Ukuhlangabezana Nolwaphulo-mthetho Kwihlabathi Elineziphithiphithi

NGABA uyakoyika ukuphuma phandle ebusuku? Ngaba kufuneka ube nezitshixo ezibini okanye ezithathu kwiingcango nakwiifestile zakho? Ngaba wakhe wabelwa inqwelo-mafutha yakho okanye ibhayisekile yakho? Ngaba unomathotholo wakho wakhe watyhuthulwa kwinqwelo-mafutha yakho? Ngaba uziva ungakhuselekanga xa uhamba kwimimandla ethile?

Ukuba uphendula ngokuthi ewe kuyo nayiphi na yale mibuzo, ngoko uyazama ukuhlangabezana nolwaphulo-mthetho kweli hlabathi lineziphithiphithi. Yintoni onokuyenza ngale meko? Ngaba iBhayibhile inokukunceda uhlangabezane nayo?

Isimo Sengqondo Sezaphuli-Mthetho Nokusesikweni

Kwihlabathi elinolwaphulo-mthetho, kukho izinto ezintathu ezisisiseko: izaphuli-mthetho, amapolisa namaxhoba. Yintoni eyimfuneko ukuze wena, wena osenokuba lixhoba, ukwazi ukuhlangabezana nolwaphulo-mthetho? Ngaba unokuba nempembelelo ethile kuyo nayiphi na enye yezi zinto zintathu? Ngokomzekelo, ngaba unokuziguqula izaphuli-mthetho?

Kaloku, izaphuli-mthetho ezininzi ziye zalwenza umsebenzi wazo ulwaphulo-mthetho. Zikhetha lona njengeyona ndlela ilula yobomi. Zibonakala zisebenzisa intetho ethi ‘Indoda imba kwenye eqolo.’ Abaphangi bayazi ukuba ixhoba eliqhelekileyo liya kuyikhupha ngaphandle kokuxhathisa imali yalo. Yaye ekubeni bengenakufane babanjwe baze baye kuvalelwa entolongweni, ngabo ulwaphulo-mthetho luyahlawula.

Ngaphezu koko, iinkqubo zeenkundla zamatyala zintsonkothile yaye zidla ixesha. Kumazwe amaninzi, iinkundla zamatyala, abagwebi neentolongo zimbalwa kakhulu. Amatyala olwaphulo-mthetho maninzi kunokuba inkqubo yomthetho injalo. Inkqubo yomthetho iyazekelela kangangokuba imeko injengoko iBhayibhile yayichazayo kwiminyaka engaphezu kwamawaka amathathu eyadlulayo: “Ekubeni isigwebo singawiswa kamsinyane emsebenzini ombi, ngenxa yoko intliziyo yoonyana babantu izele ngaphakathi kwabo kukwenza okubi.” Njengokuba lo mgaqo weBhayibhile ubonisa, akukho themba lingako lokuba le meko iya kuconjululwa ngokunciphisa inani lezaphuli-mthetho okanye ngokuziguqula.—INtshumayeli 8:11.

Kuthekani ngenxalenye yesibini, amapolisa? Ngaba likho ithemba lokuba amapolisa aya kuyoyisa le meko? Wona kanye aza kuphendula athi: Ekubeni imithetho idla ngokoyiswa ngamalungelo esaphuli-mthetho, ekubeni kukho amagqwetha anganyanisekanga asebenzisa kakubi umthetho ukuze akhulule umntu onetyala, ekubeni oorhulumente bemathidala ukuhlawula indleko enkulu yokwakhiwa kweentolongo ezingakumbi nezinkudlwana, yaye ekubeni enqongophele kangaka amapolisa, akukho nto ingako anokuyenza ukulwa olu lwaphulo-mthetho lwesameleyo.

Oko kushiya inxalenye yesithathu, abo basenokuba ngamaxhoba: thina, abantu ngokubanzi. Ngaba kukho nantoni na esinokuyenza ukuzinceda sihlangabezane kakuhle nolwaphulo-mthetho kule meko ephantse ibe yeyokungabikho komthetho?

Ubulumko Obusebenzisekayo Nengqondo Yemvelo

Incwadi yeBhayibhile yeMizekeliso ithi: “Londoloza uzimaso [ubulumko obusebenzisekayo, NW] nonkqangiyelo. Zoba bubomi emphefumlweni, nento entle emqaleni wakho. Uya kwandula uhambe ngendlela yakho ukholosile. Lungabetheki unyawo lwakho.” Esi siluleko sinokusebenza kwiimeko ezisenokwenza ubani abe lixhoba lolwaphulo-mthetho. Ziziphi ezinye zeendlela ubulumko obusebenzisekayo obunokusinceda ngazo kule nkalo?—IMizekeliso 3:21-23.

Izaphuli-mthetho zityekele ekufaneni namarhamncwa aqwengayo. Zikhangela izisulu. Azifuni kuzichanaba ekulweni nasekubanjweni okunokwenzeka ukuba zinokuzuza okufanayo kwixhoba elifumaneka lula. Ngoko zinxusa abakhulileyo, abagulayo, abadidekileyo nabo basenokuba abaqondanga ukuba bakwimeko eyingozi. Izihange zikhetha ixesha nendawo ezilungela kakuhle ukuba zihlasele. Abo basenokuba ngamaxhoba banokubusebenzisa kule meko ke ubulumko obuluncedo.

Njengokuba iBhayibhile ibachaza, ngokufuthi abathandi bobubi bayenzela ebumnyameni imisebenzi yabo. (Roma 13:12; Efese 5:11, 12) Kuyinyaniso namhlanje ukuba ulwaphulo-mthetho oluninzi olwenziwa ebantwini nasempahleni lwenziwa ebusuku. (Thelekisa uYobhi 24:14; 1 Tesalonika 5:2.) Ngoko ke, apho kunokwenzeka umntu osisilumko uya kukuphepha ukuhamba kwimimandla eyingozi ngexesha lasebusuku. Kwisixeko saseNew York esikhathazwa lulwaphulo-mthetho, ingxelo yamapolisa yemihla ngemihla ibonisa ukuba abantu abaninzi baphangwa emva kokutshona kwelanga yaye ingakumbi emva kwentsimbi yeshumi ebusuku, ngokuqhelekileyo njengoko bebuyela kumagumbi abo. Aba nqal’ intloko bahlala kwizitrato ezingenabantu baninzi bezungula amaxhoba. Ngenxa yoko, ukuba kufuneka ukhethe phakathi kokulinda uduladula okanye iteksi nokuhamba unqumla kummandla oyingozi, yiba nomonde uze ulinde. Kungenjalo, amava asenokuba ngabuhlungu.

Omnye umKristu wabethwa kakhulu waza waphangwa xa kunokulinda uduladula malunga nentsimbi yeshumi ebusuku, wahamba umgama omfutshane ebumnyameni. Babekho abanye abantu esitratweni, kodwa imigulukudu emithathu yayimcuphile lo wayengaphaphanga. Omnye umgulukudu wenzela eminye umqondiso xa owayenokuba lixhoba wayenyuka ngesitrato. Zingakhuphanga nelimdaka, zalibetha ixhoba zandula ke zaliphanga izinto zalo. Oku kwenzeka ngephanyazo kangangokuba nommelwane akazange abe nalo nexesha lokulamla. Eli xhoba kamva lavuma lathi: “Kwixesha elizayo ndiza kulinda uduladula.”

UMguvela Oyincutshe, umkhuthuzi oselula nekuthethwe ngaye kwinoveli kaDickens ethi Oliver Twist, wayengeyonto xa kuthelekiswa nenjubaqa oyibona estratweni namhla. Ngokungafaniyo naloo Mguvela Oyincutshe, amasela nabaphangi banamhlanje, kungakhathaliseki ubudala babo, basenokuphatha umpu okanye imela, yaye baza kuyisebenzisa. Abakhenkethi abangayaziyo loo ndawo, iindwendwe nabo bafane bayabule kwisixeko esinyakazela abantu baba zizisulu zezo zihange zingenalusini. Ngephanyazo ziya kuxwila nantoni na efumanekayo ngaphambi kokuba uzibone nokuzibona! Yintoni enokutsala iliso lesela? Likhonkco legolide okanye elinye ilitye elinqabileyo nelixabiso likhulu elinxitywe ngokuphandle. Okanye ikhamera ejinga entanyeni yomkhenkethi. Kufana nokunxiba umqondiso othi, “Yiza uze kuzithathela!” Ngaloo ndlela, kufuneka ingqiqo. Wafihle nawaphi na amatye anqabileyo, yaye faka ikhamera kwinto engenakufane itsale iliso labanye, mhlawumbi uyifihle kwingxowa yokufaka izinto ozithengileyo. Oku kukusebenzisa ubulumko.

Ukuba ngophaphileyo yenye indlela yokuhlangabezana nolwaphulo-mthetho. IBhayibhile ithi: “Isilumko, amehlo aso asentlokweni yaso; ke sona isinyabi sihamba emnyameni.” (INtshumayeli 2:14) Ukusebenzisa esi silumkiso kwingxaki yolwaphulo-mthetho kuya kumnceda ubani abaphawule abantu abazulazula ngokurhanelekayo bengenasizathu sicacileyo. Lumkela amasela asenokuza emva kwakho aze axwile ingxowa yakho njengoko usihla ngesitrato. Yaye ekubeni abanye bekhwela izithuthuthu baze bathi xwii izinto zabanye abantu njengoko bedlula ngesantya esikhulu, ungaze uhambe kanye ekupheleni kwendledlana eyayame istrato, ingakumbi ukuba uphethe naluphi na uhlobo lwebrifkheyisi okanye ingxowa encinane. Ziphephe iinqwelo-mafutha ezihamba kwiindlela ezingaphantsi komhlaba kwiindawo phantse ezingenabantu. Ukhuselekile phakathi kwenyambalala yabantu apho kukho ukukhanya okuninzi. Amasela akafuni kubonwa aze afaniswe.

Ukuqhekeza lolunye ulwaphulo-mthetho oluqhelekileyo olunokuphetshwa ngokufuthi ukuba abantu bebeluphaphele ngakumbi ulwaphulo-mthetho. IBhayibhile yalusebenzisa ngokufanelekileyo olu faniso: “Bangena ngeefestile njengesela.” (Yoweli 2:9) Ubulumko bumisela ukuba ungashiyi iingcango zingatshixwanga okanye iifestile zingavalwanga. Kusoloko kuyinyaniso ukuba kulunge ngakumbi ukuyithintela into kunokuzama ukulungisa umonakalo osele ukho. Iindleko ezingakumbi zokukhusela ikhaya lakho ngokwenene ziqinisekisa ukukhuseleka kubusela nokwenzakala emzimbeni.

Kuthekani Ukuba Uyaphangwa?

Ewe, kuthekani ukuba, phezu kwako nje ukuphapha, umiswa ngumphangi? Zama ukungaphakuzeli okanye wenze nantoni na ungacinganga. Khumbula ukuba nesela lisenokothuka yaye lisenokukuqonda phosakeleyo oko ukwenzayo. Zama ukuthetha uze uqiqe naloo mntu ukuba uyakuvumela. (Ewe, umntu okuhlaselayo usenokuba libhinqa.) Maxa wambi abaphangi baye bazoliswa kukwazi ukuba bahlasela umKristu onyanisekileyo nowokwenene. Ingakhathaliseki indlela abasabela ngayo, musa ukuzama ukuxhathisa ukuba bafuna nje imali okanye iimpahla zakho. Banike nantoni na abayifunayo. IBhayibhile ifundisa ukuba ubomi bomntu buxabiseke ngakumbi kunayo nantoni na asenokuba unayo.—Thelekisa uMarko 8:36.

Ngaphandle kokwenza kubonakale ngathi umhlolisisa ngokusondeleyo, zama ukuphawula naziphi na iimpawu ezahlukileyo lo mphangi asenokuba nazo, enoba yimpahla okanye imbonakalo yomzimba. Uthetha ngaluphi uhlobo? Zonke ezi nkcukacha zisenokuba luncedo xa unikela ingxelo yolwaphulo-mthetho emapoliseni, ekubeni inkoliso yezaphuli-mthetho inendlela yayo yobuqu esoloko iqhuba ngayo kwaye ngaloo ndlela inokufaniswa ngokulula ngakumbi.

Kuthekani ngokuphatha izixhobo ukuze uzikhusele? Ngokuqinisekileyo bekungayi kuba bubulumko ngomKristu ukuphatha izixhobo. Ukuba isihange besicinga ukuba ufuna ukukhupha isixhobo, besingayi kulibazisa ukukwenzakalisa okanye ukukubulala. Ngaphezu koko, ubuya kuba uwulandela njani umgaqo weBhayibhile ‘wokuba noxolo kubantu bonke’ ukuba uxhobele ukuhlasela ngogonyamelo ngenjongo yokuphindisa?—Roma 12:18.

Kungakhathaliseki enoba uthabatha waphi na amanyathelo obulumko, akukho siqinisekiso sokuba ngamini ithile akuyi kuba lixhoba. Kwiidolophu ezinolwaphulo-mthetho, usenokuba kwindawo ephosakeleyo ngexesha eliphosakeleyo. Kungekudala kakhulu eNew York, elinye igqwetha laphuma kwiofisi yalo lisiya kuthenga ikomityi yekofu. Njengoko lalingena evenkileni, ulutsha oluthile lwadlula apho ngenqwelo-mafutha lwaza lwadubula kuloo ndawo. Eli gqwetha lachanwa yimbumbulu entloko laza lafa. Ngenxa ‘yexesha nesihlo,’ laphulukana nobomi balo. Enjani yona intlekele! Ngaba likho ithemba lesicombululo esihlala sihleli soku kwesamela kukhoyo kolwaphulo-mthetho olusasazeke ehlabathini?—INtshumayeli 9:11.

Xa Ulwaphulo-mthetho Luya Kuphela

Phantse kwiminyaka engamawaka amabini eyadlulayo, uYesu waxela kwangaphambili ukuba kwakuya kuza isizukulwana esasiya kubona iziganeko ezoyikisa ngakumbi kunaso nasiphi na isizukulwana sangaphambili. Ekubeni zinomabonwakude nonxibelelwano olukhawulezayo, izigidi, hayi, amawaka ezigidi, azibonela ngamehlo kumajelo awo eendaba asekuhlaleni izenzo zenkohlakalo njengoko zisenziwa ngokoqobo. Ihlabathi liye laba yidolophu encinane, yaye iindaba zehlabathi ngequbuliso ziba ziindaba zasekuhlaleni. Ngenxa yoko, izinto zokoqobo ezenzekayo zisichaphazela imihla ngemihla, yaye njengoko uYesu waprofetayo, abantu abaninzi ‘bayafa kukoyika nakukulindela izinto ezilizelayo elimiweyo.’—Luka 21:26.

UYesu wazibona kusengaphambili iziganeko eziye zenzeka ukususela ngowe-1914, ziganeko ezo ezaziya kutshayelela ‘ukupheliswa kwephakade eli.’ (Mateyu 24:3-14) Kodwa wakwathi: “Xa nithe nazibona ezi zinto zisihla, yazini ukuba bukufuphi ubukumkani bukaThixo.” (Luka 21:31) Oko kuthetha ukuba ulawulo lukaThixo lobulungisa luya kuthi kungekudala luwuchaphazele ngokuphawulekayo umhlaba.—Mateyu 6:9, 10; ISityhilelo 21:1-4.

Phantsi kolo lawulo, kuphela ngabalulamileyo, abanoxolo nabo bamthobelayo uThixo abaya konwabela iimeko zeParadisi yasemhlabeni. Kuya kwenzeka ntoni kwizaphuli-mthetho nakubenzi-bubi? “Baya kusikwa kamsinyane njengengca, babune njengohlaza oluphumayo. Ngokuba abenzi bobubi baya kunqunyulwa; ke bona abamthembayo uYehova, baya kulidla ilifa ilizwe.” Phantsi kwaloo rhulumente wobulungisa wasezulwini, akuyi kubakho ziphithiphithi okanye ulwaphulo-mthetho.—INdumiso 37:2, 9.

Ukuba ungathanda ukwazi okungakumbi ngeli themba lisekelwe eBhayibhileni lorhulumente wehlabathi woxolo nohlala uhleli, qhagamshelana namaNgqina kaYehova kwindawo ohlala kuyo okanye kwiHolo yawo yoBukumkani yasekuhlaleni. Aya kukunceda ngovuyo ukuba uyiqonde iBhayibhile, ngesisa.

[Amagama acatshulweyo akwiphepha 6]

“Abenzi bobubi baya kunqunyulwa; ke bona abamthembayo uYehova, baya kulidla ilifa ilizwe”

[Imifanekiso ekwiphepha 7]

Umkhuthuzi kaCharles Dickens, uMguvela Oyincutshe, wayengeyonto xa ethelekiswa nabaphangi banamhla

[Inkcazelo]

Graphic Works of GEORGE CRUIKSHANK, by Richard A. Vogler, Dover Publications, Inc.