njani uPawulos, njengoko wayexelisa iNkosi?

¹⁸ Kule nkalo umpostile uPawulos wayixelisa kakuhle iNkosi yakhe, uYesu Kristu. Kwakutheni ukuze aphumelele kangaka ekuqaliseni amabandla ngamabandla? Ngaba kwakungenxa yenzondelelo yakhe? Ewe. Kodwa kwanangenxa yothando awayelubonakalisa. Phawula amazwi akhe othando ngokubhekisele kwibandla elitsha laseTesalonika: “Thina ke sisuke sathantamisa phakathi kwenu njengomdlezane osukuba ebagcinile abakhe abantwana; ngokunjalo sinilangazelela nje, kwakholeka kuthi ukuba singaneli kunabela iindaba ezilungileyo zikaThixo nje kodwa, sinabele nobomi bethu, ngenxa enokuba naba ziintanda kuthi.” Ukuxelisa uPawulos kuya kusinceda kwimigudu yethu yonxibelelwano.—1 Tesalonika 2:7, 8.

19. Kutheni singafanele sivumele ukungafumani ntsabelo intle entsimini kusidimaze?

¹⁹ Ukuba senze okusemandleni ethu ukunxibelelana nabantu yaye siyasilela ukufumana imiphumo emihle, ngaba simele sityhafe? Nakanye. ABafundi BeBhayibhile (njengoko amaNgqina kaYehova ayesakubizwa njalo) babedla ngokuthi ukuze abantu bayamkele inyaniso, kufuneka babe neempawu ezintathu. Kufuneka banyaniseke, bathobeke, yaye balambe ngokomoya. Asinakulindela ukuba abantu abanganyanisekanga basabele kakuhle kwinyaniso; yaye singenakulindela nokuba abantu abazidlayo nabaziphakamisayo baphulaphule iindaba ezilungileyo. Ukongezelela, kwanokuba umntu ngomlinganiselo othile unyanisekile kwaye uthobekile, akunakufane kwenzeke ukuba ayamkele inyaniso ukuba akalambanga ngokomoya.

20. Kutheni kunokusoloko kusithiwa imigudu yethu ayibanga lilize?

²⁰ Ngokungathandabuzekiyo inkoliso yabo udibana nabo kwintsimi yakho baya kuba bengenalo olunye okanye ezingakumbi zezi mpawu. Umprofeti uYeremiya wayenamava afanayo. (Yeremiya 1:17-19; thelekisa uMateyu 5:3.) Sekunjalo, imigudu yethu ayize ibe lilize. Ngoba? Kuba sibhengeza igama likaYehova noBukumkani. Ngokushumayela kwethu nangobukho bethu nje entsimini, siyabalumkisa abangendawo. (Hezekile 33:33) Yaye ungaze ulibale ukuba ngemigudu yethu yokunxibelelana nabanye ngenyaniso, siyangenelwa. (1 Timoti 4:16) Sigcina ukholo lwethu lomelele nethemba lethu ngoBukumkani liqaqambile. Ngaphezu koko, sigcina ingqibelelelo yethu size ngaloo ndlela sibe nesabelo ekungcwaliseni igama likaYehova uThixo, sivuyisa intliziyo yakhe.—IMizekeliso 27:11.

21. Kunokushwankathelwa ngelithini konke oku?

²¹ Ukushwankathela: Unxibelelwano kukudluliselwa kwenkcazelo ngokunempumelelo. Kubalulekile ukuba sibe nobuchule kunxibelelwano, yaye kwenzeka iingozi ezininzi xa lungekho unxibelelwano. Sibonile ukuba uYehova uThixo noYesu Kristu babalasele kunxibelelwano yaye uYesu wavula ijelo lokunxibelelana kumhla wethu. Yaye sibonile ukuba ngendlela esizilungisa ngayo nesiziphatha ngayo, sinxibelelana nabanye, sithetha okuthile kubo. Sifundile ukuba ukuqiqa kunendima ebalulekileyo ekuzameni ukunxibelelana nabantu yaye ukuze sinxibelelane ngokunempumelelo, sifanele sithozame, sithobeke, sibonakalise uvelwano, sibe nomonde, yaye, ngaphezu kwako konke, sishukunyiswe yintliziyo ezele luthando. Ukuba sihlakulela ezi mpawu size silandele imizekelo yeBhayibhile, siya kuba ngamaKristu anxibelelana ngokunempumelelo nabanye.—Roma 12:8-11.

[Umbhalo osemazantsi]

Ubuya Kuphendula Njani?

◻ Unxibelelwano luqalisa ngaziphi iindlela nangaphambi kokuthetha ngomlomo?

◻ Yiyiphi eminye yemizekelo yonxibelelwano ngokuqiqa okunempumelelo?

◻ Ziziphi iimpawu ezanceda uYesu Kristu noPawulos banxibelelane nabanye ngokunempumelelo?

◻ Kutheni singamele sidimazeke ukuba imiphumo ayibonakali ngokukhawuleza?