Iintsikelelo Ezityebileyo KwiiNdibano ZeSithili “Zabathwali Bokukhanya”
KWIMINYAKA enokuba ngama-2 700 eyadlulayo, umprofeti uIsaya wabhala: “Uyabona, ubumnyama buwugubungele umhlaba, isithokothoko sizigubungele izizwe.” (Isaya 60:2) Hayi indlela angqineke eyinyaniso ngayo loo mazwi! Noko ke, likho ithemba, kuba uYehova uye wabangela ukuba ukukhanya kukhanye. Kulo nyaka uphelileyo, abo bathanda ukukhanya kukaThixo bamenywa ngokufudumeleyo ukuba babekho kwiNdibano YeSithili “Yabathwali Bokukhanya”.
Ucwangciso lwendibano lwaqalisa ngoJuni eMntla Merika. Ebudeni beenyanga ezalandelayo, luye lwaqhutywa eMpuma naseNtshona Yurophu, eMbindi naseMzantsi Merika, eAfrika, eAsia nakwiziqithi zolwandle. Abo babekho bafikelela kwizigidi. Yaye onjani wona umsitho wokudla abaye bawunandipha!
“Namkelekile, Nonke Nina Bathwali Bokukhanya!”
Kwiindawo ezininzi indibano yaqala ngoLwesihlanu yaza yaphela ngemva kwemini yangeCawa. Njengoko abo babesendibanweni babehlala phantsi ngentsasa yangoLwesihlanu, bakuvuyela ukuphulaphula ushwankathelo olufutshane olungendlela ukukhanya kukaYehova okuye kwakhanya ngokuqaqambe ngakumbi ngayo kule mihla yokugqibela. Wandula ke usihlalo wendibano wakhwel’ eqongeni. Wabethelela ukuba amaKristu okwenyaniso afanele abe ngabathwali bokukhanya waza ngokufudumeleyo wathi: “Namkelekile, nonke nina bathwali bokukhanya!” Ucwangciso lwendibano lwaluya kunceda abo babekho ukuba baqhubeke bebonakalisa ukukhanya kukaYehova.
Intetho engumxholo yandlala isiseko seentetho zendibano yonke. Esi sithethi sakhumbuza ababekho kwindibano ukuba izikhanyiso zacima kuluntu kude kudala kumyezo wase-Eden. Ukususela ngoko, uSathana uye wamfamekisa abantu ukuze bangasiboni isikhanyiso senyaniso. (2 Korinte 4:4) Sekunjalo, uYesu weza ‘njengesikhanyiselo seentlanga.’ (Isaya 42:1-6) Wabhenca ubuxoki bezonqulo, wachaza imisebenzi ephosakeleyo yobumnyama, waphakamisa ulongamo lukaYehova waza washumayela iindaba ezilungileyo zoBukumkani. Abalandeli bakaYesu benza okufanayo—yaye basakwenza! (Mateyu 28:19, 20) Ngehlombe esi sithethi sathi: ‘Thina, njengoYesu, sinokuba ngabathwali bokukhanya. Awukho omnye umsebenzi obaluleke ngaphezu kwalowo kumhla wethu. Yaye alikho ilungelo eligqwese ngakumbi.’
Kanye njengokuba ucwangciso lwendibano lwalusiya ekuqukunjelweni, kwakukho okuthile okwakugcinelwe ababekho endibanweni. Usihlalo wendibano wabuyela eqongeni waza wenza isaziso sokukhutshwa kwephecana lokuqala kwamane amatsha alandelelanayo. Kwaqhwatywa izandla ngehlombe emva kwesi saziso, yaye umbhalo omnye weli phecana wawufumaneka kumntu ngamnye owayekho kuloo ndibano.
Ngemva kwemini yangoLwesihlanu, ucwangciso lwendibano lwatsalel’ ingqalelo kwisiluleko esisiseko samaKristu angabathwali bokukhanya. Iintetho ezimbini zokuqala zanikela isiluleko esihle esingendlela yokuphepha ukusulelwa bubumnyama beli hlabathi. Ekubeni uSathana esenokuzimilisa okwesithunywa sokukhanya, kubalulekile ukulondoloza imbono yokomoya ukuze izinto ezingacocekanga zehlabathi zingasihendi. (2 Korinte 11:14) UPawulos wanikela esi siluleko: “Ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.” (Roma 12:2) Ababekho endibanweni beva ukuba ukumila kumbi komKristu kuyinkqubo eqhubekayo. Ngokuthe ngcembe iingqondo zethu ziyacocwa yaye zenziwa kumila kumbi njengokuba sifunda iLizwi likaThixo size sikusebenzise oko sikufundayo. Ngaloo ndlela, siya sifana ngakumbi noYesu, ‘owayezele lubabalo nayinyaniso.’—Yohane 1:14.
Abathwali Bokukhanya Abaselula
Isiqingatha sesibini semva kwemini yangoLwesihlanu sasijoliswe kulutsha. Intetho yokuqala (“Lutsha—Liliphi Ikhondo Enililandelayo?”) yawancoma amaKristu aselula angumzekelo omhle wokuthembeka. Kodwa yawakhumbuza ukuba ngokukhethekileyo angamaxhoba kaSathana. Kwanembaleki eqeqeshwe ngokufanelekileyo ifanele ibe nomqeqeshi. Ngendlela efanayo, abantu abaselula bafuna uncedo lwabazali babo nolwebandla ukuze baqhubeke behamba ekukhanyeni.
Oku kwabethelelwa ngumdlalo osemagqabini othi Ukwenza Okuthe Tye Emehlweni KaYehova, owaqukumbela ucwangciso lwangoLwesihlanu. Wabalaselisa umzekelo kaKumkani uYosiya. Kwanaxa wayeseyinkwenkwana, wayezimisele ukukhonza uYehova. Wayengqongwe ziimpembelelo ezimbi, kodwa ngolwalathiso lombingeleli omkhulu uHilekiya nangenxa yothando lwakhe ngoMthetho kaThixo, uYosiya wenza okulungileyo emehlweni kaYehova. Kwanga amaKristu aselula namhlanje angenza ngendlela efanayo.
Malukhanye Ukhanyiselo
Emva kobusuku bokuphumla, ababekho endibanweni beza endibanweni ngentsasa yangoMgqibelo belungele isiluleko esakhayo esingakumbi esingokweZibhalo. Abazange badane. Emva kwengxubusho yetekisi yosuku, ucwangciso lwaqhubeka ngongcelele lweentetho olwalubonisa iindlela ezahlukeneyo anokuthi umKristu avumele ukhanyiselo lwakhe lukhanye ngazo. (Mateyu 5:14-16) Ukushumayela kuyenye indlela ebalulekileyo, kwakhona ihambo entle inendima ebalulekileyo. Njengokuba isithethi sathi, “ukushumayela kuxelela abanye oko sikukholelwayo, kodwa ukuba nothando kuyakubonakalisa.”
Uncedo olubalulekileyo lokushumayela lwaziswa kwingqalelo yababekho endibanweni—amaphecana. Isaziso sezolo sisathe tha ezingqondweni, ababekho endibanweni beva amava angqina indlela ezi zixhobo zincinane ezinamandla ngayo. Ababekho endibanweni bakhuthazwa ukuba babe nesixa samaphecana ngawo onke amaxesha, balungiselele nasiphi na isihlandlo.
Ngokulandelayo kwanikelw’ ingqalelo koovulindlela, abavakalisi boBukumkani bexesha elizeleyo abazibhokoxayo ekuthwaleni ukukhanya. Hayi indlela esibaxabisa ngayo oovulindlela bethu abazibhokoxayo! Yaye inani labo liyanda. Kwanakumazwe asandul’ ukufumana inkululeko yonqulo oovulindlela banda ngeyona ndlela ibalaseleyo. Oovulindlela bakhuthazwa ukuba baxabise ilungelo labo. Abo bangekabi ngoovulindlela babongozwa ukuba bahlolisise imeko yabo. Mhlawumbi nabo basenokuhlengahlengisa imicimbi yabo ukuze bavumele ukukhanya kwabo kukhanye kwinkonzo yexesha elizeleyo.
Ngokufuthi ukuba ngumthwali wokukhanya kuquka ukuzincama, yaye oku kwabalaseliswa kwintetho eyalandelayo ethi, “Ukukhonza UYehova Ngomoya Wokuzincama.” UPawulos wabongoza: “Niyinikele imizimba yenu ibe lidini eliphilileyo, elingcwele, elikholekileyo kuThixo.” (Roma 12:1) Umoya wokuzincama ubonakaliswa ngabo banyamezela intshutshiso. Oovulindlela bayazincama suku ngalunye ukuze bahlale kwinkonzo yexesha elizeleyo. Eneneni, onke amaKristu okwenyaniso ayazincama, ezigcina exakekile enkonzweni kaYehova kunakusukelo lokuzingca nolwezinto eziphathekayo lweli hlabathi. Ikhondo elinjalo liphumela kwiintsikelelo ezityebileyo ezivela kuYehova.
Loo ntetho yaba yintshayelelo efanelekileyo koko kwalandelayo—intetho yobhaptizo. Abo babhaptizwa kwiNdibano YeSithili “Yabathwali Bokukhanya” ngokuqinisekileyo abasokuze bayilibale loo ntetho. Ubhaptizo lwabo luya kusoloko luyimbalasane yobomi babo. Bakhunjuzwa ukuba babelandela umzekelo kaYesu Kristu, owabhaptizwa eneminyaka engama-30 ubudala. Ngaphezu koko, ababeza kubhaptizwa kwabavuyisa ukukhumbula ukuba ‘babeyilahlile imisebenzi yobumnyama’ yaye benze isigqibo ‘sokukhonza iNkosi.’ (Roma 12:11; 13:12) Ngovuyo ngaphambi kwesihlwele sendibano benza uvumo lwasesidlangalaleni olucacileyo ngaphambi kokuba baye kubhaptizwa. (Roma 10:10) Sithandazela intsikelelo kaYehova ukuba ibe kubo bonke abaye babonakalisa uzahlulelo lwabo kuye ngokubhaptizwa emanzini ebudeni beNdibano YeSithili “Yabathwali Bokukhanya.”
Imva kwemini yangoMgqibelo yayilixesha lezilumkiso ezicacileyo. Ezi zeza zikwimo yeentetho ezinomxholo othi “Yiphephe Imigibe Yokubawa,” “Ngaba Kukho Ubani Owonakalisa Imikhwa Yakho Elungileyo?” nothi “Zilumkele Zonke Iintlobo Zonqulo-zithixo.” Ezi ntetho zintathu zabonisa amanye amacebo achuliweyo asetyenziswa nguSathana ukuze enze amaKristu abe buthathaka. UYuda Sikariyoti wayengumpostile, kodwa wangcatsha uYesu ukuze afumane imali. USamuweli oselula wakhulela kanye esazulwini sonqulo lukaYehova, kodwa ngendlela awayenganakuyiphepha wachanabeka kunxulumano olubi gqitha. (1 Samuweli 2:12, 18-20) Unqulo-zithixo lusenokuquka izinto ezifana nokuziphatha okubi ngokwesini nokubawa. (Efese 5:5; Kolose 3:5) Ewe, ukubawa, unxulumano olubi nonqulo-zithixo kuyingozi yaye kufanelwe kuphetshwe.
Ucwangciso lwendibano, ngokungathi kunjalo, lwagqithela kumgca ongezantsi. Intetho elandelayo yaphakamisa imibuzo emininzi yeBhayibhile ebangel’ umdla yaza yayiphendula. Ngokomzekelo, ngaba unokuchaza enoba abantu abangayamkeliyo inyaniso baza bafa ngaphambi kwembandezelo enkulu baya kuvuswa kusini na? Yintoni anokuyenza umKristu xa engalifumani iqabane lomtshato elifanelekileyo? Ukuze benze nzulu ulwazi lwabo ngeBhayibhile, ababekho endibanweni bakhuthazwa ukuba bayisebenzise ngokupheleleyo iWatch Tower Publications Index, ngokukhethekileyo phantsi komxholo othi “Question From Readers.”
Ubukho Nokutyhileka KukaKristu
Icandelo eliqukumbela ucwangciso lwangoMgqibelo lwaphethukela kwisiprofeto kungcelele lweentetho olunomxholo othi “Ukukhanyisa Ngobukho Nokutyhileka KukaKristu.” Kwenziwa impinda ngeembalasane ‘zomqondiso’ ezingqina ubukho bukaYesu Kristu. (Mateyu 24:3) Kwinxalenye yesibini, kwaxutyushwa imisebenzi yanamhlanje ‘yomkhonzi othembekileyo noqondayo.’ (Mateyu 24:45-47) Kwaboniswa ukuba ukususela ngowe-1919 udidi lomkhonzi ngokuthembeka luye lwahambisela phambili umsebenzi wokushumayela iindaba ezilungileyo zoBukumkani. Kwandula ke kwahlanganiswa isihlwele esikhulu esiphuma kuzo zonke iintlanga ukuze sabelane namaKristu athanjisiweyo ekubonakaliseni ukukhanya kukaYehova. Isithethi saqukumbela ngelithi: “Ngenzondelelo sonke masiqhubeke simxhasa umkhonzi othembekileyo noqondayo. Kuba kungokwenza oku kuphela ekuya kuthi ngaminazana ithile engekude bonke ababumvu bakwazi ukuva la mazwi avuyisayo: ‘Yizani, nina nisikelelweyo nguBawo, nibudle ilifa ubukumkani obalungiselelwa nina kwasekusekweni kwehlabathi.’”—Mateyu 25:34.
Isithethi sokugqibela saxubusha ngentsingiselo nangoko kuqukwa kukutyhileka kukaYesu Kristu. (1 Korinte 1:7) Anjani wona amava oko kutyhileka aya kuba kuko! IBhabhiloni Enkulu iya kuba itshatyalalisiwe. Imfazwe enkulu ephakathi kwehlabathi likaSathana noYesu nezithunywa zakhe iya kuphelela ekutshatyalalisweni kwale nkqubo. Ekugqibeleni, uSathana uya kuphoswa enzonzobileni aze enziwe angakwazi ukwenza nto. Kodwa kuza kubakho isiqabu kubantu bakaThixo, nomtshato weMvana ezulwini nakukuzalwa komhlaba omtsha. Isithethi sachwayitisa abaphulaphuli ngokukhulula incwadana entsha enemifanekiso ethi Ngaba Ngokwenene UThixo Usikhathalele? Olunjani lona uncedo ukuba luhle kubantu abathobekileyo abafuna ukwazi ngoMdali wethu onenyameko neenjongo zakhe ngathi!
Iintsapho ZamaKristu
Ngoku luye lwafika usuku lokugqibela lwendibano, ngeCawa. Noko ke, okuninzi kwakuseza kunikelwa. Emva kwengxubusho yetekisi yosuku, kwanikelwa ingqalelo kwiintsapho zamaKristu kungcelele lweentetho oluthi “Ukunyamekelana Kwintsapho YamaKristu.” Icandelo lokuqala lanceda ababekho endibanweni ukuba baqonde undoqo wokuba nentsapho ephumelelayo yamaKristu: ukubeka izinto zokomoya kuqala. Icandelo lesibini lakhuthaza iintsapho ukuba zenze zonke izinto kunye, enoba oko kuquka ukuya ezintlanganisweni, inkonzo yasentsimini, isifundo sentsapho okanye ukuzonwabisa. Yaye icandelo lesithathu longcelele lwakhumbuza iindwendwe ngelungelo lazo nangembopheleleko yazo yokunyamekela abalupheleyo. Isithethi sathi, “Abazalwana noodade bethu abalupheleyo baxabisekile ebandleni.” Masiwaxabise amava abo size sixelise ingqibelelo yabo.
Ngokulandelayo kwahlolisiswa intsingiselo yebinzana elithi “ukuba nengqondo ephilileyo.” (1 Petros 4:7) Lowo unengqondo ephilileyo ulungelelene, usezingqondweni, uyaqiqa, uthobekile yaye usebenzisa ingqondo kwintetho nakwizenzo. Unokwahlula phakathi kokulungileyo nokuphosakeleyo, okuyinyaniso nokububuxoki. Ngaphezu koko, uzabalazela ukulondoloza impilo entle yokomoya.
Intetho yokugqibela kucwangciso lwangentsasa yangeCawa yaxubusha ngokuzithoba kwethu kuThixo nakuKristu. Isithethi sathi: “Ukubaluleka kokuzithoba ngokunyanisekileyo kuYehova uThixo nakuNyana wakhe, uYesu Kristu, kuyabethelelwa.” Saqhubeka sibonisa indlela oku okuyichaphazela ngayo inkalo nganye yobomi bethu. Yintoni eya kusinceda ukuba sihlale sizithobile? Ziimpawu ezine: uthando, ukoyika uThixo, ukholo nokuthobeka.
Ngemva Kwemini YangeCawa
Ngokuqhwanyaza kweliso, kwakusemva kwemini yangeCawa yaye kwakusekulixesha lenxalenye yokugqibela yendibano. Kwabaninzi, kwakubonakala ngathi indibano yayisandul’ ukuqala, yaye yayisele ifikelela kumqukumbelo.
Intetho yesidlangalala yayinomxholo othi “Landela Ukukhanya Kwehlabathi.” Abo babekho bafumana inkcazelo echulumancisayo engendima yokukhanya kokoqobo ekulondolozeni ubomi. Sandula ke isithethi sabonisa imbaluleka engakumbi yokukhanya kokomoya. Ukukhanya kokoqobo kusigcina siphilile kangangamashumi nje ambalwa eminyaka, kodwa ukukhanya kokomoya kunokusigcina siphilile ngonaphakade. Imbalasane yentetho yaba yingxubusho yendinyana ngendinyana kaYohane 1:1-16, apho uYesu afaniswa nokukhanya kwehlabathi. Namhlanje, kwiminyaka yokugqibela yale nkqubo ingendawo, kungxamiseke ngakumbi kunanini ukulandela uYesu kule nkalo.
Emva koshwankathelo lweSifundo seMboniselo esabelwe loo veki, kwafika ixesha lentetho yokuqukumbela. Okuvuyisayo kukuba isithethi sabonisa ukuba zazininzi izinto ezazinokulindelwa ngomdla kwixesha elizayo. Ngokomzekelo, sachaza ikhasethi entsha, umdlalo othi Ukwenza Ukuthanda KukaThixo Ngenzondelelo. Ibe kwakungaphelelanga apho. Kwakuza kubakho ungcelele olutsha lweekhasethi zevideo olunomxholo othi, The Bible—A Book of Fact and Prophecy, eyokuqala kulo mbandela ithi The Bible—Accurate History, Reliable Prophecy.
Ekugqibeleni, isithethi sachaza ukuba ngowe-1993 kuza kubakho iindibano zesithili zeentsuku ezine, kuquka neendibano ezikhethekileyo zezizwe ngezizwe eAfrika, eAsia, eYurophu naseMzantsi Merika. Nangona iNdibano Yesithili “Yabathwali Bokukhanya” yayiphela, ababekho endibanweni babenokuqalisa ukwenza amalungiselelo onyaka olandelayo.
Kwafika ixesha lokuba ababekho endibanweni bagoduke. Ngokuqinisekileyo, babezimisele ngakumbi kunanini ukubonakalisa ukukhanya kweli hlabathi lobumnyama. Emva kweentsuku ezintathu ezizaliswe zizinto ezintle zokomoya, amazwi esibhalo sokugqibela acatshulwe kwintetho yokugqibela aye aphawuleka ngokungakumbi: “UYehova nguThixo, u[ya]sikhanyisela. . . . Bulelani kuYehova, ngokuba elungile, ngokuba ingunaphakade inceba yakhe.”—INdumiso 118:27, 29.
[Umfanekiso okwiphepha 15]
Ucwangciso lwendibano olushicilelwe ngesiRashiya
[Imifanekiso ekwiphepha 16, 17]
Amalungu eQumrhu Elilawulayo anikela iintetho kwiindibano ezininzi
Iindwendwe ezivela eJapan zaziphakathi kwabo babehlanganisene eSt. Petersburg, eRashiya
Umdlalo weBhayibhile ochulumancisayo wagxininisa imfuneko yokwenza okulungileyo emehlweni kaYehova
Abathwali bokukhanya abatsha babonakalisa uzahlulelo lwabo kuYehova ngobhaptizo
Ababekho endibanweni babephulaphule ngenyameko kucwangciso eSt. Petersburg
[Umfanekiso okwiphepha 18]
Iindwendwe zavuya zakufumana incwadana enemifa-nekiso ethi “Ngaba Ngokwenene UThixo Usikhathalele?”