Ngaba Inokwenzeka Ngokwenene Imimangaliso?—Izizathu Ezithathu Ezidla Ngokuchazwa

ISIZATHU 1: Imimangaliso ayinakwenzeka kuba yaphula imithetho yendalo. Imithetho yendalo siyiqonda ngenxa yezinto eziye zafunyaniswa yinzululwazi. Noko ke, loo mithetho iyafana nemithetho yegrama yolwimi eyahlukahlukeneyo. Sisenokungabi nalo lonke ulwazi ngale “mithetho.” (Yobhi 38:4) Isazinzulu sisenokuchitha ubomi baso bonke sifunda umthetho othile wendalo. Kodwa kunokwenzeka nje “into” enye kuphela kuze kufuneke siphinde siyihlole ngokutsha indlela ebesiwuqonda ngayo loo mthetho. Kanye njengokuba bekunokuthiwa “onke amadada amhlophe kusuke kuvele elimnyama.”

Elinye ibali libonisa indlela ekulula ngayo ukufikelela kwizigqibo ezingachananga. UJohn Locke (1632-1704) wabalisa ibali ngonozakuzaku waseHolani nokumkani waseSiam: Xa wayembalisela ukumkani ngeHolani ilizwe lakhe, lo nozakuzaku wathi maxa wambi indlovu iyakwazi ukuhamba phezu kwamanzi. Ukumkani akazange alikholelwe eli bali kuba wayecinga ukuba lo nozakuzaku wayemxokisa. Inyaniso, kukuba lo nozakuzaku wayebalisa into awayengayazi ukumkani. Ukumkani wayengazi ukuba xa amanzi engumkhenkce, indlovu inokuhamba kuwo. Le nto yayibonakala ingenakwenzeka kukumkani kuba wayengenazo zonke izibakala.

Khawucinge ngezinto eziye zenziwa yinzululwazi kwiminyaka yakutshanje ebezibonakala zingenakwenzeka kumashumi ambalwa eminyaka edlulileyo:

● Inqwelo moya ingabathwala abantu ngama-800 ukusuka eNew York iye eSingapore, ingakhange imise ndawo ngesantya seekhilomitha ezingama-900 ngeyure.

● Abantu abakumazwekazi awahlukahlukeneyo banokukwazi ukuqhuba inkomfa baze bathethe ubuso ngobuso besebenzisa ividiyo.

● Amawaka eengoma anokugcinwa kwisixhobo esingaphantsi nakwibhokisi yematshisi.

● Oogqirha banokukwazi ukufakela intliziyo namanye amalungu omzimba.

Sisiphi isigqibo esisengqiqweni esinokufikelela kuso ngenxa yezi zibakala? Sesi: Ukuba abantu bayakwazi ukwenza izinto ebezibonakala zingenakwenzeka kwiminyaka embalwa edluleyo, ngokuqinisekileyo uThixo owadala yonke indalo unokwenza imimangaliso esingenakuyiqonda okwangoku okanye esingenakukwazi ukuyenza.a—Genesis 18:14; Mateyu 19:26.

ISIZATHU 2: IBhayibhile ixhomekeke kwimimangaliso ukuze abantu bayikholelwe. Ayithi iBhayibhile simele sikholelwe kwanto ekuthiwa ngummangaliso. Eneneni, isikhuthaza ukuba senze ngendlela eyahlukileyo. IBhayibhile iyasilumkisa ukuba siyiphaphele kakhulu imimangaliso nemiqondiso. Khawuve esi silumkiso sicacileyo: “Ukufika kungokusebenza kukaSathana ngayo imisebenzi yonke yamandla nemiqondiso nezimanga zobuxoki nangako ukulukuhla konke kokungalungisi.”—2 Tesalonika 2:9, 10.

NoYesu Kristu walumkisa ngokuba abantu abaninzi babeza kuthi bangabalandeli bakhe kodwa babe bengengabo. Abanye babeza kude bathi kuye: “Nkosi, Nkosi, sasingathe na egameni lakho saprofeta, sathi egameni lakho sakhupha iidemon, sathi egameni lakho senza imisebenzi yamandla emininzi?” (Mateyu 7:22) Kodwa uYesu wathi wayengenakubavumela abantu abanjalo babengabalandeli bakhe. (Mateyu 7:23) Kucacile ke, ukuba uYesu akazange afundise ukuba yonke imimangaliso ivela kuThixo.

UThixo akathi abanquli bakhe mabasekele ukholo lwabo kwimimangaliso. Kunoko ukholo lwabo lufanele lusekelwe kwizibakala.—Hebhere 11:1.

Ngokomzekelo, makhe sihl’ amahlongwane omnye wemimangaliso eyaziwa kakhulu eBhayibhileni, ukuvuswa kukaYesu Kristu. Emva kweminyaka senzekile esi siganeko, amanye amaKristu eKorinte ayethandabuza ukuba uYesu wavuswa. Wawanceda njani umpostile uPawulos? Ngaba wasuka nje wathi, “Yiba nokholo olungakumbi”? Akazange atsho. Phawula indlela awawakhumbuza ngayo ngezibakala awayezazi. Wathi uYesu “wangcwatywa, waza wavuswa ngomhla wesithathu, ngokutsho kweZibhalo, wabonakala kuKefas, nakwabalishumi elinesibini. Emva koko wabonakala kubazalwana abangaphezu kwamakhulu amahlanu ngexesha elinye, inkoliso yabo esahleliyo nangoku, kodwa bambi balele ekufeni.”—1 Korinte 15:4-8.

Ngaba kwakubalulekile enoba loo maKristu ayekholelwa kulo mmangaliso? UPawulos uhlabela mgama esithi: “Ukuba uKristu akavuswanga, ngokuqinisekileyo ukushumayela kwethu kulilize, nokholo lwethu lulilize.” (1 Korinte 15:14) UPawulos akazange awuthabathe lula lo mbandela. Enoba ummangaliso wokuvuswa kukaYesu wawuyinyani okanye kwakungenjalo! UPawulos wayesazi ukuba wawuyinyani ngenxa yamakhulu amangqina awazibonelayo awayesaphila ngelo xesha. Eneneni, loo mangqina okuzibonela ayekulungele ukufa kunokuba akhanyele izinto azibonileyo.—1 Korinte 15:17-19.

ISIZATHU 3: Imimangaliso zizinto zendalo ezingaqondwayo ngabantu abangafundanga. Abanye abaphengululi bathi imimangaliso eseBhayibhileni ziziganeko zendalo ezenzeka ngaphandle kokungenelela kukaThixo. Bavakalelwa kukuba yenza iingxelo zeBhayibhile zikholeleke ngakumbi. Ngoxa kuyinyani ukuba iziganeko ezithile zinokunxulunyaniswa nemimangaliso ethile—njengenyikima, izibetho nokuqengqeleka kwamatye amakhulu ezintabeni—ezi ngcaciso zinento enye ezifana ngayo. Aziwananzi amaxesha eyenzeke ngayo imimangaliso eZibhalweni.

Ngokomzekelo, abanye bemi ngelokuba isibetho sokuqala esabetha iYiputa, ukujikwa koMlambo umNayile ube ligazi, wawubangelwa ngumhlaba obomvu oza nomNayile, naluhlobo oluthile lwezilwanyana ezincinane nezityalo. Noko ke, ingxelo yeBhayibhile ithi umlambo wajika waligazi kungekhona udaka olubomvu. Xa uyifunda ngokucokisekileyo iEksodus 7:14-21 ibonisa ukuba lo mmangaliso wenzeka emva kokuba uMoses eyalele uAron ukuba abethe uMlambo umNayile ngentonga. Enoba ukujikwa komlambo kwakusenzeka ngokwemvelo, ixesha awawubetha ngalo uAron kwakungummangaliso!

Ukuze ubone ukubaluleka kwexesha lokwenzeka kommangaliso, qwalasela into eyenzekayo xa uhlanga lwakwaSirayeli lwaluza kungena kwiLizwe Lesithembiso. Indlela yawo yavalwa ngamanzi oMlambo iYordan owawuphuphuma. Ingxelo yeBhayibhile isichazela oko kwenzekayo: “Abathwali beTyeya befikelela eYordan neenyawo zababingeleli abathwele iTyeya zithe nkxu enyeleni yamanzi . . . , andula amanzi ehla phezulu ema ngxi. Aphakama aba njengedama elinye kude kakhulu eAdam.” (Yoshuwa 3:15, 16) Ngaba esi senzo sasibangelwa yinyikima. Ayisichazeli le ngxelo. Kodwa esi siganeko senzeka ngokungummangaliso. Senzeka kanye ngexesha awayethe uYehova siza kwenzeka ngalo.—Yoshuwa 3:7, 8, 13.

Ngoko ke, ngaba ikho imimangaliso? IBhayibhile ithi ikho. Ngokwendlela esichazela ngayo, le asiyontlekele ebangelwa yimvelo. Ngaba kusengqiqweni ukuthi ayenzeki kuba nje ingenzeki yonke imihla?

[Umbhalo osemazantsi]

[Umfanekiso okwiphepha 5]

Kwizizukulwana nje ezimbalwa ezidluleyo, abantu abaninzi babenokucinga ukuba akunakwenzeka ukuhamba amakhulu eekhilomitha ngeyure