Ngaba Uyalixabisa Ilungiselelo LikaYehova Lokukuhlangula?

“Makabongwe uYehova uThixo kaSirayeli, ngenxa yokuba eyiphethule ingqalelo yakhe waza wabahlangula abantu bakhe.”—LUKA 1:68.

1, 2. Sinokuyifanisa nantoni imeko embi esikuyo, yaye yiyiphi imibuzo esiza kuyixubusha?

MASITHI ulele ngandletyana nye esibhedlele. Ukwigumbi elinabantu abagula sisifo esifanayo nesinganyangekiyo. Uqalisa ukuba nethemba xa usiva ukuba kukho ugqirha ozama ukufumana indlela yokusinyanga. Uhlala ujong’ enkalweni ufuna ukwazi ngenkqubela yezi nzame zenziwa ngulo gqirha. Ngeny’ imini, uva iindaba zokuba iyeza lifumanekile! Lo gqirha uye wawa evuka ukuze kufumaneke eli yeza. Ubuya kuvakalelwa njani? Ngokuqinisekileyo ubuya kuba nentlonelo nombulelo kulo gqirha oye wavula ithuba lokuba nisinde ekufeni.

² Le meko ichazwe ngasentla isenokuvakala ibaxiwe, kodwa enyanisweni sonke sikwimeko efanayo. Kodwa le meko sikuyo imbi nangakumbi. Sifuna umhlanguli ngokungxamisekileyo. (Funda eyabaseRoma 7:24.) UYehova wancama into exabisekileyo ukuze asihlangule. NoNyana wakhe wenza okufanayo. Ngoko ke, makhe sihlolisise le mibuzo mine. Kutheni sifuna ukuhlangulwa? Yintoni ekwafuneka uYesu ayincame ukuze asihlangule? Yintoni ekwafuneka uYehova eyincamile? Sinokubonisa njani ukuba sinoxabiso ngeli lungiselelo?

Isizathu Sokuba Kufuneke Sihlangulwe

3. Sinokusifanisa njani isono nesifo esingubhubhani?

³ Ngokutsho kohlolisiso olwenziwe kutshanje, esinye sezona zifo zakha zathwaxa abantu abaninzi nguMbathalala, owawukho ngowe-1918 nowabulala abantu abangamashumi ngamashumi ezigidi. Ezinye izifo ziyingozi ngakumbi. Ngokomzekelo, basenokungabi baninzi abantu abaphethwe zezo zifo, kodwa uninzi lwabo luyafa.a Noko ke, sinokusifanisa njani isono nesifo esingubhubhani? Cinga ngamazwi akweyabaseRoma 5:12: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” Ekubeni sonke singafezekanga, sonke sinesono. (Funda eyabaseRoma 3:23.) Bangaphi abantu ababulawa sisono? UPawulos wathi isono sibulala “bonke abantu.”

4. Ngokwembono kaYehova siphila ixesha elingakanani, yaye yahluke njani kwindlela abantu abaninzi abacinga ngayo?

⁴ Abantu namhlanje bacinga ukuba isono nokufa zizinto nje eziqhelekileyo. Into ebakhathazayo kukufa komntu ngaphambi kwexesha, kodwa ukuba umntu uyaluphala aze afe baye bathi ufe ngendlela “eqhelekileyo.” Abantu abajongi izinto ngendlela uMdali azijonga ngayo. Siphila ixesha elifutshane kunelo uYehova wayesidalele ukuba siliphile. Eneneni, ngokwembono kaYehova, akukho mntu osele ephile ‘nemini le enye.’ (2 Pet. 3:8) Kungenxa yoko le nto iLizwi likaThixo lisithi, ubomi bethu bufutshane njengengca okanye umphunga. (INdu. 39:5; 1 Pet. 1:24) Sifanele sihlale sikukhumbula oku. Ngoba? Ukuba siyabuqonda ubunzulu “besifo” esinaso, siya kuba noxabiso “ngeyeza” laso—ukuhlangulwa kwethu.

5. Yintoni esaphulukana nayo ngenxa yesono?

⁵ Ukuze sibuqonde ubunzulu besono nemiphumo yaso, simele sizame ukuqonda umonakalo esiwenzileyo kuthi. Kusenokuba nzima ukukuqonda oku, kuba asizange silifumane ilungelo ababenalo abazali bethu bokuqala. Ekuqaleni uAdam noEva babefezekile. Ekubeni babefezekile babenokukwazi ukucinga nokwenza izinto ngendlela egqibeleleyo. Babenokuba nazo iimpawu uYehova uThixo azilindeleyo kubakhonzi bakhe. Kodwa, basigatya isipho esixabisekileyo sobomi obufezekileyo. Ngenxa yokuba uAdam noEva bona uYehova, abazange baphile ngendlela uYehova awayefuna ngayo ibe kwenzeka okufanayo nakwinzala yabo. (Gen. 3:16-19) Yiloo nto kanye ebangela ukuba sibe nesi “sifo” sithetha ngaso. UYehova wabagweba, yaye kwakufanelekile ukuba enjenjalo. Kodwa thina, usithembisa ukusihlangula ngonaphakade.—INdu. 103:10.

Oko UYesu Kwafuneka Akuncame Ukuze Asihlangule

6, 7. (a) UYehova wabonisa njani ukuba kwakuza kufuneka encame lukhulu ukuze asihlangule? (b) Yintoni esinokuyifunda ngemibingelelo eyenziwa nguAbheli nangoosolusapho ababephila ngaphambi kokuba kubhalwe uMthetho?

⁶ UYehova wayesazi ukuba kwakuya kufuneka ancame lukhulu ukuze ahlangule inzala ka-Adam noEva. Kwisiprofeto esikwiGenesis 3:15, sichazelwa ngento ekwafuneka ayincame. UYehova wayeza kuvelisa ‘imbewu,’ umhlanguli, owayeza kutshabalalisa uSathana. Noko ke, naye umhlanguli wayeza kubandezeleka, kwakuza kuba ngathi utyunyuzwe isithende. Oku kumele ukuba kwakuza kuba buhlungu yaye kumthez’ amandla, kodwa yintoni eyayibandakanyekile? Yintoni kanye kanye ekwakuza kufuneka Onyuliweyo kaYehova ayinyamezele?

⁷ Ukuze ahlangule abantu esonweni, umhlanguli kwakuza kufuneka enze isicamagusho, asuse imiphumo yesono aze abaxolelanise noThixo. Wayeya kukwenza njani oku? Kwabonakala kwakudala ukuba idini liza kufuneka. UYehova wakholiswa ngumbingelelo owenziwa ngumntu wokuqala othembekileyo, uAbheli. Kamva, oosolusapho abahlonel’ uThixo abanjengoNowa, uAbraham, uYakobi noYobhi benza imibingelelo efanayo yaye uThixo wakholiswa yiyo. (Gen. 4:4; 8:20, 21; 22:13; 31:54; Yobhi 1:5) Kwiinkulungwane kamva, uMthetho kaMoses wagxininisa ukubaluleka kokunikelwa kwamadini.

8. Yintoni eyayisenziwa ngumbingeleli omkhulu minyaka le ngoMhla Wocamagusho?

⁸ Eminye yemibingelelo uMthetho owawuyalela ukuba yenziwe, yileyo yayinikelwa ngoMhla Wocamagusho. Ngaloo mini umbingeleli omkhulu wayesenza izinto eziliqela ezazifuzisela okuthile. Wayebingelela kuYehova ukuze kuxolelwe izono—okokuqala ezababingeleli aze emva koko enzele izizwe ezazingezizo ezababingeleli. Umbingeleli omkhulu wayengena kweYona Ngcwele yetempile, yaye nguye kuphela owayenelungelo lokungena apho, naye engena ngolo suku kuphela. Wayefefa igazi lemibingelelo phambi kwetyeya yomnqophiso. Maxa wambi, kwakuye kubonakale ilifu phezu kwetyeya engcwele, elalifanekisela ubukho bukaYehova uThixo.—Eks. 25:22; Lev. 16:1-30.

9. (a) NgoMhla Wocamagusho, umbingeleli ophakamileyo wayefanekisela bani, yaye imibingelelo awayenikela ngayo yayifanekisela ntoni? (b) Kwakufanekisela ntoni ukungena kombingeleli omkhulu kweYona Ngcwele?

⁹ Umpostile uPawulos waphefumlelwa ukuba achaze intsingiselo yezinto ezazisenziwa ngalo mhla. Wathi umbingeleli omkhulu ufanekisela uMesiya, uYesu Kristu, kanti imibingelelo ifanekisela ukufa kukaKristu okulidini. (Heb. 9:11-14) Lo mbingelelo ugqibeleleyo wawuza kucamagushela iindidi ezimbini zabantu—okokuqala udidi lwababingeleli abangabazalwana bakaKristu abathanjisiweyo abali-144 000 “nezinye izimvu.” (Yoh. 10:16) Ukungena kombingeleli omkhulu kweYona Ngcwele kwakufanekisela ukungena kukaYesu ezulwini ezise ixabiso ledini lentlawulelo kuYehova uThixo.—Heb. 9:24, 25.

10. Ngokutsho kwesiprofeto seBhayibhile yintoni eyayiza kwenzeka kuMesiya?

¹⁰ Kuyabonakala ukuba kwakuya kufuneka into enkulu ukuze kuhlangulwe inzala ka-Adam noEva. Kwakuya kufuneka uMesiya ancame ubomi bakhe! Abaprofeti ababhala iZibhalo zesiHebhere bachaza iinkcukacha ezingakumbi. Ngokomzekelo, umprofeti uDaniyeli wathi ‘uMesiya iNkokeli’ wayeya “kunqunyulwa” okanye abulawe, ukuze ‘kucanyagushelwe isiphoso.’ (Dan. 9:24-26) UIsaya waprofeta ukuba uMesiya wayeya kugatywa, atshutshiswe aze abulawe okanye ahlatywe ukuze athwale izono zabantu abangafezekanga.—Isa. 53:4, 5, 7.

11. UNyana kaYehova wabonisa njani ukuba ukulungele ukuzincama ukuze sihlangulwe?

¹¹ Ngaphambi kokuba eze emhlabeni, uNyana okuphela kozelwe nguThixo wayeyiqonda into ekwakuza kufuneka ayincame ukuze asihlangule. Kwakuza kufuneka abandezeleke aze abulawe. Xa uYise emxelela oko, ngaba warhoxa waza wavukela? Akunjalo, kunoko wayithobela ngokuzithandela imiyalelo kaYise. (Isa. 50:4-6) Naxa wayelapha emhlabeni, uYesu wenza ukuthanda kukaYise. Kwakutheni? Impendulo ifumaneka kula mazwi: “Ndiyamthanda uBawo.” Enye ifumaneka kula athi: “Akukho bani unothando olukhulu kunolu, lokuba uthile anikezele umphefumlo wakhe ngenxa yabahlobo bakhe.” (Yoh. 14:31; 15:13) Ngenxa yoko, noNyana kaYehova unendima enkulu ekuhlangulweni kwethu. Nangona kwafuneka ancame ubomi bakhe obufezekileyo, wakwenza ngovuyo oko ukuze sihlangulwe.

Izinto UYehova Awazincamayo Ukuze Asihlangule

12. Ngubani owenza ilungiselelo lentlawulelo, yaye kwakutheni ukuze alenze?

¹² AsingoYesu uMsunguli welungiselelo ledini lentlawulelo. Kunoko, eli lilungiselelo lokuphunyezwa kwentando kaYehova. Umpostile uPawulos wabiza isibingelelo ekwakubingelelwa kuso etempileni, ngokuba yintando kaYehova. (Heb. 10:10) Ngoko kufuneka sibe nombulelo kuYehova ngelungiselelo likaKristu ledini lentlawulelo. (Luka 1:68) Yindlela aphumeza ngayo ukuthanda kwakhe nabonisa ngayo uthando olunzulu ngabantu.—Funda uYohane 3:16.

13, 14. Umzekelo ka-Abraham unokusinceda njani siyiqonde into esiyenzelwe nguYehova?

¹³ Yintoni ekwafuneka uYehova ayincame ukuze asibonise ukuba uyasithanda? Kunzima ukuba sikuqonde oku. Noko ke, kukho ingxelo yeBhayibhile esincedayo ukuze sikuqonde. UYehova wacela uAbraham owayethembekile ukuba enze into enzima—anikele ngonyana wakhe uIsake. UAbraham wayemthanda unyana wakhe. Ethetha noAbraham ngoIsake, uYehova wathi ‘ngunyana wakho okuphela kwakhe, omthanda kunene.’ (Gen. 22:2) Sekunjalo, uAbraham wayesazi ukuba ukwenza ukuthanda kukaYehova kubaluleke ngaphezu kothando awayenalo ngoIsake. Ngenxa yoko, wathobela. Noko ke, uYehova wamnqanda uAbraham ekwenzeni into eyayiza kwenziwa nguye ngenye imini. UThixo wathumela ingelosi ukuba imnqande uAbraham anganikeli ngonyana wakhe. UAbraham wayezimisele ukuthobela uThixo kolu vavanyo lunzima kuba wayeqinisekile ukuba unyana wakhe wayeya kumbona eluvukweni. Wayenokholo lokuba uThixo uya kumvusa. Eneneni, uPawulos wathi uAbraham wamzuza uIsake eluvukweni “ngokomzekeliso.”—Heb. 11:19.

¹⁴ Ngaba unokuyithelekelela indlela awayebuhlungu ngayo uAbraham xa kwafuneka anikele ngonyana wakhe? Ngandlel’ ithile, into eyenziwa nguAbraham ifanekisela idini lalowo uYehova wambiza ngokuthi ‘uNyana wam, oyintanda.’ (Mat. 3:17) Kodwa ke, khumbula ukuba uYehova waba buhlungu kakhulu. Wayechithe izigidi ngezigidi zeminyaka noNyana wakhe. UNyana wayekuthanda ukusebenza noYise amthandayo “njengomsebénzi onobuchule,” neSithethi sakhe, “uLizwi.” (IMize. 8:22, 30, 31; Yoh. 1:1) Soze siyiqonde indlela awayebuhlungu ngayo uYehova xa uNyana wakhe wayengcungcuthekiswa, egculelwa waza wagqibela ngokubulawa njengesaphuli-mthetho. UYehova walahlekelwa kakhulu elungiselela ukuba sihlangulwe! Ngoko ke, sinokubonisa njani ukuba sinoxabiso ngale ntlangulo?

Unokubonisa Njani Ukuba Uyakuxabisa Ukuhlangulwa?

15. UYesu walifezekisa njani ilungiselelo locamagusho, yaye oku kwavula liphi ithuba?

¹⁵ UYesu walifezekisa ilungiselelo lesicamagusho emva kokuba evuselwe ezulwini. Wafika wanika uYise amthandayo ixabiso ledini lakhe. Kwavuleka ithuba lokuba abantu bafumane iintsikelelo. Oku kwabangela ukuba kuxolelwe izono, okokuqala ezabazalwana bakaKristu abathanjisiweyo, kuze emva koko kuxolelwe ‘nezehlabathi liphela.’ Ngenxa yelo dini, bonke abo baguqukayo ezonweni zabo baze babe ngabalandeli bakaKristu abanyanisekileyo, baba nolwalamano oluhle noYehova uThixo. (1 Yoh. 2:2) Oku kukuchaphazela njani?

16. Sinokuluzekelisa njani uxabiso esifanele sibe nalo ngentlangulo esiyilungiselelwe nguYehova?

¹⁶ Makhe sibuyele kumzekelo wethu ebesiqale ngawo. Masithi ugqirha ofumene iyeza uthi kwizigulana: Umntu ovumayo ukunyangwa aze alandele imiyalelo kagqirha uza kuphila. Kuthekani ukuba ezinye izigulana azifuni kulandela imiyalelo kagqirha kuba zisithi iyaxakekisa? Ngaba nawe ungenza okufanayo, nakuba kukho ubungqina obucacileyo bokuba eli yeza liyasebenza? Akunakuyenza loo nto! Ngokuqinisekileyo ubuya kuba noxabiso uze ulandele imiyalelo kagqirha ngocoselelo, mhlawumbi ude uxelele nabanye ngeli yeza. Sifanele simbonise uYehova ukuba sinoxabiso kakhulu ngokusilungiselela kwakhe intlangulo ngedini loNyana wakhe.—Funda eyabaseRoma 6:17, 18.

17. Unokulubonisa njani uxabiso onalo ngentlangulo evela kuYehova?

¹⁷ Ukuba sinoxabiso ngento esiyenzelwe nguYehova noNyana wakhe ukuze basihlangule esonweni nasekufeni, oko kuya kubonakala kwizenzo zethu. (1 Yoh. 5:3) Siya kulwa notyekelo esinalo lwesono. Asinakwenza isono ngabom size siphile ubomi obumbaxa. Xa sinokwenza oko kuya kufana nokuba asinaxabiso kwaphela ngentlawulelo. Kunoko, siya kubonisa ukuba sinoxabiso ngokuzama ukuhlala sicocekile phambi koThixo. (2 Pet. 3:14) Siya kukubonisa oko ngokwabelana nabanye ngethemba elimangalisayo lentlangulo ukuze nabo babe nolwalamano noYehova nethemba lobomi obungunaphakade. (1 Tim. 4:16) Ngokuqinisekileyo, kufanelekile ukuba sichithe ixesha yaye sizinikele ekudumiseni uYehova noNyana wakhe! (Marko 12:28-30) Khawucinge nje, kungekudala siza kukhululwa ngokupheleleyo esonweni! Siya kutsho sifezeke size siphile ngonaphakade ngokuvisisana nenjongo kaThixo yaye oko kuya kwenzeka ngenxa yokuba uYehova esihlangule!—Roma 8:21.

[Umbhalo osemazantsi]

Ubuya Kuphendula Uthini?

• Yintoni ebangela ukuba ukufune ngokungxamisekileyo ukuhlangulwa?

• Ukuzincama kukaYesu kukuchaphazela njani wena?

• Uvakalelwa njani ngesipho sikaYehova sentlawulelo?

• Uzimisele ukwenza ntoni ukuze ubonise uxabiso ngentlangulo evela kuYehova?

[Umfanekiso okwiphepha 27]

NgoMhla Wocamagusho, umbingeleli omkhulu wakwaSirayeli wayefanekisela uMesiya

[Umfanekiso okwiphepha 28]

Ukuvuma kuka-Abraham ukunikela ngonyana kwakhe kusifundisa okuninzi ngedini elenziwe nguYehova