Ulwaphulo-mthetho Kwihlabathi Elineziphithiphithi
ULWAPHULO-MTHETHO aluyonto intsha. Ukubulawa komntu kokuqala kwenzeka kwiminyaka engamawaka eyadlulayo xa uKayin wabulala umntakwabo uAbheli. Ubudlwengu nobufanasini buyakhankanywa kwiZibhalo zesiHebhere zamandulo. (Genesis 4:8; 19:4, 5; 34:1-4) Abantu babephangwa ngenkulungwane yokuqala yeXesha lethu Eliqhelekileyo, njengoko umzekeliso womSamariya olungileyo ubonisa. (Luka 10:29-37) Kodwa kukho umahluko namhlanje.
Abantu abakwizixeko ezininzi ezikhulu zehlabathi, enoba yiNew York, yiLondon, yiCalcutta okanye yiBogotá, bavakalelwa kukuba ulwaphulo-mthetho lwesamele ngakumbi yaye lusongela ngakumbi. Ingxelo ephuma kwiIndia Today enomxholo othi “Ihlelo Lokuchas’ Umthetho” ithi: “Into ephazamisayo nebonakala ngathi iza kuphelisa naloo msontwana ucekethekileyo wokuziphatha nowentlalo ogcina ilizwe limanyene kukwanda kogonyamelo, ukungaqeqesheki nokuchas’ umthetho kwihlelo.” Ekulweleni kwawo ukuphelisa ulwaphulo-mthetho, maxa wambi namapolisa ahendelwa ukuba ayityeshele imiqathango yomthetho aze asebenzise iindlela zabaphuli-mthetho. Ingxelo ekhankanywe ngaphambilana ephuma eIndiya ithi: “Ukufa kwabantu abaselugcinweni lwamapolisa kuqhubeka kungundaba-mlonyeni.” Oko kukwanjalo nakwamanye amazwe.
Amathuba okuba lixhoba lolwaphulo-mthetho abonakala esiya esiba maninzi ngakumbi. Ingxelo evela eUnited States ithi “ikhaya elinye kumakhaya amane aseMerika lahlaselwa lulwaphulo-mthetho logonyamelo okanye lobusela ngowe-1988.” Ngaphezu koko, ngoku abantu benza ulwaphulo-mthetho lobundlobongela beselula ngeminyaka. Iphephancwadi laseMzantsi Merika iVisión lithi “iisicarios [ababulali abahlawulwayo] ezisithoba kwezilishumi ngabantwana abancinane. [‘Zingabantwana’] ngokwemvelo nangengqiqo yokuba ziyakhuselwa ngumthetho.” Kwakhona, ulwaphulo-mthetho lobundlobongela lwabantwana abancinane lutyekelo lwehlabathi lonke.
Phantse iminyaka engama-2 000 eyadlulayo iBhayibhile yaprofeta isithi: “Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, . . . abangengcwele, abangenabubele, . . . abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi . . . bona abantu abangendawo noosiyazi, kukhona baya kuhambela phambili ebubini, belahlekisa, belahlekiswa.”—2 Timoti 3:1-4, 13.
Ukususela ngowe-1914 bekukho ubungqina obuninzi bokuba siphila kuloo mihla yokugqibela inomngcipheko. Ihlabathi, ekubeni liye lathwaxwa ziimfazwe ezimbini zehlabathi nangamanye amadabi amakhulu, liye ngeendlela ezininzi laba lelingalawulekiyo, elineziphithiphithi. Ulwaphulo-mthetho lwesamele. Kwimimandla emininzi yasezidolophini izaphuli-mthetho ziyalawula, zibangela inkoliso yabantu egcina umthetho iguqule iindlela ephila ngazo. Kunjengokuba ilungu lendlu yeengwevu elidumileyo laseUnited States lathi: “Kukho izinto ezininzi kakhulu ezixhalatyelweyo ngoku, izinto ebesidla ngokungazoyiki. Maxa wambi soyika kangangokuba siba ngamabanjwa, ngoxa abo bebefanelwe kukuvalelwa behamba bekhululekile.”
Ngenxa yoko, abantu namhlanje bathabatha amanyathelo okulumka awayengeyomfuneko kwiminyaka engama-20 okanye engama-30 eyadlulayo. Iminyango inezitshixo ezibini okanye ezithathu yaye ivalwa iqiniswe ngeentsimbi. Abantu kwiindawo ezininzi baphatha imali eninzi ukuze banelise umphangi ngethemba lokuba abayi kubethwa kuba bengenanto baza kuyinika amasela. Phantse izitrato ezininzi azibi nabantu emva kokutshona kwelanga, ubona nje imbinana engazi nto, amadela-ngozi nabo banyanzelwa ziimeko ukuba babe lapho—abathi babe zizisulu zoonqal’ intloko abadakasa ezidolophini.
Yintoni esinokuyenza ukuze siphephe ukuba ngamaxhoba olwaphulo-mthetho kweli hlabathi lineziphithiphithi nelinokuchas’ umthetho? Sinokuhlangabezana njani nalo?