Ngaba Ngokwenene Izinto Ziya Zilunga?
“Udonga [lwaseBerlin] lusenokuba luya lusiba neentanda ezingakumbi njengoko amaqhina phakathi kweMpuma neNtshona eya eqina ngokuqina. Kodwa kuya kuthabatha iminyaka, kwanezizukulwana ngaphambi kokuba ludilike. IJamani ayisokuze iphinde imanyane kwakhona.” Oko koko kwakubhalwe kwiphephancwadi leendaba elidumileyo laseMerika ngoMatshi 1989.
Kungaphelanga neentsuku ezingama-250—kungaphelanga minyaka, singasathethi ke ngezizukulwana—kamva, udonga lwaqalisa ukudilika. Kwisithuba seeveki, iingceba zalo ezininzi, ngoku eziye zaguquka zaba zizikhumbuzo, kwakuhonjiswe ngazo ehlabathini jikelele.
UMDA Wokwahlukanisa Amazwe nobekukudala ukho ekugqibeleni uye wapheliswa, nto leyo eye yavelisa amathemba okuba ekugqibeleni uxolo nonqabiseko lwehlabathi lonke lwalusondele. KwaneMfazwe eyayikwiGulf kuMbindi Mpuma ayizange ilenze mfiliba ithemba lokuba usukuzwano ebekukudala lukho phakathi kweMpuma neNtshona lwaluphelile, yaye ulungelelwaniso olutsha lwehlabathi lwalusemnyango.
Ukongezelelwa Kwenkalo Entsha
Ukususela kwimfazwe yehlabathi yesibini, bekubonakala ukuba abantu bebesebenzela ukumanyanisa iYurophu. Ngowe-1951, amazwe aseNtshona Yurophu aseka uManyano Lwamazwe AseYurophu Arhweba Ngamalahle Nentsimbi (European Coal and Steel Community). Ngowe-1957 olu manyano lwalandelwa kukusekwa koRhwebo Olumanyeneyo LwaseYurophu (European Common Market). Ngowe-1987 amalungu ali-12 olu manyano lwezizwe ngezizwe (ngoku olunabantu abazizigidi ezingama-342) azibekela usukelo lokumanyanisa ngokupheleleyo ezoqoqosho ngowe-1992. Ngoku kwanomanyano olupheleleyo kwezobupolitika lubonakala luyinto enokwenzeka. Enjani yona inguqulelo ehlaziyayo okuyiyo oku ukusuka kwimbali engcoliswe ligazi yeYurophu yangaphambili!
Noko ke, ngenxa yezi nguqulelo zakutshanje kwezobupolitika, unyaka wowe-1992 ujongwe ngamehlo abomvu. Kuye kwanda ingcamango yokuba amazwe aseMpuma Yurophu awayengawobuKomanisi ngaphambili ekugqibeleni asenokuqukwa kwiYurophu emanyeneyo.
Ngaba Oku Kuxhaswa NguThixo?
Amanye amaqela onqulo, ewubetha ngoyaba umgaqo wobundilele bobuKristu, aye avumela ingcinezelo yonqulo eyathabatha amashumi eminyaka eMpuma Yurophu iwanyanzelele ekubeni azibhokoxe ngamandla kwezobupolitika. Ligqabaza ngoku, iphephandaba lemihla ngemihla laseJamani iFrankfurter Allgemeine Zeitung lithi “ukufak’ isandla kwamaKristu ekwenzeni iinguqulelo eMpuma akunakukhanyelwa,” longezelela lathi “ngokuqinisekileyo inxaxheba yawo ayinakujongelwa phantsi.” Linaba ngalo mbandela lithi: “Ngokomzekelo, ePoland unqulo lwazimanyanisa nabemi belo lizwe, ibe icawa yaba liqela elineenkani eliphikisa iqela elilawulayo; kwilizwe ebeliyiMpuma Jamani ngaphambili (GDR) icawa yavula indawo ngaphandle kwentlawulo ukuze abavukeli-mbuso basebenzele kuyo ibe yabavumela ukuba basebenzise izakhiwo zecawa ukuze baqhubele kuzo iintlanganiso zabo; eCzechoslovakia, amaKristu nabalweli bolawulo-melo badibana entolongweni, omnye waqala ukuba noxabiso ngomnye, yaye ekugqibeleni bamanyana kumzabalazo wabo.” KwanaseRomania, apho “iicawa zazingqina zingabakhonzi abathembekileyo bolawulo lukaCeauşescu,” yaba sisisongelo sokubanjwa komfundisi uLaszlo Tökes esaqhwaya imvukelo.
KwaneVatican yayingalelanga emqokozweni. NgoDisemba 1989 iphephancwadi iTime lagqabaza lathi: “Ngoxa unobangela ongqalileyo wongcelele lweziganeko zenkululeko eziye zenzeka ngequbuliso eMpuma Yurophu kwezi nyanga zimbalwa zidlulileyo, waba yinkqubo kaGorbachev yokuyekelela, uJohn Paul ufanele anconywe gqitha. . . . Ukutyhubela iminyaka yee-1980 iintetho zakhe ngokuzingisileyo bezibethelela ingcamango yokumanyaniswa kwakhona kweYurophu ukususela kwiAtlantiki ukusa kwiintaba iiUrals yaye oko kufanele kuphenjelelwe yicawa yamaKristu.” Ngaloo ndlela, kanye njengoko kwakulindelwe, ngoxa wayetyelele eCzechoslovakia ngoAprili 1990, upopu wavakalisa ithemba lokuba utyelelo lwakhe lwaluya kuphumela kwintsebenziswano engakumbi phakathi kweMpuma neNtshona. Wazisa ukuba wayeceba ukuba kubekho ingqungquthela yoobhishopu baseYurophu eyayiza kucwangcisa inkqubo yokuzalisekisa loo mbono wakhe ‘weYurophu emanyaniswe ngokobuKristu.’
Ngaba ayingethi na iJamani emanyeneyo ephakathi kommandla weYurophu emanyeneyo ibe ngunobangela weYurophu emanyene ngokupheleleyo, kuze oko kuphumele kwihlabathi elimanyeneyo? Ngaba ukubandakanyeka konqulo akubonisi ukuba oku koko iBhayibhile ikuthembisayo? Ngokuqinisekileyo, ekubeni abefundisi baseMpuma nabaseNtshona ngoku benegalelo kwiinkqubo zobupolitika ezizabalazela ukuzisa uxolo nonqabiseko, ngaba asinakulindela ukuba kungekudala oku kube yinto yokwenene? Makhe sibone.
[Imaphu/Umfanekiso okwiphepha 4]
ICawa YamaProtestanti iNikolai eLeipzig—umfuziselo wokuguquka kwezobupolitika eJamani
Amazwe angamalungu oRhwebo Olumanyeneyo LwaseYurophu