Ngaba Usixabisa Ngokwenene Isipho SikaThixo Somtshato?
“Wanga uYehova anganinika isipho, nize nifumane indawo yokuphumla ngamnye kwindlu yendoda yakhe.”—RUTE 1:9.
KHANGELA IIMPENDULO:
Kutheni sinokuthi abakhonzi bakaThixo bamandulo babesixabisa isipho sakhe somtshato?
Sazi njani ukuba uYehova uluxhalabele ukhetho esilwenzayo lweqabane lomtshato?
Sisiphi isiluleko seBhayibhile esiphathelele umtshato oceba ukusisebenzisa kubomi bakho?
1. Khawuchaze indlela awasabela ngayo uAdam esakufumana umfazi.
“EKUGQIBELENI eli ke lithambo lasemathanjeni am nenyama yasenyameni yam. Lo yena ukubizwa kothiwa nguMfazi, kuba uthatyathwe endodeni.” (Gen. 2:23) Indoda yokuqala, uAdam yayivuyiswa ngokwenene kukuba yayiza kuba nomfazi! Yiyo loo nto yathetha ngendlela ebongayo! Emva kokuba uYehova ewise ubuthongo obunzulu phezu kuka-Adam, wadala ibhinqa elihle ngobambo olunye oluvela endodeni. Kamva uAdam wambiza ngokuba nguEva. UThixo wabamanyanisa ngeqhina lomtshato aba babini. Ekubeni uYehova wadala umfazi ngobambo luka-Adam, uAdam noEva babemanyene ngaphezu kwamadoda nabafazi abaphila kule mihla.
2. Kutheni kukho umtsalane phakathi kwamadoda namabhinqa?
2 Ngobulumko bakhe obungenakuthelekiswa nanto, uYehova wafaka ebantwini uthando oluphakathi kwabantu besini esahlukileyo—uphawu olwaluza kuba ngumtsalane phakathi kwamadoda nabafazi. IThe World Book Encyclopedia ithi: “Xa betshata, indoda nebhinqa bajonge phambili ekubeni neentlobano zesini baze babe nomtsalane omnye komnye.” Oku kwenzeke kangangezihlandlo ezininzi gqitha phakathi kwabantu bakaYehova.
BABESIXABISA ISIPHO SOMTSHATO
3. UIsake wamfumana njani umfazi?
3 UAbraham othembekileyo wayewuxabisa gqitha umtshato. Ngenxa yoko, wathumela umkhonzi wakhe omkhulu eMesopotamiya ukuba aye kufunela uIsake umfazi. Ukuthandaza kwaloo mkhonzi kwaba nemiphumo emihle. URebheka ohlonela uThixo waba ngumfazi othandekayo kaIsake waza waba negalelo kwilungiselelo likaYehova lokulondoloza imbewu ka-Abraham. (Gen. 22:18; 24:12-14, 67) Ngokusuka koku asimele sigqibe kwelokuba, umntu oneenjongo ezintle, unelungelo lokudibanisa abantu ababini. Kule mihla, abantu abaninzi bayazikhethela amaqabane omtshato. Kambe ke, imitshato ayidityaniswa ezulwini, kodwa uThixo uyawalathisa amaKristu kulo mba nakweminye imiba yobomi xa ethandazela ulwalathiso lwakhe yaye uwakhokela ngomoya wakhe oyingcwele.—Gal. 5:18, 25.
4, 5. Yintoni ekuqinisekisayo ukuba umShulamikazi nomalusi babethandana ngokwenene?
4 Inzwakazi engumShulamikazi yakwaSirayeli wamandulo ayizange ivume ukuba abahlobo bayo bayinyanzelele ekubeni ngomnye wabafazi abaninzi bakaKumkani uSolomon. Yathi: “Ndiyanifungisa, zintombi zaseYerusalem, ukuba ningazami ukuluvusa okanye niluvuselele uthando lwam lude luzivukele ngokwalo.” (INgoma 8:4) UmShulamikazi wayethandana nomnye umfana ongumalusi. Ngokuthobeka, wathi: “Ndiyisafroni yethafa eliselunxwemeni, inyibiba yasentilini.” Yena umalusi waphindisa ngelithi: “Njengenyibiba phakathi kokhula olunameva, injalo intombazana eliqabane lam phakathi kweentombi”! (INgoma 2:1, 2) Babethandana ngokwenene.
5 Ngenxa yokuba umShulamikazi nomalusi babemthanda ngokwenene uThixo, iqhina labo lomtshato laliza komelela ngokwenene. Enyanisweni, umShulamikazi wathi kumalusi amthandayo: “Ndibeke njengetywina entliziyweni yakho, njengetywina engalweni yakho; ngenxa yokuba uthando lunamandla njengokufa, ukuzingisa ekufuneni uzinikelo olupheleleyo akuyekeleli njengeShiyol. Amalangatye alo ngamalangatye omlilo, idangatye likaYa [kuba livela kuye]. Amanzi amaninzi akanako ukulucima uthando, nemilambo ayinakulukhukulisa. Ukuba umntu ebeya kunikela ngezinto zakhe zonke ezixabisekileyo ngenxa yothando, abantu bebeya kumdelela.” (INgoma 8:6, 7) Xa ecinga ngomtshato, umkhonzi kaYehova akanakusuka nje aziphose.
UKHETHO OLUBALULEKILEYO KUTHIXO
6, 7. Sazi njani ukuba uThixo ulukhathalele ukhetho esilwenzayo lweqabane lomtshato?
6 UYehova ulukhathalele ukhetho olwenzayo lweqabane lomtshato. AmaSirayeli ayalelwa oku ngokuphathelele iintlanga zakwaKanan: “Uze ungendiselani nazo. Intombi yakho uze ungayiniki unyana wakhe, nentombi yakhe uze ungayithabatheli unyana wakho. Kuba iya kumtyekisa unyana wakho ekundilandeleni, baze ngokuqinisekileyo bakhonze thixo bambi; uvuthe umsindo kaYehova kuni, aze ngokuqinisekileyo akubhubhise ngokukhawuleza.” (Dut. 7:3, 4) Kwiinkulungwane ezalandelayo, umbingeleli uEzra wathi: “Nina nenze ngokungathembeki ngokuthi ninike abafazi basemzini indawo yokuhlala ukuze nongeze kwityala likaSirayeli.” (Ezra 10:10) Nompostile uPawulos wathi kwamanye amaKristu: “Umfazi ubotshiwe ebudeni balo lonke ixesha indoda yakhe iphila. Kodwa ukuba indoda yakhe ingalala ekufeni, ukhululekile ukuba atshatiselwe kulowo amfunayo, kuphela eNkosini.”—1 Kor. 7:39.
7 Ukuba umkhonzi kaYehova ozahluleleyo uye watshata nomntu ongakholwayo, uya kuba akamthobeli uThixo. AmaSirayeli omhla kaEzra enza ngokungathembeki ngokunika “abafazi basemzini indawo yokuhlala,” yaye bekuya kuba yinto ephosakeleyo ukuzama ukuwabetha ngoyaba amazwi acacileyo eZibhalo. (Ezra 10:10; 2 Kor. 6:14, 15) UmKristu otshata nomntu ongakholwayo akangomzekelo yaye akasixabisi isipho sikaThixo somtshato. Ukutshata ngolo hlobo emva kokuba ubhaptiziwe kunokukwenza uphulukane namanye amalungelo phakathi kwabantu bakaThixo. Yaye bekungayi kuba sengqiqweni ukulindela ukusikelelwa ngoxa uthandaza uthi: ‘Yehova, ndikone ngabom, kodwa sekunjalo ndicela undisikelele.’
UBAWO WETHU WASEZULWINI WAZI YONKE INTO
8. Khawuchaze isizathu sokuba sifanele silandele ulwalathiso lukaThixo ngomtshato.
8 Umenzi womatshini uyazi kakuhle indlela osebenza ngayo. Ukuba esi sixhobo sifuna ukudityaniswa, unokunikela iinkcukacha eziyimfuneko ngoko. Kuthekani ukuba siyayigatya imiyalelo yakhe size sidibanise umatshini ngendlela esithanda ngayo? Oko kunokuphumela kwintlekele—ukuba loo matshini uya kusebenza kwaukusebenza phofu. Ngokufanayo, ukuze sonwabe emtshatweni, simele silandele imiyalelo esiyinikwa nguYehova, uMsunguli womtshato.
9. Kutheni sinokuthi uYehova uyaziqonda iimvakalelo ezibangelwa bubulolo kwakunye nolonwabo olukhoyo emtshatweni?
9 UYehova wazi yonke into ephathelele uluntu nomtshato. Wafaka umnqweno wesini ebantwini ukuze ‘baqhame baze bande.’ (Gen. 1:28) UThixo uyaziqonda iimvakalelo ezibangelwa bubulolo, kuba ngaphambi kokudala ibhinqa lokuqala, wathi: “Akulungile ukuba umntu aqhubeke eyedwa. Ndiza kumenzela umncedi oza kuba ngumphelelisi wakhe.” (Gen. 2:18) Kanti uYehova uluqonda kakuhle novuyo olukhoyo kwiqhina lomtshato.—Funda iMizekeliso 5:15-18.
10. Ziziphi iinkalo ezifanele zilawule iintlobano zesini zamaKristu atshatileyo?
10 Ngenxa yesono nokungafezeki okuye kwadluliselwa kuhlanga loluntu nguAdam onesono, awukho umtshato ogqibeleleyo namhlanje. Noko ke, phakathi kwabakhonzi bakaYehova umtshato unokuba nolonwabo lokwenene ukuba iLizwi likaThixo liyalandelwa. Ngokomzekelo, cinga nje ngesiluleko esicacileyo sikaPawulos ngokuphathelele iintlobano zesini emtshatweni. (Funda eyoku-1 kwabaseKorinte 7:1-5.) Asingomyalelo weZibhalo ukuba izibini ezitshatileyo zibe neentlobano zesini kuphela ngenjongo yokuzala. Iintlobano zesini zanelisa iimvakalelo yaye zibangela uyolo. Kodwa ngokuqinisekileyo uThixo uzithiyile iintlobano zesini ezigqwethekileyo. Ngokungathabuzekiyo amadoda nabafazi abangamaKristu kufuneka bawuphathe ngobunono lo mba ubalulekileyo, baze bathandane ngokwenene. Kambe ke, baya kukuphepha ukwenza nantoni na engayi kumkholisa uYehova.
11. Wasikelelwa njani uRute ngenxa yokwenza izinto ngendlela kaYehova?
11 Kumele kubekho uvuyo emtshatweni, kungekhona intlungu nokuphathwa njengekhoboka. Amakhaya amaKristu afanele abe ngawona ayindawo yokuphumla noxolo. Cinga nje ngoko kwenzeka kwiminyaka emalunga nama-3 000 eyadlulayo xa umhlolokazi osele ekhulile uNahomi noomolokazana bakhe abangabahlolokazi, uOrpa noRute babesendleleni esuka kwaMowabhi eya kwaYuda. UNahomi wabongoza la mabhinqa aselula ukuba agoduke. URute ongumMowabhikazi wanamathela kuNahomi, wathembeka kuThixo oyinyaniso yaye waqinisekiswa ‘ngomvuzo ogqibeleleyo ovela kuYehova uThixo kaSirayeli, awafuna indawo yokusabela phantsi kwamaphiko akhe.’ (Rute 1:9; 2:12) Enoxabiso olungathethekiyo ngesipho sikaThixo somtshato, uRute waba ngumfazi kaBhohazi osele ekhulile, ongumkhonzi onyanisekileyo kaYehova. Xa evuselwa kwihlabathi elitsha likaThixo, uya kuvuyiswa gqitha kukwazi ukuba waba ngukhokhokazi kaYesu Kristu. (Mat. 1:1, 5, 6; Luka 3:23, 32) Wafumana intabalala yeentsikelelo ngenxa yokwenza izinto ngendlela kaYehova!
ISILULEKO ESISENGQIQWENI SOKUNCEDA UMTSHATO UPHUMELELE
12. Umntu unokusifumana phi isiluleko esisengqiqweni ngomtshato?
12 UMsunguli womtshato usixelela ngendlela yokwenza umtshato uphumelele. Akakho umntu onolwazi olufana nolwakhe. IBhayibhile isoloko ichanile, yaye ekuphela kwendlela nabani na anokusiphulaphula ngayo isiluleko esisengqiqweni esiphathelele umtshato kukuphila ngokuvisisana nemilinganiselo echazwe eZibhalweni. Ngokomzekelo, ephefumlelwe umpostile uPawulos wabhala wathi: “Ngamnye wenu makamthande umfazi wakhe njengoko ezithanda; ke yena umfazi, makabe nentlonelo enzulu ngendoda yakhe.” (Efe. 5:33) AmaKristu aqolileyo akanakungasiqondi eso siluleko seZibhalo. Umbuzo ngowokuba, Ngaba aya kulisebenzisa iLizwi likaYehova? Aya kukwenza oko ukuba asixabisa ngokwenene isipho sakhe somtshato.a
13. Yintoni enokubangelwa kukungasithobeli isiluleko esikweyoku-1 kaPetros 3:7?
13 Indoda engumKristu ifanele imphathe ngothando umfazi wayo. Umpostile uPawulos wabhala wathi: “Ngokukwanjalo, nina madoda, qhubekani nihlala nabo ngokokwazi, nibanika imbeko njengesitya esibuthathaka ngakumbi, esobukhomokazi, ekubeni nikwaziindlalifa kunye nabo zobabalo lobomi, ukuze imithandazo yenu ingathinteleki.” (1 Pet. 3:7) Imithandazo yendoda inokuthinteleka ukuba ayisisebenzisi isiluleko sikaYehova. Imeko yokomoya yawo omabini amaqabane inokonakala, nto leyo enokukhokelela kuxinezeleko, iingxwabangxwaba nokuphathana kakubi.
14. Umfazi onothando unokuba naliphi igalelo kwintsapho yakhe?
14 Umfazi okhokelwa liLizwi likaYehova nomoya wakhe oyingcwele unokuba negalelo elibonakalayo ekwenzeni umzi wakhe ube yindawo yoxolo nolonwabo. Kungokwemvelo ngomyeni ohlonela uThixo ukuthanda umfazi wakhe nokumkhusela ngokoqobo nangokomoya. Uyakufuna ukuthandwa yindoda yakhe, yaye naye umele azenze athandeke. IMizekeliso 14:1 ithi: “Umfazi osisilumko ngokwenene uyayakha indlu yakhe, kodwa osisidenge uyayichitha ngezandla zakhe.” Umfazi olumkileyo nonothando unegalelo elibonakalayo kwimpumelelo nakulonwabo lwentsapho yakhe. Kanti uyabonisa ukuba usixabisa ngokwenene isipho sikaThixo somtshato.
15. Sisiphi isiluleko esikweyabase-Efese 5:22-25?
15 Amadoda nabafazi abasekela imitshato yabo kwindlela uYesu aliphatha ngayo ibandla lakhe, banombulelo ngesipho sikaThixo somtshato. (Funda eyabase-Efese 5:22-25.) Izibini ezitshatileyo zisikelelwa ngokwenene xa zithandana ngokusuka ezintliziyweni zize zingaze zivumele ikratshi, ubuntwana bokungathethisani okanye eminye imikhwa engeyoyabuKristu iphazamise imitshato yazo!
MABANGAHLUKANISWA MNTU
16. Kutheni amanye amaKristu ehlala engatshatanga?
16 Nangona abantu abaninzi beceba ukutshata ngaxa lithile ebomini, abanye abakhonzi bakaYehova bahlala bengatshatanga ngenxa yokuba bengawafumani amaqabane afanelekileyo nathandwayo nguYehova. Abanye banesipho abasinikwe nguThixo sokuhlala bengatshatanga, nto leyo eyenza kube lula ukuba bakhonze uYehova ngaphandle kokuphazanyiswa ngumtshato. Kambe ke, ukungatshati kumele kunanditshwe phakathi kwemida ebekwe nguYehova.—Mat. 19:10-12; 1 Kor. 7:1, 6, 7, 17.
17. (a) Ngawaphi amazwi kaYesu aphathelele umtshato esifanele siwakhumbule? (b) Ukuba nawuphi na umKristu unokunqwenela iqabane lomtshato lomnye umntu, yintoni amele akhawuleze ayenze?
17 Enoba sitshatile okanye asitshatanga, sonke simele sikhumbule la mazwi kaYesu: “Anizange nifunde na ukuba [uThixo] lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’? Ngako oko abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungahlukaniswa mntu.” (Mat. 19:4-6) Ukunqwenela iqabane lomtshato lomnye umntu kusisono. (Dut. 5:21) Ukuba nawuphi na umKristu ungenwa kukubawa okunjalo, ufanele akhawuleze awuncothule neengcambu loo mnqweno ungacocekanga, enoba loo nto iza kumshiya enzakele ngokweemvakalelo kuba eye wavumela iminqweno yokuzingca ikhule kuye. (Mat. 5:27-30) Kubalulekile ukuyilungisa loo ndlela yokucinga size siyicinezele iminqweno yesono yentliziyo enenkohliso.—Yer. 17:9.
18. Ucinga ukuba sifanele sisigqale njani isipho sikaThixo somtshato?
18 Nabantu abaninzi abangazi nto kangako, nkqu nabo bangazi nowathwethwa ngoYehova uThixo nesipho sakhe esimangalisayo somtshato baye babonisa umlinganiselo othile woxabiso ngawo. Thina bazahlulele ‘kuThixo onoyolo,’ uYehova, sifanele sivuyiswe gqitha ngawo onke amalungiselelo akhe size sinikele ubungqina bokuba sisixabisa ngokwenene isipho sikaThixo somtshato!—1 Tim. 1:11.
[Umbhalo osemazantsi]
a Ukuze ufumane iinkcukacha ngomtshato, sicela ufunde isahluko 10 nese-11 sencwadi ethi “Zigcineni Kuthando LukaThixo.”
[Amagama acatshulweyo akwiphepha 6]
Umtshato oqhuba kakuhle uzukisa uYehova yaye unokubangela ukuba yonke intsapho yonwabe
[Umfanekiso okwiphepha 5]
URute wasixabisa isipho sikaThixo somtshato
[Umfanekiso okwiphepha 7]
Ngaba ubonisa ukuba usixabisa ngokwenene isipho sikaYehova somtshato?