Ngaba Ungumzekelo Omhle Kuwe Okanye Usisilumkiso?
‘UThixo kaYakobi uya kusiyalela ngeendlela zakhe, ukuze sihambe emendweni wakhe.’—ISA. 2:3.
1, 2. Ziziphi iindlela onokungenelwa ngazo kwimizekelo eseBhayibhileni?
NGABA weyisekile ukuba unokungenelwa kwizinto ezibhalwe eBhayibhileni? Kuyo uva ngemizekelo yamadoda nabafazi abathembekileyo onokuthanda ukuxelisa indlela ababephila ngayo neempawu zabo. (Heb. 11:32-34) Kodwa ke, kusenokwenzeka ukuba uye waphawula nabo bayimizekelo esisilumkiso—amadoda nabafazi ekuya kufuneka uphephe izenzo neendlela ababecinga ngazo.
2 Eneneni, abanye abantu ekuthethwa ngabo eBhayibhileni bangumzekelo wokuxeliswa yaye kwangaxeshanye bazizilumkiso zezinto esimele siziphephe. Khawucinge ngoDavide, umalusi othobekileyo owaba ngukumkani onamandla. Kuye ubona umzekelo omhle womntu owayethanda inyaniso nowayethembele kuYehova. Sekunjalo, uDavide wenza izono ezinzulu, njengezo zibandakanya uBhatshebha, u-Uriya nokubala abantu engafanelanga. Kodwa ke, makhe sithethe ngonyana wakhe—ukumkani nombhali weBhayibhile—uSolomon. Siza kuphawula iindlela ezimbini awaba ngumzekelo omhle ngazo.
“Ubulumko BukaSolomon”
3. Kutheni sinokuthi uSolomon wasimisela umzekelo omhle?
3 USolomon Omkhulu, uYesu Kristu, wathetha kakuhle ngoKumkani uSolomon, echaza ukuba ungumzekelo omhle kuthi. UYesu wathi kumaYuda athile awayethandabuza: “Ukumkanikazi wasemzantsi uya kuvuswa ngomgwebo nesi sizukulwana yaye uya kusigwebela isohlwayo; ngenxa yokuba weza evela eziphelweni zomhlaba esiza kuva ubulumko bukaSolomon, kodwa, khangelani! okuthile okungaphezu koSolomon kulapha.” (Mat. 12:42) Ngokwenene, uSolomon wayedume ngobulumko bakhe, yaye wasibongoza ukuba sibufune.
4, 5. USolomon wabufumana njani ubulumko, kodwa thina sibufumana njani ngendlela eyahlukileyo?
4 Ukuqalisa kukaSolomon ukuba ngukumkani, uThixo wabonakala kuye ephupheni waza wathi makacele into ayifunayo. Esazi ukuba akanawo amava, uSolomon wacela ubulumko. (Funda eyoku-1 yooKumkani 3:5-9.) UThixo wavuyiswa yinto yokuba lo kumkani ecele ubulumko kunobutyebi nozuko, kangangokuba wanika uSolomon “intliziyo elumkileyo nenokuqonda”—kunye nobutyebi. (1 Kum. 3:10-14) Njengoko uYesu watshoyo, uSolomon wayehamba yedwa ngobulumko kangangokuba ukumkanikazi waseShebha weva ngabo waza wathatha uhambo olude ukuze azibonele ngawakhe amehlo.—1 Kum. 10:1, 4-9.
5 Thina asinakulindela ukufumana ubulumko ngokungummangaliso. USolomon wathi “uYehova unika ubulumko,” kodwa wakhuthaza ukuba sizame ukulufumana olo phawu lukaThixo, xa wabhala wathi: ‘Nikela ingqalelo kubulumko ngendlebe yakho, ukuba uyithobele ukuqonda intliziyo yakho.’ Ngokuphathelele loo nto, wasebenzisa amabinzana afana nelithi ‘bubize,’ ‘qhubeka ubufuna,’ nelithi ‘buphande’ ubulumko. (IMize. 2:1-6) Licacile elokuba, sinako ukubufumana ubulumko.
6. Ziziphi iindlela esinokubonisa ngazo ukuba siyangenelwa kumzekelo omhle kaSolomon wobulumko?
6 Kuya kuba kuhle ukuzibuza, ‘Ngaba ndixelisa umzekelo kaSolomon wokuxabisa ubulumko obuvela kuThixo?’ Ukukekela kwemeko yoqoqosho kuye kwenza abantu abaninzi banikel’ ingqalelo kwimisebenzi yempangelo nakwimali yabo okanye kwaphembelela izigqibo abazenzayo ngokuphathelele uhlobo nobungakanani bemfundo abamele bayifune. Kuthekani ngawe neyakho intsapho? Ngaba izinto ozikhethayo zibonisa ukuba uyabuxabisa yaye uyabufuna ubulumko obuvela kuThixo? Ngaba ukutshintsha izinto onikela ingqalelo kuzo nosukelo lwakho kunokukwenza ukwazi ukufumana ubulumko obungakumbi? Eneneni, ukufumana nokusebenzisa ubulumko kuya kukunceda ngonaphakade. USolomon wathi: “Uya kwandula ke ukubuqonda ubulungisa nomgwebo nokuthe tye, ikhondo lokulungileyo liphela.”—IMize. 2:9.
Ukuphakamisa Unqulo Lokwenyaniso Kwabangela Uxolo
7. Kwenzeka njani ukuba uThixo abe netempile yodidi?
7 Ebutsheni bolawulo lwakhe, uSolomon wakha itempile ekumgangatho ophezulu endaweni yomnquba owawusetyenziswa ukususela ngemihla kaMoses. (1 Kum. 6:1) Sinokuyibiza sithi yitempile kaSolomon, kodwa ukwakhiwa kwayo kwakungeyongcamango yakhe, mhlawumbi indlela yokuzenzela igama njengegcisa lokwakha okanye isinhanha. Eneneni, yayinguDavide umntu owaqala wacela ukwakha itempile, ekwathi uThixo wamnika iinkcukacha zeplani yetempile nendlela eyayiza kuhonjiswa ngayo. Yaye uDavide wanikela ngemali eninzi yokuxhasa loo msebenzi. (2 Sam. 7:2, 12, 13; 1 Kron. 22:14-16) Sekunjalo, kwaba yimbopheleleko kaSolomon ukwakha esi sakhiwo, okwathatha iminyaka esixhenxe enesiqingatha.—1 Kum. 6:37, 38; 7:51.
8, 9. (a) Nguwuphi umzekelo omhle esiwufunda kuSolomon ngokuphathelele ukuqhubeka nokwenza imisebenzi emihle? (b) Yintoni eyenzekayo xa uSolomon waphakamisa unqulo lokwenyaniso?
8 Ngaloo ndlela uSolomon usibekela umzekelo omhle wokuqhubeka sisenza imisebenzi emihle, nokubeka izinto ezibalulekileyo kwindawo yokuqala. Xa itempile yagqitywayo kwaza kwafakwa ityeya yomnqophiso kuyo, uSolomon wathandaza esidlangalaleni. Ithi inxalenye yomthandazo wakhe: ‘Ngamana amehlo akho angavulekela kule ndlu ubusuku nemini, kule ndawo wathi ngayo, “Igama lam liya kuba lapho,” ukuze uphulaphule umthandazo athandaza ngawo umkhonzi wakho ngale ndawo.’ (1 Kum. 8:6, 29) AmaSirayeli nabantu basemzini babenokuthandaza kule tempile ibizwa ngegama likaThixo.—1 Kum. 8:30, 41-43, 60.
9 Yintoni eyenzekayo xa uSolomon wabeka kuqala unqulo lokwenyaniso? Emva kokubhiyozela ukunikezelwa kwetempile, abantu ‘babenemihlali yaye bechwayitile entliziyweni ngako konke ukulunga uYehova awayekwenzele uDavide umkhonzi wakhe namaSirayeli abantu bakhe.’ (1 Kum. 8:65, 66) Enyanisweni, kuyo yonke iminyaka engama-40 yokulawula kukaSolomon, kwabakho uxolo nobutyebi ngendlela engathethekiyo. (Funda eyoku-1 yooKumkani 4:20, 21, 25.) INdumiso 72 isixelela oko ize isincede siziqonde ngakumbi iintsikelelo esiza kuzinandipha phantsi kolawulo lukaSolomon Omkhulu, uYesu Kristu.—INdu. 72:6-8, 16.
Umzekelo KaSolomon Osisilumkiso
10. Yiyiphi impazamo esiyikhumbulayo eyenziwa nguSolomon?
10 Ngoko ke, sinokutsho njani ukuba indlela awayephila ngayo uSolomon ikwasisilumkiso? Mhlawumbi into eqala ithi qatha kuwe ngabafazi bakhe basemzini namashweshwe. Sifunda oku: “Kwathi ngexesha lokuba mdala kukaSolomon abafazi bakhe bayenza intliziyo yakhe yatyekela ekulandeleni abanye oothixo; kwaye intliziyo yakhe ayizange iphelele kuYehova.” (1 Kum. 11:1-6) Alithandabuzeki elokuba, uzimisele ukungaze ulixelise ikhondo lakhe lobuyatha. Kodwa ngaba yiloo nto kuphela esisilumkiso kubomi bukaSolomon? Makhe sithethe ngezinye iinkcukacha zobomi bakhe ekulula ukuzibetha ngoyaba, size sibone ukuba zisilumkisa njani na.
11. Yintoni esinokugqiba kuyo ngokuphathelele umtshato wokuqala kaSolomon?
11 USolomon walawula iminyaka engama-40. (2 Kron. 9:30) Ngenxa yoko, sisiphi isigqibo onokufikelela kuso ngokusuka kweyoku-1 yooKumkani 14:21? (Yifunde.) Ngokutsho kwale ndinyana, ukufa kukaSolomon, unyana wakhe uRehobhoham waba ngukumkani eneminyaka engama-41 ubudala, unina “inguNahama umAmonikazi.” Oku kuthetha ukuba ngaphambi kokuba uSolomon abe ngukumkani, watshata nomntu wasemzini owayengowohlanga olulutshaba nolunqula izithixo. (ABagwe. 10:6; 2 Sam. 10:6) Ngaba lo mntu wayezinqula ezo zithixo? Kwanokuba wayekhe wazinqula, kusenokwenzeka ukuba wazishiya izithixo waza waba ngumnquli wokwenyaniso, njengoko wenzayo uRahabhi noRute. (Rute 1:16; 4:13-17; Mat. 1:5, 6) Sekunjalo, kusenokwenzeka ukuba uSolomon wayenobukhwe nezalamane ezingamkhonziyo uYehova.
12, 13. Sisiphi isigqibo esingesosabulumko esenziwa nguSolomon ebutsheni bolawulo lwakhe, yaye kusenokwenzeka ukuba waqiqa ngelithini?
12 Kodwa ke, izinto zonakala emva kokuba ebe ngukumkani. USolomon “wendiselana noFaro ukumkani waseYiputa waza [wathabatha] intombi kaFaro [wayizisa] kwisiXeko sikaDavide.” (1 Kum. 3:1) Ngaba loo mfazi waseYiputa waxelisa uRute ngokwamkela unqulo lokwenyaniso? Akukho nto ibonisa ukuba wenjenjalo. Kunoko, ekuhambeni kwexesha uSolomon wamakhela indlu (mhlawumbi nezicakakazi zakhe zaseYiputa) ngaphandle kwesiXeko sikaDavide. Ngoba? IZibhalo zithi wakwenza oko ngenxa yokuba kwakungafanelekanga ukuba umnquli-zithixo ahlale kufutshane netyeya yomnqophiso.—2 Kron. 8:11.
13 Mhlawumbi uSolomon wabona iingenelo zobupolitika zokutshata nenkosazana yaseYiputa, kodwa ngaba eso yayisisingxengxezo esivakalayo? Kude kudala, uThixo wayekwalele ukutshatwa kwamaKanan angabahedeni, de wazibiza ngamagama ezinye iintlanga. (Eks. 34:11-16) Ngaba uSolomon waqiqa ngelithi amaYiputa ayengekho phakathi kweentlanga ezabalwayo? Kwanokuba wayenokuqiqa ngaloo ndlela, ngaba wayeza kuvakala? Eneneni, indlela awazenza ngayo izinto yayingabonisi ukuba uyayiqonda ingozi eyachazwa nguYehova—le yokutyekiswa kwamaSirayeli alushiye unqulo lokwenyaniso aye kolobuxoki.—Funda iDuteronomi 7:1-4.
14. Sinokungenelwa njani ngokufunda kumzekelo kaSolomon osisilumkiso kuthi?
14 Ngaba siza kuvumela umzekelo kaSolomon ube sisilumkiso kuthi? Udade usenokuzama ukuzithethelela ngokungathobeli umthetho kaThixo ophathelele ukutshata “kuphela eNkosini.” (1 Kor. 7:39) Ngeendlela ezifana nezo, umntu unokuba yinxalenye yemidlalo yasesikolweni, angayichazi yonke imali ayifumanayo ukuze ahlawule irhafu, okanye axoke xa ebuzwa ngezinto ezisenokumhlazisa. Ingongoma yile, kusenokwenzeka ukuba uSolomon waqiqa ngokwendlela yabantu abangafezekanga ukuze angawuthobeli umyalelo kaThixo, yaye nathi sinokuba kwingozi efanayo.
15. UYehova wayibonisa njani inceba kwindlela awamphatha ngayo uSolomon, kodwa yintoni esifanele siyikhumbule ngaloo nto?
15 Kubangel’ umdla ukuba emva kokuba iBhayibhile ithethe ngokutshata kukaSolomon nenkosazana yasemzini, iphinda itsho ukuba uThixo wamnika ubulumko njengoko wayebucelile, waza Wamnika nobutyebi. (1 Kum. 3:10-13) USolomon akazange ayithobele imiyalelo kaThixo, sekunjalo akukho nto ibonisa ukuba uYehova wakhawuleza wamgatya njengokumkani okanye wamohlwaya kabukhali. Oku kuvisisana nesibakala sokuba uThixo uyasiqonda ukuba singabantu abangafezekanga ababunjwe ngothuli. (INdu. 103:10, 13, 14) Kodwa khumbula: Izenzo zethu zinokusichaphazela ngoku okanye mhlawumbi kamva ebomini.
Inkitha Yabafazi!
16. Yintoni eyatyeshelwa nguSolomon ngokutshata abafazi abaninzi?
16 KwiNgoma Yazo Iingoma, lo kumkani wabonga enye intombi enyulu esithi intle ngaphezu kookumkanikazi abangama-60 namashweshwe angama-80. (INgoma 6:1, 8-10) Ukuba oko kubhekisela kwimeko kaSolomon, ngelo xesha kulawulo lwakhe, wayenabafazi abalelo nani. Kwanokuba uninzi lwabo okanye bonke babengabanquli bokwenyaniso, umyalelo kaThixo awawudlulisela ngoMoses wawusithi ukumkani wakwaSirayeli “makangazandiseli bafazi, ukuze ingaphambuki intliziyo yakhe.” (Dut. 17:17) Kodwa ke, nalapho uYehova akazange asuke amshiye uSolomon. Eneneni, uThixo wamsikelela uSolomon, wamsebenzisela ukubhala incwadi yeBhayibhile yeeNgoma Yazo Iingoma.
17. Yiyiphi inyaniso esingamele siyityeshele?
17 Ngaba oku kuthetha ukuba uSolomon wayenokusuka angaluthobeli ulwalathiso lukaThixo aze angohlwaywa okanye ngaba oko kuthetha ukuba nathi sinokwenjenjalo? Akunjalo. Kunoko, kusibonisa ukuba uThixo unako ukunyamezela kangangethuba elithile. Sekunjalo, isibakala sokuba omnye wabantu bakaThixo enokungaluthobeli ulwalathiso lwakhe aze angafumani miphumo ibuhlungu ngokukhawuleza akuthethi kuthi akanakuvuna imiphumo mibi ekugqibeleni. Khumbula la mazwi kaSolomon: “Ngenxa yokuba isigwebo nxamnye nomsebenzi ombi singaphunyezwa ngokukhawuleza, ngoko intliziyo yoonyana babantu izele ngaphakathi kwabo kukwenza okubi.” Wongezelela wathi: “Ndiyaqonda ukuba kuya kulunga kwabamoyikayo uThixo oyinyaniso, ngenxa yokuba babesoyika yena.”—INtshu. 8:11, 12.
18. Imeko kaSolomon iyibonisa njani inyaniso efumaneka kumaGalati 6:7?
18 Akwaba uSolomon wayeyithobele loo nyaniso kaThixo! Ewe kona, zininzi izinto ezintle awazenzayo yaye wafumana iintsikelelo ezininzi ezivela kuThixo. Kodwa ngokuthe ngcembe waqalisa ukuthabatha ikhondo eliphosakeleyo elinye emva kwelinye. Imikhwa emibi yaya ikhula. Ayechane ngokwenene amazwi umpostile uPawulos awaphefumlelwa ukuba awabhale: “Ningalahlekiswa: UThixo akanakwenziwa intlekisa. Loo nto ayihlwayelayo umntu, uya kuvuna kwayona”! (Gal. 6:7) Ekuhambeni kwexesha, uSolomon wavuna imiphumo ebuhlungu ngenxa yokungaluthobeli ulwalathiso lukaThixo. Sifunda oku: “UKumkani uSolomon wayethanda abafazi basemzini abaninzi kunye nentombi kaFaro, amaMowabhikazi, ama-Amonikazi, amaEdomikazi, amaSidonikazi namaHitikazi.” (1 Kum. 11:1) Kusenokwenzeka ukuba, abaninzi kubo baqhubeka benqula izithixo, yaye baba nempembelelo nakuSolomon. Wakhukuliseka waza waphulukana nenkoliseko kaThixo wethu onomonde.—Funda eyoku-1 yooKumkani 11:4-8.
Funda Kumzekelo Wakhe—Omhle Nombi
19. Kutheni sinokuthi iBhayibhile iqulethe imizekelo emininzi enokuxeliswa?
19 Ngobubele, uYehova waphefumlela uPawulos ukuba abhale oku: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Ezo zinto zabhalwayo ziquka imizekelo emininzi emihle yamadoda nabafazi abanokholo olubalaseleyo. Wayefanele uPawulos ukuthi: “Ndingathetha ndithini na? Lingaphela ixesha ndibalisa ngoGidiyon, uBharaki, uSamson, uYifeta, uDavide noSamuweli nabanye abaprofeti, abathi ngokholo boyisa izikumkani kungquzulwano, baphumeza ubulungisa, bazuza izithembiso, . . . bathi bekwimo yobuthathaka basuka benziwa baba namandla.” (Heb. 11:32-34) Sinako yaye simele singenelwe kwimizekelo emihle efumaneka eZibhalweni, ngokulandela okanye ngokuxelisa izinto esizifunda kwezo ngxelo zintle zeBhayibhile.
20, 21. Kutheni uzimisele ukufunda kwimizekelo esisilumkiso efumaneka kwiLizwi likaThixo?
20 Noko ke, ezinye iingxelo zeBhayibhile ziba nemizekelo esisilumkiso. Ezinye zezo ngxelo sizibona kubomi bamadoda nabafazi awathi uYehova wabamkela waza wabasebenzisa njengabakhonzi bakhe. Njengoko sifunda iBhayibhile, sinokuphawula apho abanye abantu bakaThixo bayiphosa khona indlela, yaye oko kubenza babe yimizekelo esisilumkiso kuthi. Sinokuqonda ukuba abanye baqala kancinci ukuba neengcinga notyekelo olubi, zinto ezo ezaba nemiphumo ebuhlungu kamva. Yintoni esinokuyifunda kwezo ngxelo? Mhlawumbi sinokuzibuza imibuzo efana nale: ‘Kwaqala kwathini? Ngaba nakum kunokwenzeka okufanayo? Yintoni endinokuyenza ukuze ndikuphephe oko ndize ndingenelwe kwesi silumkiso?’
21 Ngokuqinisekileyo asifanele siyithathe lula le mizekelo, kuba uPawulos waphefumlelwa ukuba abhale la mazwi: “Ezi zinto zabahlela njengemizekelo, yaye zabhalelwa ukulumkisa thina bafikelwe ziziphelo zeenkqubo zezinto.”—1 Kor. 10:11.
Ufunde Ntoni?
• Kutheni kukho imizekelo emihle kunye nesisilumkiso eBhayibhileni?
• USolomon waqala njani ukuvumela imikhwa emibi ebomini bakhe?
• Unokufunda ntoni kumzekelo osisilumkiso kaSolomon?
[Umfanekiso okwiphepha 9]
USolomon wabusebenzisa ubulumko awabunikwa nguThixo
[Imifanekiso ekwiphepha 12]
Ngaba uyafunda kumzekelo osisilumkiso obandakanya uSolomon?