Imibuzo Evela Kubafundi

Kutheni iBhayibhile isithi umntu ufanele amemeze xa ejamelene nokudlwengulwa?

Nabani na ongazange ajamelane noloyiko lokuhlaselwa ngenkohlakalo ngumdlwenguli akasoze ayiqonde indlela oku okumenza ubani axheleke ngayo. Oku koyikisa gqitha kuloo mntu kangangokuba kusenokumkhathaza ubomi bakhe bonke.a Ibhinqa eliselula nelingumKristu elahlaselwa ngumdlwenguli kwiminyaka ethile eyadlulayo lithi: “Indlela endandisoyika ngayo ngobo busuku ayinakuchazwa ngamazwi okanye intlungu ekwakufuneka ndijamelane nayo ukususela ngelo xesha.” Kuyaqondakala ukuba, abantu abaninzi abafuni nokucinga ngalo mbandela woyikisayo. Sekunjalo, abantu basenokujamelana nokudlwengulwa kweli hlabathi lingendawo.

IBhayibhile iyathetha ngabantu abadlwengulwayo nabo baphantse badlwengulwa kwixesha eladlulayo. (Genesis 19:4-11; 34:1-7; 2 Samuweli 13:1-14) Kodwa ikwanikela nesiluleko ngoko ubani afanele akwenze xa ejamelene nokudlwengulwa. Oko kuthethwa nguMthetho ngalo mbandela kufumaneka kwiDuteronomi 22:23-27. Oku kugubungela iimeko ezimbini. Kwimeko yokuqala, indoda yafumana ibhinqa esixekweni yaze yalala nalo. Sekunjalo, elo bhinqa alizange limemeze okanye likhale lifuna uncedo. Ngenxa yoku, lafunyaniswa linetyala ‘kuba lingamemezanga esixekweni.’ Ukuba lalimemezile abantu abahlala kufuphi mhlawumbi ngebabezile ukuza kulinceda. Kwimeko yesibini, indoda ifumana ibhinqa eliselula lisendle yaza ‘yalibamba yalilala.’ Lizama ukuzikhusela, eli bhinqa ‘lamemeza, akwabikho ulihlangulayo.’ Ngokungafaniyo nebhinqa elikwimeko yokuqala, ngokucacileyo eli bhinqa alizange linikezele kuloo mntu wayelihlasela. Lazama ukuxhathisa, ngokumemeza lifuna uncedo, kodwa loyiswa. Ukumemeza kwalo kwabonisa ukuba lalingafuni ukudlwengulwa, ngoko lalingenatyala lokwenza ububi.

Nangona amaKristu namhlanje engekho phantsi koMthetho kaMoses, imigaqo ekhankanyiweyo inikela ukhokelo. Ingxelo ekhankanywe ngasentla ibalaselisa ukubaluleka kokuxhathisa nokumemeza ufuna uncedo. Ukumemeza xa ujamelene nokudlwengulwa kusagqalwa njengekhondo lobulumko. Enye ingcali engokuthintelwa kolwaphulo-mthetho yathi: “Ukuba ibhinqa liyahlaselwa, esona sixhobo salo sinamandla iseyimiphunga yalo.” Ukumemeza kwebhinqa kunokubiza abanye, abanokulinceda, okanye kusenokumothusa lowo uhlaselayo aze abaleke. Elinye ibhinqa eliselula nelingumKristu elahlaselwa ngumdlwenguli lathi: “Ndamemeza kakhulu waza wandiyeka. Xa lo mntu wayephinda esondela kum, ndamemeza ndaza ndabaleka. Ngaphambili bendisoloko ndicinga, ‘Ukumemeza kunokundinceda njani xa indoda enamandla indibambile icinga nje ngento enye?’ Kodwa ndiye ndafunda ukuba oku kuyasebenza!”

Nakwimeko elusizi xa ibhinqa elithile liye loyiswa laza ladlwengulwa, imigudu yalo nokumemeza lifuna uncedo akulolize. Kunoko, ibonisa ukuba liye lenza konke okusemandleni alo ukuxhathisa umdlwenguli. (Duteronomi 22:26) Nangona lijamelene nale ntlungu, linokuba nesazela esicocekileyo, lihlale lizihlonela lize liqiniseke ukuba licocekile emehlweni kaThixo. Esi siganeko sibuhlungu sinokulishiya lenzakele ngaphakathi, kodwa ukwazi ukuba lenze konke okusemandleni alo ukuxhathisa kuya kulinceda gqitha ngoxa lichacha ngokuthe ngcembe.

Xa sicinga ngendlela esebenza ngayo incwadi yeDuteronomi 22:23-27, simele siqonde ukuba le ngxelo imfutshane ayigubungeli zonke iimeko. Ngokomzekelo, ayithethi ngemeko apho ibhinqa elihlaselwayo lingenakukwazi ukumemeza kuba lisisimumu, lingekho zingqondweni, okanye loyike kangangokuba lingakwazi ukwenza nto okanye livalwe umlomo ngesandla okanye ngeteyiphu. Noko ke, ekubeni uYehova ekwazi ukuzihlola zonke izibakala, kuquka iintshukumisa, ubonisa ukuqonda nokusesikweni kwiimeko ezinjalo, kuba “zonke iindlela zakhe zisesikweni.” (Duteronomi 32:4) Uyazi ngokwenene into eyenzekileyo nemigudu eyenziwe ngulowo uhlaselweyo ukuze axhathise. Ngoko ke, umntu ongakwazanga ukumemeza kodwa owenze konke okusemandleni akhe phantsi kwezo meko unokuwushiyela kuYehova loo mbandela.—INdumiso 55:22; 1 Petros 5:7.

Sekunjalo, amanye amabhinqa angamaKristu aye ahlaselwa aze adlwengulwa ahlala enesazela. Xa ecinga ngoko kwenzekayo, avakalelwa kukuba kwakufanele enze okungakumbi ukuthintela oku kungenzeki. Noko ke, kunokuba bazisole, abantu abadlwengulweyo banokuthandaza kuYehova, bacele uncedo, baze babe nentembelo yokuba uya kubonakalisa ububele bothando olukhulu.—Eksodus 34:6; INdumiso 86:5.

Ngenxa yoko, amabhinqa angamaKristu ngoku ajamelene nentlungu yokudlwengulwa anokuba nentembelo yokuba uYehova uyiqonda ngokupheleleyo intlungu akuyo. ILizwi likaThixo liyawaqinisekisa lisithi: “UYehova usondele kwabo baphuke intliziyo; yaye abo bamoya utyumkileyo uyabasindisa.” (INdumiso 34:18) Uncedo olungakumbi lokuhlangabezana nale ntlungu lunokufumaneka kwinkxaso evela kwamanye amakholwa anolwazelelelo nanobubele kwibandla lamaKristu. (Yobhi 29:12; 1 Tesalonika 5:14) Ngaphezu koko, imigudu yabo badlwenguliweyo yokuhlala becinga ngezinto ezakhayo iya kubanceda bafumane “uxolo lukaThixo olungaphaya kokuqonda.”—Filipi 4:6-9.

[Umbhalo osemazantsi]