IMpuma Yurophu—Ngaba Unqulo Luyavuseleleka?
UKUNGABIKHO kwenkululeko yokuvakalisa iingcamango ezithile kwiqela lamashumi eminyaka edluleyo kumazwe aseMpuma Yurophu kuye kwaquka imiqathango ethile eqatha kwezonqulo. Ukungakholelwa kubukho bukaThixo kwakuyinto eyayishunyayelwa ngokukhutheleyo, yaye izindlu ezithile zabefundisi nezecawa zaguqulelwa ekubeni ziimyuziyam zabo bangakholelwayo kubukho bukaThixo, njengaleyo ityelelwe gqitha ngabakhenkethi eLeningrad. Nabaphi na abefundisi ababeqhubeka besebenza babesiba zizicaka zikarhulumente walapho. Ekubeni zonke iindawo zonqulo, njengezindlu zoonongendi, izindlu zeecawa nezindlu zecawa zamaSilamsi, zavalwa ngokusemthethweni ngowe-1967, iAlbania yade yabizwa liZiko Likanomathotholo iTirana ‘njengelizwana lokuqala ehlabathini labantu abangakholelwayo kubukho bukaThixo.’
Ngoku, ekubeni kuye kwakho inkululeko kulo lonke elaseMpuma Yurophu ngokungathi kukudubula kweentyatyambo entwasahlobo, yintoni eyenzekayo elunqulweni? Kunjengokuba umbhali waseFransi uJean-François Kahn wabhala esithi: “Unqulo obeluthintelwe ziingcinezelo ngoku lunokubambisana nesizwe ebesicinezelekile. Oku kusandul’ ukwenzeka eIran. Kuyenzeka khona ngoku eAzerbaijan yaseRashiya. Kwixesha elizayo isenokunwenwela kulo lonke elaseRashiya njengomlilo wedobo.” Kwanangoku ezinye iicawa zizimanyanisa neengcamango nezilangazelelo zobuhlanga yaye ziphambili kwiimvukelo zezobupolitika, zizingcwalisa ngokubakho kwabefundisi bazo bamaKatolika nabobuOthodoki nabamaLuthere.
Ngoko ke unqulo luqhuba njani kule mekobume intsha yolawulo-melo?
Indlela Eziguquke Ngayo Izinto!
Iinkonzo eziphambili zaseMpuma Yurophu, ingakumbi iCawa yamaKatolika, zisuka nje ziye zathabatha amanyathelo ukuze zamkeleke ngokwasemthethweni kwaba rhulumente batsha. Ngokomzekelo, iL’Osservatore Romano yanikela ingxelo yokuba “ngomhla we-9 kuFebruwari [1990], kwatyobelwa iSivumelwano phakathi kukaPopu neRiphabliki yaseHungary.” Ngesi sivumelwano la maqela mabini avumelana ngokuphinda ayile amaqhina olwalamano. (IVatican igqalwa njengelizwana elizimeleyo.)
Enye ingxelo evela eVatican ithi iCawa yamaKatolika yaseUkrainian Rite, eyavalwa umlomo ngowe-1946, iye yacela ukuba yamkeleke ngokwasemthethweni yaye iye yaqalisa uthethathethwano “noRhulumente neCawa yobuOthodoki yaseRashiya ngeengxaki ezibalulekileyo ezibandakanya ubomi obunxulumene neCawa eUkraine.”
NgoAprili 1990 upopu watyelela eCzechoslovakia yaye wamkelwa kwisikhululo seenqwelo-moya sasePrague “ngamalungu aphambili eCawa nawasebuRhulumenteni, kuquka . . . uMnu. Vaclav Havel, uMongameli wale Riphabliki.” (iL’Osservatore Romano) Kuvela imeko entsha engokonqulo nalapho.
ICawa yamaKatolika ibisoloko izifake ekhwapheni lePoland. Ngoku, ngale nkululeko intsha ikhoyo, iyazolula yaye iququzelela ukuba kubekho izifundo ezingokonqulo ezikolweni. Omnye umfundisi wathi: “Izikolo ziyinxalenye yesizwe. Ngaphezu kwama-90 ekhulwini abemi basePoland ngamaKatolika. . . . Ngokubonakalisa intlonelo ngezinye iicawa, izifundo ezingokonqulo ezikolweni ziza kubuyisela igunya labafundisi-ntsapho kwindawo yalo, . . . nelamagosa asemthethweni kuba ezi zifundo ziphathelele isiseko sokuziphatha komntu.”
Ingxelo engeCawa yobuOthodoki yaseRomania ithi: “UBhishophu Omkhulu kunye neqela loobhishophu abaye basebenzisana nomkhosi [kaCeauşescu] baye banyanzelwa ukuba barhoxe. Kwasekwa iBhunga elithile ukuba livuselele imicimbi yeCawa. Uninzi lwabantu ababengengawo amakholwa ngoku baguqukela kunqulo yaye bazalisa iicawa zasekuhlaleni . . . ICawa yamaKatolika iByzantine yaseRomania, eyanyanzelwa ukuba ichithakale kwiminyaka engama-40 edluleyo, iye yavunyelwa ukuba iphinde ihlanganisane.”—IOrthodox Unity kaJulayi 1990.
Iinguqulelo EAlbania
Ngokutsho kweengxelo zamaphephandaba, ngokuthe ngcembe kwenzeka iinguqulelo ezothusayo eAlbania, ilizwana elineentaba nelinabemi abazizigidi ezithathu ezinesiqingatha, abahlala kwindawo efihlakeleyo kuNxweme lweAdriatic phakathi kweYugoslavia neGrisi. Iphephandaba laseJamani iDie Welt lanikela ingxelo ethi: “EAlbania, intsika yokugqibela yohlobo oludala lobukomanisi eYurophu, abantu baqalise ukuvota ngeenyawo zabo” ngokubalekela kubameli bamazwe aseNtshona, apho bathi bavunyelwe ukuba bafudukele eItali, eJamani nakwamanye amazwe.
Le ngxelo ihlabela mgama ize ithi: “NgoMeyi 1990 abemi baseAlbania bathenjiswa ngokunikwa iincwadi zokundwendwela nokupheliswa kwemithetho ethintela imibandela yonqulo.” (Oku kucatshulwe kwiThe German Tribune, kaJulayi 15, 1990) Unjingalwazi kwizifundo zembali uDenis R. Janz wabhala esithi: “Umzamo othabathe ixesha elide nonzima wokuphelisa lonke unqulo uye wabekelwa ecaleni.” Noko ke, wongezelela ngokuthi: “Kukho ubungqina . . . bokuba enyanisweni unqulo luye lwaphants’ ukucinywa igama luluntu.”
Kule nkalo amaNgqina kaYehova aye alondoloza ngokungqongqo ubundilele aziwa ngabo. Ngokusekelwe kwimigaqo yeBhayibhile, awabandakanyeki kwiiyantlukwano zobupolitika nezobuhlanga. Akholose ngoThixo ukuze awazuzise imeko eseluxolweni yokufeza uthumo lwawo lwazwenibanzi lokushumayela ngoBukumkani bukaThixo.—Mateyu 22:21; 1 Timoti 2:1, 2; 1 Petros 2:13-15.
Ngoko, kuthekani ngamaNgqina kaYehova eMpuma Yurophu? Ngaba aye anda nangona ebevalwe umlomo? Ngaba anenkululeko engokonqulo?
[Umfanekiso okwiphepha 7]
Ngaba abantu baza kuphinda babuyele kwiicawa zaseMpuma Yurophu?