Kutheni Ufanele ube Nomdla Kwimimangaliso?

“Ngokwengcaciso, imimangaliso iyangqubana nemigaqo yenzululwazi.”—RICHARD DAWKINS, OBEFUDULA ENGUNJINGALWAZI WENZULULWAZI KWIYUNIVESITHI YASEOXFORD.

“Ukukholelwa kwimimangaliso kusengqiqweni. Akungqubani nonqulo, iyimiqondiso ebonisa uthando lukaThixo, nokubandakanyeka kwakhe kwindalo.”—ROBERT A. LARMER, UNJINGALWAZI WENTANDABULUMKO.

“NGABA uyakholelwa kwimimangaliso?” Ezi zicatshulwa zingasentla zibonisa ukubethabethana kwezimvo. Kodwa ubunokuwuphendula njani loo mbuzo?

Usenokuba mathidala ukuwuphendula, ngokuthi “Ewe, ndiyakholelwa.” Mhlawumbi ucinga ukuba ukukholelwa kuyo kunokukwenza ubonakale ungumntu oneenkolelo okanye ongafundanga. Abantu abaninzi bavakalelwa ngaloo ndlela.

Kwelinye icala, usenokweyiseka ukuba ngokwenene imimangaliso iyenzeka. Usenokukholelwa kwimimangaliso ebhalwe eBhayibhileni, njengokuvula kukaMoses indlela kuLwandle Olubomvu. Usenokukholelwa nokuba imimangaliso iyenzeka nakwixesha lethu. Xa sithetha phandle, ingxelo esandula ukukhululwa kutshanje ibonise ukuba “inani elivisa kanobom labantu baseNtshona—ngomzekelo isahlulo sesithathu sabantu baseUnited States nama-38 ekhulwini abantu baseBritani—basakholelwa kwimimangaliso.” (The Cambridge Companion to Miracles, ehlelwe nguGraham H. Twelftree) Kanti ke, asingomaKristu kuphela akholelwa kwimimangaliso. IBritannica Encyclopedia of World Religions ithi “phantse zonke iinkonzo” ziyakholelwa kwimimangaliso.

Okanye usenokuwela kudidi lwesithathu, oluthi: “Andazi, ngaphezu koko andiyikhathalele! Kuba imimangaliso ayenzeki kum!” Phofu, kutheni umele ube nomdla kwimimangaliso?

Khawucinge ngale meko: Masithi unesifo esinganyangekiyo. Ukuba ubunokufunda kulindixesha wamayeza ngeyeza elitsha elisenokunyanga isigulo sakho, ngaba bekungayi kufaneleka ukuchitha ixesha namandla ukuze uphande ubunyani baloo ngxelo? Ngendlela efanayo, iBhayibhile ithembisa ukuba kungekudala kuza kwenzeka imimangaliso. Iza kuchaphazela zonke izidalwa eziphila kwesi sijikelezi langa. Ngaba bekungayi kufaneleka ukuchitha ixesha namandla akho ukuze uphande ukuba singathenjwa na eso sithembiso?

Noko ke, ngaphambi kokuba sihlole lo mimangaliso siyithenjisiweyo, makhe siphendule izinto ezintathu ezidla ngokwenza abantu bangakholelwa kwimimangaliso.

[Ibhokisi ekwiphepha 3]

YINTONI UMMANGALISO?

Sisiganeko esibangelwa ngamandla angaphezu kwawomntu okanye awemvelo.