UThixo Uyayiphendula Imithandazo

UKorneli wayeyindoda efuna inkoliseko kaThixo ngokuthandaza rhoqo imithandazo esuk’ entliziyweni. Ngaphezu koko, wasisebenzisa kakuhle isikhundla awayekuso njengegosa lasemkhosini. Ngokutsho kweBhayibhile, ‘wanikela izipho ezininzi zenceba’ ebantwini ababeswele.—IZenzo 10:1, 2.

NGELO xesha, kwibandla lamaKristu kwakukho amaYuda angamakholwa, abaguqukele ebuYudeni namaSamariya. UKorneli wayengoweeNtlanga ongalukanga yaye engeyonxalenye yebandla lamaKristu. Ngaba oko kuthetha ukuba imithandazo yakhe yaba lilize? Akunjalo. UYehova uThixo wanikela ingqalelo kuKorneli nakwimisebenzi yakhe eyayihambisana nemithandazo yakhe.—IZenzo 10:4.

Ngokhokelo lwengelosi, uKorneli wanxityelelaniswa nebandla lamaKristu. (IZenzo 10:30-33) Ngenxa yoko, yena nendlu yakhe bafumana ilungelo lokuba babe ngabantu bokuqala beeNtlanga ezingalukanga abamkelwa kwibandla lobuKristu. UYehova uThixo wabona kufanelekile ukuba amava kaKorneli aqukwe kwingxelo yeBhayibhile. Ngokungathandabuzekiyo, wenza iinguqulelo ezininzi ukuze avisisanise ubomi bakhe nemilinganiselo kaThixo ngokupheleleyo. (Isaya 2:2-4; Yohane 17:16) Amava kaKorneli afanele abe lukhuthazo kakhulu kubantu bazo zonke iintlanga abafuna inkoliseko kaThixo namhlanje. Khawuqwalasele eminye imizekelo.

Imizekelo Yanamhlanje

Ibhinqa eliselula laseIndiya lalifuna intuthuzelo kakhulu. Lalitshate lineminyaka engama-21, laza laba nabantwana ababini. Kodwa ngokukhawuleza emva kokuzala umntwana wesibini, umyeni walo wafa. Ngequbuliso, xa lalineminyaka engama-24, laba ngumhlolokazi onentwazana eneenyanga ezi-2 nonyana oneenyanga ezingama-22. Akumangalisi ke ngoko ukuba lalifuna intuthuzelo! Laliza kuphethukela phi? Ngobunye ubusuku, libandezelekile kakhulu, lathandaza lisithi, “Bawo osemazulwini, nceda undithuthuzele ngeLizwi lakho.”

Ngentsasa elandelayo, lafumana undwendwe. Lwalungomnye wamaNgqina kaYehova. Ngaloo mini, lalinengxaki kubulungiseleli balo basentsimini ngenxa yokuba babembalwa abantu ababelamkela. Lidiniwe yaye lidimazekile noko, lalisele liza kugoduka, kodwa ngandlel’ ithile laziva linyanzelekile ukuba lingene kwindlu yokugqibela. Kulapho lafika kukho lo mhlolokazi uselula. Walingenisa endlwini waza wathabatha impapasho eyayicacisa iBhayibhile. Eli bhinqa lathuthuzeleka kakhulu kukufunda loo mpapasho nayingxubusho elaba nayo nelo Ngqina. Lafunda ngesithembiso sikaThixo sokuvusa abafi nangoBukumkani bukaThixo, obuza kuthi kungekudala benze lo mhlaba ube yiparadesi. Okubaluleke nangakumbi kukuba, latsho lamazi yaye lamthanda okuphela koThixo oyinyaniso, uYehova, owayephendule umthandazo walo.

UNora, ohlala kwisixeko saseGeorge, eMzantsi Afrika, wakhetha inyanga awayeza kuba nesabelo ngayo kumsebenzi wokushumayela ixesha elizeleyo. Ngaphambi kokuba aqalise, wathandaza ngokunyanisekileyo kuYehova ukuba amncede afumane umntu onomdla wokwenene wokufunda iBhayibhile. Kwintsimi awabelwa ukusebenza kuyo kwakukho ikhaya lomntu owayebe krwada kakhulu kutyelelo lukaNora lwangaphambili. Ngenkalipho, uNora waya kwelo khaya kwakhona. Wamangaliswa kukufumanisa ukuba kwakusele kuhlala mntu wumbi, ogama linguNoleen. Ngaphezu koko, uNoleen nonina babethandaza kuThixo ukuba bafumane uncedo ukuze baqonde iBhayibhile. UNora uyachaza, “Ndathi ndakucela ukubaqhubela isifundo seBhayibhile bavuya kakhulu.” UNoleen nonina benza inkqubela ngokukhawuleza. Ekuhambeni kwexesha, baqalisa ukuhamba noNora besenza lo msebenzi wokuphilisa ngokomoya.

Omnye umzekelo obonisa amandla omthandazo ngowesibini esihlala kwisixeko saseRhawutini eMzantsi Afrika. Ngobunye ubusuku bangoMgqibelo ngowe-1996, umtshato kaDennis noCarol wawusecicini lokuqhawuka. Njengelinge lokugqibela, bagqiba kwelokuba bathandazele uncedo, yaye benjenjalo bephindaphinda de kwasezinzulwini zobusuku. Ngentsasa elandelayo, ngentsimbi ye-11:00 kwankqonkqoza amaNgqina kaYehova amabini. UDennis wavula umnyango waza wawaxelela ukuba amlinde aye kubiza inkosikazi yakhe. UDennis walumkisa uCarol ngelithi ukuba uyawangenisa amaNgqina, kusenokuba nzima ukwahlukana nawo. UCarol wamkhumbuza uDennis ukuba bebethandazela uncedo yaye wathi kusenokwenzeka ukuba uThixo uphendula loo mithandazo yabo. Ngoko angeniswa la maNgqina, kwaza kwaqaliswa isifundo seBhayibhile ngencwadi ethi Ulwazi Olukhokelela Kubomi Obungunaphakade. UDennis noCarol baba nemincili kakhulu ngoko babekufunda. Ngaloo mvakwemini, okokuqala baya kwintlanganiso eyayikwiHolo yoBukumkani yasekuhlaleni yamaNgqina kaYehova. Ngokusebenzisa oko babekufunda eBhayibhileni, uDennis noCarol bafumana isicombululo kwiingxaki zabo zomtshato. Ngoku bangabadumisi bakaYehova ababhaptiziweyo nabonwabileyo, yaye babelana rhoqo nabamelwane babo ngeenkolelo zabo ezisekelwe eBhayibhileni.

Kuthekani Ukuba Uziva Ungakufanelekelanga Ukuthandaza?

Abanye abantu abanyanisekileyo bangaziva bengakufanelekelanga ukuthandaza ngenxa yendlela embi abaphila ngayo. UYesu Kristu wachaza ngebali lendoda eyayinjalo, umbuthi werhafu owayecekiswa. Le ndoda yangena kwintendelezo yetempile, yaziva ingakufanelekelanga ukuya kwindawo yokuthandaza. “Wayemi mgama . . . ezibetha isifuba, esithi, ‘Owu Thixo, yiba nobabalo kum mna moni.’” (Luka 18:13) Ngokutsho kukaYesu, le ndoda yaphulaphulwa. Obu bubungqina bokuba uYehova uThixo ngenene unobabalo yaye uyafuna ukubanceda aboni abaguquka ngokunyanisekileyo.

Khawucinge ngomfana waseMzantsi Afrika ogama linguPaul. Ngoxa wayeseyinkwenkwana, uPaul wayesiya kwiintlanganiso zamaKristu nonina. Kodwa xa wayekumabanga aphakamileyo, waqalisa ukunxulumana nolutsha olwalungaphili ngendlela kaThixo. Emva kokuba ephumile esikolweni, waya kwinkonzo yomkhosi worhulumente owawunocalu-calulo, waseMzantsi Afrika. Emva ko-ko engalindelanga, intombazana awayethandana nayo yaluqhawula olo lwalamano lwalukho phakathi kwabo. Le ndlela yokuphila inganelisiyo yamshiya uPaul ekhathazeke kakhulu. Ukhumbula oku: “Ngenye ingokuhlwa ndathandaza kuYehova ndicela ukuba andincede, nangona ndandingasasondeli ngokunyanisekileyo kuThixo kangangeminyaka emininzi.”

Kungekudala emva kokuba ethandazile, uPaul wamenywa ngunina ukuba aye eSikhumbuzweni sokufa kukaKristu. (Luka 22:19) UPaul wamangaliswa sesi senzo sikanina, ngenxa yokuba iindlela zakhe zazitenxile yaye wayengenamdla eBhayibhileni. “Esi simemo ndasigqala njengempendulo kaYehova kumthandazo wam yaye ndavakalelwa kukuba ndimele ndisamkele.” Ukususela ngelo xesha, uPaul waqalisa ukuya kuzo zonke iintlanganiso zamaKristu. Emva kweenyanga ezine efundisisa iBhayibhile, wakufanelekela ukubhaptizwa. Ngaphezulu, wayeka ukufundela ukuba ngunonjineli waza wakhetha umsebenzi wokuba nesabelo ekushumayeleni ixesha elizeleyo. Namhlanje, uPaul wonwabile yaye akasakhathazekanga ngenxa yendlela awayephila ngayo ngaphambili. Kule minyaka ili-11 idluleyo, ebekhonza kwiofisi yesebe leWatch Tower Society eMzantsi Afrika.

Eneneni, uYehova uThixo uyiphendula ngobubele imithandazo yaye “ungumvuzi wabo bamfuna ngenyameko.” (Hebhere 11:6) Kungekudala iza kufika imini enkulu kaYehova ize iphelise bonke ubungendawo. Okwangoku, uYehova uyayiphendula imithandazo yabantu bakhe yokucela amandla nokhokelo njengoko benesabelo ngenkuthalo kulo msebenzi ubalulekileyo wokunikel’ ubungqina. Ngaloo ndlela, izigidi zabantu abavela kuzo zonke iintlanga ziziswa kwibandla lobuKristu yaye ziyasikelelwa ngolwazi lweBhayibhile olukhokelela kubomi obungunaphakade.—Yohane 17:3.

[Umfanekiso okwiphepha 5]

Umthandazo kaKorneli osuk’ entliziyweni wabangela ukuba atyelelwe ngumpostile uPetros

[Umfanekiso okwiphepha 6]

Umthandazo uye wanceda abaninzi ngamaxesha okubandezeleka

[Imifanekiso ekwiphepha 7]

Kulungile ukuthandazela uncedo ukuze uqonde iBhayibhile

Izibini ezitshatileyo zinokuthandazela uncedo lokomeleza umtshato wazo