Ukunyamezela Izilingo Kuzukisa UYehova

“Ukuba nibandezeleka ngenxa yokwenza okulungileyo, nize ninyamezele, kuyamkholisa uThixo oko.”—1 PETROS 2:20.

1. Ekubeni amaKristu okwenyaniso ekuxhalabele ukuphila ngokuvisisana nozahlulelo lwawo, nguwuphi umbuzo ofanele uqwalaselwe?

AMAKRISTU azahlulele kuYehova yaye afuna ukwenza ukuthanda kwakhe. Ukuze aphile ngokuvisisana nozahlulelo lwawo, enza konke okusemandleni ukuze alandele emanyathelweni oMzekelo wawo, uYesu Kristu, aze anikele ubungqina kwinyaniso. (Mateyu 16:24; Yohane 18:37; 1 Petros 2:21) Noko ke, uYesu nabanye abathembekileyo bancama ubomi ngenxa yokholo lwabo baza bafa njengabafeli-nkolo. Ngaba oku kuthetha ukuba onke amaKristu anokulindela ukufa ngenxa yokholo lwawo?

2. AmaKristu azijonga njani izilingo nokubandezeleka?

² NjengamaKristu, siyalelwa ukuba sithembeke kude kuse ekufeni, kodwa akuthiwa simele sife ngenxa yokholo lwethu. (2 Timoti 4:7; ISityhilelo 2:10) Oku kuthetha ukuba nakuba sikulungele ukubandezeleka—yaye, ukuba kuyimfuneko, sife—ngenxa yokholo lwethu, leyo asinto esiyinqwenelayo. Asikuvuyeli ukubandezeleka yaye akusiyolisi ukuva iintlungu okanye ukuhlaziswa. Noko ke, ekubeni sikulindele ukujamelana nezilingo nentshutshiso, sifanele sicingisise nzulu ngento esiya kuyenza xa oko kusenzeka kuthi.

Ukuthembeka Xa Sijamelene Novavanyo

3. Yiyiphi imizekelo eseBhayibhileni yendlela yokujamelana nentshutshiso onokuyibalisa? (Bona ibhokisi ethi “Indlela Abajamelana Ngayo Nentshutshiso,” kwiphepha elilandelayo.)

³ EBhayibhileni, sineengxelo ezininzi ezibonisa indlela abakhonzi bakaThixo kumaxesha adluleyo abaye bajamelana ngayo neemeko ezazisongela ubomi babo. Izinto ezahlukahlukeneyo abazenzayo zinceda amaKristu namhlanje ukuze abone into anokuyenza xa ejamelene nobunzima obufanayo. Qwalasela iingxelo ezikwibhokisi ethi “Indlela Abajamelana Ngayo Nentshutshiso,” uze ubone into onokuyifunda kuzo.

4. Kunokuthiwani ngendlela uYesu nabanye abakhonzi abathembekileyo abajamelana ngayo nezilingo?

⁴ Nangona uYesu nabanye abakhonzi bakaThixo abathembekileyo bajamelana nentshutshiso ngeendlela ezahlukahlukeneyo, ngokuxhomekeka kwiimeko, kucacile ukuba abazange babubeke esichengeni ubomi babo. Xa bazifumanisa besengozini, babenenkalipho kodwa besebenzisa ubulumko. (Mateyu 10:16, 23) Injongo yabo yayikukuhambisela phambili umsebenzi wokushumayela nokugcina ingqibelelo kuYehova. Indlela abajamelana ngayo neemeko ezahlukahlukeneyo ingumzekelo kuloo maKristu ajamelene nezilingo nentshutshiso namhlanje.

5. Atshutshiswa njani amaNgqina eMalawi ngeminyaka yee-1960, yaye ajamelana njani naloo ntshutshiso?

⁵ Kule mihla, abantu bakaYehova baye ngamaxesha amaninzi bazifumanisa besebunzimeni ngenxa yeemfazwe, ukuvalwa komsebenzi wabo, okanye intshutshiso ekrakra. Ngokomzekelo, ngeminyaka yee-1960, amaNgqina kaYehova eMalawi atshutshiswa ngokuqatha. IiHolo zawo zoBukumkani, amakhaya, ukutya, amashishini awo—phantse yonke into yawo—yatshatyalaliswa. Ayebethwa yaye ejamelana nezinye iinkxwaleko. Benza ntoni aba bazalwana? Abaninzi babaleka kwiindawo ababehlala kuzo. Abaninzi babalekela emahlathini, ngoxa abanye baxhwarha eMozambique okwexeshana, ilizwe elingummelwane. Nangona abaninzi abathembekileyo baphulukana nobomi babo, abaninzi bakhetha ukubaleka kwindawo eyingozi, nto leyo eyayisengqiqweni kwiimeko ezinjalo. Ngokwenjenjalo, abazalwana balandela umzekelo kaYesu noPawulos.

6. Yintoni amaNgqina aseMalawi angazange ayeke ukuyenza nangona ayetshutshiswa ngokuqatha?

⁶ Nangona kwafuneka abazalwana baseMalawi basabe okanye bazimele, balandela iindlela ezingokobuthixo baza baqhubeka nomsebenzi wabo wobuKristu ngokufihlakeleyo kangangoko banako. Waba yintoni umphumo? Ngaphambi kokuvalwa komsebenzi wawo ngowe-1967, kwakusele kukho incopho yabavakalisi boBukumkani abangama-18 519. Nangona umsebenzi wawusavaliwe yaye abavakalisi abaninzi bebalekele eMozambique, ngowe-1972 kwabakho incopho entsha yabangama-23 398. Aba bavakalisi babeshumayela umlinganiselo weeyure ezili-16 nyanga nganye. Ngokungathandabuzekiyo, ababekwenza kwamzukisa uYehova, yaye uYehova wabasikelela abo bazalwana bathembekileyo ebudeni belo xesha linzima.a

7, 8. Ziziphi izizathu ezibangela ukuba abanye bakhethe ukungabaleki, nangona inkcaso ibangela iingxaki?

⁷ Kwelinye icala, kumazwe aneengxaki ngenxa yenkcaso, abanye abazalwana basenokukhetha ukungahambi, enoba bayakwazi ukwenjenjalo. Ukuhamba kusenokuzicombulula ezinye iingxaki, kodwa kusenokuvelisa ezinye. Ngokomzekelo, ngaba baya kukwazi ukuqhagamshelana nabazalwana abangamaKristu baze bangalambi ngokomoya? Ngaba baza kuhlala bezondla ngokomoya ngokuthe rhoqo njengoko bezama ukuzinza mhlawumbi kwilizwe elimi kakuhle okanye kwelo linamathuba angakumbi okuzuza izinto eziphathekayo?—1 Timoti 6:9.

⁸ Abanye bakhetha ukungahambi ngenxa yokuxhalabela impilo yokomoya yabazalwana babo. Bakhetha ukuhlala baze bajamelane naloo meko ukuze baqhubeke beshumayela kwintsimi yabo baze bakhuthaze amanye amakholwa. (Filipi 1:14) Ngokukhetha ngolo hlobo, bambi baye bakwazi ukuba nenxaxheba kumatyala axoxwa enkundleni kumazwe abo baza baphumelela.b

9. Ziziphi izinto umntu afanele aziqwalasele xa esenza isigqibo sokuhlala okanye sokufuduka ngenxa yentshutshiso?

⁹ Ngokuqinisekileyo ukuhlala okanye ukufuduka—lowo ngumbandela wobuqu. Phofu ke, izigqibo ezinjalo, zifanele zenziwe kuphela emva kokuthandaza ngokunzulu sifuna ulwalathiso lukaYehova. Noko ke, lingakhathaliseki ikhondo esikhetha ukulilandela, sifanele sikhumbule amazwi ompostile uPawulos athi: “Ngamnye wethu uya kuziphendulela kuThixo.” (Roma 14:12) Njengokuba sitshilo ngaphambilana, oko uYehova akufunayo kukuba mkhonzi ngamnye wakhe ahlale ethembekile phantsi kwazo naziphi na iimeko. Bambi kubakhonzi bakhe bajamelene nezilingo neentshutshiso kanye ngoku sithethayo; mhlawumbi kwabanye oko kuya kwenzeka kwixesha elizayo. Bonke baya kuvavanywa ngandlel’ ithile, yaye akukho mntu ufanele alindele ukuba yena ugonyiwe. (Yohane 15:19, 20) Njengabakhonzi bakaYehova abazahluleleyo, asinakuyibaleka imbambano yendalo iphela ebandakanya ukungcwaliswa kwegama likaYehova nokuthethelelwa kolongamo lwakhe.—Hezekile 38:23; Mateyu 6:9, 10.

“Musani Ukubuyisela Ububi Ngobubi Nakubani Na”

10. UYesu nabapostile bakhe basimisela wuphi umzekelo obalulekileyo ngokujamelana nengcinezelo nenkcaso?

¹⁰ Omnye umgaqo obalulekileyo esinokuwufunda kwindlela uYesu nabanye abapostile abajamelana ngayo nengcinezelo kukungaze siziphindezele xa sitshutshiswa. IBhayibhile ayilikhankanyi nakancinane elokuba uYesu okanye abalandeli bakhe baqalisa umbutho womzabalazo okanye babhenele ekuphakamiseni izigalo ukuze balwe nabo babatshutshisayo. Kunoko, umpostile uPawulos wawaluleka amaKristu esithi: “Musani ukubuyisela ububi ngobubi nakubani na. . . . Musani ukuziphindezelela, zintanda, kodwa yikhweleleni ingqumbo; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’” Ngapha koko, “musa ukuzivumela woyiswe bububi, kodwa hlala uboyisa ububi ngokulungileyo.”—Roma 12:17-21; INdumiso 37:1-4; IMizekeliso 20:22.

11. Omnye umbhali-mbali uthini ngendlela amaKristu amandulo ayemgqala ngayo uRhulumente?

¹¹ AmaKristu okuqala asigcina eso siluleko. Kwincwadi yakhe ethi The Early Church and the World, umbhali-mbali uCecil J. Cadoux uchaza indlela amaKristu awayemjonga ngayo uRhulumente ebudeni beminyaka yama-30 ukusa kweyama-70 C.E. Ubhala esithi: “Asinabungqina bubambekayo obubonisa ukuba amaKristu eli xesha akhe azama ukulwa ngenxa yokuba ayetshutshiswa. Ekuphela kwento akhe ayenza kukubagxeka kabukhali abalawuli okanye ukubadida ngokubaleka. Noko ke, ngokuqhelekileyo amaKristu ayengayithobeli imiyalelo karhulumente awayevakalelwa kukuba ayihambisani nokuthobela uKristu kodwa oko ayekwenza ngentlonelo.”

12. Kutheni kukuhle ukunyamezela ubunzima kunokuziphindezelela?

¹² Ngaba ngokwenene isimo esinjalo sokuthobeka siluncedo? Ngaba nabani na owenjenjalo akasayi kuba lixhoba labo bafuna ukumtshabalalisa? Ngaba bekungasayi kuba bubulumko ukuzikhusela? Ngokwembono yomntu, oko kusenokubonakala kunjalo. Noko ke, njengabakhonzi bakaYehova, siqinisekile ukuba ukulandela ulwalathiso lukaYehova kuzo zonke iinkalo kulelona khondo lobulumko. Sikhumbula amazwi kaPetros athi: “Ukuba nibandezeleka ngenxa yokwenza okulungileyo, nize ninyamezele, kuyamkholisa uThixo oko.” (1 Petros 2:20) Siqinisekile ukuba uYehova uyayazi le meko yaye akasayi kuvumela ukuba oku kuqhubeke ngokungapheliyo. Yintoni esenza siqiniseke ngaloo nto? Kubantu bakhe ababethinjwe eBhabhiloni, uYehova wathi: “Ochukumisa nina uchukumisa ukhozo lweliso lam.” (Zekariya 2:8) Umntu unokukunyamezela ixesha elide kangakanani ukuchukunyiswa kwekhozo leliso lakhe? UYehova uya kuzisa isiqabu ngexesha elifanelekileyo. Siqiniseke ngokupheleleyo ngaloo nto.—2 Tesalonika 1:5-8.

13. Kwakutheni ukuze uYesu ngokuzithoba avumele utshaba lumbambe?

¹³ Ngokuphathelele oku, sinokukhangela kuYesu njengomzekelo wethu. Xa wavumela iintshaba zakhe ukuba zimbambe kwisitiya saseGetsemane, akuthethi kuthi wayengakwazi ukuzikhusela. Enyanisweni wabaxelela oku abafundi bakhe: “Ucinga ukuba andinako ukubongoza uBawo andibonelele ngawo lo mzuzu ngemikhosi yeengelosi engaphezu kweshumi elinesibini? Ngoko, beziya kuzaliseka njani iZibhalo ezithi kumele kwenzeke ngale ndlela?” (Mateyu 26:53, 54) Ukufezwa kokuthanda kukaYehova kwakuyeyona nto iphambili kuYesu, enoba oku kwakuthetha ukunyamezela ubunzima. Wayeqiniseke ngokupheleleyo ngamazwi endumiso kaDavide asisiprofeto athi: “Akuyi kuwushiya eShiyol umphefumlo wam. Akuyi kumvumela onyanisekileyo wakho abone umhadi.” (INdumiso 16:10) Kwiminyaka kamva umpostile uPawulos wathi ngoYesu: “Ngenxa yovuyo olwalubekwe phambi kwakhe wasinyamezela isibonda sentuthumbo, elidela ihlazo, waza wahlala phantsi ngasekunene kwetrone kaThixo.”—Hebhere 12:2.

Uvuyo Lokungcwaliswa Kwegama LikaYehova

14. Luluphi uvuyo olwalondoloza uYesu kuzo zonke izilingo awajamelana nazo?

¹⁴ Luluphi olu vuyo lwalondoloza uYesu wakwazi ukujamelana nolona vavanyo luqatha? Kubo bonke abakhonzi bakaYehova, uYesu, uNyana kaThixo amthandayo, wayelolona tshaba luphambili lukaSathana. Ngoko ke, ukulondoloza ingqibelelo kukaYesu ngoxa wayevavanywa kwakuya kuba yeyona ndlela ibalaseleyo yokuphendula uSathana ekungcikiveni kwakhe uYehova. (IMizekeliso 27:11) Ngaba unokuluthelekelela uvuyo uYesu awayenalo emva kokuvuswa kwakhe? Hayi indlela awayevuya ngayo xa wayeqonda ukuba uye wayifeza indima yakhe njengomntu ofezekileyo ekuthethelelweni kolongamo lukaYehova nokungcwaliswa kwegama Lakhe! Ukongezelela, ukuhlaliswa “phantsi ngasekunene kwetrone kaThixo” ngokungathandabuzekiyo lilungelo elikhulu neyona nto embangela avuye gqitha uYesu.—INdumiso 110:1, 2; 1 Timoti 6:15, 16.

15, 16. AmaNgqina anyamezela yiphi intshutshiso embi eSachsenhausen, yaye yintoni eyawomelezayo ukuze enjenjalo?

¹⁵ Nawo amaKristu, ayakuvuyela ukuba nenxaxheba ekungcwalisweni kwegama likaYehova ngokunyamezela izilingo nentshutshiso, elandela umzekelo kaYesu. Omnye umzekelo ofanelekileyo ngowamaNgqina awabandezeleka kwinkampu yoxinaniso edume kakubi yaseSachsenhausen aza asinda ngoxa ayekuhambo olwaluwabeka emngciphekweni wokufa ekupheleni kweMfazwe Yehlabathi II. Ebudeni bolo hambo, amabanjwa amaninzi afa ngenxa yemozulu embi, izifo, okanye indlala okanye abulawa ngamaNazi ngenkohlakalo endleleni. Onke amaNgqina angama-230, asinda ngokuhlala endawonye yaye encedana naxa ubomi bawo babusengozini.

¹⁶ Yintoni eyawomelezayo la maNgqina ukuze akwazi ukunyamezela intshutshiso? Athi nje akuziva ekhuselekile, avakalisa uvuyo lwawo nombulelo kuYehova kuxwebhu olwalunomxholo othi: “Isigqibo samangqina kaYehova angama-230 aziintlanga ezintandathu, ahlanganisene kwihlathi elikufuphi neSchwerin, eMecklenburg.” Kulo athi: “Lundlulile uvavanyo olukhulu yaye abo baye basinda ngokungathi baxhwilwe kwiziko elivuthayo, abanalo nevumba eli lomlilo. (Bona uDaniyeli 3:27.) Kunoko, amandla kaYehova abomeleze ngeyona ndlela yaye ayilindele ngolangazelelo imiyalelo emitsha evela eNkosini yokuhambisela phambili izilangazelelo Zobuthixo.”c

17. Abantu bakaThixo ngoku bajamelene naziphi iimvavanyo?

¹⁷ Njengabo bathembekileyo bangama-230, nalo ukholo lwethu lusenokuvavanywa, nangona ‘singekaxhathisi kude kuphalale igazi.’ (Hebhere 12:4) Kodwa sinokuvavanywa ngeendlela ngeendlela. Sisenokuhlekwa ngabantwana esifunda nabo, okanye isenokuba yingcinezelo yoontanga yokuziphatha okubi nokwenza ezinye izinto ezimbi. Ukongezelela, ukuzimisela ukuzinxwema kwigazi, ukutshata kuphela eNkosini, okanye ukukhulisela abantwana enyanisweni kwintsapho eyahluleleneyo maxa wambi kunokubangela ingcinezelo kuze kube sisilingo esikhulu.—IZenzo 15:29; 1 Korinte 7:39; Efese 6:4; 1 Petros 3:1, 2.

18. Sisiphi isiqinisekiso esinaso sokuba sinokunyamezela nesona silingo sinzima?

¹⁸ Noko ke, enoba sinokujamelana naluphi na uvavanyo, siyazi ukuba sibandezeleka ngenxa yokubeka kuqala uYehova noBukumkani bakhe, yaye sikugqala kulilungelo lokwenene novuyo ukwenjenjalo. Somelezwa ngamazwi aqinisekisayo kaPetros athi: “Ukuba niyangcikivwa ngenxa yegama likaKristu, ninoyolo, ngenxa yokuba umoya wozuko, oko kukuthi, umoya kaThixo, uphumle phezu kwenu.” (1 Petros 4:14) Ngamandla omoya kaYehova, sinamandla okunyamezela nezona zilingo zinzima, ukuze yena azukiswe aze adunyiswe.—2 Korinte 4:7; Efese 3:16; Filipi 4:13.

[Imibhalo esemazantsi]

Unokucacisa Uthini?

• AmaKristu akujonga njani ukubandezeleka nentshutshiso?

• Sinokufunda ntoni kwinto uYesu nabanye abathembekileyo abayenzayo ngoxa babejamelene nezilingo?

• Kutheni kububulumko ukungaziphindezeli xa sitshutshiswa?

• Luluphi uvuyo olwalondoloza uYesu ngoxa wayejamelene nezilingo, yaye sinokufunda ntoni koku?

[Ibhokisi/Imifanekiso ekwiphepha 15]

Indlela Abajamelana Ngayo Nentshutshiso

• Ngaphambi kokuba amajoni kaHerode afike eBhetelehem ukuze abulale zonke iintsana ezingamakhwenkwe ezineminyaka emibini nangaphantsi, uYosefu noMariya beyalelwe yingelosi bamthabatha uYesu owayeselusana baza babalekela eYiputa.—Mateyu 2:13-16.

• Izihlandlo ezininzi ebudeni bexesha lokushumayela kukaYesu, iintshaba zakhe zazifuna ukumbulala ngenxa yokunikela kwakhe ubungqina. Sihlandlo ngasinye uYesu wayesinda.—Mateyu 21:45, 46; Luka 4:28-30; Yohane 8:57-59.

• Xa amajoni neenkokeli zeza kwisitiya saseGetsemane ukuza kubamba uYesu, akazange azifihle, kade kakabini wazixelela esithi: “Ndinguye.” Wade waxelela abalandeli bakhe ukuba bangalwi bezama ukumkhusela waza wavumela elo hlokondiba ukuba limbambe.—Yohane 18:3-12.

• EYerusalem, uPetros nabanye babanjwa, bakatswa, baza bayalelwa ukuba bayeke ukuthetha ngoYesu. Kodwa, bathi bakukhululwa “bemka . . . , yaye imihla yonke etempileni nakwizindlu ngezindlu baqhubeka ngaphandle kokuyekelela befundisa kwaye bevakalisa iindaba ezilungileyo ezingoKristu, uYesu.”—IZenzo 5:40-42.

• Xa uSawule, kamva owaba ngumpostile uPawulos, weva ngeyelenqe lamaYuda eDamasko lokumbulala, abazalwana bamfaka kwingobozi baza bamthoba ngentunja eyayikudonga lwesixeko ebusuku, yaye wasinda.—IZenzo 9:22-25.

• Kwiminyaka emininzi kamva, uPawulos wakhetha ukubhenela kuKesare, kwanaxa iRhuluneli uFesto noKumkani uAgripa bengazange bafumane “nto ifanele ukufa okanye imixokelelwane.”—IZenzo 25:10-12, 24-27; 26:30-32.

[Imifanekiso ekwiphepha 16, 17]

Nangona anyanzeleka ukuba abaleke ngenxa yentshutshiso ekrakra, amaNgqina amaninzi aseMalawi aqhubeka nenkonzo yawo yoBukumkani evuya

[Imifanekiso ekwiphepha 17]

Uvuyo lokungcwalisa igama likaYehova lwabalondoloza aba bantu bathembekileyo kuhambo lwamaNazi besiya kubulawa nakwiinkampu zoxinaniso

[Inkcazelo]

Death march: KZ-Gedenkstätte Dachau, courtesy of the USHMM Photo Archives

[Imifanekiso ekwiphepha 18]

Izilingo neengcinezelo zisenokuza ngeendlela ngeendlela