Imimangaliso—Ngaba Iyinyaniso Okanye Ibubuxoki?
ENYE indoda ngokukhawuleza yaphawula umbhalo owawukwimoto edlulayo owawusithi, “Imimangaliso Iyenzeka—Buza Iingelosi.” Nangona ingumntu oluthandayo unqulo, yayingaqinisekanga ukuba la mazwi athetha ukuthini. Ngaba lo mbhalo wawuthetha ukuba umqhubi wale moto uyayikholelwa imimangaliso? Okanye ngaba ngendlela ekwekwayo wayebonisa ukungayikholelwa kwakhe imimangaliso neengelosi?
Usenokuba nomdla koko kwathethwa ngumbhali ongumJamani uManfred Barthel owathi: “Igama elithi imimangaliso ngokukhawuleza lenza umfundi abe neengcamango ezimbini ezingqubanayo.” Abo bayikholelwayo imimangaliso baqinisekile ukuba iyenzeka yaye mhlawumbi yenzeka ngokufuthi.a Ngokomzekelo, kuthiwa eGrisi kwiminyaka yakutshanje, amakholwa athi imimangaliso yenzeka mhlawumbi kanye ngenyanga. Oku kwakhokelela ukuba ubhishophu weCawa yobuOthodoki yamaGrike alumkise esithi: “Amakholwa anotyekelo lokugqala uThixo, uMariya neengcwele njengezidalwa ezingabantu. Amakholwa akafanelanga azibaxe izinto.”
Kwamanye amazwe, abantu abayikholelwa kangako imimangaliso. Ngokohlolisiso olwenziwa eAllensbach nolwapapashwa eJamani ngowama-2002, abemi balapha abangama-71 ekhulwini abakholelwa ukuba imimangaliso iyinyaniso. Phakathi kwabo bayikholelwayo imimangaliso, kukho amabhinqa amathathu athi afumana isigidimi esivela kuMariya oyiNtombi Enyulu. Kwiinyanga eziliqela emva kokuba uMariya ebonakele kuwo njengoko ayesitsho—ehamba neengelosi kunye nehobe—iphephandaba laseJamani iWestfalenpost lathi: “Kude kube ngoku abantu abamalunga nama-50 000 abeza apha beze kunqula, abantu abafuna ukuphiliswa nabo bathanda ukwazi izinto baye babonakalisa umdla kwimibono ebonwe ngala mabhinqa.” Kwakulindeleke ukuba abantu abangama-10 000 abongezelelekileyo baye kule dolophana ukuya kubona uMariya xa ephinde wabonakala. Kwakhona kuthiwa uMariya oyiNtombi Enyulu uye waphinda wabonakala eLourdes, eFransi, ngowe-1858, naseFátima, ePortugal, ngowe-1917.
Kuthekani Ngeenkonzo Ezingezizo EzobuKristu?
Phantse zonke iinkonzo ziyakholelwa kwimimangaliso. IThe Encyclopedia of Religion ithi abaseki bobuBhuda, bobuKristu nobobuSilamsi babeneembono ezahlukahlukeneyo ngemimangaliso, kodwa ithi: “Imbali yezi nkonzo ibonisa ngokuqinisekileyo ukuba imimangaliso neengxelo ezingemimangaliso beziyinxalenye ebalulekileyo yeenkolelo zabantu zonqulo.” Le ncwadi ithi “maxa wambi uBhuda wayesenza imimangaliso.” Kamva xa “ubuBhuda bamiselwa eTshayina, abavangeli babo basemazweni babedla ngokubonakalisa amandla okwenza imimangaliso.”
Emva kokubhekisela kwimimangaliso eliqela ekuthiwa yenzeka, laa ntyilalwazi iqukumbela ngokuthi: “Ubani usenokungazamkeli zonke ezi ngxelo zemimangaliso ezibaliswa ngababhali ngemicimbi yonqulo, kodwa ngokungathandabuzekiyo zenziwa ngenjongo entle yokuzukisa uBhuda, owakwazi ukunika abalandeli bakhe abanenzondelelo loo mandla okwenza imimangaliso.” Kwale ncwadi inye ithetha ngobuSilamsi isithi: “AmaSilamsi amaninzi ebesaqhubeka elindele ukuba kwenzeke imimangaliso. Ingxelo engoMuhammad (hadīths) imchaza njengalowo wenza imimangaliso esidlangalaleni izihlandlo ezininzi. . . . Kwanasemva kokufa kwazo, kukholelwa ukuba iingcwele zenzela abathembekileyo imimangaliso emangcwabeni azo, yaye ngentlonelo abantu bacela uncedo kwiingcwele.”
Imimangaliso Ijongwa Njani Kwiinkonzo ZamaKristu?
Uninzi lwabo bamkele ubuKristu luneengcamango ezahlukahlukeneyo. Bambi bazamkela njengeziyinyaniso iingxelo zeBhayibhile ezingemimangaliso eyenziwa nguYesu Kristu okanye ngabakhonzi bakaThixo ngamaxesha angaphambi kobuKristu. Sekunjalo, abaninzi bavumelana noMhlaziyi wobuProtestanti uMartin Luther. IThe Encyclopedia of Religion ithi ngaye: “ULuther noCalvin babhala bathi laliselidlulile ixesha lokwenzeka kwemimangaliso yaye abantu abanakulindela ukuba yenzeke.” ICawa yamaKatolika iye yaqhubeka iyikholelwa imimangaliso “ngaphandle kokuzama ukuchaza indlela eyenzeka ngayo,” itsho njalo le ntyilalwazi. Noko ke, “amaProtestanti aziinkcuba-buchopho aye akholelwa ukuba ubuKristu ubukhulu becala buphathelele imigaqo yokuziphatha yaye abunanto yakwenza noThixo okanye elemimoya okanye buphembelele ubomi babantu.”
Abanye abazibiza ngokuba bangamaKristu, kuquka abefundisi abathile, bayakuthandabuza ukuba yinyaniso kwemimangaliso ekhankanywe eBhayibhileni. Ngokomzekelo, cinga ngengxelo yokutsha kwetyholo echazwe eBhayibhileni kwiEksodus 3:1-5. Incwadi ethi What the Bible Really Says ithi abafundi bezakwalizwi abaninzi abangamaJamani abakuthabathi oku njengengxelo yokoqobo yommangaliso. Kunoko, bayichaza “njengefuzisela ukutyiwa sisazela kukaMoses ngenxa yezinto awazenzayo.” Le ncwadi yongezelela isithi: “Amadangatye anokujongwa njengeentyatyambo ezidubula ngokukhawuleza ngenxa yokukhanya okubangelwa bubukho bukaThixo.”
Loo ngcaciso usenokuyifumanisa inganelisi. Ngoko ke, yintoni ofanele uyikholelwe? Ngaba kusengqiqweni ukukholelwa ukuba imimangaliso yenzeka? Yaye kuthekani ngemimangaliso eyenzeka kwezi mini? Ekubeni singenakubuza iingelosi, sinokubuza kubani?
Imbono YeBhayibhile
Akukho mntu unokukhanyela ukuba iBhayibhile inikela ingxelo yokuba ngaphambili maxa wambi uThixo wayengenelela ukuze enze izinto ezingenakwenziwa ngabantu. Sifunda oku ngaye: “Wabakhupha abantu bakho amaSirayeli kwilizwe laseYiputa, ngemiqondiso nangemimangaliso nangesandla esomeleleyo nangengalo eyoluliweyo nangokoyikeka okukhulu.” (Yeremiya 32:21) Khawufan’ ucinge, olona hlanga lunamandla ngelo xesha luthotywa ngezibetho ezilishumi ezathunyelwa nguThixo, kuquka nokufa kwamazibulo alo. Ngokwenene ezi zibetho zazingummangaliso!—Eksodus, isahluko 7 ukusa kwese-14.
Kwiinkulungwane kamva, ababhali abane beVangeli bachaza imimangaliso eyenziwa nguYesu emalunga nama-35. Eneneni, ingxelo yabo ibonisa ukuba wenza imimangaliso engakumbi kunaleyo bayichazayo. Ngaba ezi ngxelo ziyinyaniso okanye zibubuxoki?b—Mateyu 9:35; Luka 9:11.
Ukuba iBhayibhile iyiloo nto izibanga iyiyo—iLizwi likaThixo lenyaniso—ngoko ke unesizathu esiqinileyo sokukholelwa kwimimangaliso ethetha ngayo. IBhayibhile iyichaza ngokucacileyo imimangaliso eyenzeka ngexesha elidluleyo—ukuphilisa ngokungummangaliso, uvuko nezinye izinto ezinjalo—sekunjalo iyichaza ngokucacileyo into yokuba imimangaliso enjalo ayisenzeki. (Bona ibhokisi ethi “Isizathu Sokuba Eminye Imimangaliso Ingasenzeki,” kwiphepha 4.) Ngoko ke ngaba oku kuthetha ukuba nabo bakholelwa eBhayibhileni abakholelwa ukuba imimangaliso iyenzeka kule mihla? Funda inqaku elilandelayo ukuze ufumane impendulo.
[Imibhalo esemazantsi]
a Igama elithi “imimangaliso” elisetyenziswe kweli nqaku, isichazi-magama seBhayibhile silichaza ngolu hlobo: “Zizinto ezenzeka ngokoqobo ezingaphezu kwamandla omntu okanye aqhelekileyo emvelo yaye ngenxa yoko kuthiwa zenziwa ngamandla angaphezu kwawemvelo.”
b Unokuqwalasela ubungqina obubonisa ukuba unokuyikholelwa iBhayibhile. Obo bungqina bunokufunyanwa kwincwadi ethi IBhayibhile—Ngaba Ililizwi LikaThixo Okanye Lomntu? epapashwe ngamaNgqina kaYehova.
[Ibhokisi ekwiphepha 4]
ISIZATHU SOKUBA EMINYE IMIMANGALISO INGASENZEKI
IBhayibhile ikhankanya imimangaliso eyahlukahlukeneyo. (Eksodus 7:19-21; 1 Kumkani 17:1-7; 18:22-38; 2 Kumkani 5:1-14; Mateyu 8:24-27; Luka 17:11-19; Yohane 2:1-11; 9:1-7) Inkoliso yale mimangaliso yayingqina ukuba uYesu unguMesiya, nokuba uxhaswa nguThixo. Abalandeli bakaYesu bokuqala babenezipho zokwenza imimangaliso, njengokuthetha ngeelwimi nokuqonda amazwi aphefumlelweyo. (IZenzo 2:5-12; 1 Korinte 12:28-31) Ezo ziphiwo zokwenza imimangaliso zaziluncedo kwibandla lamaKristu ebudeni bokusekwa kwalo. Ngoba?
Kaloku, imibhalo yeZibhalo yayimbalwa. Ngokuqhelekileyo, yayizizityebi kuphela ezazinemibhalo esongwayo okanye iincwadi. Kumazwe obuhedeni, yayingaziwa iBhayibhile okanye uMyili wayo uYehova. Iimfundiso zamaKristu zazidluliselwa ngomlomo. Iziphiwo zokwenza imimangaliso zaziluncedo ekuboniseni ukuba uThixo wayesebenzisa ibandla lamaKristu.
Kodwa uPawulos wachaza ukuba le mimangaliso yayiza kuphela xa ingasafuneki. “Enoba kukho iziphiwo zokuprofeta, ziya kubhangiswa; enoba kukho iilwimi, ziya kuphela; enoba kukho ulwazi, luya kubhangiswa. Kuba sinolwazi oluyinxenye yaye siprofeta ngokuyinxenye; kodwa xa oko kupheleleyo kufika, oko kuyinxenye kuya kubhangiswa.”—1 Korinte 13:8-10.
Namhlanje, abantu bayakwazi ukufumana iiBhayibhile, kuquka izalatha-magama neentyilalwazi. AmaKristu aqeqeshiweyo angaphezu kwezigidi ezithandathu anceda abanye babe nolwazi ngoThixo olusekelwe eBhayibhileni. Ngenxa yoko, imimangaliso ayiseyomfuneko ekunikeleni ubungqina bokuba uYesu Kristu unguMhlanguli omiselwe nguThixo okanye bokuba uYehova uyabaxhasa abakhonzi bakhe.