Ngoobani Akholiswa Ngabo UThixo?
SONKE sifuna ukuthandwa zizinxulumani zethu. KumKristu umnqweno onamandla ngakumbi kukuzuza inkoliseko kaThixo. KwiNdumiso 84:11, kubhalwe oku ngoYehova: “UYehova uyababala [uyakholiswa, NW] azukise; abahamba ngokugqibeleleyo akabavimbi nto ilungileyo.” Ekuzalweni kukaYesu, ukumemelela kwezithunywa zasezulwini kwathembisa “uxolo emhlabeni kubantu akholiswa ngabo!”—Luka 2:14, Moffatt.
Kodwa ngoobani akholiswa ngabo uThixo? Ngaba imilinganiselo kaThixo iyafana neyabantu? Kuyaqondakala ukuba ayifani, njengoko oko kuxutyushwe kwinqaku elandulelayo kubonisile. Enyanisweni, ekubeni amaKristu elulekwa ukuba ‘abe ngabaxelisa uThixo,’ ngamnye wethu wenza kakuhle ukuzibuza oku, Ngaba ndikholiswa ngabantu akholiswa ngabo uThixo, okanye ngaba ndityekele ekulandeleni imilinganiselo yehlabathi kwindlela endibagweba ngayo abantu? (Efese 5:1) Ukuze sifumane inkoliseko kaYehova, sifanele siphaphe ukuze izinto sizibone ngendlela azijonga ngayo.
Imilinganiselo Ephakamileyo KaThixo
Umpostile uPetros wathi, “UThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” Ngaphezu koko, umpostile uPawulos waqinisekisa ukuba uThixo “wazenza ngagazi-nye zonke iintlanga zabantu.” (IZenzo 10:34, 35; 17:26) Ngoko ke, kusengqiqweni ukugqiba kwelokuba bonke abantu bayalingana emehlweni kaThixo kungakhathaliseki ukuba zinjani na iimpawu zabo ezingokwasemzimbeni. Ekubeni oko kunjalo, bekuya kuba yinto engafanelekanga ngomKristu ukuba akholiswe ngokungeyomfuneko ngumntu othile nje ngenxa yokuba loo mntu esuka kummandla othile okanye engowebala elithile lolusu okanye engowolunye uhlanga. Kunoko, ebeya kuba wenza kakuhle ukulandela uMzekelo wakhe, uYesu Kristu, lowo kwaneentshaba zavuma ukuba wayengakhethi buso bamntu.—Mateyu 22:16.
Isaci esithi “ubuhle bekhiwane” ngamanye amaxesha sisetyenziselwa ukuchaza into engenabunzulu okanye engabalulekanga. Ibala lolusu liyiloo nto kanye; kuphela bubuhle bekhiwane. Ibala lolusu lomntu alize libonakalise ubuntu okanye iimpawu zakhe zangaphakathi. Xa kufikelelwa kwindlela yokukhetha abantu onxulumana nabo, otya nabo okanye oxhawulana nabo, ngokuqinisekileyo akufanele kujongwe ngokuyintloko ibala lolusu. Khumbula ukuba intombazana eyaqamba inkoliso yemibongo ebangela umdla neyothando eyakha yabhalwa yathi ngesiqu sayo: “Ndimnyama, ndinomkhitha noko,. . . ndife mnyama, ngakuba nditshe lilanga.” (INgoma yazo iiNgoma 1:5, 6) Asilohlanga alulo okanye ibala elenza isiseko esifanelekileyo sokukholiswa ngumntu othile. Okubaluleke ngakumbi kukuba loo mntu uyamoyika uThixo yaye wenza izinto ngobulungisa kusini na.
Uvakalelwa njani uThixo ngokuba nobutyebi bezinto eziphathekayo? Kubantu bonke uThixo abathandayo nakholiswayo ngabo, uNyana wakhe, uYesu Kristu, ungoyena uphambili. Kanti, xa wayesemhlabeni, uYesu ‘wayengenandawo apho angalalisa khona intloko.’ (Mateyu 8:20) Wayengenasiza somhlaba, izindlu, amasimi, imithi yeziqhamo okanye izilwanyana. Sekunjalo, uYehova wamzukisa waza wamphakamisela kwisikhundla esingaphezu kwesakhe nabani na ongomnye kwindalo ngaphandle kukaThixo.—Filipi 2:9.
UThixo wakholiswa nguYesu Kristu ngenxa yokuba wayesisityebi kungekhona ngezinto eziphathekayo kodwa ngemisebenzi emihle. (Thelekisa eyoku-1 kuTimoti 6:17, 18.) Wanikela esi siluleko kubalandeli bakhe: “Ningaziqwebeli ubutyebi emhlabeni, apho konakalisa inundu nomhlwa, nalapho amasela agqobhozayo ebe; ziqwebeleni ke ubutyebi emazulwini, apho kungonakalisi nundu namhlwa, nalapho amasela angagqobhoziyo ebe.” (Mateyu 6:19, 20) Ngaloo ndlela, kunokuba akholiswe kuphela ngabo bazizityebi ngezinto zeli hlabathi, amaKristu awasayi kwenza mahluko ngezinto zehlabathi ubani anazo. Aya kufuna abo bazizityebi kuThixo kungakhathaliseki enoba bazizityebi okanye bangamahlwempu ngokwezinto eziphathekayo. Ungaze ulibale ukuba ‘uThixo unyule amahlwempu eli hlabathi, ukuba abe zizityebi zokholo, neendlalifa zobukumkani.’ (Yakobi 2:5) Ukuba unembono kaThixo, akusayi kuba lixhoba lomkhwa oqhelekileyo wokukholiswa okanye wokubungezelela abazizityebi ngokwezinto eziphathekayo.
Ngokuphathelele imfundo, iBhayibhile ibonisa ngokucacileyo ukuba uThixo usibongoza ukuba sifune ulwazi nobulumko nokuba uYesu Kristu wayengoyena mfundisi mkhulu owakha wanyathela emhlabeni. (IMizekeliso 4:7; Mateyu 7:29; Yohane 7:46) Kodwa asibobulumko okanye imfundo yehlabathi akholiswa yiyo uThixo. Ngokwahlukileyo koko, uPawulos usixelela ukuba ‘azizininzi izilumko ngokwenyama ezabizwayo, . . . UThixo usuke wanyula izinto ezibubudenge zehlabathi, ukuze azidanise izilumko.’—1 Korinte 1:26, 27.
UThixo ukholiswa ngabo bafundileyo, kungekhona ngemibandela yehlabathi efundiswa kumaziko emfundo yakwanokholeji okanye yaseyunivesithi, kodwa ‘kwintetho enyulu’ yenyaniso efumaneka eLizwini lakhe, iBhayibhile. (Zefaniya 3:9) Enyanisweni, uYehova ufundisa abantu bakhe namhlanje ngenkqubo yemfundo efikelela kwiimbombo ezikude zomhlaba. Njengokuba umprofeti uIsaya waxela kwangaphambili, abantu bazo zonke iintlanga basabela ngokuthi: “Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe.” Ngoko ke, kunokuzukisa imfundo yehlabathi, amaKristu aya kufuna abo bazingqina ngamazwi nangezenzo zabo ukuba ngokwenene “ngabafundi bakaYehova.” Ngokwenjenjalo, baya kunandipha ‘uxolo olukhulu’ oluvela kuThixo.—Isaya 2:3; 54:13.
Sinokuyizuza Inkoliseko KaThixo
Ewe, imilinganiselo emenza uThixo akholiswe ngabanye yahluke gqitha kweyabantu. Sekunjalo, simele sizabalazele ukukhokelwa ziindlela zakhe ukuba sifuna ukuba ngabakholekileyo emehlweni akhe. Oko kuthetha ukuba simele sifunde ukujonga abanye ngokwembono kaThixo kungekhona ngemilinganiselo yabantu, ephenjelelwa kukuzingca nalikhethe. Sinokukwenza njani oko?
UYehova uThixo uyayigocagoca intliziyo yomntu yaye ukholiswa ngabo babonakalisa iimpawu ezinjengothando, ukulunga, ububele nokuzeka kade umsindo. Nathi sifanele senjenjalo. (1 Samuweli 16:7; Galati 5:22, 23) Sifanele sijonge iimpawu zikabani zangaphakathi, kangangoko thina njengabantu sinokukwazi, kungekhona kwibala lakhe lolusu okanye kwimvelaphi yakhe yobuhlanga. Kunokukholiswa ngabo bazizityebi ngokwezinto eziphathekayo, senza kakuhle ukukhumbula imbono kaThixo ngobutyebi size sizabalazele ‘ukuba zizityebi zemisebenzi emihle, sibe nokwaba kakuhle, size sibe nobudlelane.’ (1 Timoti 6:18) Ukuze uThixo akholiswe sithi, simele siqhubeke sifuna ulwazi oluchanileyo ngoThixo nangoNyana wakhe, uYesu Kristu, sisiba ngabafundileyo kwintetho enyulu yenyaniso. (Yohane 17:3, 17) Ngokwenjenjalo, nathi siya kuba phakathi kwabo akholiswa ngabo uThixo.