Izimvo Zabafundi BakaVukani!
Isizathu Sokuba Ndiyeke Umsebenzi Owawundihlawula Imali Eninzi (Juni 2010) Ndinibulela gqitha ngeli nqaku! Ndineminyaka engama-39 ubudala yaye ndikhulisa abantwana abathathu ndedwa. Kwindawo endihlala kuyo eRashiya, kunzima ukufumana umsebenzi. Kodwa umzekelo kaMartha Teresa Márquez undikhuthaze gqitha. Eli nqaku lathi uMartha wayesenza iitamales aze azithengise esitratweni ukuze akwazi ukuqhubeka nenkonzo yexesha elizeleyo. Ngoko ndagqiba ekubeni ndilandele umzekelo wakhe ndaza ndathengisa amaqebengwana aseRashiya ekuthiwa ziipiroshki. Loo nto yandinceda! Ngoku sekulishishini lentsapho yethu. Ngenxa yoku, abantwana bam baye bafunda ukusebenza nokuzimela.
G. M., eRashiya
Indlela Yokuhlangabezana Nokuthintitha (Meyi 2010) Ndibamba ngazo zozibini ngale nkcazelo ichanileyo ephathelele ukuthintitha. Sisebenza nzima sinceda abantu abathintithayo bazi ukuba kukho izinto ezininzi ezinokubanceda.
J. F., umongameli “weStuttering Foundation,” eUnited States
Imibuzo Yabantu Abaselula . . . Ndingayichaza Njani Imbono YeBhayibhile Ngobufanasini? (Disemba 2010) Ndineminyaka elishumi nditshatile, yaye ndinomntwana omnye. Yonk’ imihla ndilwa ‘neliva enyameni.’ Ndineminqweno yobufanasini. Umtshato awuzange uyiphelise. Ndikhe ndaziva ndiphelelwe lithemba kuba kubonakala ngathi andikwazi kuyoyisa le minqweno. Noko ke, emva kokufunda eli nqaku, ndiziva ndinethemba. Ndiye ndakwazi ukufikelela usukelo lokuyoyisa le minqweno.—2 Korinte 12:7.
Igama alichazwanga, eUnited States
Bendisoloko ndilwisana neminqweno yobufanasini ukususela ndiseneminyaka emihlanu kuphela ubudala. Ngoku ndineminyaka engama-61 ubudala, kodwa loo minqweno ayikapheli. Eyona nto ndayithanda kakhulu yingongoma yokuba nkqu nabantu abatsaleleka kubantu besini esahlukileyo bamele baluphephe uhenyuzo nokuba kukho “nabanye abangenathemba lokuba baya kuze batshate nabanye abatshate namaqabane aneziphene angakwaziyo ukwabelana nabo ngesini,” sekunjalo babe bekwazi ukuphila ubomi babo bonwabile ngaphandle kokwanelisa iminqweno yesini. Ngoko ke, nabo banotyekelo lobufanasini banako ukuziphatha kakuhle ukuba bafuna ukukholisa uThixo. Ngoko ndiyanibulela ngokukhuthaza abantu abafana nathi abalwisana neemeko ezinje.
Igama alichazwanga, eUnited States