Ukuba Likholwa Nokuba Ngummi Onenkathalo—Unokuba Zizo Njani Zombini Ezi Zinto

ZIZIPHI iinkalo ezimbini awayebalasele ngazo uYesu kumsebenzi wakhe wokushumayela? Okokuqala, uYesu wayenosukelo lokutshintsha iintliziyo zabantu, kungekhona amaziko ezopolitiko. Ngokomzekelo, khawuve oko wakuthethayo kwiNtshumayelo yaseNtabeni. Ngaphambi kokuba athethe ngemfuneko yokuba njengetyuwa nangokuba lukhanyiselo, waxelela abaphulaphuli bakhe ukuba ulonwabo lokwenene lufunyanwa ngabo “bayiphapheleyo intswelo yabo yokomoya.” Wongezelela wathi: “Banoyolo abo banomoya wobulali, . . . abasulungekileyo entliziyweni, . . . abanoxolo.” (Mateyu 5:1-11) UYesu wanceda abalandeli bakhe ukuba babone imbaluleka yokulungisa indlela abacinga nabavakalelwa ngayo ngemithetho kaThixo yoko kulungileyo nokubi nokukhonza uThixo ngentliziyo epheleleyo.

Okwesibini, xa uYesu wabona abantu betsala nzima, uvelwano awaba nalo ngabo lwamshukumisela ukuba abancede. Noko ke, akazange akwenze usukelo lwakhe ukuphelisa konke ukubandezeleka. (Mateyu 20:30-34) Waphilisa abantu abagulayo, kodwa ukugula kwahlala kukho. (Luka 6:17-19) Wazisa isiqabu kwabo babecinezelekile, kodwa ukungabikho kokusesikweni kwaqhubeka kukho. Wabanika ukutya abo babelambile, kodwa indlala yaqhubeka ibangela ubhubhane kuluntu.—Marko 6:41-44.

Ukutshintsha Iintliziyo Nokuthomalalisa Ukubandezeleka

Kwakutheni ukuze uYesu abe nomdla wokutshintsha iintliziyo aze athomalalise ukubandezeleka kodwa angawatshintshi amaziko ezopolitiko okanye aphelise uxinezeleko? UYesu wayesazi ukuba uThixo unenjongo yokuba ibe buBukumkani Bakhe obuza kuthi kwikamva bushenxise oorhulumente bomhlaba aze aphelise oonobangela bokubandezeleka. (Luka 4:43; 8:1) Ngenxa yoko, xa abafundi bakaYesu bambongozayo ukuba achithe ixesha elingakumbi ephilisa abantu abagulayo, wathi: “Masiye kwenye indawo, kwiidolophu ezikufuphi, ukuze ndishumayele kwanalapho, kuba ndiphumele oko.” (Marko 1:32-38) UYesu wabanceda abantu abaninzi ababetsala nzima, kodwa eyona nto yayiphambili kuye yayikukushumayela nokufundisa iLizwi likaThixo.

Xa amaNgqina kaYehova eshumayela namhlanje, azama ngako konke okusemandleni awo ukuxelisa uYesu. Afuna ukuthomalalisa ukubandezeleka ngokuthi anikele uncedo kwabo balufunayo. Kodwa amaNgqina awazami kuphelisa ukungabikho kokusesikweni okukhoyo ehlabathini. Akholelwa ukuba uBukumkani bukaThixo buya kuphelisa oonobangela bokubandezeleka. (Mateyu 6:10) Kanye njengoYesu, enza unako nako wokutshintsha iintliziyo kungekhona amaziko ezopolitiko. Ukwenza izinto ngale ndlela kufanelekile kuba ezona ngxaki zabantu azinanto yakwenza nezopolitiko, kodwa zinento yokwenza nokuziphatha.

Abemi Abanenkathalo

Kwangaxesha nye, amaNgqina kaYehova akholelwa ukuba njengamaKristu amele abe ngabemi abalungileyo. Ngenxa yoko, abanika imbeko nentlonelo abasemagunyeni. Esebenzisa iincwadi zawo nangomsebenzi wawo wokunikela ubungqina, akhuthaza abamelwane bawo ukuba bathobele umthetho. Noko ke, xa urhulumente efuna kwenziwe into engqubana noko kufunwa nguThixo, amaNgqina awathobeli. ‘Athobela uThixo njengomlawuli kunabantu.’—IZenzo 5:29; Roma 13:1-7.

AmaNgqina kaYehova atyelela bonke abantu basekuhlaleni ukuze abafundise iBhayibhile ngesisa. Ngenxa yale mfundo, kuye kwaguqulwa izigidi zeentliziyo zabantu. Nyaka ngamnye, amakhulu amawaka abantu aye ancedwa ukuze oyise imikhwa eyingozi njengokutshaya, ukunxila, ukusebenzisa kakubi iziyobisi, ukungcakaza nokuziphatha kakubi ngokwesini. Baye bangabemi abaziphethe kakuhle kuba baye bafunda ukusebenzisa imigaqo yeBhayibhile.—Funda inqaku elithi “IBhayibhile Iyabutshintsha Ubomi Babantu,” kwiphepha 18 leli phephancwadi.

Ukongezelela koko, imfundo yeBhayibhile inceda iintsapho ukuba zihlonelane zize ziphucule nendlela ezithetha ngayo—indoda nomfazi, abazali nabantwana nabantwana bebodwa. Zezi zinto eziqinisa iintsapho. Iintsapho ezomeleleyo zakha ibutho labantu elomeleleyo.

Emva kokuhlolisisa iingongoma ebezigwadlwa kula manqaku, ucinga ntoni: Ngaba iBhayibhile iya baxhasa abo badibanisa unqulo nezopolitiko? Impendulo izicacele; ayibaxhasi. Kodwa ngaba amaKristu okwenyaniso amele abe ngabemi abazenza kakuhle izinto? Ewe, bafanele babenjalo. Bangakwenza njani oko? Ngokulandela umyalelo kaYesu wokuba njengetyuwa nokuba lukhanyiselo lwehlabathi.

Abo bazama ukusebenzisa olu lwalathiso lukaKristu baya kunceda bona neentsapho zabo—neengingqi abahla kuzo. AmaNgqina kaYehova akummandla wakho aya kukuvuyela ukwabelana nawe ngemfundo yeBhayibhile efundiswa nabanye abantu.a

[Umbhalo osemazantsi]

[Amagama acatshulweyo akwiphepha 10]

UYesu wazama ukutshintsha iintliziyo zabantu, kungekhona amaziko ezopolitiko

[Amagama acatshulweyo akwiphepha 11]

AmaNgqina kaYehova akholelwa ukuba amele abe ngabemi abalungileyo