Ibali Lobomi

Ndifunde Ukukholosa Ngokupheleleyo NgoYehova

Kubalisa uAubrey Baxter

Ngenjikalanga yangoMgqibelo ngowe-1940, amadoda amabini andihlasela aze andingqula phantsi. Kwakukho amapolisa amabini awayemi kude kufuphi, kunokuba andihlangule, andithuka aza antyontyela la madoda. Izinto ezakhokelela kule mpatho igadalala zaqala kwiminyaka emihlanu ngaphambi koko xa ndandisebenza emgodini wamalahle. Makhe ndityatyadule.

NDINGUNYANA wesithathu kwabane, ndazalwa ngowe-1913 eSwansea, kwidolophu ekunxweme lweNew South Wales, eOstreliya. Xa ndandineminyaka emihlanu ubudala, intsapho yasekhaya yosulelwa nguMbathalala wowe-1918, ekusenokwenzeka ukuba wabulala abantu abazizigidi ngezigidi ehlabathini lonke. Kuluvuyo ukuthi akukho namnye owafayo ekhaya. Ngowe-1933, kwenzeka eyona nto ibuhlungu, umama wafa xa wayeneminyaka engama-47. Ekubeni wayemthanda uThixo, wafumana imiqulu emibini yencwadi ethi Light, neyayisetyenziswa ngamaNgqina kaYehova ukufundisa abanye iBhayibhile.

Ngelo xesha, ndandisebenza kumgodi wamalahle. Njengokuba emsebenzini wam ndandixakeka ndiphinde ndibe nomtyhi, ndathabatha ezi ncwadi ndaza ndazifunda ngesibane esasikumakarabha wam (umnqwazi othwalwa ngabantu abasebenza emgodini.) Ngokukhawuleza ndaqonda ukuba ndiyifumene inyaniso. Ndandiphulaphula kwaneentetho ezazisasazwa kunomathotholo ngamaNgqina. Okwandivuyisa nangakumbi, kukuba uTata nabantakwethu, babanomdla kwiinyaniso zeBhayibhile.

Ngowe-1935 yaphinda yehl’ intlekele, kwafa umninawa wam uBilly, ebulawa yinyumoniya. Wayeneminyaka eli-16 kuphela ubudala. Noko ke, ngesi sihlandlo, intsapho yakowethu yathuthuzelwa lithemba lovuko. (IZenzo 24:15) Ekuhambeni kwexesha abakhuluwa bam, uVerner noHarold, bahlulela ubomi babo kuThixo. Kwintsapho yakowethu ndim kuphela osadla amazimba. Phofu, usekho umfazi kaVerner wesibini, uMarjorie, nomfazi kaHarold, uElizabeth yaye baqhuba kakuhle enkonzweni kaYehova.

Ukufunda Ukukholosa NgoYehova

Ndaqala ukudibana namaNgqina kaYehova ngowe-1935, xa ekhaya kwafika ibhinqa laseUkraine elaliqhuba ibhayisekile. NgeCawa elandelayo, ndaya kwiintlanganiso zamaKristu okokuqala ngqa, kwiveki elandelayo saya entsimini. AmaNgqina awayeqhuba iintlanganiso andinika iincwadana yaye ndingalindelanga ndahamba ndedwa! Kumzi wokuqala ndandisoyika kangangokuba kwanga ndingathi vuleka mhlaba ndingene! Kodwa loo mninimzi wayenobubele kangangokuba walwamkela noncwadi.

IZibhalo ezifana neNtshumayelo 12:1 noMateyu 28:19, 20 zandichukumisa kakhulu yaye ndafuna ukuba nguvulindlela, umshumayeli wexesha elizeleyo. Utata wasixhasa isigqibo sam. Nangona ndandingekabhaptizwa, ndakhetha uJulayi 15, 1936 njengosuku lwam lokuqalisa. Ngaloo mini, ndaya kwiofisi yesebe yamaNgqina kaYehova eSydney, ndikunye noovulindlela abali-12 sathunyelwa ukuba sishumayele kwihlomela-dolophu laseSydney, iDulwich Hill. Ndafundiswa apho ke ukusebenzisa umatshini wokuguba ingqolowa owawusetyenziswa ngoovulindlela ukuze bonge imali.

Ubuvulindlela Emagqagaleni

Emva kokuba ndibhaptiziwe kwakuloo nyaka, ndabelwa kumbindi weQueensland kunye noovulindlela ababini—uAubrey Wills noClive Shade. Sasineveni kaAubrey, iibhayisekile, igramafoni ephathwayo ukuze sidlale iintetho zeBhayibhile, intente eyaba likhaya lethu iminyaka emithathu, iibhedi ezintathu, itafile nembiza yesinyithi. Ngenye imini xa yayindim owayefanele apheke ndacinga ukuba ndiza kupheka isidlo “esikhethekileyo” semifuno nengqolowa. Kodwa akukho namnye kuthi owakwaziyo ukusitya. Sanika ihashe oko kutya. Lakujoja, lanikin’ intloko laza lahamba! Ndagqibelisa ngaloo mini ukupheka izinto endingazaziyo.

Ekuhambeni kwexesha, sagqiba kwelokuba sikhawulezise ukugubungela umhlaba wethu ngokuba umntu ngamnye asebenze inxalenye yakhe. Ngamanye amaxesha ndandisiba kude nendawo esasihlala kuyo ndize ke ndilalise kubantu basemaphandleni abanomdla. Ngaxesha lithile ndalala kwigumbi leendwendwe ebhedini esemgangathweni, kubusuku obulandelayo ndalala phantsi kumgangatho omdaka neekangaroo, kwakukwakho neemfele ezazitsho ngevumba elinganyamezelekiyo. Amaxesha amaninzi ndandidla ngokugob’ ityholo. Xa ndandilele ngenye imini ndangqongwa ziidigo (izinja zasendle zaseOstreliya), zisitsho ngomkhulungwane kweso sithokothoko sobumnyama. Emva kokuphuthelwa ubusuku bonke ndafumanisa ukuba zazifuna isilwanyana esifileyo esasikufutshane.

Ukushumayela Ngemoto Enesandisi-lizwi

Sasebenzisa imoto enesandisi-lizwi ukuze sivakalise uBukumkani bukaThixo. Kumntla weQueensland, kwisixeko saseTownsville, amapolisa asivumela ukuba sibeke imoto yethu kumbindi wesixeko. Iintetho ezirekhodiweyo zawaphath’ emanyeni amagosa eSalvation Army aza asigxotha kuloo ndawo. Sala yaye abahlanu kuwo asityityimbisel’ umnwe. Ngelo xesha ndingaphakathi evenini ndilungisa izixhobo zesandisi-lizwi! Yayiya kuba bubudenge ukunyanzelisa amalungelo ethu apho, ngoko athi akuthomalala la madoda nathi sahamba kuloo ndawo.

EBundaberg, indoda eyayinomdla yasiboleka iphenyane layo ukuze sishumayele kuMlambo iBurnett, oqukuqela phakathi esixekweni. UAubrey noClive bahamba nesandisi-lizwi ngephenyane, ngoxa mna ndasala neholo esasiliqeshile. Ngobo busuku, ilizwi elikhulu likaJoseph F. Rutherford elirekhodiweyo, lavakala kuyo yonk’ iBundaberg, livakalisa isigidimi esinamandla seBhayibhile. Ngokwenene, yayingamaxesha amyoli lawo awayefuna inkalipho nokholo kubantu bakaThixo.

Imfazwe Izisa Iinzima Ezingakumbi

Emva nje kokuba iMfazwe Yehlabathi II iqalisile ngoSeptemba 1939, IMboniselo kaNovemba 1, yathetha ngokungabi nanxaxheba kwezobupolitika nakwimfazwe. Kamva ndavuya kakhulu kuba ndalifunda elo nqaku. Emva kweminyaka emithathu ndikunye noAubrey noClive ndafumana isabelo esitsha. Ndamiselwa njengomveleli ohambahambayo kumntla weQueesland, isabelo esavavanya indlela endandikholose ngayo kuYehova.

NgoAgasti 1940, ndatyelela ibandla laseTownsville, elalinoovulindlela abane—uPercy noIlma Iszlauba bekunye noNorman Belloti noBeatrice udadewabo. Kwiminyaka emithandathu kamva, uBeatrice waba ngumfazi wam. Oko kuhlaselwa bendikukhankanye ngaphambilana kwenzeka ngorhatya lwangoMgqibelo emva kokuba sasishumayela esitratweni. Oku kuphathwa gadalala kwandikhuthaza kwinkonzo kaYehova.

Iintombi zakwaKilpatrick u-Una noMerle, zazisenza umsebenzi omhle njengoovulindlela emantla. Saba nexesha elimnandi entsimini ngaloo mini, zacela ukuba siwele umlambo siye kwintsapho eyayinomdla. Oko kwakuthetha ukuqubha ukusuka kwelinye icala lomlambo ukuya kwelinye, nditsale iphenyane ukuze kukhwele aba dade, size siphinde siwele kwakhona. Xa ndafika kweli phenyane, ndafumanisa ukuba amaphini okubheqa ayengekho! Seva ukuba afihlwe ngumntu owayechasa. Kodwa elo qhinga lakhe lafa namthanyana. Ndakha ndasebenza ekusindiseni abantu elwandle iminyaka emininzi yaye ndandinawo amandla okuqubha. Ngoko ndabophelela eli phenyane kwisihlahla sam ndalitsala njengokuba oodade babekulo. UYehova wawusikelela lo mgudu wethu, kaloku abantu belo khaya lalinomdla baba ngamaNgqina.

Ukukhuselwa NguYehova

Ngenxa yokhuseleko, amajoni avala indlela kufuphi nedolophu yaseInnisfail. Ngokusemthethweni ndandihlala kulo mmandla, ngoko ke, ndafumana imvume yokungena kuwo yaye kwavuleka nendlela yokuba amagqwetha avela kwiofisi yesebe lamaNgqina kaYehova angene lula. Ukuze sidlule kula majoni, ndandibafihla aba bazalwana emotweni yam ngaphantsi kwezitulo ezingasemva.

Yayinqabile ipetroli ngelo xesha, yaye iimoto ezininzi zazifakelwa isixhobo sokuvelisa amafutha emoto. Ukuze injini yemoto ibe namafutha esi sixhobo sasitsala igesi yamalahle ashushu. Ndandidla ngokuhamba ebusuku namalahle endandiwafihla kwindawo ekwakuzimele laa mzalwana ndandihamba naye ngemoto. Xa ndimiswa kwezi ndawo, ndandiphazamisa la majoni ngokuyeka imoto iduma, ndize ndiqiniseke ukuba amalahle ashushu ngeyona ndlela. Ndathi kwelinye ijoni: “Ukuba ndicima imoto, umxube womoya negesi uza konakala, yaye kunganzima ukuyidumisa kwakhona.” Becatshukiswa bubushushu nengxolo nomsi owaphuma kuloo moto amajoni ayejonga nje ngaphezulu andiyeke ndidlule.

Ngeloo xesha ndabelwa ukuba ndilungiselele indibano yesithili yamaNgqina eTownsville. Ukutya kwakunqabile, yaye ukuze sikwazi ukufumana izinto esasizifuna kwafuneka sifumane imvume kumantyi. Kwangaxeshanye, abazalwana bethu babebanjiwe ngenxa yokungafuni ukuba yinxalenye yehlabathi. Ngoko ke, xa ndacela ukudibana nemantyi, ndazibuza ‘Ngaba sisenzo sobulumko esi, okanye ndiziqhwayela ukhwembekhwembe?’ Nakuba kunjalo ndenza oko ndandikuyalelwe.

Ihleli kwidesika enkulu, le mantyi yandivumela ukuba ndihlale phantsi. Xa ndamxelela injongo yokuza kuyo, le mantyi yabonakala ikhathazekile, yaza yandithi ntshoo ixesha elide. Kamva yakhululeka yathi “Ufuna ukutya okungakanani?” Ndayinika uludwe lwezinto ezimbalwa esasizifuna. Emva kokuhlola olo ludwe yathi: “Zimbalwa ezi zinto. Kuza kufuneka siziphinde kabini.” Ndaphuma kuloo ofisi yayo, ndabulela uYehova ngokundifundisa esinye isifundo sokukholosa ngaye.

NgoJanuwari 1941, umsebenzi wamaNgqina kaYehova wawuvaliwe eOstreliya. Abantu abaninzi babesirhanela ngokuba ngoontamnani borhulumente waseJapan. Ngesinye isihlandlo, kwafika iimoto ezimbini ezinamapolisa namajoni, zangena kwiFama YoBukumkani, isiqwengana somhlaba esasiseAtherton Plateau esasithenga ukuze sizilimele ukutya. Babekhangela isibane ekuthiwa sasisisebenzisa ukuze sithumele imiyalezo kutshaba. Satyholwa nangokuba sityala umbona ngendlela yokuba, xa kudlula inqwelo-moya kufundwe imiyalezo ethile! Yayilulwimi etywaleni olu, phofu nabo bazibonela.

Ngenxa yokuvalwa umlomo, kwafuneka silumke—sizame namacebo alusizi—ukuze sikwazi ukuthumela iincwadi. Ngokomzekelo, xa incwadi ethi Children yakhululwayo, ndafumana ibhokisi eBrisbane, ndijongise imibombo ngaseNtla, ndahamba ngololiwe ndishiya ezi ncwadi kwiindawo ezazinamabandla. Ukuze ndiqiniseke ukuba amapolisa akavuli ezi bhokisi, ndajijela isarha enkulu ngaphezu kwazo ngaphambi kokuba ndiphume. Nakuba lalibonakala lilula, eli cebo alizange lisilele. Okwavuyisa abantu bakaYehova kukuba ngoJuni 1943 umsebenzi waphinda wavulwa, isigqibo esasithathwe yinkundla ngaphambili kwathiwa “yayisesobuzwi-lakhe, singacingisiswanga kakuhle kwaye sasicinezela.”

Ukubizelwa Emkhosini

Kunyaka ongaphambi kwalowo, mna, uAubrey Wills, noNorman Bellotti, sabizelwa emkhosini. UAubrey noNorman babizwa kwiveki ngaphambi kwam baza bagwetywa iinyanga ezintandathu. Kwangaxeshanye, iofisi yeposi yathimba zonke iiMboniselo ezazisiya kumaNgqina aziwayo kodwa imirhumo yabanye abantu ingenziwa nto tu. Isabelo sethu yaba kukufuna abantu abenza umrhumo, senza iikopi zamaphephancwadi, sazithumela kubazalwana bethu. Ngaloo ndlela sonke, sasifumana ukutya kokomoya.

Xa nam ndanikwa isigwebo seenyanga ezintandathu, ndabhena njengokuba ndandiyalelwe yiofisi yesebe eseSydney. Sasifuna ukuziziliza de kunconyelwe omnye umntu wokuthabatha ukhokelo kumsebenzi wokushumayela. Ndasebenzisa eli thuba ukuze ndityelele abazalwana abangama-21 ababevalelwe emntla Queensland. Uninzi lwalusentolongweni enye, yaye umlindi wentolongo wayesithiy’ egazini. Xa ndambuza ukuba kutheni ezinye iinkokeli zonqulo zivunyelwa ukuba zityelele abantu bazo, lo mlindi waba ligqabi ngumsindo. Engxola wathi: “Ukuba bekusiya ngam, onke amaNgqina kaYehova ngedutyulwa onke!” Ngoko nangoko ndagxagxanyiswa ngabanye oonogada ukuphuma apho.

Xa kwafika ixesha lokuphulaphula isibheno, ndanikwa ilungelo lokumelwa ligqwetha likarhulumente. Kodwa ke, ndazimela ngenkqay’ elangeni nto leyo eyayithetha ukukholosa ngakumbi kuYehova. Naye akazange andishiye kwesinomhlwa. (Luka 12:11, 12; Filipi 4:6, 7) Okwandothusayo kukuba, isibheno saphumelela ngenxa yokuba kwakukho iimpazamo ezininzi kuxwebhu lwetyala!

Ngowe-1944, ndabelwa kwisiphaluka esikhulu esasiquka wonke uMzantsi weOstreliya, emantla Victoria nesixeko saseNew South Wales iSydney. Ngonyaka olandelayo kwasungulwa ilungiselelo leentetho zesidlangalala, yaye isithethi kwakufuneka silungiselele umbandela waso, sisebenzisa ulwandlalo olwalulungiselelwe yintlangano. Ukunikela intetho iyure yonke kwakunzima ngokwenene, kodwa saphumelela ngoncedo lukaYehova, yaye wayisikelela imigudu yethu.

Ukutshata Neembopheleleko Ezintsha

NgoJulayi 1946, ndatshata noBeatrice Bellotti saza sangoovulindlela. Sasihlala kwikharavan eyenziwe ngamaplanga. Umntwana wethu okuphela kwakhe, uJanyce (Jann) wazalwa ngoDisemba 1950. Sashumayela kwiindawo ezahlukeneyo kuquka nedolophu yaseKempsey, eNew South Wales yaye yayisithi kuphela amaNgqina awayelapho. Rhoqo ngeeCawa sasisiya kwiholo yasekuhlaleni, ukuze sinikele intetho esasimema abantu ukuba beze kuyo. Kangangeenyanga ezimbalwa, uBeatrice nentombazana yethu uJann babekuphela kwabantu ababesibakho. Kungekudala nabanye beza. Namhlanje iKempsey inamabandla amabini andayo.

Xa uJann wayeneminyaka emibini ubudala, sazinza eBrisbane. Emva kokugqiba kwakhe ukufunda, saba ngoovulindlela kangangeminyaka emine njengentsapho eNew South Wales, kwidolophu yaseCessnock, saza sabuyela eBrisbane ukuze sinyamekele umama kaBeatrice owayegula. Ngoku ndingumdala kwibandla laseChermside.

Mna noBeatrice simbulela ngokungazenzisiyo uYehova ngendlela asisikelele ngayo, kuquka nelungelo lokunceda abantu abangama-32 ukuba bamazi. Ndikwathanda ukubulela uYehova ngokundipha umfazi, nakuba elulamile yaye ethobekile, kodwa uyilwela ngenkalipho inyaniso yeBhayibhile. Ukuthanda kwakhe uThixo, ukumthemba kwakhe nokuba ‘neliso elingenakumbi,’ kumenze umfazi nomama ongayiwayo. (Mateyu 6:22, 23; IMizekeliso 12:4) Sobabini sinokuthi ngentliziyo iphela: “Isikelelwe indoda eyomeleleyo ekholosa ngoYehova, naleyo ithembele ngoYehova.”—Yeremiya 17:7.

[Umbhalo osemazantsi]

[Umfanekiso okwiphepha 9]

Sasisebenzisa le moto emntla weQueensland

[Umfanekiso okwiphepha 10]

Ndincedisa iintombi zakwaKlipatrick utyhala imoto yazo kwizantyalantyala zeemvula emntla weQueensland

[Umfanekiso okwiphepha 12]

Ngomhla esazimanya ngawo