Isixeko Esikhethekileyo Esakhiwe Ngamaphepha

MHLAWUMBI uyazibuza ukuba, “singakho njani isixeko esakhiwe ngamaphepha?’ Ewe sikhona, kodwa ayisiso esokwenene, ngumfanekiso wesixeko. Ngumfanekiso wesixeko sasePrague, ikomkhulu leCzech Republic ogcinwe kwiMyuziyam Yomasipala walapho. Lo mfanekiso wakhiwa nguAntonín Langweil owachitha iminyaka eli-11 ewakha, ukususela ngowe-1826 ukusa kowe-1837, unyaka awafa ngawo. Kwakutheni ukuze aqalise umsebenzi onzima kangako?

ULangweil wazalwa ngowe-1791 kwidolophu yasePostoloprty kwelo kuthiwa yiCzech Republic ngoku. Akugqiba izifundo zokushicilela kwiArt Academy yaseVienna eOstriya, wavula ishishini lokushicilela lokuqala ePrague. Noko ke, ishishini lakhe latshona. Ngowe-1826, xa wayekumsitho othile ePrague, wabona umfanekiso owawenziwe ngesamente wesixeko saseFransi, iParis. Lo mfanekiso wawuthanda kangangokuba wagqiba ekubeni enze owesixeko sasePrague, esebenzisa amakhadibhodi neentsasa.

Noko ke, waqala wachitha iminyaka eliqela eqokelela iinkcukacha zesixeko sasePrague. Wayehamba kuzo zonke izitrato zelo, ezoba yaye ehlola indawo nganye esikuyo isakhiwo, izitulo ezisepakini, iishedi, imifanekiso eqingqiweyo nemithi. Wada waquka nemigqomo awayibona iwile, iifestile ezaphukileyo, ileli eyayimiswe eludongeni kunye neenkuni. Emva koko waqalisa ukwenza umfanekiso wakhe. Ukuze afumane imali yokuxhasa loo msebenzi, wenza imifanekiso yemizi yezidwangube zalapho.

Ngowe-1837, wahlaselwa sisifo sephepha waza wasutywa kukufa ngoJuni waloo nyaka, eshiya ngasemva umfazi neentombi ezintlanu. Kwiminyaka emithathu kamva, umfanekiso wakhe wasiwa kwiPatriotic Museum, ngoku ekuthiwa yiMyuziyam Yesizwe. Waya kufika njani apho? Ngowe-1840, umhlolokazi kaLangweil wathengisela uMlawuli uFerdinand I lo mfanekiso ibe yena waphisa ngawo kule myuziyam. Wafika uziinxalenye ezisithoba. Kamva, iMyuziyam Yomasipala wasePrague indawo okuyo ngoku lo mfanekiso yathi: “Umfanekiso kaLangweil kuye kwaboniswa ngawo izihlandlo ezimbalwa ngenkulungwane ye-19. Ngowe-1891, wawuyenye yezinto ekwaboniswa ngazo kwiProvincial Jubilee Exhibition. Xa kwakulungiselelwa lo msitho, kwachithwa intywenka yemali kulungiswa lo mfanekiso . . . Ukususela ngowe1905, lo mfanekiso ubusoloko uyinxalenye yezinto ezisisigxina eziboniswa kwiNational Museum, iLapidarium.”

Uyathandwa Ngababhali-mbali

Lo mfanekiso uthandwa gqitha. Lo mfanekiso uziimitha ezi-5.76 ubude nezi-3.24 ububanzi, ugcinwe kwibhokisi yeglasi ehonjiswe ngentlaninge yezibane ezincinane ezikuloo bhokisi. Ubonakala ngathi sisixeko sokwenene kangangokuba ude ulibale ukuba ngumfanekiso. ULangweil wakha ngononophelo isakhiwo ngasinye kwezo zincinane zingaphezu kwamawaka amabini zikulo mfanekiso.

Wada waquka neenombolo zezo zakhiwo. Wafakela izibane zezitrato, imijelo yamanzi neendlela zokuhamba abantu. Wenza nezakhiwo zeecawa kuquka iifestile zazo ezinamabala—nkqu nezaphukileyo okanye ezingasekhoyo. Ude aveze nezitena kwezo zindlu zinesamente exobukileyo. Waquka noMlambo iVltava, onqumla kwisixeko sasePrague.

Namhlanje, lo mfanekiso awupheleli nje ekuthandweni ngabantu abatyelele kule myuziyam, kodwa kunjalo nangabathandi bemizobo nababhali-mbali abafuna ukubona indlela esitshintshe ngayo isixeko sasePrague ukutyhubela iminyaka. Kakade ke, esi sixeko asisafani ncam neso sikulo mfanekiso ngenxa yokwakhiwa ngokutsha nokulungiswa kwezakhiwo ezithile, ngakumbi iindawo ezihlala amaYuda nenxalenye ekuthiwa yiOld Town. Ngenxa yobugcisa bezi mini, umfanekiso kaLangweil ufakwe kwikhompyutha nto leyo enceda abantu abatyeleleyo babone ukuba sasinjani isixeko sasePrague ngowe-1837.

NgoAprili 1837, uLangweil owayegulel’ ukufa wacela ukuba umfanekiso wakhe ubekwe kwiPatriotic Museum, kodwa abaphathi bayo bala. Umele ukuba wadana gqitha! Cinga nje indlela abenokuvuya ngayo namhlanje xa ebenokuwubukela kwikhompyutha lo mfanekiso wakhe. Ebeya kuqonda ukuba ukusebenza nzima kwakhe kwakungelolize.

[Umfanekiso okwiphepha 10]

UAntonín Langweil

[Umfanekiso okwiphepha 10]

Isixeko sasePrague esakhiwe ngamaphepha nguLangweil

[Umfanekiso okwiphepha 10, 11]

Indlela obonakala ngayo umfanekiso kaLangweil xa uwujongele kufutshane

[Inkcazelo Ngemifanekiso ekwiphepha 10]

Iphepha 10, Langweil: S laskavým svolením Národního muzea v Praze; iphepha 10 nele-11, model photos: S laskavým svolením Muzea hlavního mesta Prahy