Ukuzibhokoxa Ekwenzeni Ukuthanda KukaThixo
1 Ukuzibhokoxa emsebenzini onentsingiselo novelisa imiphumo ebinqwenelwa kwanelisa ngokwenene. (INtshu. 3:13) Nguwuphi umsebenzi owenziwayo namhlanje onika elona themba likhulu lolonwabo ngoku nakwikamva likanaphakade? Inye kuphela impendulo—kukwenza ukuthanda kukaThixo. Izizathu zoku ziya kushikixwa ngokucokisekileyo ngeentetho, ngemiboniso nangamava kucwangciso lwethu lwendibano ekhethekileyo yosuku olunye yonyaka wenkonzo we-1992. Umxholo wolo cwangciso uya kube usithi “Ukuzibhokoxa Ekwenzeni Ukuthanda KukaThixo.”—Efe. 6:6; 1 Tim. 4:10, NW.
2 Abaninzi namhlanje abanelisekanga nje kwaphela yaye badandathekile bubomi ababuphilayo, ubukhulu becala obuzaliswe ngumsebenzi abangawuthandiyo. Ngokwahlukileyo koko, ukwenza ukuthanda kukaYehova sixelisa uKristu kusenza sibe nenjongo ebomini yaye kusenza sibe nembono entle ngomsebenzi wethu wempangelo. Yintoni ebandakanyekileyo ekuzibhokoxeni ekwenzeni ukuthanda kukaThixo? Ziziphi izinto esimele siziphaphele ukuze siqhubeke siphilela ukwenza ukuthanda kukaThixo? Ngokuphathelele umsebenzi wokushumayela nokufundisa, kubaluleke kangakanani ukulandela ulwalathiso namacebiso anikelwa yintlangano kaYehova? Ngawaphi amathuba akhethekileyo anokunanditshwa lulutsha oluzimiseleyo ekwenzeni ukuthanda kukaThixo?
3 Le mibuzo iya kuphendulwa ngokwanelisayo kucwangciso, oluquka iintetho ezimbini ezibalaseleyo ezithi “Ngaba Ubomi Bakho Bulawulwa Kukuthanda KukaThixo?” nethi “Injongo Yethu Ebomini—Ukwenza Ukuthanda KukaThixo.” Ceba kwangoku ukubakho ukuze ulunandiphe ngokupheleleyo olu cwangciso lukhethekileyo.