Iklasi Ye-124 Yabaphumelele EGiliyadi

Abathunywa Bevangeli Bafaniswa Neenkumbi

RHOQO emva kweenyanga ezintandathu, iSikolo seBhayibhile seWatchtower saseGiliyadI siba nocwangciso lwabaphumeleleyo nalapho kuye kumenywe yonke intsapho yaseBheteli eUnited States. NgoMatshi 8, 2008 le ntsapho yathelelwa ziindwendwe ezivela kumazwe angaphezu kwama-30 ezazize kwinkqubo yabaphumelele kwiklasi ye-124 kwiSikolo saseGiliyadi. Bebonke, babengama-6 411 ababekho beze kuvuyisana nabaphumeleleyo ngolo suku lwabo lukhethekileyo.

Usihlalo wolo cwangciso, uStephen Lett weQumrhu Elilawulayo, wahlahl’ indlela ngentetho enomxholo othi, “Tyhalelani Phambili Kunye Neenkumbi Zokomfuziselo ZikaYehova.” ISityhilelo 9:1-4 sifanisa iqaqobana lamaKristu athanjisiweyo elathi ngowe-1919 lachacha ngokomoya laba libubu leenkumbi ezimaxhaphetshu. Abaphumeleleyo bakhunjuzwa ukuba ekubeni bengamalungu “ezinye izimvu,” baye bathelela kweli bubu leenkumbi zokomfuziselo.—Yoh. 10:16.

ULon Schilling, olilungu leKomiti Yesebe laseUnited States, walandelisa ngentetho ethi “Yibani Ngabaphelelisi.” Yayisekelwe kumzekelo oseBhayibhileni ka-Akwila noPrisila (okanye, uPriska), isibini esitshatileyo esasingamaKristu ngenkulungwane yokuqala. (Roma 16:3, 4) Le klasi yayibunjwa zizibini ezitshatileyo ezingama-28. Zakhunjuzwa ukuba ukuze zibe ngabathunywa bevangeli abaphumelelayo, zimele zigcine amaqhina azo omtshato omelele. IBhayibhile ayikhe ithethe ngoAkwila imshiye umfazi wakhe, uPrisila. Oku kubonisa ukuba, umpostile uPawulos nebandla babejonga ngamnye kwesi sibini njengomphelelisi womnye. Nazo ke, ezi zibini zabathunywa bevangeli zimele zisebenze kunye, zinqule kunye yaye zibambisane kwiingxaki ezingaqhelekanga zelizwe lasemzini, ngaloo ndlela ziphelelisane.—Gen. 2:18.

Intetho elandelayo eyayinomxholo othi, “Buyiselani Ukulunga KukaYehova Ngokwenza Okulungileyo,” yanikelwa nguGuy Pierce weQumrhu Elilawulayo. UMzalwan’ uPierce wacacisa into yokuba, ukuba ngolungileyo akuthethi nje ukuphepha ukwenza okubi. Umntu olungileyo wenza okulungileyo ukuze kungenelwe abanye. UYehova uThixo ulunge ngendlela engenakuchazwa. (Zek. 9:16, 17) Ukulunga nothando lukaThixo zizinto ezinokusenza sifune ukwenza okulungileyo kwabanye. Encoma abo baphumeleleyo, uMzalwan’ uPierce waqukumbela ngamazwi athi: “Benisele nikwenza kakade okulungileyo. Siqinisekile ukuba niza kuqhubeka nibuyisela ukulunga kukaThixo ngokwenza okulungileyo kuso nasiphi na isabelo aninika sona uYehova uThixo.”

Emva koko, uMichael Burnett, obekade engumthunywa wevangeli, waza kutshanje wathunyelwa ukuba aye kuhlohla eGiliyadi, wanikela intetho enomxholo othi “Nizinxibe Njengesibopho Esisebunzi.” Njengokungathi ayenxibe ‘izibopho ezisebunzi,’ amaSirayeli ayemele akhumbule ukuhlangulwa kwawo nguYehova ngendlela engummangaliso eYiputa. (Eks. 13:16) Abo baphumeleleyo babongozwa ukuba bakhumbule izinto abazifunde kweso Sikolo saseGiliyadi ngokungathi bazinxibe njengezibopho ezisebunzi phakathi kwabo. UMzalwan’ uBurnett wagxininisa imfuneko yokuba bathobeke yaye bathozame ukuze basebenzise imigaqo yeBhayibhile xa belungisa nakuphi na ukungaboni ngasonye nabazalwana babo, abo bangabathunywa bevangeli nabanye.—Mat. 5:23, 24.

UMark Noumair, osele enethuba ehlohla eGiliyadi wanikela intetho ethi “Abantu Baya Kuvuma Ingoma Ethini Ngawe?” Mandulo kwakulisiko ukubhiyozela uloyiso emfazweni ngokuvuma ingoma. Enye yezo ngoma ichaza isizwe sakwaRubhen, esakwaDan nesakwa-Ashere njengezazibandezayo, ngoxa sona esakwaZebhulon sidunyiswa ngomoya waso wokuzincama. (ABagwe. 5:16-18) Njengamazwi engoma, izenzo zomKristu ngamnye ziye zaziwe ngabanye ekugqibeleni. Ngenzondelelo anayo kwimisebenzi kaThixo nokunyamezela kwakhe ngokuthembeka kwintlangano kaYehova umntu uye abe nengxelo entle kuYehova yaye abe ngumzekelo omhle kubazalwana bakhe. Njengoko abanye ebandleni bephulaphule le ngoma yomfuziselo iqanjwe zizenzo zethu, baye bafune ukuxelisa umzekelo wethu omhle.

Njengenxalenye yoqeqesho lwabo lwaseGiliyadi, le klasi ye-124 yachitha iiyure ezimalunga nama-3 000 kumsebenzi wokushumayela. Kwintetho enomxholo othi “Landelani Ukhokelo Lomoya Oyingcwele,” abafundi babalisela uSam Roberson weSebe Lezikolo Zobuthixo amava aliqela abawafumene entsimini, belinganisa nendlela enzeke ngayo amanye. La mava akhuthazayo alandelwa ludliwano-ndlebe, olwaluqhutywa nguPatrick LaFranca weKomiti Yesebe laseUnited States, edlan’ iindlebe nabanye abaphumelela apho eGiliyadi ngoku abakhonza kumazwe ahlukahlukeneyo. Abafundi abatsha balixabisa gqitha icebiso elisebenzisekayo abalifumana kwaba bazalwana.

UAnthony Morris weQumrhu Elilawulayo wanikela intetho yokuqukumbela ethi “Khumbulani, Ukuba Izinto Ezibonwayo Zezokwexeshana.” IZibhalo zisibongoza ukuba sinikele ingqalelo kwiintsikelelo esiza kuzifumana kuYehova kunokuyinikela kwiimbandezelo zomzuzwana isikuzo ngoku. (2 Kor. 4:16-18) Ubuhlwempu obugqithiseleyo, ukungabikho kokusesikweni, ingcinezelo, ukugula nokufa zizinto zokwenene esizibona zisenzeka namhlanje. Abathunywa bevangeli basenokujamelana nezi meko zibuhlungu. Kodwa ukukhumbula ukuba ezi zizinto zokwexeshana kuya kusinceda sihlale silungelelene ngokomoya yaye sinethemba.

Ucwangciso lwavalwa ngokuba bonke abo baphumeleleyo beze ngaphambili eqongeni baphulaphule amagqabaza okugqibela kaMzalwan’ uLett. Ebakhuthaza ukuba banganikezeli wathi: “Asinakuze sinikezele kwingqibelelo yethu xa uYehova enathi.” Wabongoza abathunywa bevangeli abatsha ukuba bafane neenkumbi, batyhalele phambili kwinkonzo kaYehova yaye bahlale benenzondelelo, bethembekile yaye bethobekile.

[Ibhokisi ekwiphepha 30]

INKCAZELO ENGABAFUNDI

Inani lamazwe abavela kuwo: 7

Inani lamazwe abathunyelwe kuwo: 16

Inani labafundi: 56

Umlinganiselo wobudala: 33.8

Umlinganiselo weminyaka besenyanisweni: 18.2

Umlinganiselo weminyaka bekwinkonzo yexesha elizeleyo: 13.8

[Umfanekiso okwiphepha 31]

Iklasi Ye-124 Yabaphumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukusa ekunene kuluhlu ngalunye.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Umfanekiso okwiphepha 32]

ISikolo saseGiliyadi sikwiZiko Lemfundo LeWatchtower