Ngaba Unokuzithemba Izigqibo Ozenzayo Ngomntu Oqalayo Ukubona?
NGOXA wayehleli kwigumbi lakhe lokuphumla, ugqirha wayebukele inkqubo kamabonwakude eyayinomphathiswa waseIreland. Njengoko wayeqolozele ubuso balo mphathiswa, ugqirha wabona iqhuma. Wacebisa loo mphathiswa ukuba aye kwagqirha.
Wathi akuxilongwa kwafunyaniswa ukuba ngokwenene unalo. Lo gqirha waba neliso elibukhali, oko kuthetha ukuba unokuyazi into agula yiyo umntu ngokumjonga nje. Noko ke, abanye abantu bavakalelwa kukuba “baneliso elibukhali” xa kufikwa kumba wokubona ubuntu babanye abantu nokuba banokuthenjwa kusini na abo bantu.
Ukutyhubela iinkulungwane, abaphandi baye baqobola indlela engokwenzululwazi yokufunda umntu ngokujonga inkangeleko yakhe. Le ndlela ibizwa ngokuba yiphysiognomy, iEncyclopædia Britannica iyichaza ngokuba “ngusinganzululwazi efunda umntu ngokondela inkangeleko yakhe.” Ngenkulungwane ye-19, iingcali ngemvelaphi nentlalo yabantu, ezinjengoFrancis Galton, ongumzala kaCharles Darwin, neengcali zolwaphulo-mthetho ezinjengoCesare Lombroso waseItali, wayikhuthaza le ndlela nangona sele zaphoswa kwelokulibala ngoku.
Nakuba kunjalo, abantu abaninzi basakholelwa ukuba unokumazi umntu ngokondela inkangeleko yakhe. Ngaba oko ukubona emntwini uze ugqibe ngako kunokuthenjwa?
Ukugweba Ngembonakalo
Umzekelo ophilayo wokugweba umntu ngembonakalo ukwincwadi yeBhayibhile yoKuqala kaSamuweli. UYehova uThixo wayalela umprofeti uSamuweli ukuba athambise ilungu lendlu kaYese njengokumkani wexesha elizayo wakwaSirayeli. Siyafunda: “Njengoko babengena [oonyana bakaYese] waza wabona uEliyabhi, kwaoko wathi: ‘Ngokuqinisekileyo othanjisiweyo wakhe uphambi koYehova.’ Kodwa uYehova wathi kuSamuweli: ‘Musa ukukhangela imbonakalo yakhe nokuphakama kwesithomo sakhe, kuba ndimgatyile. Kuba indlela abona ngayo umntu asiyondlela abona ngayo uThixo, ngenxa yokuba umntu nje ubona okubonakalayo emehlweni; kodwa uYehova yena, ubona oko ikuko intliziyo.’” Kwenzeka kwaloo nto nakwabanye oonyana bakaYese abathandathu. Ngokwahlukileyo, koko kwakucingwa ngumprofeti noYese, uThixo wakhetha unyana wesibhozo—uDavide—ukuba abe ngukumkani ityendyana lo mfana ekungekho mntu owakhe wacinga ngaye.—1 Samuweli 16:6-12.
Awukho kangako umahluko nanamhlanje. Kwiminyaka embalwa edluleyo, eJamani, unjingalwazi wolwaphulo mthetho wenza uphando olwaluquka abafundi bomthetho abangama-500. Kwakukho “iindwendwe” ezili-12. Zaziquka umphathi wamapolisa nomtshutshisi wasekuhlaleni, unondyebo waseYunivesithi negosa elingumnxibelelanisi kawonke wonke, amagqwetha namagosa enkundla namabanjwa amathathu. Kwakufuneka abafundi bachaze umsebenzi owenziwa nguye ngamnye wezo ndwendwe, kwakhona bachaze nesigwebo sakhe ngamnye netyala alenzileyo. Konke oku kwakufuneka bakuchaze ngokusuka kwimbonakalo, nakwizinto ezithandwa zezo ndwendwe.
Waba yintoni umphumo? Malunga nama-75 ekhulwini labo bafundi bakwazi ukuchaza ezona zaphuli mthetho. Kodwa ama-60 ekhulwini abo bafundi baphazama bathi kwezo ndwendwe ezilithoba zizaphuli mthetho. Umfundi omnye kwabasixhenxe babecinga ukuba umtshutshisi wasekuhlaleni uthengisa iziyobisi, kwaza kwathiwa umphathi wamapolisa lisela ngumfundi omnye kwabathathu. Ukwenza izigqibo ezisekelwe kwimbonakalo yomntu zinokukulahlekisa. Ngoba?
Imbonakalo Yangaphandle Ingakuqhatha
Xa sidibana nomntu isihlandlo sokuqala, sidla ngokucinga ukuba siyamazi ngenxa yamava exesha elidlulileyo. Kwiimeko ezilolo hlobo, siye sityekele ekuzigwenguleni izibakala size sigwebe ngokwendlela esicinga ukuba kuyiyo. Ukongezelela kwimbonakalo yangaphandle, umntu unokugwetywa ngokohlanga , isizwe, umgangatho wakhe entlalweni okanye unqulo lwakhe.
Ukuba imbono esinayo ngaloo mntu ichanile, siye sizingomb’ isifuba sicinge ukuba siyabazi abantu. Noko ke, xa sifumanisa ukuba siye safikelela kwisigqibo esingesiso, siye sisabele njani? Ukuba sinyanisekile, sifanele sahlukane nalo mkhwa wokuba jonga ezibhatyini abantu size sisebenze ngezibakala. Kungenjalo, sakuba siba dlel’ indlala abanye, ngenxa yekratshi lokuba sicinga ukuba sazi yonke into.
Ukugweba abantu ngokwembonakalo akwenzakalisi loo mntu ugwetywayo kuphela kodwa nalowo ugwebayo. Ngokomzekelo, ngenkulungwane yokuqala, amaYuda amaninzi ayengafuni ukuvuma ukuba uYesu nguMesiya. Kwakutheni? Izimvo zawo ayezisekele kwimbonakalo yangaphandle, yokuba wayengunyana womchweli. Nangona ayewathanda amazwi kaYesu obulumko nemisebenzi yakhe yamandla, awazange akholelwe ukuba angayenye into kuna le babesele begqibe kuyo. Isimo sengqondo sabo sabangela ukuba uYesu aye kushumayela kwabanye abantu, esithi: “Umprofeti akaphathwa ngokungenambeko ngaphandle kwakummandla wakowabo nasendlwini yakhe.”—Mateyu 13:54-58.
Loo maYuda ayeyinxalenye yohlanga olwalulindele uMesiya kangangeenkulungwane. Ukungamgqali kwawo uYesu njengoMesiya ekufikeni kwakhe kwakhokelela kwintlekele yokomoya. (Mateyu 23:37-39) Nabalandeli bakaYesu baphathwa ngendlela efanayo. Abantu abaninzi babengakholelwa ukuba iqaqobana labalobi beentlanzi, elalijongelwa phantsi zizifundiswa nazinkokeli zonqulo, lalinokuthetha into ebhadlileyo. Abo babekholose ngeembono zabo baphulukana nentlaka, ithuba lokuba ngabalandeli boNyana kaThixo.—Yohane 1:10-12.
Abanye Basitshintsha Isimo Sengqondo Sabo
Ayekho amaYuda awayethobekile ngexesha likaYesu awayekulungele ukujika xa kukho ubungqina. (Yohane 7:45-52) Phakathi kwawo kwakukho nabe ntsapho yakulo Yesu, abazange ekuqaleni bayis’ eso into yokuba kunokuthi kanti isalamane sabo nguMesiya. (Yohane 7:5) Okuncomekayo kukuba ekuhambeni kwexesha batshintsha baza baba nokholo kuye. (IZenzo 1:14; 1 Korinte 9:5; Galati 1:19) Ngendlela efanayo, emva kweminyaka eliqela eRoma, abameli bamaYuda babekulungele ukuphulaphula umpostile uPawulos kunokuba bahambe bephulaphula amarhe awayesasazwa ziintshaba zobuKristu. Emva kokumphulaphula, abanye babo baba ngamakholwa.—IZenzo 28:22-24.
Namhlanje, abantu abaninzi abawaginyi amaNgqina kaYehova. Kutheni? Amaxesha amaninzi asikuko ukuba baye bahlola izibakala okanye beyisekile ukuba iinkolelo nezinto ezenziwa ngamaNgqina zichasene nezibhalo. Kunoko, abakholelwa ukuba amaNgqina kaYehova anokuba nayo inyaniso yonqulo. Njengoko unokukhumbula, le mbono ifana nqwa naleyo babenayo abantu abaninzi ngamaKristu enkulungwane yokuqala.
Akothusi ukuva abantu bethetha kakubi ngabo bazama ukulandela umzekelo kaYesu. Kutheni? Kaloku uYesu wabalumkisa abalandeli bakhe wathi: “Niya kuthiywa ngabantu bonke ngenxa yegama lam.” Kodwa wabakhuthaza ngala mazwi: “lowo uye wanyamezela kwasa ekupheleni ngulowo oya kusindiswa.”—Mateyu 10:22.
Ethobela umyalelo kaYesu, amaNgqina kaYehova namhlanje asebenza nzima eshumayela iindaba ezilungileyo zoBukumkani bukaThixo kubantu bonke ehlabathini. (Mateyu 28:19, 20) Abo bangavumiyo ukuphulaphula bazibeka esichengeni sokuphulukana nethuba lokufumana ubomi obungunaphakade. (Yohane 17:3) Kuthekani ngawe? Ngaba uza kuqhubeka ngokuthabatha izigqibo ngabantu ngokusuka nje koko ukubonayo okanye uza kukulungela ukuhlola izibakala? Khumbula ukuba: Imbonakalo yangaphandle ingakuqhatha kwaye inokungachani; kodwa ukuhlola izibakala ngenyameko kunokukuvuyisa.—IZenzo 17:10-12.
[Umfanekiso okwiphepha 11]
Imbonakalo yangaphandle yabangela ukuba amaYuda amaninzi amgatye uYesu njengoMesiya
[Umfanekiso okwiphepha 12]
Ngaba uluvo lwakho ngamaNgqina kaYehova lusekelwe koko kuthethwa ngabanye ngawo okanye kwizibakala?