Zinikele Ngomphefumlo Uphela!
1 Sinezizathu ezininzi zokumbulela uYehova. Ezi ziquka izinto aye wasenzela zona kwixa elidluleyo, asenzela zona ngoku nasaya kusenzela zona kwixa elizayo. Umbulelo wethu ufanele usishukumisele ukuba senze ntoni? Indumiso kaDavide iyaphendula: “Ndiya kumbonga uYehova ngamaxesha onke, ihlale isemlonyeni wam indumiso yakhe.”—INdu. 34:1.
2 IBhayibhile ibonisa ngokucacileyo ukuba sinikwe umyalelo wokushumayela. Lo ngumsebenzi esiwenza “ngomphefumlo uphela ngokungathi kukuYehova.” (Kol. 3:23) Kungakanani esiya kukwenza kubulungiseleli ukuba ngokwenene sizinikela ngomphefumlo uphela? Xa siqwalasela indlela uYehova asithanda ngayo, ngokuqinisekileyo iintliziyo zethu zisishukumisela ukuba sibe nesabelo ngenzondelelo ekuxeleleni abanye ngaye nangeenjongo zakhe ezixabisekileyo! Sishukunyiselwa ukwenza konke okusemandleni ethu.
3 Bekuya kuba yinto esengqiqweni ukulindela ukuba umntu ozinikeleyo afune ukugcina ingqalelo yakhe itsoliswe kwinkonzo engcwele. Umdumisi, owayevakalelwa ngolo hlobo ngokucacileyo, wathi: “Ndikudumisa kasixhenxe ngemini.” (INdu. 119:164) Abo bavakalelwa njengomdumisi bazabalazela ukuxhakamfula amathuba okudumisa uYehova. Xa iimeko zabo zibavumela, bakhonza ngenzondelelo kangangoko banako.
4 Sinamathuba Amaninzi Okudumisa UYehova: Ukuze sishumayele iindaba ezilungileyo akuyomfuneko ukuba silinde de sibe nesabelo kumsebenzi wendlu ngendlu. Abo sisebenza nabo, esifunda nabo esikolweni, izalamane nabantu esibaziyo kufuneka bevile bonke ngesigidimi soBukumkani. Xa siseluhambeni, sisenokuqalisa incoko eya kukhokelela ekubeni sinikele ubungqina kwabo basebenza ehotele, kwiindawo zokudlela, kwiindawo zokutha amafutha, okanye kubaqhubi beeteksi. Xa sisekhaya, sinokunikela ubungqina kubamelwane okanye kubantu abahambisa iimpahla. Ukuba silele esibhedlele, bakho abongikazi, oogqirha nabanye abaguli esinokushumayela kubo ngokungacwangciswanga.
5 Ukunikela Ubungqina Obungacwangciswanga Kuba Nemiphumo: Ngenye imini amaNgqina amabini ayehamba epakini aza aqalisa incoko nomnye umfana owayehambahamba kunye nomntwana wakhe. Ekugqibeleni yena nomkakhe bayamkela inyaniso. Kamva lo mfana wachaza ukuba kanye nje ngaphambi kokuba adibane nala maNgqina mabini, wayesandul’ ukuthandaza kuThixo, emcela esithi, ‘Ukuba ukho, ndincede ndikwazi.’ Ukudibana nawo epakini ukujonga njengempendulo kaYehova kumthandazo wakhe.
6 Abo bazinikele ngomphefumlo uphela kumnqweno wabo wokunceda abanye ngokomoya bafumana uvuyo olukhulu. Bayazi ukuba inkonzo enjalo, ‘yentliziyo epheleleyo,’ iyamkholisa uYehova.—1 Kron. 28:9.