Ngaba Uyayikholelwa Into Ongayiboniyo?

XA UMNTU esithi, ‘Mna ndikholelwa into endiyibonayo kuphela,’ akanyanisanga ncam. Enyanisweni, sonke siyakholelwa kwizinto esingaziboniyo.

Ngokomzekelo, esikolweni usenokuba ukhe wenza ulingelo lokubonisa ubukho bamandla emagneti. Olu lingelo lusenokuchaza ngolu hlobo: Sasaza amasuntswana aqhekeke kwintsimbi ephepheni. Emva koko beka elo phepha phezu kwemagneti. Xa elo phepha lingcangcazela, kuba ngathi kwenzeka umlingo njengoko loo masuntswana eqokelelana kufutshane neempondo zemagneti aze amilise okwemagneti leyo. Xa usenza loo nto, ngaba ngokwenene unokuyibona imagneti? Hayi, kodwa amandla ayo kumasuntswana entsimbi anokubonwa ngokucacileyo, nto leyo ebonisa ukuba imagneti inawo amandla okutsala.

Siyamkela ngaphandle kwamathandabuzo into yokuba ezinye izinto asinako ukuzibona. Xa sibuka umzobo omhle okanye umfanekiso okroliweyo othi ndijonge, asibuthandabuzi nje kwaphela ubukho bomzobi nomkroli wemifanekiso. Ngoko xa sijonge iingxangxasi okanye sibukele ukutshona kwelanga, ngaba ubuncinane asifanele sishukunyiselwe ekucingeni ukuba zingumsebenzi weNgcungela yeGcisa okanye uMkroli?

Isizathu Sokuba Abanye Bangakholelwa

Okuhlekisayo kukuba abanye abantu baye bayeka ukukholelwa kuThixo ngenxa yoko bakufundiswa ecaweni. Kwakunjalo ngendoda yaseNorway eyaxelelwa ukuba uThixo utshisa abantu abangendawo kwisihogo esivutha umlilo. Le ndoda yayizibuza nje ukuba inganguThixo onjani onokungcungcuthekisa abantu ngolo hlobo, ngoko yayeka ukukholelwa kubukho bukaThixo.

Noko ke, kamva le ndoda yavuma ukufunda iBhayibhile, incedwa ngomnye wamaNgqina kaYehova. Yothuswa kukufunda ukuba iBhayibhile ayifundisi ukuba abangendawo bayangcungcuthekiswa kwisihogo esivuthayo. IBhayibhile ifanisa ukufa nokulala. Xa sisengcwabeni, asiva buhlungu; asazi nto kwaphela. (INtshumayeli 9:5, 10) Kwakhona le ndoda yafunda ukuba abantu abaya kugwetywa nguThixo njengooncanyelweni baya kuhlala engcwabeni ngonaphakade. (Mateyu 12:31, 32) Abafi baya kuvuswa ngexesha elifanelekileyo likaThixo, benethemba lokufumana ubomi obungunaphakade eParadesi. (Yohane 5:28, 29; 17:3) Le ngcaciso yayivakala. Yayivisisana namazwi eBhayibhile athi “uThixo uluthando.” (1 Yohane 4:8) Le ndoda inyanisekileyo yaqhubeka ifundisisa iLizwi likaThixo yaye, ethubeni, yamthanda uThixo ekuthethwa ngaye eBhayibhileni.

Abanye abayamkeli into yokuba uMdali ukho ngenxa yokwesamela kwezinto ezicinezelayo nokungabikho kokusesikweni. Bavumelana nenye indoda yaseSweden eyakha yalatha ezulwini yaza yabuza: “Inokwenzeka njani into yokuba phaya phezulu kubekho usomandla, uThixo onezinwe ngoxa kugquba ukonakala nobungendawo ezants’ apha?” Kwathi kwakungabikho mntu uyiphendulayo, nayo ayakholelwa ukuba uThixo ukho. Kamva yaqalisa ukufundisisa iBhayibhile namaNgqina kaYehova. Yafumanisa ukuba iLizwi likaThixo liwuphendula ngendlela eyanelisayo umbuzo ekukudala ukho othi, Kutheni uThixo evumela ubungendawo?a

Le ndoda inyanisekileyo yafumanisa ukuba ubukho bobungendawo bubodwa abuthethi kuthi uThixo akakho. Ngokomzekelo: Umntu usenokwenza imela yokunqunqa inyama. Umthengi usenokuyithenga loo mela aze ayisebenzise, kungekhona ekunqunqeni inyama, kodwa ekubulaleni omnye umntu. Isibakala sokuba le mela ingazange isetyenziswe ngendlela efanelekileyo asithethi kuthi umenzi wayo akakho. Ngendlela efanayo, isibakala sokuba umhlaba ubungasetyenziswa ngokuvisisana nenjongo eyayimiselwe kwantlandlolo asithethi kuthi awunaMdali.

IBhayibhile ifundisa ukuba umsebenzi kaThixo ugqibelele. Kuye ‘akukho bugqwetha; lilungisa yaye uthe tye yena.’ (Duteronomi 32:4) UThixo unika abantu izipho ezilungileyo, kodwa ezinye zezo zipho ziye zasetyenziswa kakubi, nto leyo eye yabangela ukubandezeleka. (Yakobi 1:17) Noko ke, uThixo uza kukuphelisa ukubandezeleka. Emva koko, ‘abalulamileyo baya kuwudla ilifa umhlaba, bahlale kuwo ngonaphakade.’—INdumiso 37:11, 29.

Indoda yaseSweden ekhankanywe ngaphambilana yachukumiseka yakubona abanye abantu bebandezeleka. Enyanisweni, inkxalabo enothando eyayinayo ngabanye ingqina ubukho bukaThixo. Njani?

Kwinkoliso yabantu, ekuphela kwendlela eyahlukileyo yokukholelwa kuThixo yinkolelo yendaleko. Abo bakholelwa kwindaleko bafundisa ukuba “kusinda esona sinamandla”—ukuba abantu bayakhuphisana yaye nezilwanyana zikhuphisana nezinye ezohlobo lwazo ukuze ziqhubeke ziphila. Ezona zinamandla ziyaphila; ezona zibuthathaka zife. Bathi ke yindlela indalo esebenza ngayo. Kodwa ukuba “yimvelo” ukuba ezibuthathaka zife ukuze zivulele umtyhi ezinamandla, siyichaza njani into yokuba abanye abantu abanamandla bachukunyiswe kukubona abanye abantu bebandezeleka njengale ndoda yaseSweden?

Ukwazi UThixo

Asinako ukumbona uThixo kuba akanamzimba womntu. Ukanti uThixo ufuna simazi. Enye yeendlela esinokumazi ngakumbi ngazo kukubuka umsebenzi wakhe obalaseleyo—“imizobo” kunye “nemifanekiso ekroliweyo” yendalo. KumaRoma 1:20, iBhayibhile ithi: “Iimpawu [zikaThixo] ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe.” Ewe, kanye njengokuba ukubuka umzobo okanye umfanekiso okroliweyo kunokukunceda ubuqonde ubuntu bomzobi okanye umkroli wawo, ukucamngca ngemisebenzi engummangaliso kaThixo kunokukunceda ubazi ngakumbi ubuntu bakhe.

Kakade ke, asinakukwazi ukuyiphendula yonke imibuzo exhalabisayo yobomi ngokusuka sijonge imisebenzi yendalo kaThixo. Kodwa sinako ukufumana iimpendulo kuloo mibuzo ngokuphanda kwiLizwi likaThixo, iBhayibhile. Amadoda amabini akhankanywe ngaphambilana athi ukuze afikelele kwisigqibo sokuba uThixo ukho nokuba ukukhathalele oko kwenzeka kuthi, afunda iBhayibhile enengqondo ephangaleleyo.

[Umbhalo osemazantsi]

[Inkcazelo Ngomfanekiso okwiphepha 28]

J. Hester and P. Scowen (AZ State Univ.), NASA