Ibali Lobomi
Sasithembele Emandleni KaYehova
KUBALISA UERZSÉBET HAFFNER
Xa wafumanisa ukuba ndandixelelwe ukuba ndihambe eCzechoslovakia, uTibor Haffner wathi: “Andisoze ndibavumele bakugxothe.” Wandula ke wongezelela esithi: “Ukuba uyavuma, ndiza kukutshata, uze uhlale nam ngonaphakade.”
NGOJANUWARI 29, 1938, ndatshata, kwiiveki nje ezimbalwa emva kokuba uTibor, umzalwana ongumKristu owaqala washumayela kwintsapho yasekhaya, endicele ukuba nditshate naye ndingalindelanga. Yayingesosigqibo esilula ukusenza. Ndandisandul’ ukuba neminyaka eli-18 ubudala, yaye njengomlungiseleli wexesha elizeleyo wamaNgqina kaYehova, ndandizimisele ukuchitha iminyaka yobutsha bam kwinkonzo kaThixo. Ndalila. Ndathandaza. Ndakuba ndithule ndaqala ndaqonda ukuba uTibor wayefuna ukundenzela ububele, yaye ndavakalelwa kukuba ndandifuna ukuphila nale ndoda eyayindithanda ngokwenene.
Kodwa kwakutheni ukuze ndibe secicini lokugxothwa? Ngapha koko, ndandihlala kwilizwe elaliziqhayisa ngenkqubo yalo yokulawula yedemokhrasi nenkululeko yonqulo. Phofu ke, ndicinga ukuba ngoku kuza kufuneka ndikubalisele ngakumbi ngemvelaphi yam.
Ndazalwa ngoDisemba 26, 1919, ngabazali abangamaKatolika angamaGrike kwidolophana yaseSajószentpéter, eHungary, kwiikhilomitha ezinokuba li-160 empuma yeBudapest. Okubuhlungu kukuba, utata wafa ngaphambi kokuba ndimazi. Kungekudala umama watshata nomhlolo onabantwana abane, saza safudukela eLučenec, kwisixeko esihle kwindawo eyayisaziwa ngokuba yiCzechoslovakia. Ngaloo minyaka, kwakungelula ukuhlala nentsapho yomtshato wesibini. Ekubeni ndandingomncinane kubantwana abahlanu, ndandiziva ndingamkelekanga kule ntsapho. Imeko yezoqoqosho yayinzima, yaye ndandingabandezwa nje izinto eziphathekayo kuphela kodwa ndabandezwa nengqalelo nothando endandimele ndilufumane kubazali.
Ngaba Ukho Umntu Onokundiphendula?
Xa ndandineminyaka eli-16 ubudala, ndandinemibuzo enzulu engqondweni yam. Ngomdla, ndafunda imbali yeMfazwe Yehlabathi I, yaye ndothuswa kukufa kwabantu bezizwe ezazihambele phambili ngempucuko nezazisithi zingamaKristu. Ngaphezu koko, kubantu abaninzi kwakukhula umoya wemfazwe. Oku kwakungavumelani noko ndandikufundile ecaweni ngokuphathelele uthando ngommelwane.
Ngoko ke, ndaya kumfundisi ongumRoma Katolika ndaza ndambuza: “Nguwuphi umyalelo esifanele siwuthobele njengamaKristu—kukuya emfazweni size sibulale abamelwane bethu okanye kukubathanda?” Ecatshukiswe ngumbuzo wam, waphendula esithi ufundisa oko akufundiswe ngabaphathi becawa. Kwenzeka into efanayo xa ndatyelela umfundisi wamaRhabe norabhi wamaYuda. Andizange ndifumane mpendulo, kuphela bothuswa nje ngumbuzo wam ongaqhelekanga. Ekugqibeleni, ndaya kumfundisi wamaLuthere. Wacaphuka, kodwa ngaphambi kokuba ndihambe, wathi: “Ukuba ufuna ngokwenene ukwazi, buza amaNgqina kaYehova.”
Ndazama ukufuna amaNgqina kodwa andizange ndiwafumane. Kwiintsuku ezimbalwa kamva njengoko ndandigoduka ndivela emsebenzini, ndabona ucango luvulwe kancinane. Umfana owayeyinzwana wayefundela umama iBhayibhile. Ngokukhawuleza ndacinga, ‘Kumele ukuba ngomnye wamaNgqina kaYehova!’ Samngenisa ngaphakathi lo mfana, uTibor Haffner, ndaza ndaphinda imibuzo yam. Kunokuba aphendule ngamazwi akhe, wandibonisa oko iBhayibhile ikuthethayo ngophawu lwamaKristu okwenyaniso, kwakunye namaxesha esasiphila kuwo.—Yohane 13:34, 35; 2 Timoti 3:1-5.
Kwiinyanga nje ezimbalwa, ngaphambi kokuba ndibe neminyaka eli-17 ubudala, ndabhaptizwa. Ndandivakalelwa kukuba wonke ubani ufanele azive ezi nyaniso zixabisekileyo endandisiwa ndivuka ukuze ndizifumane. Ndaqalisa ukushumayela ixesha elizeleyo, nto leyo eyayingelula eCzechoslovakia ebudeni beminyaka engasekupheleni kweyee-1930. Nangona umsebenzi wethu wawuvunyiwe ngokwasemthethweni, sajamelana nenkcaso eqatha eyayiphenjelelwa ngabefundisi.
Ukutshutshiswa Okwesihlandlo Sokuqala
Ngenye imini ngasekupheleni kowe-1937, ndandishumayela nomnye udade ongumKristu kwidolophana ekufuphi neLučenec. Kungekudala, sabanjwa saza sasiwa entolongweni. “Niza kufela apho,” latsho elinye ipolisa, njengoko lalivala ucango lwesisele.
Xa kusihlwa, savalelwa nabanye abane. Saqalisa ukubathuthuzela saza sashumayela kubo. Bazola, yaye saxakeka ubusuku bonke sithetha nabo ngenyaniso yeBhayibhile.
Ngentsimbi yesithandathu ekuseni, elinye ipolisa landibiza kweso sisele. Ndathi kulo dade ndandivalelwe naye: “Siza kudibana kwakhona kuBukumkani bukaThixo.” Ndamcela ukuba axelele intsapho yasekhaya oko kwenzekileyo ukuba uye wasinda. Ndathandazela ngaphakathi ndaza ndahamba nelo polisa. Landisa apho lihlala khona kwalapha entolongweni. Lathi: “Ntombazana, ndinezinto ezithile endithanda ukuzibuza. Phezolo uthe igama likaThixo nguYehova. Ungandibonisa oko eBhayibhileni?” Indlela endandothuke ngayo kodwa kwangaxeshanye oku kwandinika nesiqabu! Leza neBhayibhile yalo, ndaza ndalibonisa nomfazi walo igama likaYehova. Lalinemibuzo emininzi ephathelele noko sasikuthetha nala mabhinqa amane ebusuku. Lanelisekile ziimpendulo, lacela umfazi walo ukuba asilungiselele into etyiwayo.
Kwiintsuku ezimbalwa kamva, sakhululwa, kodwa ijaji yagqiba kwelokuba ekubeni ndandingummi waseHungary, kwakufuneka ndihambe eCzechoslovakia. UTibor Haffner wandicela ukuba ndibe ngumfazi wakhe emva kwesi siganeko. Satshata, saza sahlala kunye nabazali bakhe.
Intshutshiso Iba Qatha
Saqhubeka nomsebenzi wokushumayela njengabantu abatshatileyo, nangona uTibor wayemele enze nomnye umsebenzi wentlangano. Kwiintsuku nje ezimbalwa ngaphambi kokuba amajoni aseHungary athimbe isixeko sethu ngoNovemba 1938, kwazalwa unyana wethu, uTibor, Omnci. EYurophu, kwakuza kuqalisa IMfazwe Yehlabathi II. Inxalenye enkulu yeCzechoslovakia yathinjwa yiHungary, nto leyo eyazisa intshutshiso engakumbi kumaNgqina kaYehova awayephila kummandla owawuthinjwe yiHungary.
Ngo-Oktobha 10, 1942, uTibor waya eDebrecen ukuze adibane nabanye abazalwana. Noko ke, ngesi sihlandlo akazange abuye. Kamva wandixelela oko kwenzekayo. Kunokuba adibane nabazalwana, wadibana namanye amapolisa awayenxibe iimpahla zabantu abasebenzayo emi kwibhulorho apho babeza kudibana khona. Babelindele umyeni wam noPál Nagypál, ababengabokugqibela ukufika apho. Amapolisa abasa kwisikhululo samapolisa baza bekhulule izihlangu babethwa ezinyaweni ngamagqudu bade bafa isiqaqa ngenxa yeentlungu.
Bandula ke bayalelwa ukuba banxibe iibhutsi zabo baze beme. Phezu kwazo nje ezo ntlungu, banyanzelwa ukuba baye kwisikhululo sikaloliwe. Amapolisa azisa enye indoda eyayifakwe iibhandeji entloko kangangokuba kwakungelula ukuba ibone. Lo yayinguMzalwan’ uAndrás Pilling, naye owayeze kudibana naba bazalwana. Umyeni wam wahanjiswa ngololiwe esiya kuvalelwa eAlag, kufuphi naseBudapest. Elinye ipolisa elabona iinyawo zikaTibor ezibethiweyo liphoxisa lathi: “Hayi indlela abakhohlakele ngayo abanye abantu! Ungazikhathazi, siza kukupholisa.” Amanye amapolisa amabini aqalisa ukubetha uTibor ezinyaweni, yaye kwakuzele igazi yonke indawo. Emva kwemizuzu embalwa, wafa isiqaqa.
Kwinyanga elandelayo, uTibor nabanye abazalwana noodade abangaphezu kwama-60 basiwa ematyaleni. UMzalwan’ uAndrás Bartha, uDénes Faluvégi, noJános Konrád bagwetyelwa ukufa ngokuxhonywa. UMzalwan’ uAndrás Pilling wagwetywa ubomi bakhe bonke, yaye umyeni wam wagwetywa iminyaka eli-12 entolongweni. Babesaphule wuphi umthetho? Umtshutshisi wabatyhola ngokuvukela urhulumente, ukungafuni ukuya emkhosini, ukuba yintlola nokunyelisa eyona cawa ingcwele. Izigwebo zokubulawa kamva zatshintshwa zaba kukuhlala ubomi bethu bonke entolongweni.
Ndilandela Umyeni Wam
Kwiintsuku ezimbini emva kokuba uTibor endulukile ukuya kudibana nabo bazalwana eDebrecen, ndavuka ekuseni ngaphambi kwentsimbi yesithandathu, ndaza nda-ayina iimpahla zethu. Ngesiquphe kwankqonkqozwa emnyango. Ndizithethela ndathi, ‘Sele efikile.’ Kwangena amapolisa amathandathu aza andixelela ukuba anikwe imvume yokugqogqa endlwini. Sonke endlwini sabanjwa saza sasiwa kwisikhululo samapolisa, kuquka nonyana wethu oneminyaka emithathu ubudala. Kanye ngolo suku safuduselwa kwintolongo yasePétervására, eHungary.
Emva kokufika apho, ndaba nomkhuhlane ndaza ndohlulwa kwabanye. Ekuchacheni kwam, kwakukho amajoni amabini kwisisele sam, ephikisana ngam. Elinye lalisithi: “Simele simdubule! Ndiza kumdubula!” Kodwa elinye lalifuna ukuhlolisisa impilo yam ngaphambi kokuba enze nantoni na. Ndawacela ukuba andiyeke ndiphile. Ekugqibeleni ahamba kwisisele sam, ndaza ndambulela uYehova ngokundinceda.
Amapolisa ayenendlela ekhethekileyo yokuncina. Athi mandicambalale phantsi, afaka iikawusi emlonyeni wam, andibopha izandla neenyawo, aza andibetha ndaze ndopha. Ayeka kuphela xa omnye waloo mapolisa athi udiniwe. Abuza ukuba umyeni wam wayeza kudibana noobani ngaphambi kokuba abanjwe. Andizange ndiwaxelele, ngoko aqhubeka endibetha iintsuku ezintathu. Kusuku lwesine, ndavunyelwa ukuba ndise unyana wam kumama. Kubanda kuqhaqhazelisa amazinyo, ndandibeleke umntwana wam omncinane kumqolo owonzakeleyo ndihamba iikhilomitha ezili-13 ndisiya kwisikhululo sikaloliwe. Ukusuka apho, ndahamba ngololiwe ndisiya ekhaya, kodwa kwafuneka ndibuyele kuloo nkampu kwangolo suku.
Ndagwetywa iminyaka emithandathu entolongweni eBudapest. Xa ndifika, ndafumanisa ukuba noTibor ulapho. Hayi indlela esasivuya ngayo xa safumana imvume yokuba singathetha kunye, nangona sasinokuthetha imizuzu embalwa ngapha kothango lwentsimbi! Sobabini salubona uthando lukaYehova yaye somelezwa zizihlandlo ezinjengezi nezixabisekileyo. Ngaphambi kokuba sidibane kwakhona, sasiza kuvavanywa ngokuqatha saza saba secicini lokufa izihlandlo eziliqela.
Ukusuka Kwintolongo Ukuya Kwenye
Sasingoodade abangama-80 sixinaniswe kwisisele esinye. Sasikulangazelela ukutya kokomoya, kodwa kwakubonakala ngathi kwakungenakwenzeka ukuba singenise nantoni na entolongweni. Ngaba kukho nto ithile esasinokuyifumana apha ngaphakathi entolongweni? Makhe ndikuxelele into esayenzayo. Ndacela ukulungisa iikawusi zoonobhalana basentolongweni. Kwenye yezi kawusi, ndafaka iphetshana ndicela inombolo yeBhayibhile kumzi wogcino-zincwadi. Ukuze ndiphephe ukuba abantu bandirhanele, ndaboleka nezinye iincwadi ezimbini.
Ngosuku olulandelayo, ndafumana enye inqwaba yeekawusi ezivela koonobhala. Kwenye yazo kwakukho impendulo. Ndandula ndanika elinye ipolisa ezo nombolo ndaza ndacela ezo ncwadi. Hayi indlela esavuya ngayo xa safumana ezo ncwadi, kuquka neBhayibhile! Ezo ncwadi sasizitshintsha veki nganye, kodwa yona iBhayibhile sayigcina. Xa elinye ipolisa lalibuza ngayo, sasidla ngokuthi: “Yincwadi enkulu, yaye wonke ubani ufuna ukuyifunda.” Ngoko ke sakwazi ukufunda iBhayibhile.
Ngenye imini, elinye ipolisa landibizela eofisini yalo. Lalikhangeleka linentlonelo ngendlela engaqhelekanga.
Lathi: “Nksk. Haffner, ndineendaba ezimnandi. Ungagoduka. Mhlawumbi ngomso. Ukuba ukho uloliwe, ungagoduka nanamhlanje.”
Ndaphendula: “Ndingavuya kakhulu.”
Lathi: “Kakade, oko kungakuhle. Unomntwana yaye ndiqinisekile ukuba ufuna ukumkhulisa.” Landula longezelela lisithi: “Tyobela nje le leta.”
Ndabuza: “Yileta yantoni?”
Lagxininisa lisithi: “Ungazikhathazi ngayo. Tyobela nje wena, yaye uza kukhululwa.” Landula ke lathi kum: “Ukufika nje kwakho ekhaya, ungenza nantoni na oyifunayo. Kodwa kufanele utyobele ukuba uyayeka ukuba ngomnye wamaNgqina kaYehova.”
Ndabuya umva ndaza andavuma ngokupheleleyo ukwenjenjalo.
Linomsindo landingxolisa lindigxotha apho laza lathi: “Uza kufela apha!”
NgoMeyi 1943, ndafuduselwa kwenye intolongo eBudapest yaye kamva ndasiwa kwidolophana yaseMárianosztra, apho sasihlala kumzi woonongendi kunye noonongendi abanokuba ngama-70. Phezu kwako nje ukulamba nezinye iingxaki, sasisoloko sinomdla wokuthetha nabo ngethemba esinalo. Omnye woonongendi wabonakalisa umdla wokwenene kwisigidimi sethu waza wathi: “Zintle ezi ndaba. Andizange ndiyive into enjengale. Ncedani, nindixelele okungakumbi.” Samxelela ngehlabathi elitsha nobomi obumnandi khona. Njengoko sasithetha, kwafika umphathi walapho. Ngokukhawuleza unongendi owayenomdla wathatyathwa apho, wakhululwa impahla, waza wabethwa kanobom ngemvubu. Xa sadibana naye kwakhona, wasibongoza esithi: “Ncedani, thandazani kuYehova ukuze andisindise aze andikhuphe apha. Ndifuna ukuba ngomnye wenu.”
Sandula ke sasiwa kwenye intolongo endala eKomárom, kwisixeko esikuMlambo iDanube, malunga neekhilomitha ezingama-80 entshona yeBudapest. Intlalo yalapho yayimbi kakhulu. Kanye njengabanye oodade, nam ndagula kakhulu sisifo seentwala, ndihlanza igazi ndaza ndabuthathaka kakhulu. Sasingenamayeza, yaye ndandicinga ukuba ndiza kufa. Kodwa amapolisa ayefuna umntu owayeza kwenza umsebenzi waseofisini. Oodade bakhankanya igama lam. Ngenxa yoko, ndanikwa amayeza, ndaza ndachacha.
Ukuphinda Ndimanyane Nentsapho Yam
Njengoko amajoni aseSoviet esiza ngasempuma, safuduselwa ngasentshona. Kungatshona ilanga ndibalisa ngazo zonke izinto ezimbi ezenzeka apho. Ndaphantse ndafa izihlandlo eziliqela, kodwa ndibulela uYehova ngokundihlangula, ndaza ndasinda. Ukuphela kwemfazwe, sasiseCzech, kwisixeko iTábor, kwiikhilomitha ezinokuba ngama-80 ukusuka ePrague. Kwathabatha iiveki ezintathu ezingakumbi ngaphambi kokuba mna nendodakazi yam uMagdalena sifike ekhaya eLučenec, ngoMeyi 30, 1945.
Ndisekude ndandimbona umazala nonyana wam othandekayo, uTibor eyadini. Zehla iinyembezi, ndaza ndakhwaza ndisithi, “Tibike!” Weza ebaleka waza waxhumela ezandleni zam. “Awuzuphinda uhambe, Mama, andibi kunjalo?” Lawo yayingamazwi akhe okuqala awawathetha kum, yaye andisoze ndiphinde ndiwalibale.
UYehova wabonisa inceba nakumyeni wam, uTibor. Ukusuka kwakhe kwintolongo yaseBudapest, wathunyelwa kwinkampu ekusetyenzwa nzima kuyo eBor, kunye nabazalwana abanokuba li-160. Izihlandlo ezininzi baphantse bafa, kodwa njengeqela, basinda. UTibor wabuyela ekhaya ngoAprili 8, 1945, malunga nenyanga ngaphambi kokuba ndifike.
Emva kwemfazwe, sasisakufuna ukomelezwa nguYehova ukuze sinyamezele izilingo esasiza kujamelana nazo kwiminyaka engama-40 eyalandelayo phantsi kolawulo lwamaKomanisi eCzechoslovakia. Kwakhona uTibor wagwetywa ixesha elide entolongweni, yaye kwafuneka ndinyamekele unyana wethu ngaphandle kwakhe. Emva kokukhululwa kwakhe, uTibor waba ngumveleli ohambahambayo. Ebudeni beminyaka engama-40 yobuKomanisi, sasebenzisa onke amathuba okuthetha nabanye ngokholo lwethu. Sakwazi ukunceda abaninzi ukuba bafunde inyaniso. Ngenxa yoko baba ngabantwana bethu bokomoya.
Hayi indlela esavuya ngayo xa safumana inkululeko yonqulo ngowe-1989! Kunyaka olandelayo, saya kwindibano yokuqala kwilizwe lethu emva kwexesha elide. Xa sabona amawaka abazalwana noodade abagcin’ ingqibelelo kangangeminyaka, sasisazi ukuba uYehova wabomeleza bonke.
Umyeni wam endimthandayo, uTibor, wafa ethembekile kuThixo ngo-Oktobha 14, 1993, yaye ngoku ndihlala kufuphi nonyana wam eŽilina, eSlovakia. Andisenamandla angako ngoku, kodwa umoya wam usenentumekelelo ngenxa yamandla kaYehova. Ndiyakholwa yaye andithandabuzi ukuba ngamandla akhe ndinganyamezela nasiphi na isilingo kule nkqubo indala. Ngaphezu koko, ndikhangele phambili kwixesha laxa, ngobubele bukaYehova obungasifanelanga, ndiya kukwazi ukuphila ngonaphakade.
[Umfanekiso okwiphepha 20]
Unyana wam uTibor, Omnci., (eneminyaka emi-4 ubudala) ekwakufuneka ndimshiye
[Umfanekiso okwiphepha 21]
UTibor, Omkhulu, kunye nabanye abazalwana eBor
[Umfanekiso okwiphepha 22]
NdinoTibor noMagdalena, indodakazi yam, ngowe-1947, eBrno
[Imifanekiso ekwiphepha 23]
Ndaphantse ndafa izihlandlo eziliqela, kodwa ndibulela uYehova ngokundihlangula, ndaza ndasinda