Ukususela Kubafundi Abanempumelelo Ukusa Kubavangeli Basemazweni Abanempumelelo

“ANDIKAYIKHOLELWA nangoku into yokuba siye salifumana eli lungelo!” wakhuza watsho uWill, ebhekisela kuqeqesho yena nomfazi wakhe, uPatsy, ababesandul’ ukulugqiba njengabafundi beklasi ye-103 kwiSikolo seBhayibhile SeWatchtower saseGiliyadi. UZahid noJeni bangqina. Bathi: “Kulilungelo ukuba lapha.” Bonke abafundi babezimisele esikolweni. Ngoku babekulungele ukuqalisa umsebenzi wabo njengabavangeli basemazweni. Kodwa kuqala, kucwangciso lokuvuyisana nabaphumeleleyo olwalungoSeptemba 6, 1997, bafumana isiluleko sothando esasiya kubanceda baphumelele kwisabelo sabo sobuvangeli basemazweni.

Usihlalo wocwangciso yayinguTheodore Jaracz, ilungu leQumrhu Elilawulayo. Wathi—phakathi kwentsapho yaseBheteli nabameli abangama-48 bamasebe eWatch Tower Society—kwakukho abahlobo nezizalwana ezisuka eKhanada, eYurophu, ePuerto Rico, naseUnited States ababeze kuqinisekisa abafundi ngenkxaso nangothando lwabo. UMzalwana uJaracz wavakalisa ukuba abavangeli basemazweni abathunyelwa ziicawa zeNgqobhoko ngokufuthi baye baphazamiseka kubuvangeli basemazweni yaye baye basukela imfundo okanye bazibandakanya nezobupolitika. Ngokwahlukileyo koko, abaphumelele eGiliyadi benza oko baqeqeshelwe ukukwenza. Bafundisa abantu iBhayibhile.

URobert Butler owayevela kwiofisi yoMbutho yaseBrooklyn wathetha ngomxholo othi “Yenza Indlela Yakho Iphumelele.” Wacacisa ukuba ngoxa abantu becinga ukuba baphumelele xa befumene imali okanye xa bezuza okuthile, okona kubalulekileyo yindlela uThixo ayigqala ngayo impumelelo. Ubulungiseleli bukaYesu baphumelela, kungekhona ngenxa yokuba abantu abaninzi baguquka kodwa ngenxa yokuba wayethembekile kwisabelo sakhe. UYesu wamzukisa uYehova, waza wazigcina engenabala kulo ihlabathi. (Yohane 16:33; 17:4) Ezi zizinto ezinokwenziwa ngawo onke amaKristu.

“Yibani Ngamakhoboka Ebantwini Bonke,” watsho uRobert Pevy, owayengumvangeli wasemazweni eMpuma. Umpostile uPawulos wayengumvangeli wasemazweni onempumelelo. Yayiyintoni imfihlelo yakhe? Wazenza ikhoboka labo bonke. (1 Korinte 9:19-23) Esi sithethi sacacisa sathi: “Umntu ophumelele eGiliyadi onalo mbono akayi kuyigqala inkonzo yobuvangeli njengokunyuselwa, umchankcatho okhokelela kwizikhundla ezibaluleke ngakumbi entlanganweni. Umvangeli wasemazweni uya esabelweni sakhe enenjongo enye kuphela—ukukhonza, kuba enza kanye oko amakhoboka.”

UGerrit Lösch weQumrhu Elilawulayo esekela isiluleko sakhe ngokuyintloko kweyesi-2 kwabaseKorinte isahluko 3 nesesi-4, wabongoza abafundi ukuba “Babonakalise Njengezipili Uzuko LukaYehova.” Wabakhumbuza ukuba ulwazi lukaThixo lufana nokukhanya okukhanyisa umKristu xa evula intliziyo ukuze alufumane. Oku kukhanya sikubonisa ngokushumayela iindaba ezilungileyo nangokuhlala sinehambo entle. Wavuma esithi: “Maxa wambi usenokuziva ungungantweni. Xa ufikelwa ngamathuba anjalo, thembela kuYehova, ‘ukuze amandla angaphaya koko kuqhelekileyo abe ngakaThixo.’” (2 Korinte 4:7) Ephinda amazwi kaPawulos abhalwe kweye-2 kwabaseKorinte 4:1, uMzalwana uLösch wabongoza abafundi esithi: “Ningaze ninikezele kwisabelo senu sobuvangeli basemazweni. Gcinani isipili senu simenyezela!”

UKarl Adams, ilungu labasebenzi baseGiliyadi, lathetha ngomxholo onika umdla othi “Uphi UYehova?” Lo mbuzo ubhekisela, kungekhona kwindawo akuyo uThixo kwindalo iphela, kodwa kwimfuneko yokuqwalasela imbono kaYehova nolwalathiso lwakhe. Wathi: “Xa umntu exinezelekile enoba unexesha elininzi enkonzweni kaYehova usenokungabi nambono injalo.” (Yobhi 35:10) Kuthekani ngale mihla yethu? Ngowe-1942, abantu bakaThixo babefuna ukhokelo. Ngaba umsebenzi wokushumayela wawufikelele esiphelweni, okanye kwakukho umsebenzi omninzi owawuseza kwenziwa? Kuyintoni ukuthanda kukaYehova ngabantu bakhe? Njengokuba babefundisisa iLizwi likaThixo, inyaniso yacaca. Ngaphambi kokuba kuphele unyaka, uMzalwana uAdams wavakalisa esithi: “Sekwenziwe amalungiselelo okuqaliswa kweSikolo seBhayibhile seWatchtower saseGiliyadi.” Ngokuqinisekileyo uYehova uye wawusikelela umsebenzi wabavangeli basemazweni abathunyelwa seso sikolo.

UMark Noumair wayengumhlohli wesibini ukuthetha. Kwintetho yakhe, eyayisithi “Uya Kuyisebenzisa Njani Italente Yakho?,” wakhuthaza abafundi ukuba basebenzise uqeqesho abalufumana eGiliyadi ngokukhawuleza xa befumana izabelo zabo. Wathi: “Zibhokoxeni niye kwabanye. Yibani nomdla ebantwini. Kuphapheleni ukufunda izithethe, imbali noko abantu belo lizwe bonwatyiswa kuko. Xa ufundisisa ulwimi ngokukhawuleza, kokukhona uya kuqhela ngakumbi.”

Abafundi Abanenzondelelo Bafumana Uvuyo Kubulungiseleli

Ukongezelela ekuzibhokoxeni ezifundweni zabo ngoxa beseGiliyadi, abafundi babelwa kumabandla asekuhlaleni ali-11. Ngeempela-veki, babesiba nesabelo ngokuzeleyo kumsebenzi wokushumayela. UWallace Liverance ongumsebenzi waseGiliyadi wamema iqela labo ukuba libalisele abaphulaphuli amava. Uvuyo lwabo lwalubonakala njengoko babesabelana ngamava abawafumana xa babenikela ubungqina ezivenkileni, kwiindawo ezimisa izithuthi, kwimimandla yamashishini, ezitratweni nakwindlu ngendlu. Abanye babo bakhangela iindlela zokufikelela abantu abathetha iilwimi zasemzini abahlala baze basebenze kummandla webandla labo. Ubuncinane kwaqaliswa izifundo zeBhayibhile ezilishumi yaye zaziqhutywa ngamalungu eklasi ye-103 ebudeni beenyanga ezintlanu zoqeqesho lwabo.

Abavangeli Basemazweni Abangamagqala Babelana Ngeemfihlelo Zempumelelo

Emva kokunandipha le nxalenye yocwangciso, uPatrick Lafranca noWilliam Van de Wall bamema amalungu eKomiti yeSebe asixhenxe ukuba abalise ngezifundo azifumene kubulungiseleli bobuvangeli basemazweni ukuze kungenelwe le klasi. Abayala abo baphumeleleyo ukuba basigqale isabelo sabo sobuvangeli basemazweni njengesivela kuYehova yaye bazimisele ukunamathela kwisabelo sabo. Bathetha ngemiphumo emihle ebangelwa ngabavangeli abaqeqeshwe eGiliyadi ethi ibekho emsebenzini nakwamanye amazwe.

Yintoni eyanceda la malungu eKomiti yeSebe ukuba akhonze kangangamashumi eminyaka njengawonwabileyo, nangabavangeli abaphumeza umsebenzi ongaka? Ayesebenza ngokusondeleyo nabazalwana basekuhlaleni yaye afunda kubo. Azimisela ekufundeni ulwimi ngokukhawuleza nje akuba efikile ezabelweni zabo. Afunda ukuba bhetye-bhetye nokuziqhelanisa nezithethe zasekuhlaleni. UCharles Eisenhower, owaphumelela kwiklasi yokuqala yaseGiliyadi nobengumvangeli wasemazweni kangangeminyaka engama-54, wabelana nabo ‘ngeemfihlelo’ ezintlanu eziye zafundwa ngabavangeli basemazweni abanempumelelo: (1) Fundisisa iBhayibhile rhoqo, (2) funda ulwimi, (3) bukhuthalele ubulungiseleli, (4) sebenzela uxolo kwikhaya lobuvangeli basemazweni, uze (5) uthandaze rhoqo kuYehova. Aba bafundi babechukumisekile kungekhona nje licebiso abalifumanayo kodwa ngovuyo olubonakalayo olunanditshwa ngabavangeli basemazweni enkonzweni kaYehova. Kunjengokuba uArmando noLupe bekubeka, “bonwaba ngakumbi xa bethetha ngobomi babo.”

Emva kodliwano-ndlebe, kwasala intetho yanye. UAlbert Schroeder, ilungu leQumrhu Elilawulayo, wakhetha umxholo othi “Ukuthembeka Kwamagosa ELizwi LikaThixo Kutyhila Ubuncwane Obuxabisekileyo Benyaniso.” Ekubeni iBhayibhile iyeyona ncwadi isetyenziswayo kwiSikolo saseGiliyadi, abafundi babenomdla koko wayeza kukuthetha. UMzalwan’ uSchroeder walatha ukuba xa umsebenzi weNew World Translation of the Holy Scriptures waqaliswa kwiminyaka engama-50 eyadlulayo, amalungu abathanjiswa eNew World Bible Translation Committee akazange afune ukukholisa abantu kodwa athembela kukhokelo lomoya oyingcwele. (Yeremiya 17:5-8) Noko ke, kutshanje abanye abaphengululi baye baphawula umgangatho ophezulu omiselwe yiNew World Translation. Kwincwadi awayeyibhalele uMbutho, omnye umphengululi wabhala: “Ndiyakwazi ukuyiphawula incwadi esemgangathweni xa ndiyibona, yaye i-‘New World Bible Translation Committee’ yenu yawenza kakuhle umsebenzi wayo.”

Emva kwale ntetho, abafundi bafumana iziqinisekiso zabo, yaye izabelo zabo zaxelelwa nabaphulaphuli. Yayisisihlandlo esichukumisayo kumalungu eklasi. Njengokuba lowo wayebamele eklasini wayefunda incwadi yoxabiso, uninzi lwabo lwabindeka yaye kwehla neenyembezi. Abanye abafundi babewulungiselele umsebenzi wobuvangeli basemazweni kangangeminyaka. Beqonda ukuba iklasi yaseGiliyadi yayiza kuqhutywa ngesiNgesi, uninzi kwanyanzeleka ukuba luye kumabandla anentetho isisiNgesi ukuze lukwazi ukuphucula olu lwimi. Abanye baya apho kwakukho imfuneko enkulu yoovulindlela, enoba kwakusemazweni abo okuzalwa okanye kwamanye amazwe. Sekunjalo abanye babelungiselele ngokuthi bafunde amava, benze uphando okanye baphindaphinde ividiyo yoMbutho ethi To the Ends of the Earth.

UWill noPatsy ekuthethwe ngabo ekuqaleni, bamangaliswa ngumdla wobuqu owabonakaliswa kubafundi. “Abantu ababengasazi nokusazi basanga yaye babethabatha nemifanekiso yethu. Ilungu leQumrhu Elilawulayo lasibamba ngezandla laza lathi, ‘Sinelunda ngani!’” Ngokungathandabuzekiyo, abafundi beklasi ye-103 bathandwa ngokwenene. Baqeqeshwe kakuhle gqitha. Imfundo abayifumene eGiliyadi iya kubanceda benze inguqu ukususela kubafundi abanempumelelo ukusa kubavangeli basemazweni abanempumelelo.

[Ibhokisi ekwiphepha 22]

Inkcazelo Engabafundi

Inani lamazwe abavela kuwo: 9

Inani lamazwe ababelwe kuwo: 18

Inani labafundi: 48

Inani lezibini ezitshatileyo: 24

Umlinganiselo wobudala: 33 Umlinganiselo weminyaka besenyanisweni: 16

Umlinganiselo weminyaka bekubulungiseleli bexesha elizeleyo: 12

[Umfanekiso okwiphepha 23]

Abaphumelele Kwiklasi Ye-103 YeSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Umfanekiso okwiphepha 24]

Siza kuyaphi?