UYehova Ubuthiyile Ubuqhophololo
‘Musani ukuphathana ngobuqhophololo.’—MALAKI 2:10.
1. Yintoni ayifunayo uThixo kuthi ukuze sifumane ubomi obungunaphakade?
NGABA uyabufuna ubomi obungunaphakade? Ukuba nawe unethemba elinjengelo libhalwe eBhayibhileni, mhlawumbi uya kuthi, ‘Kakade ndiyabufuna.’ Kodwa ukuba unqwenela ukuba uThixo akubabale ngobomi obungunaphakade kwihlabathi lakhe elitsha, kuya kufuneka uphile ngokuvisisana nemilinganiselo yakhe. (INtshumayeli 12:13; Yohane 17:3) Ngaba kusengqiqweni ukulindela ukuba abantu abangafezekanga baphile ngaloo milinganiselo? Ewe, kuba uYehova uthetha la mazwi akhuthazayo: “Ndiyoliswa bububele bothando, kungekhona imibingelelo; ndiyoliswa kukwazi uThixo kuneminikelo etshiswa kuphele.” (Hoseya 6:6) Ngoko, kwanabantu abenza iimpazamo banako ukuphila ngokuvisisana nemilinganiselo kaThixo.
2. AmaSirayeli amaninzi aqhubana njani noYehova ngobuqhophololo?
2 Noko ke, asinguye wonke umntu okufunayo ukwenza ukuthanda kukaYehova. UHoseya ubonisa ukuba kwanamaSirayeli amaninzi ayengafuni ukwenza ukuthanda kukaYehova. Njengohlanga, avuma ukungena kumnqophiso, isivumelwano sokuthobela imithetho kaThixo. (Eksodus 24:1-8) Ukanti, kungekudala ‘awugqitha umnqophiso’ ngokwaphula imithetho yakhe. Ngaloo ndlela, uYehova wathi loo maSirayeli ‘ayeqhubana naye ngobuqhophololo.’ (Hoseya 6:7) Yaye ukususela ngoko, abantu abaninzi baye benza okufanayo. Kodwa uYehova ubuthiyile ubuqhophololo, enoba benziwa kuye okanye kwabo bamthandayo nabamkhonzayo.
3. Yintoni esiza kuyihlolisisa kwesi sifundo?
3 AsingoHoseya kuphela umprofeti owabalaselisa imbono kaThixo ngobuqhophololo, imbono ekufuneka sibe nayo ukuba sinethemba lokuphila ngolonwabo. Kwinqaku elandulelayo, siye saqalisa ukuhlalutya inxalenye enkulu yesiprofeto sikaMalaki, ukususela kwisahluko sokuqala sencwadi yakhe. Ngoku masihlabele mgama kwisahluko sesibini saloo ncwadi size sibone indlela ebalaseliswa ngakumbi ngayo imbono kaThixo ngobuqhophololo. Nangona uMalaki wayethetha ngemeko eyayixhaphakile phakathi kwabantu bakaThixo kumashumi eminyaka emva kokubuya kwabo ekuthinjweni eBhabhiloni, esi sahluko sesibini sinentsingiselo ngakumbi kuthi namhlanje.
Ababingeleli Ababekek’ Ityala
4. UYehova wabalumkisa wathini ababingeleli?
4 Kwisahluko 2, uYehova uqalisa ngokukhalimela ababingeleli abangamaYuda ngenxa yokuphambuka kwabo kwiindlela zakhe zobulungisa. Xa bengasithobeli isiluleko sakhe baze balungise iindlela zabo, ngokuqinisekileyo babeza kwehlelwa lishwangusha. Phawula iindinyana ezimbini zokuqala: “‘Lo myalelo ngowenu, babingeleli. Ukuba aniyi kuphulaphula, yaye ukuba aniyi kukubeka entliziyweni yenu ukunika igama lam uzuko,’ utsho uYehova wemikhosi, ‘ngokuqinisekileyo ndiya kuthumela kuni isiqalekiso, kwaye ndiza kuziqalekisa iintsikelelo zenu.’” Ukuba ababingeleli babefundise abantu imithetho kaThixo baza bayigcina, babeya kusikelelwa. Kodwa ngenxa yokutyeshela ukuthanda kukaThixo, babeza kufikelwa sisiqalekiso. Kwaneentsikelelo ezazivakaliswa ngababingeleli zaziza kujika zibe sisiqalekiso.
5, 6. (a) Kutheni le nto ngokukhethekileyo ingababingeleli ababekek’ ityala? (b) Yintoni eyathethwa nguYehova ukubonakalisa ukuba wayebacekisa abo babingeleli?
5 Kutheni ngokukhethekileyo ingababingeleli ababekek’ ityala? Indinyana 7 inikela impendulo ecacileyo: “Imilebe yombingeleli ifanele igcine ukwazi, nomthetho bafanele bawufune emlonyeni wakhe abantu; kuba ungumthunywa kaYehova wemikhosi.” Kwiminyaka engaphezu kwewaka ngaphambilana, imithetho kaThixo eyadluliselwa kuSirayeli ngoMoses yayisithi ababingeleli babenembopheleleko ‘yokufundisa oonyana bakaSirayeli yonke imimiselo ayithethileyo uYehova.’ (Levitikus 10:11) Okulusizi kukuba, kwixesha elithile kamva, umbhali weyesi-2 yeziKronike 15:3 wathi: “USirayeli wayenemihla emininzi engenaye uThixo oyinyaniso engenambingeleli ofundisayo yaye engenaMthetho.”
6 Ngexesha likaMalaki, ngenkulungwane yesihlanu ngaphambi kweXesha Eliqhelekileyo, ababingeleli babekwimeko efanayo. Babengabafundisi abantu uMthetho kaThixo. Ngoko abo babingeleli kwakufuneka baphenduliswe. Phawula amazwi abukhali uYehova awabhekisa kubo. UMalaki 2:3 uthi: “Ndiza kuchithachitha umswane ebusweni benu, umswane wemithendeleko yenu.” Ngokwenene, baza kuyaleka! Umswane wezilwanyana ekwakunikelwa ngazo wawufanele ulahlwe ngaphandle kwenkampu uze utshiswe. (Levitikus 16:27) Kodwa xa uYehova ebaxelela ukuba endaweni yoko, umswane wawuza kuchithachithwa ebusweni babo, ngokucacileyo oko kubonisa ukuba wayeyicekisa yaye engayamkeli loo mibingelelo kunye nabo babeyinikela.
7. Abafundisi boMthetho bamcaphukisa njani uYehova?
7 Kwiinkulungwane ngaphambi kwexesha likaMalaki, uYehova wamisela abaLevi ukuba banyamekele umnquba yaye kamva itempile nenkonzo engcwele. Babengabafundisi kuhlanga lwakwaSirayeli. Ukuphumeza kwabo imbopheleleko yabo kwakuya kuthetha ubomi noxolo kubo nakolo hlanga. (Numeri 3:5-8) Ukanti, abaLevi bayeka ukumhlonela uThixo njengoko babesenza ngaphambili. Ngenxa yoko, uYehova wathi kubo: ‘Niphambukile endleleni. Nibakhubekisile abaninzi emthethweni. Niwonakalisile umnqophiso kaLevi, anizigcinanga iindlela zam.’ (Malaki 2:8, 9) Ngenxa yokungabafundisi inyaniso nangenxa yokuba ngumzekelo ombi kwabo, ababingeleli balahlekisa amaSirayeli amaninzi, ngoko uYehova wayefanele ukuba acaphuke.
Ukuphila Ngemilinganiselo KaThixo
8. Ngaba yinto engekho ngqiqweni ukulindela abantu ukuba baphile ngemilinganiselo kaThixo? Cacisa.
8 Masingacingi ukuba abo babingeleli babefanele basizelwe baze baxolelwe ngenxa yokuba babengabantu abangafezekanga yaye ngenxa yoko kwakungalindelekanga ukuba baphile ngemilinganiselo kaThixo. Ingongoma ikukuba abantu banako ukugcina imiyalelo kaThixo, kuba uYehova akalindelanga into engaphezu kwamandla abo. Kusenokwenzeka ukuba, ngelo xesha abanye ababingeleli babephila ngemilinganiselo kaThixo, yaye akuthandabuzeki ukuba kamva ukho omnye owayigcinayo—uYesu, oyena “mbingeleli mkhulu.” (Hebhere 3:1) Enyanisweni kwakunokuthiwa ngaye: “Wona kanye umthetho wenyaniso waba semlonyeni wakhe, yaye akuzange kufumaneke ntswela-bulungisa emilebeni yakhe. Wahamba nam ngoxolo nangokuthe tye, yaye babebaninzi nabo wababuyisayo kwisiphoso sabo.”—Malaki 2:6.
9. Ngoobani abaye ngokuthembeka basasaza inyaniso kweli xesha lethu?
9 Ngokufanayo, ngaphezu kwenkulungwane ngoku, abazalwana bakaKristu abathanjisiweyo, abo banethemba lokuphila ezulwini, baye bakhonza ‘njengababingeleli abangcwele, ukuba banikele imibingelelo yokomoya eyamkelekileyo kuThixo.’ (1 Petros 2:5) Baye bakhokela ekusasazeni iinyaniso zeBhayibhile kwabanye. Njengoko uye wafunda iinyaniso abazifundisayo, ngaba akukhange ufumanise ukuba kanye umthetho wenyaniso usemilonyeni yabo? Baye banceda ukukhupha abaninzi kunqulo oluphosakeleyo, kangangokuba ngoku, emhlabeni wonke, kukho izigidi zabantu abaye bafunda iinyaniso zeBhayibhile nabanethemba lobomi obungunaphakade. Nabo aba, banelungelo lokufundisa ezinye izigidi umthetho wenyaniso.—Yohane 10:16; ISityhilelo 7:9.
Isizathu Sokulumka
10. Kutheni sifanele silumke?
10 Noko ke, sifanele silumke. Sisenokungaziqondi ngokupheleleyo iimfundiso eziqulethwe yincwadi kaMalaki 2:1-9. Ngaba thina sikulumkele ukuba kungafumaneki ntswela-bulungisa emilebeni yethu? Ngokomzekelo, ngaba amalungu entsapho yethu anokuyithemba ngokwenene into esiyithethayo? Ngaba abazalwana noodade bokomoya abasebandleni banokuyithemba into esiyithethayo? Sisenokuqalisa umkhwa wokuthetha ngezangotshe, ngoxa eneneni oko sikuthethayo kulahlekisa. Okanye ubani unokuzibaxa izinto okanye afihle iinkcukacha ezithile kumbandela wezoshishino. Ngaba uYehova ebengayi kukubona oko? Yaye ukuba besisenza izinto ezinjalo, ngaba ubeya kuyamkela imibingelelo yendumiso yemilebe yethu?
11. Ngokukhethekileyo ngoobani ekufuneka balumke?
11 Abo banelungelo lokufundisa iLizwi likaThixo emabandleni namhlanje, bafanele bafumane isilumkiso kwincwadi kaMalaki 2:7. Ithi imilebe yabo ‘ifanele igcine ukwazi, yaye abantu bafanele bafumane umthetho emlonyeni wabo.’ Abo bafundisi banembopheleleko enzima, kuba uYakobi 3:1 ubonisa ukuba baya “kufumana umgwebo onzima ngakumbi.” Ngoxa befanele bafundise ngenzondelelo nangehlombe, imfundiso yabo imele isekelwe ngokupheleleyo kwiLizwi likaThixo elibhaliweyo yaye ibe yimfundiso evela kwintlangano kaYehova. Ngaloo ndlela baya kuba ‘bakufanelekele ukufundisa abanye.’ Ngako oko, bayalulekwa: “Yenza unako-nako ukuba uzinikele ukholekile kuThixo, ungumsebénzi ongenazintloni nganto, uliphatha ngokufanelekileyo ilizwi lenyaniso.”—2 Timoti 2:2, 15.
12. Yintoni abamele bayilumkele abo bafundisayo?
12 Ukuba asilumkanga, sisenokufuna ukuxuba oko sikufundiswayo neengcamango zethu. Oko kunokuba yingozi ngokukodwa ukuba umntu unotyekelo lokuyithemba ngokugqithiseleyo indlela aqiqa ngayo kwanaxa iphikisana noko kufundiswa yintlangano kaYehova. Kodwa uMalaki isahluko 2 ubonisa ukuba sifanele silindele ukuba abo bafundisayo ebandleni banamathele kulwazi oluvela kuThixo kungekhona kwiingcamango zabo, ezinokukhubekisa izimvu. UYesu wathi: “Nabani na okhubekisa omnye waba bancinane banokholo kum, ngekumlungele kanye ukuba agangxwe ilitye lokusila entanyeni yakhe njengelo lijikeleziswa nge-esile aze atshoniswe enzulwini yolwandle.”—Mateyu 18:6.
Ukutshata Nongakholwayo
13, 14. Liliphi elinye ikhondo elakhankanywa nguMalaki?
13 Ukususela kwindinyana 10, uMalaki isahluko 2 uthetha ngobuqhophololo ngendlela engqale nangakumbi. Incwadi kaMalaki ibalaselisa imibandela emibini enxulumeneyo apho isebenzisa igama elithi “ngobuqhophololo” ngokuphindaphindiweyo. Okokuqala, phawula ukuba uMalaki uqalisa isiluleko sakhe ngale mibuzo: “Asinabawo omnye sonke na? AsingoThixo omnye na osidalileyo? Kutheni na ukuze siqhubane ngobuqhophololo, sihlambela umnqophiso wookhokho bethu?” Indinyana 11 yongezelela isithi ubuqhophololo obenziwe nguSirayeli ‘kukuhlambela ubungcwele bukaYehova.’ Yintoni le imbi kangaka wayeyenza? Loo ndinyana ikhankanya enye into embi: ‘Wayethabathe intombi yothixo wasemzini njengomtshakazi.’
14 Ngamanye amazwi, amanye amaSirayeli, awayeyinxalenye yohlanga olwaluzinikele kuYehova, ayetshate nabantu ababengengabo abanquli bakhe. Umongo usinceda sibone isizathu sokuba oku kwakukubi kangaka. Indinyana 10 ithi ayenoyise omnye. Apha kwakungathethwa ngoYakobi (owaphinda wathiywa ngokuba nguSirayeli) okanye uAbraham okanye uAdam. UMalaki 1:6 ubonisa ukuba loo “bawo mnye” nguYehova. Uhlanga lwakwaSirayeli lwalunolwalamano kunye naye, lwaluyinxalenye yomnqophiso owawenziwe nookhokho balo. Omnye wemithetho yaloo mnqophiso wawusithi: “Uze ungendiselani nazo. Intombi yakho uze ungayiniki unyana wakhe, nentombi yakhe uze ungayithabatheli unyana wakho.”—Duteronomi 7:3.
15. (a) Bambi banokuzithethelela njani ngokutshata nomntu ongakholwayo? (b) UYehova uthini ngomtshato?
15 Bambi namhlanje basenokuqiqa ngelithi: ‘Lo mntu ndimthandayo ulunge gqitha. Ekuhambeni kwexesha mhlawumbi, uya kulwamkela unqulo oluyinyaniso.’ Ukucinga ngaloo ndlela kungqina oko kuthethwa sisilumkiso esiphefumlelweyo esithi: “Intliziyo inenkohliso kunayo nantoni na yaye iyatyhudisa.” (Yeremiya 17:9) Imbono kaThixo ngokutshata nomntu ongakholwayo ichazwe kuMalaki 2:12: “UYehova uya kumnqumla ngamnye okwenzayo oko.” Ngenxa yoko, amaKristu abongozwa ukuba atshate “kuphela eNkosini.” (1 Korinte 7:39) Kwinkqubo yamaKristu, ikholwa ‘alinqunyulwa’ ngenxa yokutshata nomntu ongakholwayo. Sekunjalo, ukuba lowo ungakholwayo akaguquki, kuza kwenzeka ntoni kuye xa kungekudala uThixo ephelisa le nkqubo yezinto?—INdumiso 37:37, 38.
Ukungcungcuthekisa Iqabane Likabani
16, 17. Bambi babenobuqhophololo njani?
16 Uyandula ke uMalaki athethe ngobuqhophololo besibini: ukungcungcuthekisa iqabane likabani, ingakumbi ngokuqhawula umtshato ngokungekho mthethweni. Indinyana 14 kwisahluko 2 ithi: “UYehova enikele ubungqina phakathi kwakho nomfazi wobutsha bakho, lowo wena uqhubene naye ngobuqhophololo, nangona eliqabane lakho nomfazi womnqophiso wakho.” Ngokubaphatha ngobuqhophololo abafazi bawo, amadoda angamaYuda abangela ukuba isibingelelo sikaYehova ‘sigutyungelwe ziinyembezi.’ (Malaki 2:13) Loo madoda ayeqhawula umtshato ngezizathu ezingekho mthethweni, eshiya abafazi bobutsha bawo, etshata namabhinqa aselula okanye angabahedeni. Yaye ababingeleli abonakeleyo babekuvumela oko! Ukanti, uMalaki 2:16 uthi: “‘Kuba uluthiyile uqhawulo-mtshato,’ utsho uYehova uThixo kaSirayeli.” Kamva, uYesu wabonisa ukuba ekuphela kwesizathu esinokukhulula iqabane elimsulwa ukuba liphinde litshate, kukuziphatha okubi.—Mateyu 19:9.
17 Khawucingisise ngamazwi kaMalaki, uze ubone indlela abonisa ngayo uvelwano nobubele. Uthetha ‘ngeqabane lakho nomfazi womnqophiso wakho.’ Ndoda nganye ekwakubhekiselwa kuyo yayitshate elinye ikholwa, umSirayelikazi, isithandwa sayo, undofa naye. Ngoxa kusenokwenzeka ukuba batshata beselula, ukuhamba kwexesha nokwaluphala akuzange kuwenze ungasebenzi loo mnqophiso ababewenzile, oko kukuthi, isivumelwano somtshato.
18. Isiluleko sikaMalaki esingobuqhophololo sisebenza njani namhlanje?
18 Isiluleko ngale mibandela sisasebenza ngokufanayo nanamhlanje kuthi. Hayi indlela okubuhlungu ngayo ukubona abanye belutyeshela ulwalathiso lukaThixo lokutshata kuphela eNkosini. Kubuhlungu nokubona ukuba abanye abaqhubeki bewugcina womelele umtshato wabo. Kunoko, benezizathu ezingavakaliyo benza oko uThixo akuthiyileyo ngokuqhawula umtshato ngokungavumelani nezibhalo ukuze batshate nomnye umntu. Ngokwenjenjalo, ‘bamtyhafisile uYehova.’ Ngexesha likaMalaki, abo babesityeshela isiluleko sikaThixo babenobuganga bokuthi uYehova wayebadlel’ indlala. Babesithi: “Uphi na uThixo wokusesikweni?” Hayi indlela ababeqaqadeke ngayo! Ngamana singangaze siwele kumgibe ofanayo.—Malaki 2:17.
19. Amadoda nabafazi banokuwufumana njani umoya kaThixo?
19 Okuvuyisayo kukuba, uMalaki ubonisa ukuba amanye amadoda ayengabaphathi ngobuqhophololo abafazi bawo. ‘Ayenako okuseleyo komoya kaThixo.’ (Indinyana 15) Okonwabisayo kukuba, intlangano kaThixo namhlanje izele ngamadoda ‘awabanika imbeko abafazi bawo.’ (1 Petros 3:7) Akabaxhaphazi emzimbeni okanye ngamazwi, engafuni nokwenza izinto ezinxaxhileyo ngokwesini, yaye akabahlazisi abafazi bawo ngokubonisa umdla kwamanye amabhinqa okanye ngokubukela imifanekiso engamanyala. Kwakhona intlangano kaYehova isikelelekile ngokuba nabafazi abaninzi abathembekileyo abangamaKristu abanyanisekileyo kuThixo nakwimithetho yakhe. Onke loo madoda namabhinqa ayakwazi oko uThixo akuthiyileyo, yaye acinga aze enze izinto ngokuvisisana noko. Qhubeka uwaxelisa, ‘uthobela uThixo njengomlawuli’ ukuze akusikelele ngomoya wakhe oyingcwele.—IZenzo 5:29.
20. Yintoni eza kwenzeka kuluntu lonke kungekudala?
20 Kungekudala, uYehova uza kuligweba lonke eli hlabathi. Mntu ngamnye uya kuziphendulela kuye ngeenkolelo nangezenzo zakhe. “Ngamnye wethu uya kuziphendulela kuThixo.” (Roma 14:12) Kodwa nanku umbuzo obangela umdla ngoku: Ngubani oya kusinda ngemini kaYehova? Inqaku lesithathu nelokugqibela kolu ngcelele liya kuthetha ngalo mxholo.
Ngaba Unokucacisa?
• Sisiphi isizathu esabangela uYehova abakhalimele ababingeleli kwaSirayeli?
• Kutheni imilinganiselo kaThixo ingaphakamanga kangako ukuba abantu baphile ngayo?
• Kutheni sifanele siyilumkele indlela esifundisa ngayo namhlanje?
• Ziziphi izenzo ezibini uYehova wayezigweba ngokukhethekileyo?
[Umfanekiso okwiphepha 15]
Ngexesha likaMalaki ababingeleli bakhalinyelwa ngokungahambi ngeendlela zikaYehova
[Umfanekiso okwiphepha 16]
Simele siqiniseke ukuba sifundisa iindlela zikaYehova, kungekhona iingcinga zethu
[Imifanekiso ekwiphepha 18]
UYehova wawagweba amaSirayeli awayeqhawula umtshato nabafazi bawo ngezizathu ezingavakaliyo aze atshate namabhinqa angabahedeni
[Umfanekiso okwiphepha 18]
Namhlanje amaKristu ayawugcina umnqophiso womtshato