Ukuzisebenzisa Ngobulumko Izixhobo Ezibalulekileyo
1 Xa unikela ubungqina kwindlu ngendlu, usukelo lwakho lufanele lube kukubandakanya umninimzi ngamnye kwingxubusho yeZibhalo eyakhayo ngokusebenzisa iBhayibhile nezinye izixhobo ezibalulekileyo. (Thelekisa eyesi-2 kwabaseKorinte 6:1; 2 Timoti 2:15.) Yintoni exhalabise abantu abakwintsimi okuyo kule mihla? Ngaba banexhala ngemeko yezoqoqosho nokuhla komgangatho wobomi bentsapho? Ngaba baxhalabile ngolwaphulo-mthetho nokuchas’ umthetho okwandayo kweli lizwe? Intshayelelo emfutshane yayo nayiphi na kwezi ngongoma isenokukhokelela kwingxubusho entle yeBhayibhile.
2 Unokuthi:
◼ “Kula maxesha alucelo-mngeni, abantu abaninzi bakufumanisa kunzima ukuphila. Ngaba ucinga ukuba oorhulumente babantu banokuzicombulula iingxaki zethu zemali ngendlela eya kwanelisa wonk’ ubani? [Phulaphula impendulo.] Mna ndiyifumanise ikhuthaza gqitha le ngongoma ithi . . . ”
3 Unokwandula ufunde INdumiso 72:12-14 uze uqukumbele ingxubusho yakho ngokukhetha esinye isibhalo kwezo zifumaneka kwiphepha 307-8 lencwadi Ukuqiqa. Okanye emva kokufunda isibhalo esinye, usenokubhekisela kwisiqendu esinye okanye ezibini kwisahluko 1 kwincwadi ethi Iindaba Ezilungileyo. Ukuba unenye yeencwadi ezinamaphapha ali-192, unokwalathisel’ ingqalelo yomninimzi kwicandelo elifanelekileyo.
4 Kwimimandla emininzi usenokuthanda ukusebenzisa le ntshayelelo:
◼ “Abantu abaninzi bakholelwa ukuba siphila ‘kwimihla yokugqibela’ yaye eli hlabathi lisondela ngokukhawuleza esiphelweni salo. Wena uvakalelwa njani ngako oku? [Vumela impendulo.] Ngaba ubusazi ukuba iBhayibhile iyasixelela indlela esinokusinda ngayo kwisiphelo seli hlabathi langoku size siphile kumhlaba oya kwenziwa iparadisi? Ngaba ndinokukufundela esi sibhalo sikhuthaza gqitha?” Funda INdumiso 37:9-11. Bonisa umninimzi isahluko 17 sencwadi ethi Iindaba Ezilungileyo, kuquka umfanekiso okwiphepha 157. Ngokubona umdla anawo umninimzi nangokuvuma kwexesha, usenokumfundela ezinye izibhalo. (Bona incwadi Ukuqiqa, iphepha- 135-44.)
5 Abanye abavakalisi baye bakufumanisa kuphumelela ukusebenzisa iphecana elithi Ubomi Kwihlabathi Elitsha Elinoxolo ekuqaliseni ingxubusho. Babonisa umninimzi umfanekiso baze bambuze enoba ebengathanda kusini na ukuphila kwiimeko eziseluxolweni ngolo hlobo. Bandula ke balathisele ingqalelo yomninimzi kwisiqendu esikweli phecana. Emva kokuxubusha ngeengongoma ezimbalwa ezikweli phecana nasemva kokufunda isibhalo esinye okanye ezibini, banikela incwadi ethi Iindaba Ezilungileyo.
6 Xa umnikelo wencwadi ungamkelwa, umninimzi usenokushiyelwa iphecana kuze kwenziwe amalungiselelo okubuyela ukuze kuqhutyekwe nengxubusho. Abavakalisi abaninzi—kuquka abaselula—baqalisa izifundo zeBhayibhile ngokuphumelelayo ngelinye lamaphecana ngokufunda isiqendu baze babuze uluvo lomninimzi ngoko bakufundayo.
7 Ukuba uyakwazi ukuqalisa isifundo kutyelelo lokuqala, yenza amalungiselelo aqinisekileyo okuqhubeka nengxubusho ngolunye usuku. Usenokwenza isiseko sotyelelo lwakho olulandelayo ngokumxelela umninimzi ukuba xa ubuya uya kuthanda ukuxubusha naye ngempendulo yombuzo obuzwa ngokuqhelekileyo othi: “Kutheni uThixo evumele ukubandezeleka?” Inqaku elingezantsi liza kunikela icebiso ngendlela onokuxutyushwa ngayo lo mbandela xa kubuyelwa.