Indlela Yokuhlangabezana Nokuthintitha

“Ndithi ndakuthintitha, ndiphazamiseke gqitha, nditsho ndithi kratya ukuthintitha. Iba ngathi ndisemngxunyeni onzulu endingenakuphuma kuwo. Ndakha ndaya kufuna uncedo kugqirha wengqondo. Wathi kufuneka ndithandane nentombazana, ndize ndibe neentlobano zesini nayo ukuze ndizithembe! Andizange ndiphinde ndiye apho. Ndifuna nje abantu bandamkele ngale ndlela ndiyiyo.”—URafael oneminyaka engama-32 ubudala.

CINGA ukuba bekuya kuba njani ukuba bekuza kufuneka ude ubile xhopho uzama ukucela itikiti lebhasi uze xa uthetha asuke aphel’ emqaleni amagama uphindaphindana nesikhamiso sokuqala. Bakuloo meko ke abantu abamalunga nama-60 ezigidi ehlabathini lonke—umntu omnye kwabali-100—abathintithayo. Kusoloko kuhlekiswa ngabo yaye bayacalulwa. Kunokude kuthiwe abakho krelekrele kangako kuba besebenzisa amagama abizeka lula kunalawo asokolisayo.

Yintoni engunobangela wokuthintitha? Ngaba kunokunyangwa? Ngaba umntu othintithayo unokukwazi ukuphucula indlela athetha ngayo?a Yaye abanye abantu banokunceda njani?

Ngaba Siyamazi Unobangela Wokuthintitha?

Abanye abantu bakudala babekholelwa ekuthini ukuthintitha kubangelwa yimimoya emdaka ekwakufuneka igxothwe. KumaXesha Aphakathi kwakusithiwa ingxaki iselulwimini. “Babelunyanga” ngantoni ke? Ngeentsimbi ezishushu nezinongo! Kwiinkulungwane zakutshanje oogqirha bebesika imithambo-luvo bade bakhuphe neethonsili ukuze banyange ukuthintitha. Kodwa ezo ndlela zonyango zibuhlungu azizange zincede nto.

Uphengululo lwakutshanje lubonisa ukuba zininzi izinto ezinokubangela ukuthintitha. Phakathi kwezinye izinto, kunokubangelwa luxinezeleko. Omnye unobangela unokuba yimfuza, kuba abantu abamalunga nama-60 ekhulwini abantu abathintithayo banezizalwane ezinale ngxaki. Ngaphezu koko, abaphengululi abafunda ngemithambo-luvo bathi ingqondo yomntu othintithayo iluqonda ngenye indlela ulwimi. Kwincwadi yakhe ethi Understanding Stuttering, uGqr. Nathan Lavid uthi, abanye “banokuqala ngokuthetha iingqondo zabo zingekabaxeleli indlela yokubiza amagama.”b

Ngenxa yoko, oyena nobangela wokuthintitha usenokungabi sengqondweni njengoko kwakha kwacingwa. Incwadi ethi No Miracle Cures, ithi: “Ngamany’ amazwi, ukuthintitha akunanto yakwenza nenkolelo, yaye abantu abathintithayo ‘abanakuxelelwa’ ukuba mabathethe kakuhle.” Noko ke, abantu abathintithayo banokuba neengxaki zengqondo ngenxa yemeko yabo. Ngokomzekelo, banokoyika iimeko ezithile, njengokuthetha phambi kwabantu abaninzi okanye efowunini.

Ukunceda Abantu Abathintithayo

Okubangel’ umdla kukuba, abantu abathintithayo badla ngokukwazi ukucula, ukusebeza, ukuthetha bodwa okanye nezilwanyana abazifuyileyo, ukuthetha ngaxeshanye nabanye, okanye balinganise abanye ngaphandle kokuthintitha. Ngaphezu koko, abantwana abangama-80 ekhulwini abathintithayo bayayeka bengakhange banyangwe. Kodwa kuthekani ngabanye abangama-20 ekhulwini?

Namhlanje kukho iinkqubo zokunceda abantu abanengxaki yokuthetha ezinokubenza bathethe ngokutyibilikayo. Ezinye kwezi ndlela ziquka ukukhulula imihlathi, imilebe nolwimi nokuphefumla ngovalo. Kanti abaguli banokufundiswa ukuba baqale kancinane ukuthetha, nto leyo enokuquka ukuthatha umoya kancinane eluvalweni baze bawukhuphe kancinane ngaphambi kokuba bathethe. Ukongezelela, basenokukhuthazwa ukuba bazitsale ezinye izikhamiso noonobumba. Baya kukhawuleza ukuthetha njengoko beya betyibilika.

Ukuba nobo buchule kunokuthatha iiyure nje ezimbalwa. Kodwa ukuzisebenzisa kakuhle ezo ndlela naxa umntu exinezelekile kunokuthatha amawakawaka eeyure umntu eqhelisela.

Lunokuqala nini ke uqheliselo? Ngaba kububulumko ukulinda uze ubone enoba umntwana uza kuziyekela ukuthintitha? Uphengululo lubonisa ukuba bangaphantsi kwama-20 ekhulwini abantwana abathintitha kangangeminyaka emihlanu baze basuke baziyekele. Incwadi ethi No Miracle Cures, ithi: “Xa umntwana eneminyaka emithandathu ubudala, akunakufane kwenzeke ukuba ayeke ukuthintitha ngaphandle kokuba asiwe kwiinkqubo zabantu abaneengxaki zokuthetha.” Le ncwadi yaleka ngelithi, ngenxa yoko, “abantwana abathintithayo bafanele badibane neengcali ezinceda abanengxaki yokuthetha ngokukhawuleza kangangoko kunokwenzeka.” Kubantwana abangama-20 ekhulwini abathintitha de babe ngabantu abadala, kuqikelelwa ukuba abangama-60 ukuya kwabangama-80 ekhulwini baye bancedwa zezi ngcali.c

Nyaniseka Kwisiqu Sakho

Ingcali yokuthetha, uRobert Quesal, naye othintithayo uthi, kubantu abaninzi abathintithayo, kukunganyaniseki kwiziqu zabo ukufuna ukuthetha ngokutyibilikayo phantsi kwazo zonke iimeko. URafael, ekuthethwe ngaye ekuqaleni akakhange ayeke ngokupheleleyo ukuthintitha, nangona eye waphucula ekuthetheni ngokutyibilikayo. Uthi: “Ingxaki yam icaca ngakumbi xa kufuneka ndifunde okanye ndithethe phambi kwabantu okanye xa ndikunye nomntu wesini esahlukileyo onomtsalane. Ndandingazithembi kuba abantu babehlekisa ngam. Noko ke, mvanje ndiye ndazama ukuzamkela ngale ndlela ndiyiyo yaye andikhathazeki xa ndiye ndaphazama. Ngoku xa ndiye ndabambeka egameni, ndiye ndihleke ndize ndithathe umoya ndiphinde ndiqhubeke.”

Amazwi kaRafael ayavumelana neThe Stuttering Foundation of America ethi, “ukuyeka ukuthintitha kuxhomekeke ekuyekeni ukukoyika kunakwimizamo oyenzayo.”

Abaninzi abanale ngxaki abakhange bayivumele ukuba ibenze bangaphili ngendlela abafuna ngayo. Abanye abantu abathintithayo baye baduma, phakathi kwabo singabala uMhlekazi uIsaac Newton, inkokeli yaseBritani uWinston Churchill, nomdlali weqonga waseMerika uJames Stewart. Abanye baye bafunda ubuchule obungenanto yakwenza nokuthetha, njengokudlala isixhobo, ukuzoba okanye ukufunda intetho yezandla. Abantu abangathintithiyo bafanele bawuxabise umgudu owenziwa ngabo bathintithayo. Ngoko masibakhuthaze kangangoko kunokwenzeka size sibaxhase.

[Imibhalo esemazantsi]

[Ibhokisi/Umfanekiso okwiphepha 13]

UNOKUMNCEDA NJANI UMNTU OTHINTITHAYO?

● Mncede azole ungamngxamisi. Ubomi bamihla le obukhawulezayo budla ngokuyandisa le ngxaki.

● Kunokuba uthi kulowo uthintithayo makangangxami xa ethetha, misela umzekelo wokucotha xa uthetha. Mphulaphule kakuhle. Musa ukumngena emlonyeni. Ungamgqibezeleli izivakalisi. Nqumama ngaphambi kokumphendula.

● Kuphephe ukumgxeka nokumlungisa. Ngendlela omjonga ngayo, ngezimbo zakho zobuso, nezomzimba nangezinto ozithethayo, bonisa umdla koko akuthethayo, kunakwindlela akuthetha ngayo.

● Ukuthintitha akufanele kube yinto ekungenakuthethwa ngayo. Ukumncumela nokuthi maxa wambi umbonise ukuba uyayiqonda le ngxaki, kunokumenza akhululeke lowo uthintithayo. Mhlawumbi unokuthi: “Akusoloko kulula ukuthetha loo nto sifuna ukuyithetha.”

● Ngaphezu koko, mqinisekise ukuba umamkele njengoko enjalo.

[Ibhokisi/Umfanekiso okwiphepha 14]

“NGOKUTHE NGCEMBE KWAYA KUSIBA BHETELE UKUTHINTITHA KWAM”

UVíctor, owathintitha kangangeminyaka eliqela ngexesha lokuba neengxaki kwentsapho yakhe, wakwazi ukuthetha kakuhle ngaphandle konyango. Njengoko eliNgqina likaYehova, wabhalisa kwiSikolo Sobulungiseleli Sobuthixo, esiqhutywa kuwo onke amabandla veki nganye. Nangona esi sikolo singenzelwanga ukunyanga ingxaki yokuthetha, sinceda abafundi ukuba baphucule ubuchule babo bokuthetha baze bazithembe.

Kwesi sikolo kusetyenziswa incwadi enomxholo othi Zuza Kwimfundo YeSikolo Sobulungiseleli Sobuthixo. Phantsi komxholo othi “Indlela Yokuhlangabezana Nokuthintitha, le ncwadi ithi: “Kubalulekile ukuba uqhubeke uzama. . . . Ukuba uza kunikela intetho, lungiselela kakuhle. Zikisa ingqondo yakho kwindlela oyinikela ngayo. . . . Ukuba uthi usathetha uqalise ukuthintitha, zola uze ugcine nelizwi lakho lizolile kangangoko kunokwenzeka. Khulula izihlunu zomhlathi. Sebenzisa izivakalisi ezifutshane. Mazibe mbalwa izihlandlo osebenzisa ngazo izikhuzo ezifana nesithi ‘awu’ nesithi ‘owu.’”

Ngaba esi sikolo samnceda uVíctor? Uthi: “Ubukhulu becala ndandinikela ingqalelo koko ndiza kukuthetha kungekhona kwindlela endiza kukuthetha ngayo, loo nto ke yayindenza ndilibale ukuba ndinengxaki. Kanti ndandiqhelisela gqitha. Ngokuthe ngcembe, kwaya kusiba bhetele ukuthintitha kwam.”