Umntu Unako Ukuphila Ngonaphakade

AMAKHOLWA amaninzi ehlabathini anethemba lokuphila ngonaphakade ngeendlela ezahlukahlukeneyo. Unqulo ngalunye lunokukuchaza oku ngendlela eyahlukileyo kolunye, kodwa lona ithemba linye—kukuphila ngolonwabo ngaphandle kokoyika ukufa. Ngaba le asinto oyinqwenelayo nawe? Inokuchazwa njani le nkolelo igqugqisileyo? Ngaba ithemba lokuphila ngonaphakade liya kuze lizaliseke?

IZibhalo zibonisa ukuba uMdali wafaka ebantwini umnqweno wokuphila ngonaphakade kwasekuqaleni, xa wayedala isibini sokuqala esingabantu. IBhayibhile ithi: ‘UThixo ubeke ezintliziyweni zabo ixesha elingenammiselo.’—INtshumayeli 3:11.

Noko ke, ukuze esi sibini sokuqala siphile ngonaphakade, kwakufuneka samkele igunya likaThixo lokusigqibela ngokulungileyo nokubi. Ukuba sasikwenzile oko, uYehova wayeya kusigqala sikufanele ukuphila “ixesha elingenammiselo” kwikhaya aweyesilungiselele lona, umyezo wase-Eden.—Genesis 2:8; 3:22.

Ukuphulukana Nobomi Obungunaphakade

Ingxelo yeBhayibhile ibonisa ukuba uThixo watyala “umthi wokwazi okulungileyo nokubi” emyezweni, isiqhamo awayalela uAdam noEva ukuba bangasityi, ukuze bangafi. (Genesis 2:9, 17) Ukungatyi kuka-Adam noEva kuloo mthi kwakuya kubonisa uThixo ukuba bayaligqala igunya lakhe. Kwelinye icala, ukutya kuloo mthi, kwakuza kubonisa ukuba bayaligatya igunya likaThixo. UAdam noEva abazange bawuthobele umyalelo kaYehova baza bema kwicala likaSathana, isidalwa somoya esavukela igunya likaThixo. Ngenxa yoko, ngokufanelekileyo uThixo wagqiba ekubeni uAdam noEva abakufanelekeli ukuphila ngonaphakade.—Genesis 3:1-6.

UThixo wayebanike ukuphila okanye ukufa, ukubakho okanye ukungabikho. Ukungathobeli kwaphumela ekufeni ukungabikho kwabo ngokupheleleyo. Kwakungenakwenzeka ukuba uAdam noEva okanye nabani na kwinzala yabo aqhubeke ephila ngenxa yobugqi obuthile okanye ukungafi komphefumlo.a

Yonke inzala ka-Adam yabandezeleka ngenxa yemvukelo yakhe. Umpostile uPawulos wachaza imiphumo yoko. Wathi: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12.

Ubomi Obungunaphakade Buyazuzwa Kwakhona

Umpostile uPawulos wafanisa imeko yenzala ka-Adam naleyo yekhoboka lenkulungwane yokuqala. Ngenxa yesono abasizuze ilifa, abantwana baka-Adam noEva bazalwa “bengamakhoboka esono,” aza kufa. (Roma 5:12; 6:16, 17) Oku bekungasayi kuphepheka ukuba uYehova ebengenzanga ilungiselelo lokubakhulula kobo bukhoboka. UPawulos uthi: “Njengokuba ngesigqitho esinye [sika-Adam] umphumo kubantu bazo zonke iintlobo waba ngumgwebo wesohlwayo, ngokunjalo kwanangesenzo esinye sothethelelo umphumo kubantu bazo zonke iintlobo ukukuvakaliswa kwabo bengamalungisa afanelwe bubomi.” Eso ‘senzo sothethelelo’ sabangela ukuba uYesu anikele ngobomi bakhe obufezekileyo ‘njengentlawulelo yabo bonke.’ UYehova wasebenzisa intlawulelo ukukhulula abantu “kumgwebo wesohlwayo.”—Roma 5:16, 18, 19; 1 Timoti 2:5, 6.

Yiloo nto izazinzulu zingenakuze zisifumane isicombululo sokuphelisa ukufa. Isicombululo sifumaneka kwenye indawo. Ngokutsho kweBhayibhile, oyena nobangela wokufa kwabantu uphathelele imilinganiselo yokuziphatha nokusesikweni kungekhona imfuza. Ilungiselelo lokubuyisela ubomi obungunaphakade—idini likaYesu lentlawulelo—libonisa okusesikweni. Intlawulelo ikwabonisa ukulunga kukaThixo nobubele bakhe bothando. Ngoko ke, ngubani oza kuzuza kule ntlawulelo aze afumane ubomi obungunaphakade?

Isipho Sokungafi

UYehova uThixo “ususela kwixesha elingenammiselo ukusa kwixesha elingenammiselo.” Akanasiphelo. (INdumiso 90:2) UYesu Kristu ngumntu wokuqala owanikwa nguYehova isipho sokungafi. Umpostile uPawulos uthi: “UKristu, ekubeni ngoku eye wavuswa kwabafileyo, akasafi; ukufa akuseyiyo inkosi phezu kwakhe.” (Roma 6:9) Eneneni, ethelekisa uYesu ovusiweyo nabalawuli behlabathi, uPawulos wathi nguye kuphela ongenakufa phakathi kwabo. UYesu uya kuqhubeka “ephila ngonaphakade.” Ubomi bakhe ‘abunakutshatyalaliswa.’—Hebhere 7:15-17, 23-25; 1 Timoti 6:15, 16.

AsingoYesu kuphela ofumana eso sipho. AmaKristu athanjisiweyo akhethelwe ukulawula njengookumkani kuzuko lwasezulwini nawo afumana olo vuko lwafunyanwa nguYesu. (Roma 6:5) Umpostile uYohane ubonisa ukuba eli lungelo linikwe abantu abali-144 000. (ISityhilelo 14:1) Nabo bafumana ubomi obungenasiphelo. Ngokuphathelele uvuko lwabo, uPawulos uthi: “Inyama negazi azinakubudla ilifa ubukumkani bukaThixo . . . Liya kukhala ixilongo, yaye abafileyo baya kuvuswa bengenakonakala, ibe siya kutshintshwa. Kuba oku konakalayo kumele kwambathe ukungonakali, noku kufayo kumele kwambathe ukungafi.” Ukufa akunagunya kwabo bafumana olo vuko.—1 Korinte 15:50-53; ISityhilelo 20:6.

Esi sityhilelo sivela kuThixo sibalasele ngokwenene. Nkqu neengelosi zange zidalwe zibe zezingenakufa, phezu kwako nje ukuba zizidalwa zokomoya kwazo. Oku sikubona kwisibakala sokuba ezo zidalwa zokomoya zaxhasa imvukelo kaSathana ziza kutshatyalaliswa. (Mateyu 25:41) Kwelinye icala, abo baza kulawula noYesu bafumana isipho sokungafi, nto leyo ebonisa ukuba uYehova unentembelo epheleleyo kukholo lwabo.

Ngaba oku kuthetha ukuba ngabali-144 000 kuphela abaza kuphila ngonaphakade, inani elincinane gqitha xa lithelekiswa nabantu abangamawaka ezigidi abaye baphila? Akunjalo. Makhe sibone isizathu sokuba kungenjalo.

Ubomi Obungunaphakade Kumhlaba Oyiparadesi

Incwadi yeBhayibhile yeSityhilelo ichaza umbono omhle wesihlwele sabantu esingenakubaleka esinikwa ubomi obungunaphakade kumhlaba oyiparadesi. Phakathi kwaso kukho abo bafayo kodwa bavuswa baza babuyiselwa ebutsheni nasempilweni. (ISityhilelo 7:9; 20:12, 13; 21:3, 4) Basiwa ‘kumlambo wamanzi obomi, ongcwengeke njengekristale, uqukuqela uphuma kwitrone kaThixo.’ Emacaleni kuwo kukho “imithi yobomi . . . , yaye amagqabi emithi ayengawokuphilisa iintlanga.” Isimemo sobubele sikaYehova uThixo sithi: “Lowo unxaniweyo makeze; lowo uthandayo makawathabathe amanzi obomi ngesisa.”—ISityhilelo 22:1, 2, 17.

Le mithi nala manzi asilochiza elenza abantu bangafi njengelo lifunwa zizazinzulu kangangeenkulungwane zizama ukuvelisa amachiza anokwenza abantu baphile ngonaphakade okanye bahlale bebatsha. Kunoko, imela ilungiselelo likaThixo lokubuyisela abantu kubomi obufezekileyo bantlandlolo esebenzisa uYesu Kristu.

Injongo kaThixo yokunika abantu abathobelayo ubomi obungunaphakade emhlabeni, ayitshintshanga. Loo njongo iza kuzaliseka, kuba uYehova unyanisekile. INdumiso 37:29 ithi: “Amalungisa aya kuwudla ilifa umhlaba, ahlale kuwo ngonaphakade.” Esi sithembiso sisenza thina nabo banikwe ubomi bokungafi ezulwini, sithi: “Mikhulu kwaye iyamangalisa imisebenzi yakho, Yehova, Thixo Somandla. Zibubulungisa yaye ziyinyaniso iindlela zakho, Kumkani kanaphakade. Ngubani na ongayi kukoyika ngokwenene wena, Yehova, aze azukise igama lakho, ngenxa yokuba inguwe wedwa onyanisekileyo?”—ISityhilelo 15:3, 4.

Ngaba uyasinqwenela isipho esingayiwayo sobomi obungunaphakade? Ukuba kunjalo, umele unyaniseke uze uthobele ‘uKumkani kanaphakade.’ Umele ufunde ngoYehova nangalowo bufumaneka ngaye obo bomi, uYesu Kristu. Bonke abo bafuna ukuyamkela imilinganiselo kaThixo yokulungileyo nokubi baza kunikwa isipho ‘sobomi obungunaphakade.’—Yohane 17:3.

[Umbhalo osemazantsi]

[Ibhokisi/Umfanekiso okwiphepha 5]

Umnqweno Ekudala Ukho

UMbongo kaGilgamesh, ibali laseMesopotamiya ekucingwa ukuba lelenkulungwane yesibini ngaphambi kweXesha Eliqhelekileyo, lithetha ngeqhawe elalifuna ukuhlala lilitsha. AmaYiputa amandulo ayebaqwayita abafileyo, enengcamango yokuba imiphefumlo, awayekholelwa ukuba ayifi, yayinako ukusebenzisa imizimba yayo kwakhona. Ngenxa yoko, kumangcwaba athile amaYiputa kwakubekwa zonke izinto ezinokufunwa ngabafileyo xa bephila kwindawo ethile njengoko kwakukholelwa njalo.

Inkolelo yokungafi komzimba yezazinzulu zamaTshayina ngokuveliswa kwamachiza okuzuza ubomi obungunaphakade, isusela kwinkulungwane yesibhozo ngaphambi kweXesha Eliqhelekileyo, ize yona inkolelo yokuba umzimba ungenziwa ungafi ngokusebenzisa amayeza obugqi isusele kwinkulungwane yesine ngaphambi kweXesha Eliqhelekileyo. Izazinzulu ngokuveliswa kwamachiza okuzuza ubomi obungunaphakade zaseYurophu nezingama-Arabhu ziye zenza uphando zizama ukuzenzela awazo amachiza okwenza abantu bangafi. Eminye yale mixube yawo yayinetyuwa, iarsenic, imekyuri nesalfure. Yazi ukuba bangaphi abazibulalayo ngokutya le tyhefu bezama oku!

Enye into eyakha yaxhaphaka yayiziintsomi ezingoMthombo Wobutsha—umthombo ekwakusithiwa ubuyisela ebutsheni bonke abasela kuwo.

[Ibhokisi/Imifanekiso ekwiphepha 7]

Ngaba Ubomi Obungunaphakade Buza Kukruqula?

Bambi bathi ubomi obungunaphakade buya kukruqula, kube kukuhanjiswa kwexesha ngokwenza izinto ezingenamsebenzi ngonaphakade. Mhlawumbi ubomi obungunaphakade abacinga ngabo kukuqhubeka bephila phantsi kweemeko esiphila kuzo namhlanje, ezibonakala zikruqula yaye zingenantsingiselo kubantu abaninzi. Noko ke, kwiParadesi uThixo aza kuyibuyisela, uthembisa abantu ukuba baza ‘kuziyolisa ngokugqibeleleyo ngobuninzi boxolo.’ (INdumiso 37:11) Obo bomi buya kunika abantu ithuba lokuba nolwazi ngendalo kaYehova baze babe nexesha lokufunda bonke ubuchule, izifundo nemisebenzi ebangel’ umdla esingenako ukuyazi ngoku.

UGqr. Aubrey de Grey, ingcali ngemizila yemfuza kwiYunivesithi yaseCambridge nowenza uphando ngendlela yokwenza abantu baphile ubomi obude, uthi: “Abantu abafundileyo namhlanje nabanexesha lokusebenzisa imfundo yabo abakruquki ibe andiboni beya kuze baphelelwe zizinto ezintsha abangathanda ukuzenza.” Nokuba sekunjalo, iLizwi likaThixo eliphefumlelweyo lithi, “uluntu [alunakuze] luwufumane umsebenzi uThixo oyinyaniso awenzileyo ukususela ekuqaleni kuse ekupheleni.”—INtshumayeli 3:11.