Ukusingatha Imbopheleleko Yethu Yokwenza Okuhle Kwabanye
1 Umpostile uPawulos wawaluleka amaKristu enkulungwane yokuqala esithi: “Ke ukwenza okuhle nobudlelane musani ukukulibala.” (Heb. 13:16) Imigudu yawo yokunceda abazalwana bawo kwanaphantsi kweemeko ezinzima yayiya kuluqinisa uthando lwawo ngoThixo nangamanye. (Yoh. 13:35) Nathi siyakhuthazwa ukuba senze okuhle size sabelane nabanye.
2 Kule nkalo, uYehova wenze ilungiselelo lokusondla nokusixhobisa ngokwaneleyo ngokomoya. Onjani yena uvimba wenkcazelo esinaye ngenkupho nganye yeMboniselo noVukani! Hayi indlela esivuya ngayo xa sifunda inkupho nganye zisuka nje sakuba siyifumene! Njengoko sicamngca ngenkcazelo engokweZibhalo, sisenokuphawula iingongoma esisenokuzisebenzisa kubulungiseleli basentsimini nakwiincoko zethu nabanye. Ngokufanayo, sisenokuzibekela bucala ixesha lokulungiselela intlanganiso nganye ingakumbi iSifundo seMboniselo seeveki ngeeveki. Ufundisiso lobuqu lweLizwi likaThixo luyasinceda ukuba sibe “nengqiqo kaKristu” yaye lusenza sikwazi ukwabelana ngezinto ezikholekileyo nabo sidibana nabo.—1 Kor. 2:14-16; INdu. 19:14.
3 Iimbopheleleko Ekufanelekileyo Ukuzamkela: Bonke abamthandayo uYehova babahlulela kuye ubomi babo. Ngokwamkela iimbopheleleko ezihambisana nokuzahlulela, sibonisa ukuba simela uYehova yaye sizahlule kwihlabathi likaSathana nakwiindlela zalo ezigwenxa. Ngokulandela umzekelo esawushiyelwa nguKristu Yesu, sibamisela umzekelo omhle abanye. (1 Pet. 2:21) Ucwangciso lwendibano yesiphaluka olunjengolo lonyaka wenkonzo we-1992, olunomxholo othi “Ukuthwala Umthwalo Wethu Wembopheleleko,” lusikhuthaza ukuba siphile ngokuvisisana nozahlulelo lwethu.
4 Ukubakho rhoqo kwiintlanganiso zebandla kusivulel’ ithuba lokwabelana nabanye ngezinto ezakhayo. Ufundisiso lwethu lobuqu nokulungiselela iintlanganiso kusenza sibe nenkcazelo eninzi efanelekileyo nesinokwabelana ngayo nabanye. Ukubonisa umdla ololo hlobo wobuqu kwabanye kusikhuthazela ekubeni sibe nomoya wothando nowobuhlobo. Ngokuba nenxaxheba kwiintlanganiso, sibonisa ukuba sivumelana ngokwenene namazwi kaPawulos abhalwe kumaHebhere 10:24, 25 yaye siyayamkela imbopheleleko yethu yokukhuthaza abanye.
5 Ukuzabalazela Iimbopheleleko Ezi- ngakumbi: Ebudeni bonyaka wenkonzo we-1992, ngaba singazabalazela ukufumana iimbopheleleko ezingakumbi, njengokungenela inkonzo yobuvulindlela bobuncedani okanye obuthe ngxi? Kunokuxhalabela ngokungeyomfuneko isisikelo seeyure, kutheni ninganikeli ingqalelo ekwandiseni amathuba kumsebenzi wokubuthelwa ndawonye kwabantu? (Yoh. 4:35, 36) Ukusebenza rhoqo nabanye abavakalisi abaqolileyo noovulindlela kuya kusinceda ukuba siphucule ubuchule bethu kubulungiseleli. Kwakhona ukwanda kwenani loovulindlela babancedani kuyalikhuthaza ibandla. Ukuba kunokwenzeka, kutheni ungenzi isicelo sokuba nguvulindlela othe ngxi okanye ucwangcisele ukuba nguvulindlela ongumncedani ngokusisigxina okanye ngokufuthi kangangoko kunokwenzeka kulo nyaka?
6 Amadoda afanelekileyo azahluleleyo nabhaptiziweyo ebandleni asoloko evulekelwe ziimbopheleleko. (1 Tim. 3:1-10, 12, 13) Onke anokubonisa ukuzimisela kwawo ukukhonza ngamagqabaza awo acingisiswe kakuhle ezintlanganisweni, ngokuba nenxaxheba kwiSikolo Sobulungiseleli Sobuthixo nangokwamkela isabelo sokwenza umboniso okanye ngokusingatha ezinye iinxalenye zeNtlanganiso Yenkonzo. Kwanabantwana banokumisela umzekelo kwezi nkalo nangendlela abaziphatha ngayo kwiHolo yoBukumkani. Banokuba luncedo ngokusebenza neqela lesifundo sencwadi abakulo xa labelwe ukucoca iHolo yoBukumkani okanye ukunyamekela ezinye iintswelo ezilolo hlobo.—kmXO 4/76 iphe. 1, 3.
7 UYesu wakuvakalisa ukukulungela kwakhe ukwamkela imbopheleleko yokubenzela okuhle abanye ngamazwi athi: “Ndiyathanda.” (Luka 5:12, 13) Ngokuxelisa umzekelo wakhe, nathi sinokubakhuthaza size sibancede abazalwana bethu, abanomdla nabantu abanyanisekileyo esidibana nabo kubulungiseleli basentsimini ukuba banxulumane rhoqo nentlangano kaYehova. Ukwamkela imbopheleleko yethu ‘yokusebenza okulungileyo kubo bonke’ kufuna umgudu wokuzimisela yaye mhlawumbi nokuzincama ngokobuqu. (Gal. 6:10) Kodwa xa sibona okuhle okuye kwafezwa, sinokuvumelana noPawulos, owathi: “Imibingelelo enjalo uyakholiswa kakuhle yiyo uThixo.”—Heb. 13:16.