Indlela Onokulifumana Ngayo Ithemba Kwimeko Enganiki Themba
KHAWUZITHELEKELELE uza kujamelana nezi ngxaki: Zonke izinto onazo zitshatyalalisiwe, nto leyo ikushiya uludwayi. Abantwana bakho—ababangela ulonwabo ebomini bakho—abasekho. Iqabane lakho alikuxhasi ngokukukhuthaza. Impilo yakho inkenenkene gqitha. Yonke imihla uhlangabezana nentlungu engathethekiyo.
Ukuba oko bekunjalo ebomini bakho, ngaba ubunokusifumana isizathu sokuqhubeka uphila? Okanye ngaba ubuya kulahl’ ithemba?
Oku kubuhlungu kuchazwe apha libali lokwenyaniso lobomi bukaYobhi, indoda eyayiphila ngamaxesha okubhalwa kweBhayibhile. (Yobhi, isahluko 1, 2) Edandatheke gqitha uYobhi wakhalaza: “Umphefumlo wam udimele bubomi bam.” Wayenokwamkela ukufa njengesiqabu. (Yobhi 10:1; 14:13) Noko ke, phezu kwako nje ukubandezeleka kakhulu, uYobhi wayigcina ingqibelelo yakhe kuThixo. Ngoko ke uYehova “wakusikelela ukuphela kukaYobhi ngaphezu kokuqala kwakhe.” Ngaloo ndlela wafa eseluxolweni, “eyindoda enkulu ephelele ebudaleni.”—Yobhi 42:12, 17.
UYobhi wamisela umzekelo wokunyamezela omele unconywe nanamhlanje. Izilingo awajamelana nazo zabusulungekisa ubuntu bakhe zaza zakhuthaza nabanye ukuba benze imisebenzi elungileyo. (Yakobi 5:10, 11) Okona kubaluleke ngakumbi kukuba, ingqibelelo kaYobhi engenatyheneba yayivuyisa intliziyo kaYehova. (IMizekeliso 27:11) Ngaloo ndlela ukungcungcuthekiswa ziintlungu ekugqibeleni kwaba luloyiso olungathethekiyo lokuhlonel’ uthixo, ukholo, nengqibelelo ezazisa iintsikelelo kuYobhi nakubo bonke abo ababeshukunyiswe ngumzekelo wakhe.
Ithemba Phezu Kwazo Nje Izilingo Ezahlukahlukeneyo
Usenokujamelana nezilingo ezifana nezo wajamelana nazo uYobhi. Ukufelwa ngomthandayo kusenokukushiya unxunguphele ngokweemvakalelo. Ukugula ngokungaginyisi mathe kusenokuba kuye kwenza ukuphila kwakho kwaba sisilingo esibuhlungu nesinzima. Indlela ophila ngayo isenokubonakala iwohloka ngenxa yentliziyo ebuhlungu ebangelwa luqhawulo mtshato. Iingxaki zoqoqosho zisenokuba zikushiye uludwayi. Usenokuba ulixhoba lentshutshiso ekrakra ebangelwa ngabachasi bonqulo lokwenyaniso. Ukuzabalazela ukuhlangabezana nezilingo kusenokukushiya uvakalelwa kukuba ikamva lakho limfiliba.—1 Petros 1:6.
Kunokuba unikezele uze uphelelwe lithemba, zibuze, ‘Kutheni ndibandezeleka nje?’ Ubandezeleka kuba uphila kwihlabathi “elilele emandleni alowo ungendawo,” uSathana uMtyholi. (1 Yohane 5:19) Ngenxa yoko, wonke umntu uyabandezeleka. Ngandlel’ ithile sonke siyachaphazeleka kukuthiywa kwesigidimi soBukumkani okubangelwe nguMtyholi, amazwi abanye angathandekiyo, okanye izenzo ezoyikisayo ezingezozabuthixo eziqheleke ngendlela engathethekiyo kula “maxesha amanqam.”—2 Timoti 3:1-5.
Ukuba kukhe kwenzeka intlekele ebomini bakho, usenokuba ubulixhoba ‘lokufikelwa lixesha nasisihlo.’ (INtshumayeli 9:11) Kwelinye icala, ngamathub’ athile izinto azihambi kakuhle ebomini ngenxa yesono esasizuz’ ilifa. (Roma 5:12) Kwanokuba uye wona ngokunzulu kodwa waguquka waza wafuna uncedo lokomoya, musa ukucinga ukuba uThixo ukulahlile. (INdumiso 103:10-14; Yakobi 5:13-15) Ngaphezu kwakhe nabani na, yena usikhathalele. (1 Petros 5:6, 7) Unokuqiniseka ukuba “usondele uYehova kwabantliziyo zaphukileyo, abasindise abamoya utyumkileyo.” (INdumiso 34:18) Kungakhathaliseki indlela olubuhlungu okanye olunzima ngayo uvavanyo olufumanayo, uYehova unokukunika ubulumko bokuhlangabezana nalo. (Yakobi 1:5-8) Hlala ukhumbula ukuba uYehova unokuwapholisa onke amanxeba. Xa ekholiswa nguwe, akukho nto inokukuthintela ekufumaneni umvuzo wobomi.—Roma 8:38, 39.
Ngaba Sinokungenelwa Xa Sivavanywa?
Kukho intetho endala ethi, “Akukho nto imbi kwaphela.” Leyo yindlela nje elula yokubonisa ukuba enoba izinto zibambi kangakanani na, unokusifumana isizathu sokuba nethemba. Injongo yayo nantoni na ebhalwe eLizwini likaThixo kukuba “sibe nethemba.” (Roma 15:4) Kungakhathaliseki ukuba zimbi kangakanani iimeko okuzo, amadinga nemigaqo eseBhayibhileni inokukuzisela uvuyo nethemba elitsha.
IZibhalo zibonisa ukuba “imbandezelo iyeyokomzuzwana yaye ikhaphukhaphu” xa ithelekiswa neentsikelelo ezibekelwe abo bamthandayo uThixo. (2 Korinte 4:16-18) Kwakhona iBhayibhile ibonisa ukuba iimpawu zobuthixo ezikhula phakathi kwezilingo zezona zixabisekileyo ngaphezu kodumo okanye ubutyebi bezinto eziphathekayo. (1 Yohane 2:15-17) Ngaloo ndlela, ukubandezeleka kunokuzisa iingenelo. (Hebhere 5:8) Enyanisweni, ukusebenzisa oko ukufunde ebudeni bezilingo kunokukuzisela iintsikelelo obungazilindelanga.
Isilingo esinzima sisenokukubangela ube ngumntu onovelwano nothozamileyo. Usenokuvuma ukuba kwixa elidluleyo ubungumntu othanda ukukhathaza abanye yaye uthintela nenkqubela yakho yokomoya. Mhlawumbi ibikukuzithemba okugqithiseleyo. Emva kokuba uye wajamelana nentlekele, ngokukhawuleza usenokubona indlela obuthathaka ngayo nendlela oxhomekeke ngayo kwabanye. Ukuba isilingo obujamelene naso siye sakufundisa eso sifundo yaye uye wenza iinguqulelo eziyimfuneko siye sakunceda.
Kuthekani ukuba, kwixa elidluleyo, abanye baye bakufumanisa kunzima ukusebenzisana nawe ngenxa yokungakwazi ukuwulawula umsindo wakho? Oku kusenokuba kuye kwakubangela waxhwaleka empilweni. (IMizekeliso 14:29, 30) Noko ke, ngoku imeko isenokuba ibhetele ekubeni uthembele kumoya kaThixo ukuba ukuncede ukwazi ukuzeyisa.—Galati 5:22, 23.
Njengabanye, kusenokwenzeka ukuba ngesinye isihlandlo awukwazanga ukubonisa imfesane kwabo benza iziphoso. Kodwa ukuba uye wahlangabezana nemeko apho kufuneka wenzelwe inceba, kunokwenzeka ukuba ngoku kufuneka ubonakalise inceba kwabanye. Uvelwano olufudumez’ intliziyo, inkathalo, nenceba ezabonakaliswa kuwe ziye zakunceda waqonda ukuba nawe kufuneka ubonakalise iimpawu ezifanayo kubenzi bobubi abaguqukayo. Ukuba intlungu onayo iye yakushukumisela ekubeni ulungise obo buthathaka unabo, le yenye yeengenelo oyifumeneyo kumava onawo. Uye wafunda ukuba “inceba iwuvuyelela ngoloyiso umgwebo.”—Yakobi 2:13; Mateyu 5:7.
Kuthekani ukuba ukohlwaywa libandla lamaKristu kuye kwabangela ukuba ulahlekelwe ngamalungelo nentlonelo yabanye? Ungalahl’ ithemba. Isohlwayo sigcina ibandla licocekile, kodwa injongo yaso iquka ukumphilisa ngokomoya umenzi-bubi. Kuyavunywa ukuba, “akukho ngqeqesho ibonakala ivuyisa okwangoku, kodwa ibuhlungu; kodwa kamva ivelisa isiqhamo soxolo, oko kukuthi, ubulungisa, kwabo baqeqeshiweyo yiyo.” (Hebhere 12:11) Nangona uqeqesho lusenokunxunguphalisa, alumshiyi engenathemba loo mntu uguqukileyo. UKumkani wakwaSirayeli wamandulo uDavide wohlwaywa ngokuqatha ngokwenza okubi, kodwa waguquka yaye ekugqibeleni wanconywa ngokukhethekileyo njengendoda ebalaseleyo ngokholo.—2 Samuweli 12:7-12; INdumiso 32:5; Hebhere 11:32-34.
Isilingo sisenokuba nemiphumo ebuhlungu kuwe. Kwixa elidluleyo, usenokuba uye wabhekisela ingqalelo yakho kusukelo lwezinto eziphathekayo nakwimpumelelo eye yakuzisela udumo nesikhundla esithile kweli hlabathi. Mhlawumbi isilingo esinxulumene nokulahlekelwa ngokwezemali okanye zizinto eziphathekayo siye samilisela iingcinga zakho kwizinto ezibaluleke ngakumbi. (Thelekisa amaFilipi 1:10.) Ngoku uyaqonda ukuba izinto zokomoya nosukelo kwinkonzo engcwele zezona zinto zizisa uvuyo lokwenene nolwaneliseko oluhlala ixesha elide.
Kholosa NgoYehova
Ukunikela inkonzo engcwele kuYehova kunokuphumela kwintshutshiso nokubandezeleka kwabo bachasa iinkolelo zakho zobuKristu. Usenokuziva ucinezelekile ngenxa yesi silingo, kodwa kunokuphuma into elungileyo kuso. Olu vavanyo lunokulomeleza ukholo lwakho. Ngaphezu koko, abanye abajamelene nentshutshiso basenokukhuthazeka baze bomelele ngokubona ukunyamezela kwakho. Amangqina okuzibonela ehambo yakho entle asenokushukumiseka aze amzukise uThixo. Kwanabachasi bakho basenokudana baze bayibone imisebenzi yakho emihle!—1 Petros 2:12; 3:16.
Ukuze uphephe ukulahl’ ithemba xa utshutshiswa, kufuneka ukholose ngoYehova. ILizwi lakhe libonisa ukuba ngokuqinisekileyo siza kusifumana isiqabu kwisilingo, kodwa asizi kufika ngokukhawuleza kangangoko ufuna. Okwangoku, ‘ungayeki ukwenza okulungileyo.’ (2 Tesalonika 3:13) Qhubeka uphanda iindlela zokuhlangabezana nezilingo nezokunyamezela. Kwanaxa izinto zibonakala zingathembisi, “umthwalo wakho wulahlele kuYehova; yena wokuzimasa. Akayi kuliyekela ilungisa lishukunyiswe naphakade.” (INdumiso 55:22) Kunokuba uzisizele ngokugqithiseleyo, cinga ngendlela osikeleleke ngayo ngokwazi uYehova, ukubakho phakathi kwabantu bakhe, nokuba nethemba lobomi obungenasiphelo.—Yohane 3:16, 36.
Gcina ingqondo yakho imiliselwe kwizinto ezibalulekileyo. Sondela kuYehova ngomthandazo yonke imihla, umcela akuphe amandla okunyamezela. (Filipi 4:6, 7, 13) Khupha naziphi iingcinga onazo zokuphindezela kwabo babangela ubandezeleke. Wuyekele ezandleni zikaYehova umbandela. (Roma 12:19) Qhubeka ufuna iindlela zokusulungekisa ubuntu bakho, uhlakulela iimpawu zobuKristu. (2 Petros 1:5-8) Xabisa yonke into oyenzelwayo ngabanye, kuquka abadala abazikhathalela ngokunothando iintswelo zakho zokomoya. (Hebhere 13:7, 17) Thembeka kuThixo, ugcine iliso lakho lisemvuzweni wobomi, uqinisekile ukuba nokufa akunakukwahlukanisa nawo.—Yohane 5:28, 29; 17:3.
Ukuba ngoku uhlangabezana nentlungu okanye izilingo eziqatha, “kholosa ngoYehova ngentliziyo yakho yonke,” yaye ekugqibeleni uvuyo olukhulu luya kuthabathel’ indawo intlungu nobunzima. (IMizekeliso 3:5, 6; Yohane 16:20) Intlupheko iya kuthatyathelwa indawo lulonwabo xa uThixo esikelela uYobhi njengokuba wenzayo. Ukubandezeleka kwanamhlanje akuyonto xa kuthelekiswa nomvuzo wakho. (Thelekisa amaRoma 8:18.) Ukunyamezela kwakho ngokuthembeka kunokubakhuthaza abanye kuze kukuncede uhlakulele iimpawu ezintle zamaKristu ezibangelwa “bubuntu obutsha.” (Efese 4:23, 24; Kolose 3:10, 12-14) Ngoko ke, fumana ukhuthazo kwicebiso lobulumko likampostile uPetros elithi: “Abo babandezeleka ngokuvisisana nokuthanda kukaThixo mabahlale beyaleza imiphefumlo yabo kuMdali othembekileyo ngoxa besenza okulungileyo.”—1 Petros 4:19.
[Umfanekiso okwiphepha 23]
Yiba njengoYobhi. Ungaze ulahle ithemba
[Umfanekiso okwiphepha 24]
Kholosa ngoYehova ngentliziyo yakho yonke