Sebenzisanani Ukuze Intsapho Yenu Yenze Inkqubela Ngokomoya
INTSEBENZISWANO ibaluleke gqitha kwabo bafuna ukukhulisa intsapho ethanda izinto zokomoya. Emva kokuba uYehova edale isibini sokuqala, wakubethelela ukubaluleka kwentsebenziswano. UEva wayeza kuba “ngumphelelisi” ka-Adam. (Gen. 2:18) Indoda nomfazi bamele basebenzisane, omnye axhase omnye. (INtshu. 4:9-12) Ukuze bafeze indima abayinikwe nguYehova, abazali nabantwana bamele basebenzisane.
Ukunqula Kunye Njengentsapho
UBarry noHeidi banabantwana abahlanu. Bafumanisa ukuba ukusebenzisana kwabo ekubeni kuqhutywe isifundo seBhayibhile sekhaya kuyabanceda benze inkqubela ngokomoya. UBarry uthi: “Ukuze silungiselele isifundo sentsapho, ndisoloko ndinika abantwana izabelo. Maxa wambi ndiye ndibacele ukuba balungiselele amanqaku athile kaVukani! ukuze bagqabaze. Siye siqhelisele iintshumayelo zasentsimini ukuze mntwana ngamnye ayazi into aza kuyithetha.” UHeidi wongezelela athi: “Sonke sizibhale phantsi izinto zokomoya esifuna ukuzifikelela, ibe kwisifundo sethu sentsapho siye sizihlolisise emva kwethuba elithile ukuze sibone inkqubela esiyenzayo.” Esi sibini siye sabona ukuba ukungabukeli kwaso umabonwakude ngeentsuku ezithile, kwenza intsapho yaso ibe nethuba lokufundisisa.
Iintlanganiso Zebandla
UMike noDenise bakhulise abantwana abane. Ziziphi iingenelo ezafunyanwa yintsapho yabo ngokusebenzisana? UMike uthi: “Nokuba sele sicebe kakuhle kangakanani, sasikhe sisilele ukufika ngexesha kwiintlanganiso, kodwa xa siye sasebenzisana sasikwazi ukufika ngexesha.” UDenise yena uthi: “Ngoxa abantwana babekhula, ngamnye sasimnika umsebenzi wakhe. Intombi yethu uKim, yayincedisa ekuphekeni nasekulungiseni itafile.” Unyana wabo uMichael uthi: “NgoLwesibini iintlanganiso zebandla zaziqhutyelwa ekhaya. Ngoko sasicoca elo gumbi ziza kungenela kulo, sitshayele, size silungise izitulo.” Omnye unyana wabo uMatthew uthi: “Ngosuku lweentlanganiso utata wayebuya kwangethuba emsebenzini ukuze aqinisekise ukuba iintlanganiso ziqalisa sesilungile.” Kwaba nayiphi imiphumo oko?
Oko Kwaba Nemiphumo Emihle
UMike uthi: “Ngowe-1987 mna noDenise saba ngoovulindlela. Ngelo xesha sasisahlala nabantwana bethu abathathu. Ababini kubo baba ngoovulindlela, ngoxa abanye babencedisa kwimisebenzi yokwakha eBheteli. Eyona nto isivuyisa kakhulu kwintsapho yethu kukuba siye sanceda abantu abahlukahlukeneyo abangama-40 bazahlulela kuYehova baza babhaptizwa. Siye saxhamla nelungelo lokusebenza kunye njengentsapho kwimisebenzi yokwakha, yaye sasisakha nakumazwe angaphandle.”
Ngokwenene, ukusebenzisana njengentsapho kuba nemiphumo emihle. Ngaba zikho ezinye iindlela eninokusebenzisana ngazo kwintsapho yenu? Qinisekani ukuba intsebenziswano iya kuyinceda intsapho yenu yenze inkqubela yokomoya.
[Umfanekiso okwiphepha 28]
Ukuqhelisela iintshumayelo kusinceda senze inkqubela entsimini