Imibuzo Evela Kubafundi

Simele siyiqonde njani ingxelo yenkonzo yonyaka?

Nyaka ngamnye, sijonga phambili kwingxelo yenkonzo epapashwa kwiNcwadi Yonyaka. Kuyavuyisa ukubona oko abantu bakaYehova njengeqela abakuphumezileyo kumsebenzi wokushumayela nokufundisa ngoBukumkani owenziwa ehlabathini lonke. Kodwa ukuze singenelwe ngakumbi kuloo ngxelo, simele siyiqonde ngokuchanileyo size sibe nembono elungeleleneyo ngamanani ayo. Cinga ngale mizekelo imbalwa.

Unyaka wenkonzo. Le ngxelo isusela kuSeptemba womnye unyaka ukuya kuAgasti wonyaka olandelayo. INcwadi Yonyaka iba neengxelo zonyaka wenkonzo odluleyo. Ngaloo ndlela, iNcwadi Yonyaka Yowama-2011 iqulethe iingxelo zonyaka wenkonzo wama-2010, ezisusela kuSeptemba 1, 2009, ukuya kutsho kuAgasti 31, 2010.

Incopho yabavakalisi nomlinganiselo wabavakalisi. “Abavakalisi” baquka amaNgqina kaYehova abhaptiziweyo kuquka nangabhaptizwanga akufanelekayo ukushumayela ngoBukumkani. “Incopho yabavakalisi” linani eliphakamileyo labantu abafake ingxelo yayo nayiphi na inyanga yonyaka wenkonzo yaye inokuquka neengxelo ezifike mva zaza azafakwa kwingxelo yenyanga edluleyo. Ngale ndlela abanye abavakalisi banokubalwa kabini. Kodwa ke, inani eliyincopho aliquki inani labavakalisi abebenenxaxheba entsimini kodwa balibala ukufaka ingxelo. Le nto igxininisa ukubaluleka kokuba mvakalisi ngamnye emele afake ingxelo yakhe nyanga nganye. “Umlinganiselo wabavakalisi” linani nje labantu abahlukahlukeneyo abafaka ingxelo yentsimi nyanga nganye.

Isimbuku seeyure. Ngokutsho kweNcwadi Yonyaka Yowama-2011, amaNgqina kaYehova achithe iiyure ezingaphezu kweebhiliyoni ezisisi-1,6 entsimini. Noko ke, eli nani alibhekiseli kuzo zonke iiyure esizichitha kunqulo lwethu, kuba aliquki ixesha esilichitha kwimisebenzi efana nokwalusa, ukuya ezintlanganisweni nesifundo seBhayibhile sobuqu nokucamngca.

Imali esetyenzisiweyo. Ebudeni bonyaka wenkonzo wama-2010, amaNgqina kaYehova achithe imali engaphezu kwe-R1 bhiliyoni enyamekela oovulindlela abakhethekileyo, abavangeli basemazweni nabaveleli abahambahambayo kwizabelo zabo zasentsimini. Noko ke, le mali ayiquki imali yokushicilelwa kweempapasho ezisekelwe eBhayibhileni; yaye ayiquki imali esetyenziselwe ukunyamekela amatsha-ntliziyo aseBheteli angaphezu kwama-20 000 akuwo onke amasebe ehlabathini jikelele.

Abathabathileyo eSikhumbuzweni. Eli linani labantu ababhaptiziweyo abathabatha imifuziselo eSikhumbuzweni ehlabathini lonke. Ngaba eli nani limela inani labathanjiswa abasemhlabeni? Akunjalo. Kukho izinto ezibandakanyekileyo—kuquka iinkolelo zonqulo umntu abe nazo ngaphambili okanye ukungaphili kakuhle engqondweni okanye ukuphazamiseka ngokweemvakalelo—nto ezo ezisenokubenza abanye bacinge ukuba banobizo lwasezulwini. Ngenxa yoko, asinakulazi inani elingqalileyo labathanjiswa abasemhlabeni, ibe ayifuni thina loo nto. IQumrhu Elilawulayo aligcini ludwe lwabantu abathabathayo, kuba alinxibelelani nabo bonke abathanjiswa abasemhlabeni.a

Into esiyaziyo kukuba xa kukhululwa imimoya etshabalalisayo yembandezelo enkulu, aya kuba esekho amanye “amakhoboka oThixo wethu” athanjisiweyo emhlabeni. (ISityhi. 7:1-3) Kude kube lelo xesha, abathanjiswa baya kukhokela kwinto echazwa kakuhle yingxelo yonyaka wenkonzo—owona msebenzi mkhulu wokushumayela nokufundisa embalini yabantu.

[Umbhalo osemazantsi]