Abaphumelele EGiliyadi Bafumana ‘Uyolo Olungakumbi Lokupha’

NGECAWA, ngoMatshi 6, 1994, intsapho yaseBheteli kwikomkhulu lehlabathi lamaNgqina kaYehova yahlanganisana kunye neendwendwe kwisihlandlo esonwabisayo—ukuvuyisana nabaphumelele kwiklasi yama-96 yeSikolo seBhayibhile seWatchtower saseGiliyadi. Kumagqabaza akhe okuvula, usihlalo wocwangciso uKarl F. Klein, obekhonza kwiQumrhu Elilawulayo lamaNgqina kaYehova iminyaka enokuba ngamashumi amabini, waxelela abafundi abangama-46 oku: “UYesu wathi ukupha kunoyolo ngaphezu kokuphiwa. Kuza kuba njalo kwisabelo senu sobuvangeli basemazweni—okukhona nisipha, kokukhona niya kuba noyolo.”—IZenzo 20:35.

Isiluleko Sokuthi Ndlela-ntle

Kwalandela ungcelele lweentetho ezanikelwa kubafundi. ULeon Weaver, ilungu leKomiti yeSebe leNkonzo, wathetha ngomxholo othi “Ukunyamezela Kuyamzukisa UYehova.” Sonke sijamelana nezilingo. (2 Korinte 6:3-5) Umzalwan’ uWeaver wathi: “Xa sisengxakini, kulula gqitha ukuthembela kwiziqu zethu.” Noko ke, wabakhumbuza oku abo bafundi: “Nasiphi na isilingo esiqhelekileyo ebantwini enimele nijamelane naso, uYehova unomdla kuso. Akasayi kunivumela nilingwe ngaphezu koko ninokukuthwala.”—1 Korinte 10:13.

ULyman Swingle weQumrhu Elilawulayo wanikela intetho elandelayo enomxholo othi: “Hlalani Nisixabisa Isabelo Senu.” AmaSirayeli ayengasoloko ekhetha indawo awayeza kuhlala kuyo nento awayeza kuyenza. Hlanga ngalunye lwalwabelwe inxalenye yomhlaba, yaye abaLevi bababelwe imisebenzi ekhethekileyo ababemele bayenze. Ngokufanayo, abaninzi abakwinkonzo ekhethekileyo yexesha elizeleyo namhlanje—njengabavangeli basemazweni namalungu entsapho yaseBheteli—abazigqibeli ngendawo abaza kuhlala kuyo nomsebenzi abaza kuwenza. Kuthekani ukuba ubani uyasithandabuza isabelo sakhe? UMzalwan’ uSwingle wathi: “Ukuba nisa amehlo enu kuMgqibelelisi wokholo lwethu, uYesu, nize niwuhlolisise ngokusondeleyo umzekelo wakhe, aniyi kunikezela.”—Hebhere 12:2, 3.

ULeonard Pearson, weKomiti yeeFama zeWatchtower, walandela ngombandela othi “Hlalani Ninikele Ingqalelo.” Wathi: “Unokuba neyona khamera isemagqabini, eyona nto intle onokuyifota, nendawo entle uze sekunjalo ufumane imiphumo emibi—ukuba ikhamera yakho akuyilungelelanisanga kakuhle.” Njengesilanga esibonisa indawo ebanzi, imbono yethu imele iquke ukushumayela okwenziwa ehlabathini lonke. Asifanele silibale ngalo mfanekiso mkhulu. UMzalwan’ uPearson wathi: “Abo banikel’ ingqalelo kwiziqu zabo abayi konwaba kwizabelo zabo. Abo banikel’ ingqalelo kuYehova nakumsebenzi abanike ukuba bawenze baya kuphumelela.”

UJohn E. Barr, elinye ilungu leQumrhu Elilawulayo, wanikela intetho elandelayo enomxholo othi, “Zininzi Gqitha Izinto Esinokuba Nombulelo Ngazo.” UMzalwan’ uBarr wababongoza abafundi wathi: “Ningaze niphelelwe yimvakalelo yokuba nombulelo kuYehova. Lowo ngomnye wemithombo emikhulu yolwaneliseko, singakhathaliseki isabelo eninaso.” Isimo sengqondo sokuba nombulelo sashukumisela uDavide ukuba abhale oku: “Amacandelo andiwele ezindaweni ezimnandi; Hee! Ndide ndaba nelifa elihle.” (INdumiso 16:6) UMzalwan’ uBarr wathi: “Ninelifa elixabiseke ngokwenene lokuziva nisondele kuYehova kubomi benu bemihla ngemihla. UYehova akasoze aluphelise olo lwalamano lwenu ukuba nje nihlala nilujonga njengento entle ngokwenene eninombulelo ngayo.”

Umhlohli waseGiliyadi uJack Redford wala-ndela ngomxholo othi, “Niya Kulusebenzisa Njani Ulwimi Lwenu?” Onjani wona umonakalo onokubangelwa yintetho engacingisiswanga! (IMizekeliso 18:21) Lunokulawulwa njani ulwimi? UMzalwan’ uRedford waphendula: “Okokuqala nimele nilawule ingqondo yenu kuba ulwimi lutyhila oko kusengqondweni nokusentliziyweni.” (Mateyu 12:34-37) UYesu wamisela umzekelo obalaseleyo; ulwimi lwakhe wayelusebenzisela ukudumisa igama likaYehova. UMzalwan’ uRedford wayixelela oku le klasi: “Namhlanje kukho indlala yokuva amazwi kaYehova. Niyawazi loo mazwi. ‘Ninolwimi lwabafundileyo.’ Ngoko ngalo lonke ixesha ulwimi lwenu malulawulwe yingqondo nayintliziyo ezinikele ngokupheleleyo kuYehova.”—Isaya 50:4.

Ukubaluleka komthandazo kwabalaseliswa kwintetho ethi “Ngaba Uhamba Ngokunga Ukunye NoYehova?” U-Ulysses Glass, owamkela abafundi kwesi sikolo, wathi: “Ukuba ubawo usebenza nzima ukuze axhase intsapho yakhe kodwa akaze athethe nayo yaye akaze avakalise amazwi othando, intsapho yakhe ibisenokugqiba kwelokuba wenza umsebenzi angawuthandiyo akashukunyiswa luthando. Kunjalo ke nakuthi. Sisenokuba sixakekile enkonzweni kaThixo. Kodwa ukuba asithandazi, ngoko kuphela sizinikele emsebenzini kunokuzinikela kuBawo wasezulwini onothando.”

UTheodore Jaracz, weQumrhu Elilawulayo, wathetha ngomxholo othi “Isizathu Sokuba Izihlwele Zinxulumana Nabantu BakaThixo.” Nyaka ngamnye amakhulu amawaka ayathontelana ukuza kwintlangano kaYehova. (Zekariya 8:23) Yintoni ephawula ukuba amaNgqina kaYehova angabantu bakaThixo? Okokuqala, amkela iBhayibhile iphela njengeLizwi likaThixo. (2 Timoti 3:16) Okwesibini, akathabathi cala kwezobupolitika. (Yohane 17:16) Okwesithathu, anikel’ ubungqina ngegama likaThixo. (Yohane 17:26) Okwesine, abonakalisa uthando lokuzincama. (Yohane 13:35; 15:13) Ngezi mpawu, ngenkalipho ‘sinokuvakalisa isidima salowo wasibizayo ukuba siphume ebumnyameni, singene ekukhanyeni kwakhe okungummangaliso.’—1 Petros 2:9.

Emva kwezi ntetho zichukumisayo, bonke abo bafundi bangama-46 bafumana iziqinisekiso. Babelwe kumazwe ali-16 asehlabathini lonke.

Ucwangciso Olunezinto Ezahlukeneyo Lwasemva Kwemini

Emva kwemini uDonald Krebs weKomiti yaseBheteli wenza ushwankathelo lweSifundo seMboniselo. Kwandula ke abaphumeleleyo banikela ucwangciso olunomxholo othi ‘Ubulumko Buvakalisa Izwi Labo Ezitratweni.’ (IMizekeliso 1:20) Baphinda amava anik’ umvuzo ababewafumene kubungqina basesitratweni nakwimimandla yamashishini. Ngokwenene, uYehova uyabasikelela abo banenkalipho yokushumayela ngokungacwangciswanga. Omnye wabaphumeleleyo wathi: “Ndithanda ukucinga ngathi njengeerhengqe ezandleni zabavuni abazizithunywa zezulu. Okukhona ubuchule bethu busiba bukhali, kokukhona ezo zithunywa zezulu ziya kusisebenzisela umsebenzi ongakumbi.” (Thelekisa ISityhilelo 14:6.) Kwakhona ucwangciso lwabafundi lwaquka umboniso weeslides owathabatha ababukeli baya kutsho kukhenketho olufundisayo lwaseBolivia, eMalta naseTaiwan—amazwe amathathu abathunyelwe kuwo abaphumelele kule klasi.

Emva koko, uWallace noJane Liverance—ababengabavangeli kangangeminyaka eli-17—kwadliwana iindlebe kunye nabo. Ngo-Oktobha 1993 bamenyelwa kwiiFama zeWatchtower, apho ngoku uMzalwan’ uLiverance akhonza njengomnye wabahlohli baseGiliyadi.

Kwalandela umdlalo onemiboniso emine, onomxholo othi “Ukubeka Abo Bafanelekayo Kwiminyaka Yabo Yokwaluphala.” Njengoko abantu besiya bekhula, uloyiko lokuba ngabangeloncedo nelokushiywa lusenokukukhathaza ukuzithemba kwabo. (INdumiso 71:9) Lo mdlalo uchukumisayo wabonisa indlela bonke ebandleni abanokubaxhasa ngayo abalupheleyo abathembekileyo.

Emva kwengoma nomthandazo wokuqukumbela, bonke abangama-6 220 ababekho kwiHolo yeNdibano yesiXeko saseJersey nakwiiholo ezazinxityelelaniswe nayo baziva behlaziyekile. Sithandazela abaphumeleleyo kwizabelo zabo ezitsha. Kwanga bangaqhubeka befumana uyolo olungakumbi lokupha.

[Ibhokisi ekwiphepha 26]

Inkcazelo Engabafundi

Inani lamazwe abavela kuwo: 9

Inani lamazwe ababelwe kuwo: 16

Inani labafundi: 46

Umlinganiselo wobudala: 33,85

Umlinganiselo weminyaka besenyanisweni: 16,6

Umlinganiselo weminyaka bekubulungiseleli bexesha elizeleyo: 12,2

[Ibhokisi ekwiphepha 27]

Ukunikela Ingqalelo Ekhethekileyo EMalta

KANGANGEMINYAKA emininzi iNgqobhoko yayivala inyaniso yeBhayibhile eMalta. Abavangeli basemazweni baseGiliyadi bokugqibela abathunyelwa apho, uFrederick Smedley noPeter Bridle, babephumelele kwiklasi yesibhozo emva phayaa ngowe-1947. Noko ke, kungekudala befikile eMalta babanjwa baza banikwa uphum’ aphele. I-1948 Yearbook of Jehovah’s Witnesses inikela le ngxelo: “Aba bavangeli basemazweni babini bachithe ixesha elininzi ngakumbi ezinkundleni naphambi kwabaphathi belo lizwe kunokuba baye benjenjalo ekwenzeni imisebenzi yabo yobulungiseleli, ngenxa yenkcaso yeeNkokeli zamaRoma Katolika. Abefundisi bathi iMalta yeyamaKatolika yaye nabani na omnye umele aphum’ aphele.” Ngoku, kwiminyaka engama-45 kamva, abavangeli basemazweni abasuka kwiklasi yama-96 yaseGiliyadi babelwe eMalta.

[Umfanekiso okwiphepha 26]

Abaphumelele Kwiklasi Yama-96 YeSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kwabangasemva yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.