Yintoni Elawula Ikamva Lakho?
UJohn Gray okholelwa kwindaleko ubhala athi: “Abantu abasenawo amandla okulawula ikamva labo ngokufana naso nasiphi na isilwanyana.” Umbhali uShmuley Boteach uchaza imbono eyahlukileyo kwincwadi yakhe ethi An Intelligent Person’s Guide to Judaism. Uthi: “Umntu akasiso isilwanyana, yaye ngenxa yoko unokusoloko elilawula ikamva lakhe.”
Abantu abaninzi bavumelana nokaGray yaye bakholelwa ukuba amandla endalo angenakulawuleka alawula ikamva labantu. Abanye bamgqala umntu njengendalo kaThixo enikwe amandla okulawula ikamva layo.
Bambi bavakalelwa kukuba ubomi babo bulawulwa ngabantu abasemagunyeni. Ngokutsho kombhali uRoy Weatherford, “inkoliso yabantu ehlabathini—yaye ingakumbi inkoliso yamabhinqa embalini—ayinamandla okanye ayikwazi ukulawula ubomi bayo ngenxa yezizathu ezizicaceleyo ezinjengokucinezeleka kwabantu nokuxhatshazwa.” (The Implications of Determinism) Abaninzi baye babona amaphupha abo okuba nekamva elonwabisayo esonakaliswa ngamagunya ezobupolitika okanye imikhosi esukuzanayo.
Ukutyhubela imbali abanye baye baziva bengenakuzinceda kuba becinga ukuba amandla angaphezu kwendalo alawula ikamva labo. UBoteach uthi: “AmaGrike amandulo ayenengcamango yokuba akukho themba ekubeni umntu engenakulilawula ikamva lakhe elimiselwe kwangaphambili.” Ayevakalelwa kukuba ikamva lomntu ngamnye limiselwa ngoothixokazi abangenazigqibo. Ayekholelwa ukuba, aba thixokazi, babegqiba ngexesha aza kufa ngalo umntu kwanokubandezeleka neentlungu eziza kumthwaxa ebomini bakhe.
Ixhaphakile namhlanje inkolelo yokuba ikamva lomntu lilawulwa ngamandla angaphezu kwawomntu. Ngokomzekelo, abantu abaninzi bakholelwa kwiKismet, okanye ukumiselwa kwangaphambili kwekamva. Bathi uThixo uyimisele kwangaphambili imiphumo yazo zonke izenzo zabantu nexesha ubani aza kufa ngalo. Kwakhona imfundiso yokumiselwa kwangaphambili kwekamva ikhuthaza imbono yokuba “usindiso nomgwebo womntu ngamnye umiselwe kwangaphambili” nguThixo uSomandla. Abaninzi abazibiza ngokuba bangamaKristu babambelele kule mfundiso.
Wena ucinga ntoni? Ngaba ikamva lakho sele limiselwe ngamandla ongenakuwalawula? Okanye ngaba ikho inyaniso kumazwi ombhali wemidlalo oliNgesi uWilliam Shakespeare owabhala wathi: “Maxa wambi umntu unokulilawula ikamva lakhe”? Qwalasela oko iBhayibhile ikuthethayo ngalo mbandela.