Ukuzuza Ulwazi—Ngoku Nangonaphakade
UGQIRHA waseJamani u-Ulrich Strunz wabhala ungcelele lweencwadi ezinomxholo othi Forever Young. Kuzo umi ngelithi ukuzilolonga, ukudla ukutya okusempilweni nokuziphatha kakuhle kunokwenza ubani abe sempilweni yaye oko kunokumenza aphile ixesha elide. Sekunjalo, akathembisi abafundi bezo ncwadi zakhe ukuba banokuphila ngonaphakade xa balandela elo cebiso.
Kodwa, kukho uhlobo olunye lolwazi ekuthenjiswa ukuba umntu unokufumana ubomi obungunaphakade xa enalo. Ngokwahlukileyo, ukuba umntu ebenokuphila ngonaphakade, ebenoqhubeka ezuza ulwazi olufanelekileyo ngonaphakade. Xa wayethandaza kuThixo uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Makhe siqale sichaze ibinzana elithi “ubomi obungunaphakade” size sicacise ulwazi oluqukwa koku nendlela olunokufumaneka ngayo.
IBhayibhile ithi, kungekudala uMdali uza kwenza umhlaba ube yiparadesi, apho abantu baya kukwazi ukuphila ubomi obude. Ukuze enze loo Paradesi kuza kufuneka athabathe amanyathelo aqatha, njengalawo oMkhukula womhla kaNowa. UMateyu isahluko sama-24, indinyana yama-37 ukusa kweyama-39, ubonisa ukuba uYesu wathelekisa ixesha lethu ‘nemihla kaNowa,’ apho abantu ‘bangazange banikele ngqalelo’ kwimeko embi ababekuyo. Basibetha ngoyaba nesigidimi esasishunyayelwa nguNowa. Kusenjalo ‘yafika imini awangena ngayo uNowa emkhombeni,’ waza uMkhukula wabatshayela bonke abasigatyayo eso sigidimi. UNowa nabo babenaye emkhombeni basinda.
UYesu wabonisa ukuba kuza ‘imini’ efanayo nakumhla wethu. Abo bathobelayo xa besiva ngesi siganeko baya kuba nethemba kungekhona nje lokusinda kodwa lokuphila ngonaphakade. Ukongezelela, abafileyo abakwinkumbulo kaThixo baya kuvuselwa ebomini benethemba lokungaze baphinde bafe. (Yohane 5:28, 29) Phawula indlela uYesu awakuchaza ngayo oku. Xa wayethetha noMarta ngovuko lwabafileyo, wathi: “Lowo ubonisa ukholo kum, nokuba uyafa, uya kubuyela ebomini; kwaye wonk’ ubani ophilayo aze abonise ukholo kum akasayi kuze afe konke konke.” Ubungqina bubonisa ukuba isondele gqitha le ‘mini,’ nto leyo ethetha ukuba ‘usenokungaze ufe.’—Yohane 11:25-27.
Wandula ke uYesu wabuza uMarta: “Uyakukholelwa na oku?” Waphendula wathi: “Ewe, Nkosi.” Ukuba uYesu ebenokukubuza lo mbuzo namhlanje, ubuya kuphendula uthini? Mhlawumbi bekuya kuba kunzima ukukholelwa ukuba umntu unokuphila angaze afe. Kodwa nokuba uvakalelwa njalo, akuthandabuzeki ukuba ubuya kuthanda ukukukholelwa oko. Cinga nje ukuba ubuya kufunda izinto ezingakanani ukuba ‘ubungasayi kuze ufe konke konke’! Yiba nombono wakho ukwazi ukufunda nokwenza zonke izinto ozinqwenelayo ngoku kodwa ongenakuze ube nalo ixesha lazo. Cinga nje xa uphinda ubona abantu bakowenu obathandayo ababefile! Luluphi ulwazi olunokubangela kwenzeke izinto ezinjalo xa lusetyenziswa, yaye lunokufunyanwa njani?
Singakwazi Ukuzuza Ulwazi Olunika Ubomi
Ngaba yinto engaphaya kwamandla ethu ukwazi uThixo noKristu? Akunjalo. Yinyaniso ukuba ulwazi ngemisebenzi yoMdali alunakuze luphele. Ukanti uYesu wayengabhekiseli kwinzululwazi ngeenkwenkwezi okanye olunye uhlobo lwenzululwazi xa wanxibelelanisa “ulwazi” ‘nobomi obungunaphakade.’ IMizekeliso isahluko 2, indinyana 1 neyesi-5, ibonisa ukuba “amazwi” ‘nemiyalelo’ efumaneka eBhayibhileni ngundoqo ukuze ‘ufumane ukumazi uThixo.’ Ngokuphathelele uYesu, incwadi kaYohane 20:30, 31 ibonisa ukuba izinto ezibhalwe eBhayibhileni yinkcazelo nje eyaneleyo ukuze sibe “nobomi.”
Ngoko, ulwazi olufumaneka eBhayibhileni oluphathelele uYehova noYesu Kristu lwanele ukuze sazi indlela yokufumana ubomi obungunaphakade. IBhayibhile yincwadi eyahlukileyo. Ngobubele uMdali waphefumlela abathile ukuba bayibhale ngendlela yokuba nabantu abangafundanga kuyaphi bakwazi ukuzuza ulwazi olwaneleyo ukuze bafumane ubomi obungunaphakade. Ngokufanayo, umntu onengqondo ebalekayo nalowo unexesha elininzi nezixhobo ezifunekayo uya kusoloko enento entsha ayifundayo kwiZibhalo eziphefumlelweyo. Isibakala sokuba ukwazi ukufunda eli nqaku bubungqina bokuba uyakwazi ukufunda, kodwa umele wenze ntoni ngaloo nto?
Ehlabathini lonke, amava abonisa ukuba eyona ndlela iphumelelayo ekufumaneni olu lwazi kukuba uqhutyelwe isifundo seBhayibhile ngumntu osele enalo. Kanye njengokuba uNowa wayezimisele ukudlulisela olu lwazi kubantu bomhla wakhe, amaNgqina kaYehova akulungele ukuza kwakho ukuze axubushe nawe ngeBhayibhile. Asenokusebenzisa incwadana enemifanekiso ethi Yintoni UThixo Ayifunayo Kuthi? okanye incwadi enomxholo ofanelekileyo othi Ulwazi Olukhokelela Kubomi Obungunaphakade.a Kwanokuba kunzima ukuyikholelwa into yeParadesi esemhlabeni, apho abantu abathembekileyo ‘bengayi kuze bafe konke konke,’ ezi ngxubusho zeBhayibhile zinokukunceda ukukholelwe oko. Ngoko ukuba unqwenela ukuphila ngonaphakade okanye ufuna nje ukubona enoba kusengqiqweni na ukukholelwa into yokuphila ngonaphakade, yintoni omele uyenze? Xhakamfula eli thuba ukuze ufundisise iBhayibhile.
Sithabatha ixesha elide kangakanani esi sifundo? Incwadana enemifanekiso enamaphepha angama-32 ekuthethwe ngayo, ifumaneka ngeelwimi ezingamakhulu, yaye inezahluko nje ezili-16 ezifutshane. Ukanti ukuba unokubekela bucala ixesha elingangeyure ngeveki, uya kugqiba nje iinyanga ezimbalwa ufunda imibandela ebalulekileyo yeBhayibhile kwincwadi ethi Ulwazi Olukhokelela Kubomi Obungunaphakade. Ezi mpapasho ziye zanceda abaninzi bafumana ulwazi oluninzi batsho bamthanda ngokunzulu uThixo. UMdali uya kubavuza abo bamthanda ngokwenene, abaphe ubomi obungunaphakade.
Enyanisweni sinokukwazi ukuzuza ulwazi olunika ubomi, yaye sele lufumaneka. IBhayibhile iguqulelwe yonke okaye iinxalenye zayo ngelwimi ezingaphezu kwama-2 000. Kumazwe angama-235 amaNgqina kaYehova avuyela ukukunceda nokukuphathela iimpapasho ezisekelwe eBhayibhileni ukuze wandise ulwazi lwakho.
Isifundo Sobuqu
Ulwalamano lwakho noThixo ngumbandela ophakathi kwakho noMdali wakho. Nguwe kuphela umntu onokukwazi ukulomeleza, yaye nguye kuphela onokukwazi ukukunika ubomi obungunaphakade. Ngoko umele uqhubeke ufundisisa iLizwi lakhe alibhalileyo. Xa kukho umntu osoloko ekutyelela ekhayeni lakho, usenokukufumanisa kulula ukuzibekela bucala ixesha lokufundisisa.
Ekubeni iBhayibhile neencwadi zokufundisisa ezisekelwe eBhayibhileni ziqulethe ‘ulwazi ngoThixo,’ kubaluleke gqitha ukuba uzinyamekele kakuhle ezi ncwadi. (IMizekeliso 2:5) Xa uzinyamekela kakuhle ziya kuhlala iminyaka. Ukuba uhlala kwilizwe elisakhasayo, usenokuba akuzange usebenzise zincwadi zininzi esikolweni, ubufunda nje ngokuphulaphula nokubukela. Ngokomzekelo, eBenin kuthethwa iilwimi ezingaphezu kwama-50. Yinto eqhelekileyo ukuba umntu apho athethe iilwimi ezine nezintlanu ngokutyibilikayo, nakuba engazange abe nazo iincwadi ezibhaliweyo ngezo lwimi. Ukukwazi kwakho ukufunda ngokuphulaphula, ngokubukela nangokunikel’ ingqalelo kuyintsikelelo. Sekunjalo, uya kufumanisa ukuba iincwadi zinokukunceda gqitha kufundisiso lwakho.
Kwanokuba uhlala kwindawo encinane nexineneyo, zama ukufumana indawo efanelekileyo yokubeka iBhayibhile nezinye iincwadi ezisekelwe kuyo. Zigcine kwindawo eziza kufumaneka lula kuyo apho ziza kuhlala kakuhle zingonakali.
Isifundo Sentsapho
Ukuba ungumzali, umele ukuba unomdla wokunceda abantwana bakho bazuze ulwazi olufanayo nolo luzuzwa nguwe. Kumazwe asakhasayo, abazali badla ngokufundisa abantwana babo ubuchule obuninzi ukuze bakwazi ukuziphilisa. Oku kusenokuquka ukupheka, ukutheza iinkuni, ukukha amanzi, ukulima nokufuya, ukuloba nokuthengisa emarikeni. Loo mfundo iluncedo ngokwenene ebomini. Noko ke, kule mfundo abazali abaninzi abaluquki ulwazi olunokukhokelela kubomi obungunaphakade.
Enoba injani imeko yakho, usenokuvakalelwa kukuba akunalo ixesha loku. NoMdali uyakuqonda oko. Ngokuphathelele indlela yokufundisa abantwana iindlela zakhe, nali icebiso awalinikela kwakudala: “Uze uwabethelele kunyana [okanye intombi yakho] yaye uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” (Duteronomi 6:7) Ngokusuka kwezi zinto azitshoyo, kutheni ungazami ukuzenzela olwakho ucwangciso, njengolu lulandelayo:
1. “Ekuhlaleni kwakho endlwini yakho”: Zimisele ukuxubusha rhoqo ngeBhayibhile nabantwana bakho xa usekhaya, mhlawumbi kanye ngeveki, njengokuba kusenokwenzeka ukuba omnye umntu ebesenjenjalo kuwe. AmaNgqina kaYehova aneencwadi zeBhayibhile ezilungiselelwe ukufundisa bonke abantwana.
2. “Nasekuhambeni kwakho ngendlela”: Suka nje uthethe ngoYehova nabantwana bakho, kanye njengokuba usenza xa ubafundisa ngezinto zobomi okanye ubayalela izinto ezithile.
3. “Nasekulaleni kwakho”: Thandaza nabantwana bakho rhoqo ebusuku.
4. “Nasekuvukeni kwakho”: Iintsapho ezininzi zivuna imiphumo emihle ngenxa yokuqwalasela iBhayibhile rhoqo kusasa. AmaNgqina kaYehova asebenzisa incwadana ethi Ukuhlolisisa IZibhalo Imihla Ngemihlab ukuze enze oku.
Kumazwe asakhasayo, abazali abaninzi benza konke okusemandleni ukuqinisekisa ukuba kubantwana babo ukho ofumana imfundo efanelekileyo ukuze afumane umsebenzi. Ngaloo ndlela loo mntwana uya kukwazi ukunyamekela abazali bakhe xa besaluphala. Kodwa, ukuba ufundisisa iBhayibhile uze uncede abantwana bakho bonke nabo bayifunde, uya kuzuza ulwazi oluya kunceda wena nentsapho yakho yonke niphile ngonaphakade.
Ngaba uya kuze ufike umhla esiya kwazi yonke into ngawo? Soze. Njengokuba umhlaba uqhubeka ujikeleza kwindalo engenasiphelo, siya kuqhubeka sifunda izinto ezintsha. Enyanisweni, INtshumayeli 3:11 ithi: “Yonk’ into [uThixo] uyenze yantle ngexesha layo. Kwanexesha elingenammiselo ulibeke ezintliziyweni zabo, ukuze uluntu lungaze luwufumane umsebenzi uThixo oyinyaniso awenzileyo ukususela ekuqaleni kuse ekupheleni.” Ukuzuza ulwazi yinto eyonwabisayo engasayi kuze iphele.
[Imibhalo esemazantsi]
a Zombini zipapashwe ngamaNgqina kaYehova.
b Ipapashwe ngamaNgqina kaYehova.
[Amagama acatshulweyo akwiphepha 5]
“Oku kuthetha ubomi obungunaphakade, ukungenisa kwabo ulwazi ngawe . . . ”
[Imifanekiso ekwiphepha 7]
Nceda intsapho yakho izuze ulwazi ngoku nangonaphakade