Ukuvuzwa Emva Kokufuna Ixesha Elide
“UYEHOVA? Ngubani uYehova?” USilvia oneminyaka esibhozo ubudala wayekhe walibona elo gama kwiBhayibhile yesiArmenia, ubuncwane bentsapho awayebuboniswe yenye intwazana eselula. Wabuza kubo bonke abantu, kodwa akakho umntu eYerevan, eArmenia, apho wayehlala khona owayenokumxelela ukuba uYehova ungubani—nabazali bakhe, abafundisi-ntsapho, kwanabefundisi becawa yasekuhlaleni babengazi.
USilvia wakhula, wagqiba ukufunda waza wafumana umsebenzi, kodwa sekunjalo wayengazi ukuba uYehova ngubani na. Njengomntu oselula, kwafuneka asabe eArmenia, yaye emva kwexesha elithile wahlala ePoland kwigumbi elincinane nezinye iimbacu. Omnye kwabo wayehlala nabo wayesoloko etyelelwa ngabantu abathile. “Ngoobani ezi ndwendwe zakho?” uSilvia wabuza. “NgamaNgqina kaYehova, aze kundifundisa iBhayibhile,” yatsho impendulo.
Waba nemincili uSilvia akuva igama likaYehova. Ekugqibeleni, waqalisa ukufunda ukuba ungubani na uYehova nendlela anguThixo onothando ngayo. Noko ke, kungekudala kwafuneka ahambe ePoland. Wafuna indawo yokhuseleko eDenmark, ngaphesheya koLwandle iBaltic. Wathabatha iimpahla ezimbalwa, kodwa phakathi kwazo kwakukho uncwadi lweBhayibhile olupapashwe ngamaNgqina kaYehova. Kwiphepha elingasemva lenye impapasho, uSilvia wafumana uludwe lweekhelingi zeeofisi zamasebe eWatch Tower Society. Leyo yayiyenye yezona mpahla zakhe zibalulekileyo—indlela yokunxibelelana noYehova!
EDenmark, uSilvia wathatyathwa wasiwa kwinkampu yeembacu, yaye ngoko nangoko waqalisa ukukhangela amaNgqina kaYehova. Ngokoludwe lweekhelingi awayenalo, wayesazi ukuba iofisi yeWatch Tower Society yesebe laseDenmark yayikwidolophu yaseHolbæk. Kodwa yayindawoni? USilvia wasiwa kwenye inkampu ngololiwe, yaye endleleni eya apho, uloliwe wadlula eHolbæk! Kwakhona, intliziyo yakhe yaphuphuma luvuyo.
Kungekudala emva koko, ngenye imini ilanga laligqats’ ubhobhoyi, uSilvia wakhwela uloliwe wabuyela umva eHolbæk waza wahamba ngeenyawo ukusuka esikhululweni ukuya kwiofisi yesebe. Xa ekhumbula oku uthi: “Ndathi ndakungena kuloo myezo, ndahlala phantsi kwisihlalo ndaza ndathi ngaphakathi, ‘Le yiparadesi!’” Wamkelwa ngokufudumeleyo esebeni yaye ekugqibeleni wakwazi ukuzifumanela isifundo sakhe seBhayibhile.
Kodwa emva koko watshintshelwa kwiindawo eziliqela. Xa esuka kwindawo yeembacu esiya kwenye, uSilvia kwakufuneka afune amaNgqina kaYehova aze aphinde aqalise isifundo sakhe seBhayibhile. Sekunjalo, emva kweminyaka emibini, wayesele efunde okwaneleyo ukuba ahlulele ubomi bakhe kuYehova. Wabhaptizwa yaye kungekudala emva koko wangenela ubulungiseleli bexesha elizeleyo. Ngowe-1998 abasemagunyeni baseDenmark bamnika indawo yokhuseleko.
Ngoku uSilvia uneminyaka engama-26 yaye ukhonza kwindawo eyamkhumbuza iparadesi, iofisi yesebe yamaNgqina kaYehova eseDenmark. Ngoku uthi: “Ndingathini bethu? Bendisoloko ndifuna uYehova ukususela oko ndandiyintwazana eselula. Ngoku ndimfumene. Ndandinqwenela ukuchithela ubomi bam enkonzweni yakhe, yaye naku ndiseBheteli. Ndithandazela ukuba eli ibe likhaya lam nakwiminyaka ezayo!”