Ngubani “UThixo Oyinyaniso Nobomi Obungunaphakade”?
UYEHOVA, uYise weNkosi yethu uYesu Kristu, nguThixo oyinyaniso. UnguMdali, lowo obanika ubomi obungunaphakade abo bamthandayo. Leyo yindlela abaninzi abayifundayo nabayikholelwayo iBhayibhile ababeya kuwuphendula ngayo umbuzo okumxholo. Eneneni, uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.
Kodwa, abantu abaninzi abahamb’ icawa banikela intsingiselo eyahlukileyo ngeli binzana. Amazwi akumxholo afumaneka kweyoku-1 kaYohane 5:20, ngokuyinxalenye ethi: “Simanyene nalowo uyinyaniso, ngoNyana wakhe uYesu Kristu. Lo nguThixo oyinyaniso nobomi obungunaphakade.”
Abo bakholelwa kwimfundiso kaBathathu Emnye bathi isimelabizo sokukhomba esithi “lo” (houʹtos) sibhekisa kwisiqu esisandulelayo, uYesu Kristu. Bagxininisa kwelokuba uYesu “nguThixo oyinyaniso nobomi obungunaphakade.” Noko ke, le ntsingiselo ayivumelani nazo zonke iZibhalo. Yaye abaphengululi abaninzi abavunyiweyo abavumelani nale ngcamango kaBathathu Emnye. Umphengululi waseCambridge University uB. F. Westcott wabhala esithi: “Kusengqiqweni ukuthi [isimelabizo esithi houʹtos] simele ukuba sibhekisa kungekhona kwesona sibizo sikufuphi kodwa kwesona siyintloko ezingqondweni zabapostile.” Ngenxa yoko, umpostile uYohane wayecinga ngoYise kaYesu. Umfundi wezakwalizwi ongumJamani uErich Haupt wabhala esithi: “Kumele kufunyaniswe enoba igama elithi [houʹtos] libhekisela kwisibizo esilandela isimelabizo. . . okanye kuThixo esibhekisela kuso isimelabizo. . . . Ingcamango yoThixo omnye oyinyaniso ibonakala ivumelana nesilumkiso esanikelwayo sokukuphepha ukunqula izithixo kunokubonisa ukuba uKristu unguThixo.”
Kwanencwadi ethi A Grammatical Analysis of the Greek New Testament, epapashwe yiRome’s Pontifical Biblical Institute ithi: “Igama elithi [Houʹtos]: elisetyenziswe [kwiindinyana] 18-20 phantse ngokuqinisekileyo libhekisela kuThixo oyinene, noyinyaniso ngokuchasene nobuhedeni (indi. 21).”
Ngokuqhelekileyo igama elithi houʹtos, elidla ngokuguqulelwa ngokuthi “yena” alibhekiseli kwisibizo esandulela eli binzana. Ezinye izibhalo ziyayikhanyisa le ngongoma. Kweyesi-2 kaYohane 7, lo mpostile nombhali wencwadi yokuqala wathi: “Kuba kungene abakhohlisi abaninzi ehlabathini, abangavumiyo ukuba uYesu Kristu weza esenyameni. Abantu abanjalo [houʹtosʹ] ngabakhohlisi nabachasi-Kristu.” Apha isimelabizo asinakubhekisa kwisibizo esisandulelayo—uYesu. Ngokucacileyo, ibinzana elithi “abantu abanjalo” libhekisela kubantu abamphika uYesu. Bebonke “ngabakhohlisi nabachasi-Kristu.”
Kwincwadi yakhe yeVangeli, umpostile uYohane wabhala esithi: “UAndreya umntakwabo Simon Petros wayengomnye wababini abakuvayo oko uYohane wakutshoyo baza balandela uYesu. Kuqala yena [houʹtos] wafumana umntakwabo, uSimon.” (Yohane 1:40, 41) Kucacile ukuba isimelabizo esithi “yena” sibhekisa, kungekhona kumntu wokugqibela okhankanyiweyo, kodwa kuAndreya. Kweyoku-1 kuYohane 2:22, lo mpostile usebenzisa isimelabizo esifanayo kwangaloo ndlela.
ULuka usebenzisa isimelabizo esifanayo, njengokuba kuboniswa kwiZenzo 4:10, 11: “Egameni likaYesu Kristu umNazarete, enambethelelayo kodwa uThixo wamvusa kwabafileyo, kungaye lo athe lo mntu wema apha phambi kwenu ephilile. Yena [houʹtosʹ]] ‘ulilitye elaphathwa nini bakhi njengelingabalulekanga eliye laba yintloko yembombo.’” Apha ngokucacileyo isimelabizo esithi “yena” asibhekiseli kumntu owaphiliswayo, nangona sikhankanywe ngaphambi kwegama elithi houʹtos. Ngokuqinisekileyo, isimelabizo esithi “yena” kwindinyana 11 sibhekisela kuYesu Kristu umNazarete, ‘olilitye lembombo’ elakhelwe phezu kwakhe ibandla lamaKristu.—Efese 2:20; 1 Petros 2:4-8.
IZenzo 7:18, 19 nazo zikhanyisa le ngongoma: “Kwada kwavela omnye ukumkani eYiputa, owayengazi ngoYosefu. Yena [houʹtos] wasebenzisa ubuqotha-qikili ngokunxamnye nesizwe sethu.” “Yena” lo owatshutshisa amaYuda, yayingengoYosefu, kodwa uFaro, ukumkani waseYiputa.
Iindinyana ezinjalo zigxininisa oko kwathethwa ngumphengululi ongumGrike uDaniel Wallace, owathi kwizimelabizo zokukhomba zesiGrike, “umbhali akasoloko ebhekisa kwisimelabizo esandulelayo.”
“Lowo Uyinyaniso”
Umpostile uYohane wabhala esithi, “lowo uyinyaniso” nguYehova, uYise kaYesu Kristu. Ukuphela koThixo oyinyaniso, uMdali. Umpostile uPawulos wavuma esithi: “Okunene kuthi thina kukho uThixo omnye, uYise, eziphuma kuye zonke izinto.” (1 Korinte 8:6; Isaya 42:8) Esinye isizathu esibangela ukuba uYehova abe ‘nguLowo uyinyaniso’ ekubhekiselwa kuso kweyoku-1 kaYohane 5:20 sikukuba unguMthombo wenyaniso. Umdumisi wambiza uYehova ngokuthi ‘nguThixo wenyaniso’ ngenxa yokuba unyanisekile kuko konke akwenzayo yaye akanakuxoka. (INdumiso 31:5; Eksodus 34:6; Tito 1:2) Ebhekisa kuYise wasezulwini, uNyana wathi: “Ilizwi lakho liyinyaniso.” Yaye ngokuphathelele imfundiso yakhe, uYesu wathi: “Oko ndikufundisayo asikokwam, kodwa kokwalowo wandithumayo.”—Yohane 7:16; 17:17.
Kwakhona uYehova ‘ububomi obungunaphakade.’ UnguMthombo wobomi, yaye ubomi busisipho esivela Kuye ngoKristu. (INdumiso 36:9; Roma 6:23) Umpostile uPawulos wathi uThixo “ungumvuzi wabo bamfuna ngenyameko.” (Hebhere 11:6) UThixo wamvuza uNyana wakhe ngokumvusa kwabafileyo, yaye uBawo uya kubanika ubomi obungunaphakade abo bamkhonza ngentliziyo yabo iphela.—IZenzo 26:23; 2 Korinte 1:9.
Ngenxa yoko, sifanele sifikelele kwesiphi isigqibo? Kwisigqibo sokuba, nguYehova kuphela “uThixo oyinyaniso nobomi obungunaphakade.” Nguye kuphela ofanele anqulwe ngabantu abadalileyo.—ISityhilelo 4:11.