Ngaba Ukuthiyile Ukuchas’ Umthetho?

“[UYesu] wakuthiya ukuchas’ umthetho.”—HEB. 1:9.

1. Yintoni eyafundiswa nguYesu ngothando?

EGXININISA ukubaluleka kothando, uYesu Kristu waxelela abafundi bakhe oku: “Ndininika umyalelo omtsha, wokuba nithandane; kanye njengoko ndinithandileyo mna, ukuba nani nithandane. Ngako oko bonke baya kwazi ukuba ningabafundi bam, ukuba ninothando phakathi kwenu.” (Yoh. 13:34, 35) UYesu wayalela abalandeli bakhe ukuba babe nothando oluqhutywa kukuzincama omnye komnye. Babeya kubonwa ngolo thando. UYesu wababongoza nangala mazwi: “Qhubekani nizithanda iintshaba zenu, nibathandazele abo banitshutshisayo.”—Mat. 5:44.

2. Yintoni abafanele bazame ukuyithiya abalandeli bakaKristu?

² Noko ke, ukongezelela ekufundiseni abafundi bakhe ngothando, uYesu wabafundisa nangezinto ababemele bazithiye. Kwathethwa la mazwi ngoYesu: “Wabuthanda ubulungisa, waza wakuthiya ukuchas’ umthetho [ubungendawo].” (Heb. 1:9; INdu. 45:7) Oku kubonisa ukuba asimele sithande ubulungisa kuphela kodwa sifanele sikuthiye ukona, okanye ukuchas’ umthetho. Nompostile uYohane wathetha la mazwi: “Bonke abasenzayo isono benza okuchasene nomthetho, ngoko ke isono sikukuchas’ umthetho.”—1 Yoh. 3:4.

3. Ngokuphathelele ukuthiya ukuchas’ umthetho, ziziphi iinkalo zobomi eziza kuxutyushwa kweli nqaku?

³ Ngoko ke, njengamaKristu sifanele sizibuze, ‘Ngaba ndikuthiyile ukuchas’ umthetho?’ Makhe sixubushe indlela esinokubonisa ngayo ukuba sikuthiyile okubi kwezi nkalo zine zobomi: (1) kwindlela esikujonga ngayo ukusebenzisa kakubi utywala, (2) kwindlela esibujonga ngayo ubugqi, (3) kwindlela esikujonga ngayo ukuziphatha okubi, (4) nakwindlela esibajonga ngayo abo bathanda ukuchas’ umthetho.

Musa Ukuba Likhoboka Lotywala

4. Kwakutheni ukuze uYesu abe nenkululeko yokuthetha xa wayelumkisa abantu ngokusela ngokugqithiseleyo?

⁴ UYesu wayekhe ayisele iwayini, eyigqala njengesipho esivela kuThixo. (INdu. 104:14, 15) Kodwa ke akazange asisebenzise kakubi esi sipho ngokusela ngokugqithiseleyo. (IMize. 23:29-33) Ngenxa yoko waba nenkululeko yokuthetha xa wayeluleka abantu ngalo mba. (Funda uLuka 21:34.) Ukusebenzisa kakubi utywala kunokukhokelela nakwezinye izono ezinzulu. Ngenxa yoko umpostile uPawulos wabhala wathi: “Musani ukunxila yiwayini, ekukho kuko uburheletyo, kodwa hlalani nizaliswa ngumoya.” (Efe. 5:18) Wabongoza nabafazi abakhulileyo ebandleni ukuba “bangakhotyokiswa yiwayini eninzi.”—Tito 2:3.

5. Yiyiphi imibuzo abanokuzibuza yona abo bakhetha ukusela utywala?

⁵ Ukuba ukhetha ukubusela utywala, ufanele uzibuze: ‘Ngaba ndinesimo sengqondo esifana nesikaYesu ngokusela ngokugqithiseleyo? Xa kunokufuneka ndiluleke abanye ngalo mba, ngaba ndinokuba nenkululeko yokuthetha? Ngaba ndisela ngenjongo yokucim’ iintsizi okanye ukuthomalalisa uxinezeleko? Bungakanani utywala endibusela veki nganye? Ndisabela njani xa kukho umntu ondichazela ukuba ingathi ndisela kakhulu? Ngaba ndiye ndizithethelele okanye ndide ndiqumbe?’ Ukuzivumela ukuba sibe ngamakhoboka otywala kunokusenza singaqiqi kakuhle size senze izigqibo ezingebobulumko. Abalandeli bakaKristu bazama ukukhusela amandla abo engqondo.—IMize. 3:21, 22.

Kuphephe Ukusebenzisa Ubugqi

6, 7. (a) UYesu wamchasa njani uSathana needemon zakhe? (b) Kutheni abantu bebuthanda kangaka ubugqi namhlanje?

⁶ Xa wayesemhlabeni, uYesu wamchasa ngokupheleleyo uSathana needemon zakhe. Wayikhaba imizamo kaSathana yokuhlasela ukunyaniseka kwakhe. (Luka 4:1-13) Kwakhona wayibona waza wayixhathisa imizamo yakhe efihlakeleyo yokuphembelela indlela awayecinga nawayesenza ngayo izinto. (Mat. 16:21-23) UYesu wanceda abo babefaneleka ukuba baphuncule ekulawulweni ngenkohlakalo ziidemon.—Marko 5:2, 8, 12-15; 9:20, 25-27.

⁷ Emva kokuba uYesu ebekwe etroneni njengoKumkani ngowe-1914, wayishenxisa impembelelo eyonakalisayo kaSathana needemon zakhe. Ngenxa yoko, uSathana uzimisele nangakumbi ngoku ‘ukulahlekisa umhlaba omiweyo uphela.’ (ISityhi. 12:9, 10) Ngoko akufanele kusimangalise ukuba abantu baye bebuthanda ubugqi. Yintoni esinokuyenza ukuze sizikhusele?

8. Yintoni esifanele sizihlole kuyo ngokuphathelele indlela esikhetha ukuzonwabisa ngayo?

⁸ IBhayibhile ilumkisa ngokucacileyo ngeengozi ezinxibelelene nokusebenzelana nemimoya. (Funda iDuteronomi 18:10-12.) Namhlanje, uSathana needemon zakhe baphembelela indlela abantu abacinga ngayo besebenzisa iimovie, iincwadi, nemidlalo ye-elektroniki ekhuthaza ubugqi. Ngoko ke, xa sikhetha iindlela zokuzonwabisa, ngamnye wethu ufanele azibuze: ‘Kwezi nyanga zidluleyo, ngaba ndiye ndakhetha ukuzonwabisa ngeemovie, iinkqubo zikamabonwakude, imidlalo ye-elektroniki, iincwadi okanye amabali ahlekisayo anobugqi? Ngaba ndiyakuqonda ukubaluleka kokuchasa iimpembelelo zobugqi, okanye ngaba ndibubetha ngoyaba ubungozi bazo? Ngaba ndikhe ndacinga ngendlela uYehova avakalelwa ngayo ngendlela endikhetha ukuzonwabisa ngayo? Ukuba bendisele ndizivumele ezi mpembelelo zikaSathana zangena kubomi bam, ngaba ukuthanda kwam uYehova nemigaqo yakhe yobulungisa kuya kundiqhubela ekubeni ndithathe amanyathelo acacileyo ndize ndizichase?’—IZe. 19:19, 20.

Siphulaphule Isilumkiso SikaYesu Ngokuziphatha Okubi

9. Umntu unokukuthanda njani ukuchas’ umthetho?

⁹ UYesu wayigcina imilinganiselo kaYehova yokuziphatha ngokwesini. Wathi: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’? Ngako oko abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungahlukaniswa mntu.” (Mat. 19:4-6) UYesu wayesazi ukuba izinto esizibonayo zichaphazela iintliziyo zethu. Ngoko, kwiNtshumayelo yaseNtabeni, wathi: “Nivile ukuba kwathiwa, ‘Uze ungakrexezi.’ Kodwa mna ndithi kuni wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mat. 5:27, 28) Abo basigatyayo isilumkiso sikaYesu enyanisweni bathanda ukuchas’ umthetho.

10. Balisa amava abonisa ukuba umntu unako ukwahlukana nokubukela amanyala.

¹⁰ USathana ukhuthaza ukuziphatha okubi ngokwesini esebenzisa ukubukela amanyala. Le nkqubo yezinto izaliswe ngamanyala. Abo babukela amanyala bakufumanisa kunzima ukususa imifanekiso engcolileyo kwiingqondo zabo. Banokude babe ngamakhoboka okubukela amanyala. Khawucinge ngoko kwenzeka komnye umKristu. Uthi: “Ndandidla ngokubukela amanyala xa ndingabonwa mntu. Ndandiba kwelinye ilizwe lasemaphupheni apho ndandiye ndizilibale ukuba ndingumkhonzi kaYehova. Ndandisazi ukuba iphosakele le nto kodwa ke ndizixelele ukuba inkonzo endiyinikela kuThixo yamkelekile.” Yintoni eyatshintsha indlela awayecinga ngayo lo mzalwana? Uthi: “Ndagqiba kwelokuba ndixelele abadala ngengxaki yam, nangona kwakuyeyona nto inzima kwendakha ndazenza.” Ekugqibeleni lo mzalwana wahlukana nalo mkhwa uthob’ isidima. Uthi: “Emva kokuba ndibucocile ubomi bam, ekugqibeleni ndaziva ndinesazela esicoceke ngokwenene.” Abo bakuthiyileyo ukuchas’ umthetho bamele bafunde ukuthiya ukubukela amanyala.

11, 12. Sinokukuthiya njani ukuchas’ umthetho xa sikhetha umculo?

¹¹ Umculo kunye namazwi awo unokuba nempembelelo enkulu kwiimvakalelo zethu, uze ngaloo ndlela, uphembelele nentliziyo yethu yomfuziselo. Umculo usisipho esivela kuThixo yaye kudala waba nendawo yawo kunqulo lwenene. (Eks. 15:20, 21; Efe. 5:19) Kodwa ihlabathi elingendawo likaSathana likhuthaza umculo ozukisa ukuziphatha okubi. (1 Yoh. 5:19) Unokwazi njani ukuba umculo owuphulaphulayo uyakungcolisa okanye akunjalo?

¹² Unokuqala ngokuzibuza: ‘Ngaba iingoma endiziphulaphulayo zizukisa ukubulala, ukukrexeza, ukuhenyuza nokutshabhisa? Ukuba amazwi eengoma ezithile bendinokuwafundela omnye umntu, ngaba ebeya kucinga ukuba ndikuthiyile ukuchas’ umthetho, okanye ngaba loo mazwi ebeya kubonisa ukuba intliziyo yam ingcolile?’ Asinakukwazi kaloku ukuthiya ukuchas’ umthetho size kwelinye icala sikuzukise ngeengoma. UYesu wathi: “Izinto eziphuma emlonyeni ziphuma entliziyweni, kwaye ezo zinto zimenza inqambi umntu. Ngokomzekelo, entliziyweni kuphuma iingcinga ezingendawo, ukubulala, ukukrexeza, uhenyuzo, ubusela, ubungqina bobuxoki, izinyeliso.”—Mat. 15:18, 19; thelekisa uYakobi 3:10, 11.

Bajonge Ngendlela UYesu Abajonga Ngayo Abo Bathanda Ukuchas’ Umthetho

13. UYesu wayebajonga njani abo babeqaqadekile ngenxa yesono?

¹³ UYesu wathi wayeze kubizela enguqukweni aboni, okanye abo babechase umthetho. (Luka 5:30-32) Noko ke, wayebajonga njani abo babeqaqadekile ngenxa yesono? UYesu walumkisa ngokuqatha nxamnye nokuphenjelelwa ngabantu abanjalo. (Mat. 23:15, 23-26) Kwakhona wathi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena. Abaninzi baya kuthi kum ngaloo mini [xa uThixo egweba], ‘Nkosi, Nkosi, asizange na siprofete egameni lakho, sakhupha iidemon egameni lakho, senza imisebenzi emininzi yamandla egameni lakho?’” Noko ke, uya kubakhanyela abo bebesenza okuchasene nomthetho bengaguquki, esithi: “Mkani kum.” (Mat. 7:21-23) Kutheni eza kubanika eso sigwebo nje? Kungenxa yokuba ukuchas’ umthetho kwabo bantu kulihlazo kuThixo kwaye kwenzakalisa nabanye abantu.

14. Kutheni aboni abangaguqukiyo besuswa ebandleni?

¹⁴ ILizwi likaThixo liyalela ukuba aboni abangaguqukiyo basuswe ebandleni. (Funda eyoku-1 kwabaseKorinte 5:9-13.) Ubuncinane kukho izizathu ezithathu zokuba kube yimfuneko oku: (1) ukuze igama likaYehova linganyeliswa, (2) ukukhusela ibandla kwimpembelelo embi, kunye (3) nokunceda aboni ukuba baguquke ukuba kunokwenzeka.

15. Yiyiphi imibuzo esifanele sizibuze yona ukuba sifuna ukunyaniseka kuYehova?

¹⁵ Ngaba ubajonga ngendlela uYesu abajonga ngayo abo bazimisele ukuphila ngokuchas’ umthetho? Simele sicinge ngale mibuzo: ‘Ngaba bendiya kukhetha ukunxulumana nomntu osusiweyo kubudlelane okanye ozahluleyo kwibandla lamaKristu? Kuthekani ukuba loo mntu sisalamane esisondeleyo esingasahlali ekhaya?’ Imeko enjalo inokuluvavanya ngokwenene uthando nokunyaniseka kwethu kuThixo.a

16, 17. Yiyiphi ingxaki awayejongene nayo omnye umama ongumKristu, yaye yintoni eyamncedayo ukuba axhase ilungiselelo lokubasusa kubudlelane aboni abangaguqukiyo?

¹⁶ Khawucinge ngala mava odade owayenonyana omdala nowayekhe ngaxa lithile wamthanda uYehova. Noko ke, kamva waye wenza okuchasene nomthetho waza akaguquka. Ngenxa yoko wasuswa kubudlelane bebandla. Udadewethu wayemthanda uYehova, kodwa ke nonyana wakhe wayemthanda kwaye wakufumanisa kunzima kakhulu ukusebenzisa umyalelo weZibhalo owawusithi akuphephe ukunxulumana naye.

¹⁷ Ngewawumcebise ngelithini lo dade? Omnye umdala wamnceda ukuba abone ukuba uYehova wayeyiqonda intlungu awayekuyo. Lo mzalwana wathi makacinge ngentlungu amele ukuba wayekuyo uYehova xa abanye boonyana bakhe abaziingelosi bavukelayo. Lo mdala waqiqa naye esithi nangona uYehova eyazi indlela ekubuhlungu ngayo ukuba kuloo meko, ufuna ukuba aboni abangaguqukiyo basuswe kubudlelane. Wazamkela ezo zikhumbuzo waza walixhasa ngokunyaniseka ilungiselelo lokususa kubudlelane.b Ukunyaniseka okunjalo kuyayivuyisa intliziyo kaYehova.—IMize. 27:11.

18, 19. (a) Ukuyeka ukunxulumana nomntu owenza okuchasene nomthetho kungqina ukuba sithiye ntoni? (b) Unokuba yintoni umphumo xa sinyaniseke kuThixo nakwilungiselelo lakhe?

¹⁸ Ukuba unengxaki efanayo, khumbula ukuba uYehova uyavelana nawe. Xa uyeka ukunxulumana nomntu osusiweyo okanye ozahluleyo, uyabonisa ukuba usithiyile isimo sengqondo nezenzo eziye zakhokelela ekubeni asuswe. Noko ke, ukwabonisa nokuba uyamthanda umoni yaye ufuna ukwenza oko kuya kuba luncedo kuye. Ukunyaniseka kwakho kuYehova kuya kuwandisa amathuba okuba lowo uqeqeshwayo aguquke kwaye abuyele kuYehova.

¹⁹ Omnye umntu owayekhe wasuswa kubudlelane waza wabuyiselwa kamva wabhala wathi: “Ndiyavuya kuba uYehova ebathanda abantu bakhe kangangokuba aqiniseke ukuba intlangano yakhe igcinwa icocekile. Nangona le nto ibonakala ingqwabalala kubantu bangaphandle, iyimfuneko kwaye isisenzo sothando.” Ngaba lo mntu ngewayencedwe wada wafikelela kweso sigqibo ukuba amalungu ebandla, kuquka nentsapho yakhe, ayeqhubeke enxulumana naye ngoxa wayesusiwe kubudlelane? Ukuxhasa kwethu ilungiselelo lokususa kubudlelane kungqina ukuba sithanda ubulungisa kwaye siyayamkela into yokuba uYehova unelungelo lokubeka imilinganiselo yokuziphatha.

“Kuthiyeni Okubi”

20, 21. Kutheni kubalulekile ukufunda ukuthiya ukuchas’ umthetho?

²⁰ Umpostile uPetros ulumkisa athi: “Hlalani nithe qwa, nilindile.” Ngoba? Ngenxa yokuba “utshaba lwenu, uMtyholi, luhambahamba njengengonyama egqumayo, efuna ubani engamqwengayo.” (1 Pet. 5:8) Ngaba iya kuba nguwe oqwengwayo? Impendulo ixhomekeke ekubeni ukuthiye kangakanani ukuchas’ umthetho.

²¹ Ukuthiya okubi akuyondlwan’ iyanetha. Sizalelwe esonweni, kwaye siphila kwihlabathi elikhuthaza ukwanelisa inkanuko yenyama. (1 Yoh. 2:15-17) Noko ke, ukuba sixelisa uYesu Kristu kwaye simthanda kakhulu uYehova uThixo, sinokukwazi ukukuthiya ukuchas’ umthetho. Masizimisele ke, ‘ukuthiya okubi,’ siqinisekile ukuba uYehova ‘uyabalinda abanyanisekileyo bakhe; uyabahlangula esandleni sabangendawo.’—INdu. 97:10.

[Imibhalo esemazantsi]

Ubunokuphendula Uthini?

• Yintoni eya kusinceda sihlole indlela esibujonga ngayo utywala?

• Ngawaphi amanyathelo esinokuwathatha ukuze siphephe ubugqi?

• Kutheni ukubukela amanyala kuyingozi?

• Sibonisa njani ukuba sikuthiyile ukuchas’ umthetho xa isalamane okanye umhlobo esusiwe kubudlelane?

[Umfanekiso okwiphepha 29]

Ukuba ukhetha ukusela utywala, yintoni ofanele ucinge ngayo?

[Umfanekiso okwiphepha 30]

Yilumkele impembelelo kaSathana xa uzonwabisa

[Umfanekiso okwiphepha 31]

Umntu obukela amanyala uthanda ntoni?