Gqala Umtshato Njengesipho Esivela KuThixo Esimele Sihlonelwe
“Kungenxa yoko le nto indoda iya kumshiya uyise nonina, inamathele emfazini wayo baze babe nyama-nye.”—GEN. 2:24.
1. Kutheni sifanele simhlonele uYehova?
SIFANELE simhlonele uYehova uThixo, umsunguli womtshato. NjengoMdali wethu, uMongami nobawo wasezulwini, ukufanele ukubizwa ngokuba nguMniki waso “sonke isipho esilungileyo naso sonke isipho esigqibeleleyo.” (Yak. 1:17; ISityhi. 4:11) Leyo yindlela abonakalisa ngayo uthando lwakhe. (1 Yoh. 4:8) Zonke izinto asifundise zona, zonke izinto afuna sizenze nazo zonke izinto asinike zona ziyingenelo kuthi.—Isa. 48:17.
2. Yiyiphi imiyalelo uYehova awayinika isibini esitshatileyo sokuqala?
2 IBhayibhile ichaza umtshato njengesinye sezi zipho ‘zilungileyo’ zivela kuThixo. (Rute 1:9; 2:12) Xa uYehova watshatisa isibini sokuqala uAdam noEva, wasinika imiyalelo ecacileyo yendlela esasinokuphumelela ngayo. (Funda uMateyu 19:4-6.) Ukuba sasiyithobele imiyalelo kaThixo, ngesasifumene ulonwabo oluhlala luhleli. Noko ke, ngobuyatha asizange siyikhathalele imiyalelo kaThixo yaye sajamelana nemiphumo ebuhlungu.—Gen. 3:6-13, 16-19, 23.
3, 4. (a) Namhlanje abantu abaninzi babonisa njani ukuba abawuhloneli umtshato noYehova uThixo? (b) Yiyiphi imizekelo esiza kuyixubusha kweli nqaku?
3 Njengeso sibini sokuqala, abantu abaninzi abalunanzi kangako okanye bayalugatya ulwalathiso lukaYehova xa besenza izigqibo eziphathelele umtshato. Abanye abafuni nokuwubona umtshato, kanti abanye bazama ukuwutshintsha ukuze ulungele iminqweno yabo. (Roma 1:24-32; 2 Tim. 3:1-5) Basibetha ngoyaba isibakala sokuba umtshato sisipho esivela kuThixo, yaye ukungasihloneli eso sipho kuthetha ukungamhloneli nalowo sivela kuye, uYehova uThixo.
4 Maxa wambi, abanye abantu bakaThixo baye bangayiqondi kakuhle indlela uYehova awujonga ngayo umtshato. Ezinye izibini ezingamaKristu zigqiba ekubeni zahlukane, okanye ziqhawule umtshato ngaphandle kwesizathu esingokweZibhalo. Sinokuyiphepha njani le nto? Ulwalathiso lukaThixo olukwiGenesis 2:24 lunokuwanceda njani amaKristu atshatileyo ukuba omeleze imitshato yawo? Abo baceba ukutshata banokuwulungiselela njani? Makhe sixubushe ngemitshato emithathu eyaphumelelayo ngamaxesha okubhalwa kweBhayibhile ebonisa indlela ukuhlonela uYehova okubaluleke ngayo ukuze umtshato uhlale uhleli.
Hlakulela Ukunyaniseka
5, 6. Yintoni ekumele ukuba yavavanya uZekariya noElizabhete yaye bavuzwa njani ngokunyaniseka kwabo?
5 UZekariya noElizabhete benza izinto ngendlela efanelekileyo. Batshatana ngokwazana ukuba bathanda izinto zokomoya. UZekariya wayezenza ngokuthembeka izabelo zakhe njengombingeleli, yaye bobabini babewugcina umthetho kaThixo kangangoko babenokukwazi. Ngokuqinisekileyo zininzi izinto ababenokuba nombulelo ngazo. Kodwa ke, ukuba wawunokutyelela ikhaya labo kwaYuda, wawunokubona zisuka ukuba ikho into engahambi kakuhle. Babengenabantwana. UElizabhete wayeludlolo, yaye kubo bobabini yayisele ihambile iminyaka.—Luka 1:5-7.
6 Ukuba nabantwana kwakuxatyiswe kakhulu ngamaSirayeli amandulo, yaye ayeneentsapho ezinkulu. (1 Sam. 1:2, 6, 10; INdu. 128:3, 4) Ngaloo maxesha, indoda engumSirayeli yayinokwenza ubuqhophololo bokuqhawula umtshato nomfazi wayo ukuba akafumani bantwana. Kodwa uZekariya waqhubeka enyanisekile kuElizabhete. Yena nomfazi wakhe abazange bafune indlela elula yokuphuncula kumtshato wabo. Nangona ukungabi nabantwana kwakubenza buhlungu, baqhubeka bekhonza uYehova benyanisekile. Ekuhambeni kwexesha, uYehova wenza ummangaliso waza wabasikelela ngonyana nangona babaluphele.—Luka 1:8-14.
7. UElizabhete wazingqina njani ukuba wayenyanisekile kumyeni wakhe?
7 UElizabhete wanyaniseka nangenye indlela encomekayo. Ekuzalweni konyana wakhe, uYohane, uZekariya wohlwaywa ngokuba sisimumu ngenxa yokuthandabuza oko kwakuthethwa yingelosi kaThixo. Kodwa ke, kusenokwenzeka ukuba uZekariya wafumana indlela yokuxelela umfazi wakhe ukuba ingelosi kaYehova ithe igama lale nkwenkwe lifanele libe “nguYohane.” Abamelwane nezalamane babefuna ukuyithiya igama likayise. Kodwa uElizabhete wenza ngokolwalathiso lomyeni wakhe. Wathi: “Eneneni, akunjalo! Kodwa uza kubizwa ngokuba nguYohane.”—Luka 1:59-63.
8, 9. (a) Ukunyaniseka kwezibini kuwomeleza njani umtshato? (b) Ziziphi iindlela ezicacileyo indoda nomfazi abanokunyaniseka ngazo?
8 NjengoZekariya noElizabhete, izibini ezitshatileyo namhlanje zijamelana nezinto ezidimazayo nocelomngeni. Umtshato wabantu abanganyanisekanga awunakuphumelela. Ukuncwasa umntu ongatshatanga naye, ukubukela nokufunda amanyala, ukukrexeza, nezinye izinto eziwusongelayo umtshato zinokukuphelisa ukuthembana kubantu abatshatileyo. Xa izibini ezitshatileyo zingasathembani, uthando luyaphola. Ukunyaniseka kufana nocingo olubiyele ikhaya olukhusela intsapho kubantu abangamenywanga nakwiingozi. Ngoko ke, xa indoda nomfazi benyanisekile omnye komnye, banokuhlala kunye bekhuselekile baze baphalazelane iimbilini zabo, ibe oko kuya kubenza bathandane nangakumbi. Ukunyaniseka kubalulekile ngokwenene!
9 UYehova wathi kuAdam: “Indoda iya kumshiya uyise nonina, inamathele emfazini wayo.” (Gen. 2:24) Ithetha ukuthini loo nto? Ulwalamano obunalo nabahlobo kunye nezalamane lufanele lutshintshe. Amaqabane omtshato afanele achithe ixesha kunye yaye ngamnye anikel’ ingqalelo komnye. Akayi kubeka phambili abahlobo nezalamane ngoxa etyeshela amaqabane awo; akafanele kananjalo avumele abazali ukuba batshintshe izigqibo zawo okanye bangene kwiingxabano zawo. Isibini sifanele simanyane. Lulwalathiso lukaThixo olo.
10. Yintoni eya kunceda amaqabane omtshato ahlakulele ukunyaniseka?
10 Ukunyaniseka kunemiphumo emihle kwanakwiintsapho ezahluleleneyo ngonqulo. Omnye udade onomyeni ongakholwayo uthi: “Ndiyambulela uYehova ngokundifundisa indlela yokuthobela umyeni wam neyokumhlonela ngokunzulu. Ukusoloko ndinyanisekile kubangele ukuba sihlale sithandana yaye sihlonelana kangangeminyaka engama-47.” (1 Kor. 7:10, 11; 1 Pet. 3:1, 2) Ngoko ke, sebenzela ekubeni iqabane lakho likuthembe. Liqinisekise ngamazwi nangezenzo iqabane lakho ukuba lingoyena mntu ubalulekileyo kuwe phantsi kwelanga. Zama kangangoko kusemandleni akho ukuba ungavumeli nto okanye umntu ukuba angene phakathi kwenu. (Funda iMizekeliso 5:15-20.) URon noJeannette, abaneminyaka engaphezu kwama-35 betshatile, bathi, “Sonwabile yaye umtshato wethu uyaphumelela kuba senza konke uThixo afuna sikwenze ngokunyaniseka.”
Ukumanyana Kuyawomeleza Umtshato
11, 12. UAkwila noPrisila babesebenzisana njani (a) ekhaya, (b) kumsebenzi wokuziphilisa, (c) nakubulungiseleli bamaKristu?
11 Xa uPawulos wayethetha ngabahlobo bakhe uAkwila noPrisila, wayesoloko ebabiza bobabini. Esi sibini simanyeneyo singumzekelo omhle woko kwakuthethwa nguThixo xa wayesithi indoda nomfazi bafanele babe “nyama-nye.” (Gen. 2:24) Sasiwenza kunye umsebenzi wasekhaya, owokuziphilisa nobulungiseleli bamaKristu. Ngokomzekelo, xa uPawulos wafika okokuqala eKorinte, uAkwila noPrisila bammemela ekhayeni labo, awathi kamva walisebenzisa okwexeshana njengendawo awayefikela kuyo xa etyelele. Kamva, e-Efese, basebenzisa ikhaya labo njengendawo ekuqhutywa kuyo iintlanganiso zamaKristu yaye basebenza kunye ekuncedeni abantu abatsha, njengoApolo, ukuba baqonde inyaniso. (IZe. 18:2, 18-26) Emva koko esi sibini sikhutheleyo saya eRoma, ibe nalapho savula ikhaya laso ukuba kuqhutyelwe kulo iintlanganiso. Kamva, sabuyela e-Efese, someleza abazalwana.—Roma 16:3-5.
12 UAkwila noPrisila bakha basebenza noPawulos kumsebenzi wokuziphilisa ababewazi nabo wokwenza iintente. Kwakhona, sifumana esi sibini sisebenza kunye ngaphandle kokhuphiswano okanye usukuzwano. (IZe. 18:3) Ngokuqinisekileyo ke, ukwenza izinto zamaKristu kunye kwabangela ukuba umtshato waso womelele saza sonwaba. Enoba sasiseKorinte, e-Efese okanye eRoma, sasisaziwa ‘njengabasebenzi abangamadlelane kuKristu Yesu.’ (Roma 16:3) Sasisoloko siwenza kunye umsebenzi wokushumayela ngoBukumkani naphi na apho sasikhonza khona.
13, 14. (a) Ziziphi izinto ezinokubangela ukuba abantu abatshatileyo bangamanyani? (b) Ziziphi ezinye zezinto ezinokwenziwa zizibini ezitshatileyo ukuze ziqinise amaqhina azo njengabantu ‘abanyama-nye’?
13 Ngokwenene, ukusukela izinto ezifanayo, nokwenza izinto kunye, kuyawomeleza umtshato. (INtshu. 4:9, 10) Okubuhlungu kukuba, izibini ezitshatileyo ezininzi namhlanje azichithi xesha lininzi kunye. Zisebenza iiyure ezininzi kwimisebenzi yazo yokuziphilisa. Ezinye zihamba imigama emide xa ziphangela okanye zifudukele kwamanye amazwe zize zithumele imali ekhaya. Ukanti nasekhaya, amanye amaqabane omtshato akachithi xesha lininzi kunye ngenxa kamabonwakude, imidlalo, imidlalo yevidiyo okanye i-Intanethi. Ngaba kunjalo nakwintsapho yakho? Ukuba kunjalo, ngaba aninakuhlengahlengisa izinto ukuze nichithe ixesha elingakumbi kunye? Kutheni ningenzi kunye imisetyenzana enjengokulungiselela isidlo, ukuhlamba izitya okanye ukusebenza egadini? Ngaba aninakusebenza kunye xa ninyamekela abantwana okanye abazali abakhulileyo?
14 Okubaluleke nangakumbi, chithani ixesha rhoqo ekwenzeni izinto eziphathelele inkonzo kaYehova. Ukuxubusha itekisi yosuku kunye nokuba kunye kunqulo lwentsapho kuya kuninceda nicinge yaye nisukele izinto ezifanayo. Sebenzani kunye nasentsimini. Ukuba kunokwenzeka, zamani ukuba ngoovulindlela nobabini, enoba iimeko zenu zinivumela ukuba nenjenjalo inyanga enye okanye unyaka omnye. (Funda eyoku-1 kwabaseKorinte 15:58.) Omnye udade owathatha ubuvulindlela nomyeni wakhe uthi: “Ukuba sentsimini kwakusinceda ukuba sichithe ixesha kunye size sincokole. Ekubeni sobabini sasinosukelo olufanayo lokunceda abantu ngokomoya, ndandivakalelwa kukuba singamaphuthi ahlathi-nye. Ndaziva ndisondele kuye kungekhona njengomyeni wam kuphela kodwa nanjengomhlobo wam osenyongweni.” Njengoko nisukela kunye izinto ezibalulekileyo, izinto onomdla kuzo neziza kuqala kuwe, kunye nemikhwa yakho ziya kufana nezeqabane lakho de, njengoAkwila noPrisila, niye nicinga, nivakalelwa yaye nisenza izinto njengabantu ‘abanyama-nye.’
Vumela UThixo Akukhokele Emtshatweni Wakho
15. Yintoni enokwenza umtshato uphumelele? Cacisa.
15 UYesu wayekwazi ukubaluleka kokubeka uThixo kwindawo yokuqala emtshatweni. Wayekho xa uYehova wayetshatisa isibini sokuqala. Wayibona indlela uAdam noEva ababonwabe ngayo xa babethobela imiyalelo kaThixo waza wazibonela ngawakhe amehlo imiphumo yokungayithobeli. Ngoko xa uYesu wayefundisa abanye, wawuphinda umyalelo kaYise okwiGenesis 2:24. Kwakhona wongezelela la mazwi: “Oko uThixo akubophelele ngedyokhwe ndawonye makungahlukaniswa mntu.” (Mat. 19:6) Ngoko ke, ukumhlonela ngokunzulu uYehova kuseyeyona nto enokwenza umtshato uphumelele. Kule nkalo, abazali bakaYesu basemhlabeni, uYosefu noMariya, basimisela umzekelo obalaseleyo.
16. UYosefu noMariya bamvumela njani uThixo ukuba abakhokele kubomi bentsapho yabo?
16 UYosefu wayemphatha ngobubele nangentlonelo uMariya. Xa wafumanisa ukuba uMariya ukhulelwe, wayesele ezimisele ukumenzela inceba, kwanangaphambi kokuba ingelosi kaThixo imcacisele ngoko kwakwenzeke kuye. (Mat. 1:18-20) Njengesibini, bathobela ummiselo kaKesare yaye babebambelela ngokusondeleyo kuMthetho kaMoses. (Luka 2:1-5, 21, 22) Nangona yayingamadoda odwa ekwakufuneka ukuba aye kwimithendeleko emininzi eYerusalem, uYosefu noMariya kunye namanye amalungu entsapho babehamba kunye unyaka nonyaka. (Dut. 16:16; Luka 2:41) Ngale ndlela nangezinye, esi sibini soyika uThixo sazimisela ukumkholisa nokuhlonela izinto zokomoya. Ayimangalisi ke into yokuba uYehova wakhetha sona ukuba sikhulise uNyana wakhe xa wayesemhlabeni.
17, 18. (a) Ziziphi iindlela esinokuthi isibini sibeke ngazo ukhokelo lukaThixo kwindawo yokuqala kwintsapho yaso? (b) Sinokungenelwa njani ngokwenza oku?
17 Ngaba nakwintsapho yakho nikhokelwa nguThixo? Ngokomzekelo, xa nisenza izigqibo ezibalulekileyo, ngaba niqala ngokuphanda imigaqo yeBhayibhile, niwuthandazele loo mbandela nize nicele icebiso kumKristu okhulileyo ngokomoya? Okanye ngaba iingxaki zenu nizisombulula ngokulandela iimvakalelo zenu okanye ezezalamane nabahlobo? Ngama nizama ngandlela zonke ukusebenzisa amacebiso amaninzi asuka kuncwadi lwekhoboka elithembekileyo ngomtshato nangobomi bentsapho? Okanye ngaba niye nilandele izithethe zasekuhlaleni okanye amacebiso athandwayo avela kwimithombo yehlabathi? Ngaba niyathandaza nize nifunde kunye rhoqo, nizibekele usukelo lokomoya nize nithethe ngezinto eziza kuqala kwintsapho yenu?
18 Xa echaza iminyaka engama-50 bonwabile emtshatweni wabo, uRay uthi: “Ayikho ingxaki ekhe yasoyisa, kuba uYehova ebesoloko eyinxalenye ‘yentambo entlu-ntathu.’” (Funda iNtshumayeli 4:12.) UDanny noTrina bavumelana naye. Bathi: “Ekubeni besikhonza uThixo kunye, umtshato wethu uye womelela nangakumbi.” Baneminyaka engaphezu kwama-34 betshatile yaye bonwabile. Ukuba nisoloko nimbeka kwindawo yokuqala uYehova emtshatweni wenu, uya kuninceda niphumelele aze anisikelele ngentabalala.—INdu. 127:1.
Qhubeka Uhlonela Isipho SikaThixo
19. Kwakutheni ukuze uThixo alungiselele isipho esingumtshato?
19 Kubantu abaninzi namhlanje, eyona nto ibalulekileyo kukulungelwa kwabo. Kodwa umkhonzi kaYehova akaboni ngolo hlobo. Uyazi ukuba uThixo ulungiselele umtshato njengesipho sokufeza injongo Yakhe. (Gen. 1:26-28) Ukuba uAdam noEva babesihlonele eso sipho, umhlaba wonke ngewaba yiparadesi ezaliswe ngabakhonzi bakaThixo abonwabileyo nabangamalungisa.
20, 21. (a) Kutheni sifanele siwujonge njengongcwele umtshato? (b) Siza kufunda ngasiphi isipho kwiveki ezayo?
20 Ngaphezu kwako konke, abakhonzi bakaThixo bawugqala umtshato njengethuba lokuzukisa uYehova. (Funda eyoku-1 kwabaseKorinte 10:31.) Njengoko sibonile, ukunyaniseka, ukumanyana, nokukhokelwa nguThixo kuyawomeleza umtshato. Ngoko ke, enoba silungiselela ukutshata, someleza umtshato okanye sizama ukuwusindisa, simele sijonge umtshato ngale ndlela uyiyo: ilungiselelo likaThixo elingcwele. Ukuhlala sicinga ngaloo nto kuya kusinceda ukuba xa sisenza izigqibo emtshatweni sizisekele kwiLizwi likaThixo. Xa sisenjenjalo asiyi kwanela ukuhlonela isipho somtshato kuphela, kodwa siya kuhlonela noMniki weso sipho, uYehova uThixo.
21 Kakade ke, asingomtshato kuphela isipho esisinikwe nguYehova; kananjalo asinguwo wodwa onokusenza sonwabe ebomini. Kwinqaku elilandelayo, siza kufunda ngesiphiwo esixabisekileyo esivela kuThixo—isiphiwo sokungatshati.
Ubuya Kuphendula Uthini?
• Ukunyaniseka kumele kube nayiphi impembelelo kumaKristu atshatileyo?
• Kutheni ukwenza izinto ngomanyano kuwomeleza umtshato?
• Ziziphi iindlela abantu abatshatileyo abanokuvumela ngazo uThixo abakhokele?
• Sinokubonisa njani ukuba siyamhlonela uYehova, uMsunguli womtshato?
[Imifanekiso ekwiphepha 15]
Ukwenza izinto kunye kunceda izibini ukuba zihlale zimanyene