Nceda Abanye Babe Nobuchule Ekusebenziseni ILizwi LikaThixo
1 UYehova wenze amalungiselelo amaninzi okusiqeqesha sibe nempumelelo ekufezeni ubulungiseleli bethu. Ngokusebenzisa oko asilungiselele kona, ‘amanyathelo ethu aye aqiniswa.’ (INdu. 37:23) Ngokomzekelo, phantse kangangeminyaka engama-50 iSikolo Sobulungiseleli Sobuthixo besinikela uqeqesho oluqhubekayo kubuchule bokuthetha nobokufundisa. Kuye kwakho neNtlanganiso Yenkonzo yeeveki ngeeveki ebe negalelo, ngeentetho, ngemiboniso nangeengxubusho zayo eziluncedo.
2 Siyangenelwa ngokutyelelwa rhoqo ngabaveleli beziphaluka. Umveleli wenkonzo utyelela iqela ngalinye lesifundo sencwadi aze anikele ukhuthazo lothando lokusinceda siphucule ubuchule bethu kubulungiseleli basesidlangalaleni. Ukongezelela kuko konke oku, sihlandlo ngasinye xa sihlanganisana silungiselela ukuya kwinkonzo yasentsimini, imizuzu elishumi esiyichithayo yemfundiso esebenzisekayo inikela ukhuthazo namacebiso aluncedo ngolo suku. (Heb. 10:23-25) Amalungiselelo anjalo ngentlangano yakhe abonisa inkxalabo kaYehova enothando ngabo abathume ukushumayela iindaba ezilungileyo.
NCEDA ULUTSHA NEZIFUNDO ZEBHAYIBHILE
3 Abavakalisi abaselula nabasebatsha balufuna rhoqo uncedo lobuqu kubulungiseleli basesidlangalaleni. Ngoxa sonke sinokulunikela uncedo ngamathub’ athile, imbopheleleko eyintloko yeyabazali kwakunye nabo babaqhubela izifundo zeBhayibhile abo bantu. (Gal. 6:6; Efe. 6:4) Ukuba nempumelelo ekusebenziseni iBhayibhile akwenzeki ngamabona-ndenzile ngenxa yokuhamba kwexesha nangokuzuza umlinganiselo othile wamava. Kunoko, kufuneka kunikelwe uncedo lobuqu olulungiselelwe ngokwamanqanaba noqeqesho lothando.
4 Uncedo lobuqu lufanele luqalise ngaphambi kokuba loo mntu abe nesabelo ngokuthe ngqo kubulungiseleli. Hlolisisani uMxholo Wencoko. Bancede abo bakufanelekelayo ukuba nenxaxheba kubulungiseleli balungiselele intshumayelo elula. Mhlawumbi banokusebenzisa isibhalo nje esinye kwezicetyisiweyo de bafumane amava nentembelo engakumbi. Ngoxa nisebenza kunye enkonzweni, mncome lowo usebenza naye ngoxa nisuka kwenye indlu nisiya kwenye uze ngobubele unikele amacebiso angendlela yokuphucula. Bethelela imfuneko yokulondoloza isimo sengqondo sokuthandaza ngamaxesha onke.—Efe. 6:18, 19.
5 Nangona oovulindlela abaninzi abathe ngxi nabanye abavakalisi abanamava besiba nesabelo kubulungiseleli ubukhulu becala phakathi evekini, kungakuhle kakhulu ukuba aba bavakalisi banempumelelo banokuluhlengahlengisa ucwangciso lwabo khon’ ukuze baxhase inkonzo yasentsimini yangeempela-veki ngamathub’ athile. Ukuzincama kwabo okunjalo kobuqu kuya kuxatyiswa gqitha ngabanye abebengathanda ukuphucula ngokusebenza nabo kubulungiseleli.—INtshu. 4:9, 10.
6 Sonke sasikhe sabatsha ibe singenamava kubulungiseleli basentsimini. Abaninzi bethu bakhuthazwa baza baqeqeshwa ngabavakalisi okanye oovulindlela abanamava angakumbi. Ubuchule esinabo novuyo olungakumbi esilunandiphayo ngoku kubulungiseleli lubangelwe ngokungqalileyo luncedo olunjalo. (IMize. 27:17; IZe. 20:35) Ngamana ukuxabisa kwethu oko uYehova asenzele kona ngokusiqeqesha ngenkuthalo kubulungiseleli kungasishukumisela ekubeni sizenze sifumaneke ukuba sincede abanye babe nobuchule ngakumbi ekusebenziseni iLizwi likaYehova.