‘Ukuphilisa Ngemimangaliso’ Namhlanje—Ngaba Kuvela KuThixo?
KUMAZWE athile kuyinto eqhelekileyo ukubona abantu betyelela iindawo zonqulo apho abantu abaninzi badla ngokuthi baye baphiliswa kwizigulo zabo “ezazinganyangeki.” Kwamanye amazwe abathandazeli bathi baphilisa abantu ngamandla angaphaya kwawomntu. Ukanti kwezinye iindawo kubakho iinkonzo ezinkulu apho abantu abaphilisiweyo belahla izitulo zabagulayo okanye iintonga zokuhamba kuba besithi bayakwazi ukuhamba.
Abo bantu baphilisayo bahamba kwiicawa ezahlukeneyo yaye badla ngukutyholana besithi abanye ngabonqulo lobuxoki okanye abahedeni. Ngoko usenokuzibuza usithi, Ngaba uThixo wenza imimangaliso esebenzisa abantu abakwiicawa ezixabanayo? IBhayibhile ithi: “UThixo unguThixo, kungekhona owesidubedube, kodwa owoxolo.” (1 Korinte 14:33) Ngoko ngaba nyhani abo bantu ‘baphiliswa ngokungummangaliso’ baphiliswa nguThixo? Abanye bathi baphilisa ngamandla kaYesu. Makhe sihlolisise indlela uYesu awayebaphilisa ngayo abantu.
Indlela UYesu Awayephilisa Ngayo
UYesu waphilisa abantu abagulayo ngendlela eyahluke ngokupheleleyo kweyabantu banamhlanje. Ngokomzekelo, uYesu wayephilisa bonke abantu abeza kuye. Akazange aphilise abathile kwisihlwele aze abanye angabaphilisi. UYesu wabaphilisa ngokupheleleyo abantu yaye wayebaphilisa ngoko nangoko. IBhayibhile ithi: “Sonke isihlwele sasifuna ukumchukumisa, ngenxa yokuba amandla ayephuma kuye aze abaphilise bonke.”—Luka 6:19.
Ngokwahlukileyo kubantu abaphilisayo namhlanje, abadla ngokuthi xa umntu engaphili akanalukholo, uYesu wayephilisa kwanabo bangekakholwa kuye. Ngokomzekelo, ngesinye isihlando uYesu waphilisa indoda eyimfama. Kamva wayibuza oku: “Uyakholwa na kuNyana womntu?” Yaphendula yathi: “Ungubani na yena, mnumzana, ukuze ndikholwe kuye?” UYesu wathi: “Nguye lo uthetha nawe.”—Yohane 9:1-7, 35-38.
Usenokuzibuza ukuba, ‘Ukuba kwakungeyomfuneko ukuba abantu babenokholo ukuze uYesu abaphilise, kwakutheni ukuze asoloko esithi: “Ukholo lwakho lukuphilisile” kwabo wayebaphilisa?’ (Luka 8:48; 17:19; 18:42) Ngala mazwi, uYesu wayebonisa ukuba abo babesiza kuye benokholo lokuba uza kubaphilisa babephiliswa, ngoxa abo babengezi kuye babengaphiliswa. Abo babephiliswa babengaphiliswa lukholo lwabo, kodwa babephiliswa ngamandla kaThixo. IBhayibhile ithi ngoYesu: ‘UThixo wamthambisa ngomoya oyingcwele namandla, yaye walityhutyha ilizwe esenza okulungileyo kwaye ephilisa bonke abo bacinezelwe nguMtyholi; ngenxa yokuba uThixo wayenaye.’—IZenzo 10:38.
Kubantu abaphilisayo namhlanje imali idla ngokuba yeyona nto iphambili. Abaphilisi baziwa ngokungenisa izityhwentywe zemali. Omnye wabo kuthiwa ngonyaka nje omnye ehlabathini lonke wenza izigidi ezingama-684 zeerandi, kubantu abaphilisayo nabo babukela iinkqubo zakhe kumabonwakude. Neecawa zenza imali eninzi kubantu abaze kunqula. Kodwa uYesu yena akazange afune mali kubantu awayebaphilisa. Ngezinye izihlandlo wayede abaphe nokutya. (Mateyu 15:30-38) Xa wathuma abafundi bakhe ukuba baye kushumayela, wathi: “Philisani abantu abagulayo, vusani abantu abafileyo, hlambululani abaneqhenqa, khuphani iidemon. Namkele ngesisa, yiphani ngesisa.” (Mateyu 10:8) Kutheni abantu abaphilisayo namhlanje bohlukile kwabo babephilisa ngexesha likaYesu?
Bawathatha Phi Amandla “Okuphilisa”?
Ukutyhubela iminyaka abezonyango baye baziphanda iindlela abaphilisa ngazo abantu bonqulo. Yintoni abaye bayifumanisa? Ngokutsho kwephephandaba laseLondon, iDaily Telegraph, omnye ugqirha waseNgilani owachitha iminyaka engama-20 esenza olu phando wathi: “Akukho nabunye ubungqina beenzululwazi ngezamayeza obuxhasa iingxelo zabo baphilisa ngokungummangaliso.” Sekunjalo, abantu abaninzi bakholelwa ngokunyanisekileyo ukuba baye baphiliswa ngamandla engcwele, awomfeli-nkolo, okanye inkokeli yonqulo eyafayo, awomfanekiso oqingqiweyo okanye awabaphilisi. Ngaba bebeqhathwa?
KwiNtshumayelo yakhe edumileyo yaseNtabeni uYesu wathi iinkokeli zonqulo ezihanahanisayo zaziya kuthi kuye: “Nkosi, Nkosi, asizange na . . . senza imisebenzi emininzi yamandla egameni lakho?” Yena uya kuphendula athi: “Andizange ndinazi! Mkani kum, nina benzi bokuchasene nomthetho.” (Mateyu 7:22, 23) Ethetha ngamandla abathi banawo umpostile uPawulos walumkisa ngelithi: “Sekude kubekho umchasi-mthetho nje kungenxa yemisebenzi yamandla kaSathana nemiqondiso yobuxoki nemihlola nayo yonke inkohliso engeyoyabulungisa.”—2 Tesalonika 2:9, 10.
Ukongezelela koko, uThixo ‘akaphilisi’ abantu ngemifanekiso eqingqiweyo, izithixo nemifanekiso. Kutheni? Kuba iLizwi likaThixo lithi: “Sabani kulo unqulo-zithixo” yaye “zilindeni kuzo izithixo.” (1 Korinte 10:14; 1 Yohane 5:21) Ukuphilisa abantu ngolo hlobo yinxalenye yamaqhinga kaMtyholi okubhekelisa abantu kunqulo lokwenyaniso. IBhayibhile ithi: “NoSathana ngokwakhe uzimilisa okwengelosi yokukhanya.”—2 Korinte 11:14.
Isizathu Sokuba UYesu Nabapostile Baphilise Abantu
Imimangaliso yokuphilisa abantu ekwiZibhalo ZamaKristu ZesiGrike ibonisa ngokucacileyo ukuba amandla okuphilisa kaYesu nabapostile bakhe ayevela kuThixo. (Yohane 3:2; Hebhere 2:3, 4) Kwakhona ukuphilisa kukaYesu kuxhasa isigidimi awayeshumayela ngaso: “Walijikeleza lonke elaseGalili, efundisa kwizindlu zabo zesikhungu, eshumayela iindaba ezilungileyo zobukumkani kwaye ephilisa lonke uhlobo lwesifo nalo lonke uhlobo lobulwelwe ebantwini.” (Mateyu 4:23) Imisebenzi yamandla eyayisenziwa nguYesu—eyayingekokuphilisa abagulayo nje kuphela, kodwa eyayiquka ukondla izihlwele, ukulawula imo-zulu, kwanokuvusa abafileyo—ibonisa oko aya kukwenzela abantu abathobelayo kulawulo lwakhe loBukumkani. Ziindaba ezilunge ngokwenene ezo.
Kucacile ukuba emva kokufa kukaYesu nabapostile bakhe nabanye ababezidlulisele kubo ezi zipho, loo misebenzi yamandla okanye izipho zomoya, yaphela. Umpostile uPawulos wathi: “Enoba kukho iziphiwo zokuprofeta, ziya kubhangiswa; enoba kukho iilwimi [ezithethwa ngokungummangaliso], ziya kuphela; enoba kukho ulwazi [oluvela kuThixo], luya kubhangiswa.” (1 Korinte 13:8) Kutheni sisitsho nje? Ekubeni yafezwa injongo yazo—ukubonisa ukuba uYesu wayenguMesiya othenjisiweyo nokuba uThixo uyalithanda ibandla lamaKristu—imisebenzi yamandla elolo hlobo, kuquka ukuphilisa, ayisafuneki nganto; ‘ibhangisiwe.’
Sekunjalo, imimangaliso kaYesu yokuphilisa inesigidimi esibalulekileyo kuthi namhlanje. Ukuba sinikel’ ingqalelo kuBukumkani bukaThixo size sibe nokholo kwizinto uYesu awazifundisayo ngabo, sinokukhangela phambili kwixesha laxa esi siprofeto siphefumlelweyo sizaliseka ngokomoya nangokwasenyameni: “Akakho ummi wakhona oya kuthi: ‘Ndiyagula.’”—Isaya 33:24; 35:5, 6; ISityhilelo 21:4.