Imibuzo Evela Kubafundi
◼ Ngaba kufanelekile ngomfazi ongumKristu ukusebenzisa izihombiso ezinamatye anqabileyo okanye izithambiso ezithile, ajike ibala leenwele zakhe, okanye enze izinto ezinjengezo?
Ngaphambili nakumhla wethu, bambi abathi balandela iBhayibhile baye bavelisa iimbono ezibukhali kodwa ezahluke gqitha malunga nokuzihombisa.a
Kwiicawa ezithile abafazi abazisebenzisi nje kwaphela izinto zokuthambisa nezihombiso ezinamatye anqabileyo. Ngokomzekelo, incwadi ethi The Amish People inikela ingxelo yokuba “banemiqathango ebekiweyo engembonakalo yabo engokwasemzimbeni kuba bavakalelwa kukuba naliphi na ilungu elinqwenela ngamandla ukukhangeleka ngokwabantwana behlabathi lisengozini, ekubeni [loo] mnqweno ufanele ube kwizinto zokomoya kunakwezokwenyama. Bambi . . . badla ngokucaphula iZibhalo.”
Ngoko isibhalo esacatshulwayo seseyoku-1 kaSamuweli 16:7 esithi: “Wathi uYehova kuSamuweli, Musa ukukhangela imbonakalo yakhe, nokuphakama kwesithomo sakhe . . . Ngokuba umntu ukhangela umphandle, uYehova ukhangela intliziyo.” Noko ke, loo mbhalo ubhekisela kubude bomntakwabo Davide uEliyabhi. Kucacile ngokusuka kumongo waso ukuba uThixo apha wayengathethi ngeendlela zokuzilungisa, njengokukhangela enoba uDavide okanye abantakwabo babezilungisile iinwele zabo okanye besebenzise izinto zokuzihombisa kwizambatho zabo.—Genesis 38:18; 2 Samuweli 14:25, 26; Luka 15:22.
Oku kubonisa ukuba bambi abagxininisa kwelokuba amaKristu afanele abe ngaqhelekileyo ngokukhethekileyo, engasebenzisi zithambiso okanye izihombiso ezinamatye anqabileyo, bafuna ukuxhasa oko ngokusebenzisa izibhalo kakubi. Enyanisweni iBhayibhile ayinikeli nkcazelo inazinkcukacha ngokuzilungisa; ingavumeli nokusetyenziswa kwezithambiso ezithile zomzimba ngoxa isalela ezinye. Kuphela into eyinikelayo lukhokelo olunengqiqo. Makhe siqwalasele olu khokelo size sibone indlela olunokusetyenziswa ngayo namhlanje.
Umpostile uPawulos wanikela ukhokelo oluphefumlelweyo esithi: “Mabathi nabafazi banxibe iingubo ezifanelekileyo, beneentloni, benesidima, ingabi kukuphotha iinwele, nokunxitywa kwegolide neeperile, nesambatho esixabiso likhulu.” (1 Timoti 2:9) UPetros wabhala okufanayo esithi: “Ukuhomba kwenu makungabi kokwangaphandle, kokulukwa kweenwele, nokunxitywa kwegolide, nokwambathwa kweengubo; makube kokomntu ofihlakeleyo wentliziyo, ovethe ukungonakali, umoya onobulali, ozolileyo, oxabiso likhulu emehlweni kaThixo.”—1 Petros 3:3, 4.
Amagama esiGrike apho aguqulelwe ngokuthi ‘ukunxiba,’ “ezifanelekileyo,” nelithi “ukuhomba” avela kwelithi koʹsmos, gama elo likwayingcambu yegama elithi “cosmetic (izinto zokuthambisa umzimba),” elithetha “ukuzenza mhle ngoku-[kodwa] ibala lolusu.” Ngoko le mibhalo isinceda siphendule imibuzo engokusetyenziswa kwezinto zokuzithambisa, izihombiso ezinamatye anqabileyo nezinye izinto zokuzihombisa kwamabhinqa.
Ngaba uPawulos noPetros bathetha ukuba amaKristu amele angazoluki iinwele zawo, angazinxibi iiperile nezinto ezenziwe ngegolide, okanye xa kusongezelelwa, angazisebenzisi nezinto zokuthambisa? Akunjalo. Ukuthi babethetha oko bekuya kuthetha ukuba oodade abangamaKristu bafanele baphephe ‘nokwambatha iingubo.’ Ukanti, uDorkas, owavuswa nguPetros, wayethandwa ngenxa yokuba wayesenzela abanye oodade “iingubo zokwaleka.” (IZenzo 9:39) Ngenxa yoko, eyoku-1 kuTimoti 2:9 neyoku-1 kaPetros 3:3, 4 azithethi kuthi oodade bamele bangazoluki iinwele zabo, bangazinxibi iiperile, izambatho zokwaleka, njalo njalo. Kunoko, uPawulos wayebethelela imfuneko yokuba nokuthozama nesidima ekuzilungiseni kwamabhinqa. UPetros wabonisa ukuba abafazi bafanele banikele ingqalelo engakumbi kumntu ongaphakathi ukuze bazuze amadoda abo angakholwayo, bangagxininisi kwimbonakalo yangaphandle okanye ekuzithambiseni.
Ngamany’ amazwi xa sikubeka oku ngokulula, iBhayibhile ayiyaleli yonke imigudu yokuphucula okanye yokuhombisa imbonakalo kabani. Bambi kubakhonzi bakaThixo, amadoda nabafazi ngokufanayo, babezisebenzisa izihombiso ezinamatye anqabileyo. (Genesis 41:42; Eksodus 32:2, 3; Daniyeli 5:29) UEstere owayethembekile wakuvuma ukuhlala ithuba elithile elide esenziwa mhle ngokuthanjiswa ngeoli, iziqholo zomzimba ezinevumba elimnandi nangezinto ezithile zokuthambisa. (Estere 2:7, 12, 15; thelekisa uDaniyeli 1:3-8.) UThixo wathi ngokomfuziselo wavathisa uSirayeli ngezacholo, imixokelelwane yomqala, ikhonkco lempumlo namajikazi eendlebe. Oko kwafak’ isandla ekubeni abe ‘mhle kakhulu kunene.’—Hezekile 16:11-13.
Noko ke, ingxelo ekuHezekile, isifundisa ukuba singanikeli ingqalelo egqithiseleyo kwimbonakalo. UThixo wathi: “Wesuka wena wakholosa ngobuhle bakho, wahenyuza ngenxa yodumo lwakho; ubuhenyu bakho wabuthululela phezu kwabo bonke abadlulayo.” (Hezekile 16:15; Isaya 3:16, 19) Ngaloo ndlela, uHezekile 16:11-15 ubethelela ubulumko obukwisiluleko samva sikaPawulos noPetros esimalunga nokunganikeli ingqalelo egqithiseleyo kwimbonakalo yangaphandle. Ukuba umfazi ukhetha ukuzihombisa ngezihombiso ezinamatye anqabileyo, ubungakanani bazo nohlobo ezilulo lufanele lubonakalise ukuthozama kungabi ngohlobo olugqithiseleyo okanye, olubaxiweyo uhlobo olutsala injezu.—Yakobi 2:2.
Kuthekani ngokusebenzisa kwebhinqa elingumKristu izithambiso ezithile, njengelipstick, izinto zokujika ibala lezidlele, okanye izinto zokwandisa imisebe (eye shadow) nezenza amehlo abe mnyama (eyeliner)? Abembi bezinto zakudala kwaSirayeli nakufuphi khona baye bafumanisa izinto ekwakufakwa kuzo izithambiso, ndawonye nezixhobo zokuziqaba nezipili. Ewe, abafazi baseMpumalanga yamandulo babesebenzisa izithambiso ezazisetyenziswa ngaphambi kweemveliso ezininzi ezisetyenziswa namhlanje. Kunokwenzeka ukuba igama lentombi kaYobhi elinguKeren-hapuki lalithetha “Uphondo Lomsizi (Weliso) Omnyama,” okanye into ekufakwa kuyo into ethanjiswa emehlweni.—Yobhi 42:13-15.
Zimbi izinto zokuthambisa zazisetyenziswa kwaSirayeli, ukanti imizekelo yeBhayibhile ibonisa ingozi yokuzisebenzisa ngokugqithiseleyo. Kwiminyaka emva kokuba engukumkanikazi wakwaSirayeli, uIzebhele ‘waziqaba amehlo, wazihombisa entloko.’ (2 Kumkani 9:30) Kamva xa wachaza indlela uSirayeli awafuna ngayo ingqalelo yokuziphatha okubi yeentlanga ezingakholwayo, uThixo wathi ‘wazivathisa ngezivatho zegolide, wawenza makhulu amehlo ngomsizi, waza wazenza mhle.’ (Yeremiya 4:30; Hezekile 23:40) Ayikho kwezo ndinyana okanye kuzo naziphi na ezizezinye ethi akufanelekanga ukusebenzisa iindlela ezingezizo ezendalo ukuphucula imbonakalo yothile. Sekunjalo, ibali likaIzebhele libonisa ukuba wayewanyhibhele ngomsizi amehlo akhe kangangokuba wawunokuphawulwa ngumntu emgama, kwananguYehu owayengaphandle kwebhotwe. Yintoni esiyifundayo koku? Musa ukuzinyhibhela ngezithambiso, uzisebenzise ngendlela ebaxiweyo.b
Kambe ke, akukho namnye umfazi osebenzisa izihombiso ezinamatye anqabileyo okanye izithambiso onokuthi inkqubo yakhe nomlinganiselo awusebenzisayo awufanelekanga. Kanti, alinakukhanyelwa elokuba ngenxa yokungaqiniseki ngesiqu sakhe okanye ukuphenjelelwa zizibhengezo ezilahlekisayo, umfazi unokungenwa ngumkhwa wokuzisebenzisa ngokugqithiseleyo izithambiso. Unokuyiqhela ngokugqithiseleyo indlela akhangeleka ngayo kangangokuba asilele ukuqonda ukuba ayivisisani ‘nokuthozama nesidima’ kwenkoliso yabafazi abangamaKristu.—Bona uYakobi 1:23, 24.
Kuyavunywa ukuba, iindlela zokuzilungisa ezithandwa ngabantu zahlukahlukene; abanye abafazi basebenzisa izithambiso kancinane okanye abazisebenzisi kwaukuzisebenzisa okanye abazisebenzisi kwaphela izihombiso ezinamatye anqabileyo, abanye bazisebenzisa kakhulu. Ngoko kububulumko ukungagwebi namnye osebenzisa umlinganiselo owahlukileyo wezithambiso okanye izihombiso zamatye anqabileyo. Esinye isibakala lisiko lasekuhlaleni. Into yokuba iintlobo ezithile zamkelekile kwelinye ilizwe (okanye zaziqhelekile kumaxesha amandulo) ayithethi kuthi kuyacebiseka ukuzisebenzisa ekuhlaleni namhlanje.
Umfazi olumkileyo ongumKristu uya kuthi ngezihlandlo ezithile awuhlolisise umlinganiselo wokuzilungisa kwakhe, ezibuza ngako konke ukunyaniseka oku: ‘Ngaba ndithi ngokuqhelekileyo ndisebenzise izihombiso ezinamatye anqabileyo ngokuqaqambileyo okanye ndizithambise ngaphezu kwenkoliso yamaKristu akummandla endihlala kuwo? Ngaba ukuzilungisa kwam ndikufanisa nokwabantu abanekratshi okanye abadlali abaphambili kwimifanekiso eshukumayo abazingcayo, okanye ngaba ndikhokelwa ngokuyintloko licebiso elikweyoku-1 kuTimoti 2:9 neyoku-1 kaPetros 3:3, 4? Ngaba indlela endizilungisa ngayo ngokwenene iyefanelekileyo, ibonisa intlonipho yokwenene ngezimvo neemvakalelo zabanye?’—IMizekeliso 31:10.
Abafazi abanamadoda angamaKristu banokufuna ukuva amagqabaza nesiluleko sawo. Kwakhona, xa lifunwa ngokunyanisekileyo, icebiso eliluncedo lisenokufunyanwa kwabanye oodade. Kodwa kunokuphethukela kumhlobo othanda okufanayo, kusenokuba kokulunge ngakumbi ukuthetha noodade abakhulileyo abahlonelwayo ngenxa yolungelelwano nobulumko babo. (Thelekisa eyoku-1 yooKumkani 12:6-8.) IBhayibhile ithi abafazi abakhulileyo abanesimilo esibafaneleyo ‘basenokuyala abafazana ukuba babe nesidima babe nyulu, ukuze ilizwi likaThixo linganyeliswa.’ (Tito 2:2-5) Akakho umKristu okhulileyo obeya kufuna indlela yakhe engafanelekanga yokusebenzisa izihombiso ezinamatye anqabileyo okanye ukusebenzisa izithambiso ezithile ibangele ukuba iLizwi likaThixo okanye abantu bakhe ‘banyeliswe.’
Ingxelo yeBhayibhile engoTamare ibonisa ukuba indlela azilungisa ngayo umfazi intama udidi alulo, idiza ubunjani balo. (Genesis 38:14, 15) Sisiphi isigidimi esidluliselwa luhlobo umfazi ongumKristu azilungise ngalo iinwele nebala leenwele zakhe (ukuba zijikwe ibala) okanye ukusebenzisa kwakhe izihombiso ezinamatye anqabileyo nezithambiso? Ngaba sesithi: Lo ngumkhonzi kaThixo ococekileyo onokuthozama nolungeleleneyo?
Umntu obona amaKristu kubulungiseleli basentsimini, okanye oya kwiintlanganiso zethu, ufanele achukumiseke kakuhle. Ngokuqhelekileyo ababukeli baba njalo. Inkoliso yabafazi abangamaKristu ayibangeli ukuba umntu wangaphandle agqibe ngelokuba bangamavuxa-vuxa, okanye kwelinye icala, bazihombisa ngokugqithiseleyo; kunoko, bazilungisa ‘ngendlela efanele abafazi abathi bahlonela uThixo.’—1 Timoti 2:10.
[Imibhalo esemazantsi]
a Ngenkulungwane yesithathu yeXesha Eliqhelekileyo, uTertullian wathi abafazi “abathambisa ulusu lwabo ngezinto ezithile zokuthambisa, bazitsho zibe bomvu izidlele zabo, bawenze aqaqambe amehlo abo ngomsizi [omnyama], bayona kuMdali.” Kwakhona wagxeka nabo baguqula ibala leenwele zabo. Esebenzisa kakubi amazwi kaYesu akuMateyu 5:36, uTertullian wabamangalela esithi: “Bayayikhanyela iNkosi! Bathi, ‘Khangela! endaweni yokuzenza mhlophe okanye sizenze nyama, senza [iinwele zethu] zibe mthubi.’” Wongezelela ngelithi: “Usekwanokufumana nabantu abaneentloni kuba besaluphala, baze bazame ukuguqula iinwele zabo ezimhlophe ekubeni zibe mnyama.” Leyo yimbono yobuqu kaTertullian. Kodwa wayeziphixanisa izinto, kuba awayekuthetha kwakusekelwe kwimbono yakhe yokuba abafazi bangunobangela wokugwetyelwa ukufa kwabantu, ngoko bafanele ‘baxelise uEva, ngokuthi babonakale belusizi yaye beguqukile’ ngenxa ‘yehlazo lesono sokuqala.’ IBhayibhile ayiyithethi into enjalo; uThixo walibeka kuAdam ityala ngenxa yesono soluntu.—Roma 5:12-14; 1 Timoti 2:13, 14.
b Kwithuba elidluleyo elingekude umthombo weendaba weUnited States wawubalaselisa ihlazo elalisaziwa nanguthathatha lomvangeli owayeshumayela kumabonwakude, ngoxa umfazi womnye asebenza naye phantse kwakunikelwe kuye ingqalelo efanayo. Ngokutsho kwengxelo yeendaba, wakhula ekholelwa kwelokuba kwakusisono ukusebenzisa “izithambiso nokubukela imifanekiso eshukumayo,” kodwa kamva wayiguqula imbono yakhe waza waphawulwa “njengozisebenzisa ngokungathethekiyo izithambiso kangangokuba xa ethambisile akhangeleke ngokungathi ngumfanekiso oqingqiweyo.”
[Imifanekiso ekwiphepha 31]
Izinto ezavunjululwa ngabembi bezinto zakudala eMbindi-Mpuma: Ibhokisi eyenziwe ngophondo yezinto zokuthambisa, isipili, nemixokelelwano yegolide neyelitye elinqabileyo
[Inkcazelo]
All three: Pictorial Archive (Near Eastern History) Est.