Iphulo Labantu Lokufuna Ukuphila Ngonaphakade
KWAKUDE KUDALA, abantu bebelangazelela ukuphila ngonaphakade. Sekunjalo, lo mnqweno awude uzaliseke—akukabikho mntu ufumene indlela yokoyisa ukufa. Noko ke, kutshanje, uphando olwenziwe ngabezonyango luye lwavuselela ithemba lokuba umntu angaphila ubomi obude. Khawuqwalasele uphando olwahlukahlukeneyo olwenziwayo kulo mba.
Iingcali zebhayoloji zizama ukusebenzisa umchiza ekuthiwa yitelomerase zizama ukongezelela umkhamo wokuzihlaziya kweeseli. Izazinzulu ziyazi ukuba umzimba uyazihlaziya ngokukhupha iiseli ezindala nezingasebenzi kakuhle uvelise ezintsha endaweni yazo. Eneneni, phantse umzimba wonke uzihlaziya izihlandlo eziliqela ebudeni bokuphila komntu. Ukuba le nkqubo yokuzihlaziya ibinokwandiswa, abaphandi bacinga ukuba, “umzimba womntu ubunokuzihlaziya ixesha elide—kwanangonaphakade.”
Olunye unyango olusengumba oshukuxwa shushu lolo lubizwa ngokuba yitherapeutic cloning, lona kucingelwa ukuba lunokunceda ekulungiseleleni ukuba abantu abagulayo bakwazi ukufumana amanye amalungu omzimba amatsha naza kwamkelwa ngumzimba njengesibindi, izintso okanye intliziyo. La malungu anokwenziwa kusetyenziswa iiseli zaloo mntu ugulayo.
Kwicandelo ekuthiwa yinanotechnology iingcali zinembono yokuba ngenye imini oogqirha baya kuze bakwazi ukwenza iirobhothi ezilingana neeseli eziza kutyhutyha igazi ukuze zibulale iiseli ezibangela umhlaza neentsholongwane eziyingozi. Bambi bakholelwa ukuba eli candelo lenzululwazi, nokunyangwa kwemizila yemfuza, ekugqibeleni liya kwenza umzimba womntu uzihlaziye ngonaphakade.
Abo xhasa inkqubo ebizwa ngokuba yicryonics, bakhenkca imizimba yabo bafileyo. Injongo yabo kukubagcina de oogqirha bakwazi ukunyanga izifo, baphelise ukwaluphala, baze bavuse abafileyo babe sempilweni. IAmerican Journal of Geriatric Psychiatry ibiza le nkqubo ngokuthi “kukuqwayitwa kwezidumbu kwale mihla okufana noko kwakusenziwa ngamaYiputa amandulo.”
Iinquleqhu ezenziwa ngabantu bezama ukuphila ngonaphakade zibonisa indlela ekunzima ngayo ngabantu ukwamkela ukufa. Ngaba abantu banako ukuphila ngonaphakade? Ithini iBhayibhile ngalo mbandela? Inqaku elilandelayo liza kusiphendula.